Tuesday, August 23, 2011

ارهاصات ... يا رب تطلع غلط


الراجل البركه (William Engdahl - Egypt Expert) ده بيقول "لا توجد ثورة في مصر ولكنها احداث مصممه للتخلص من مبارك الذي كان شوكة في جانب سياسات اوباما الخاصه بالشرق الاوسط ووضع نفس الاشخاص - من لديهم الولاء لامريكيا - في القمة ولكن باوجهه مختلفه" ...وبقيه الفيديو مهم برضه للاطلاع ومش هترجم اكتر من كدة علشان انا عندي عيال عايزة اربيهم
مبدئياً البوست طويل علشان ده تجميع لكل الاحداث من يوم التنحي لغايه تاريخ كتابه البوست
لو ملكش في التفاصيل ركز في الملخص وابقى اتسلى بعد كدة على كيفك
بص يا سيدي / ستي احنا كان عندنا ثورة وتاهت
توهان الثورة تم على 5 مراحل
المرحلة الاولى "بدايه التقسيم" وديه مرحلة تحويل الايد الواحدة الى ايدين كتير
وديه ابتديت بالانقسام حول فض الاعتصام بعد التنحي او البقاء لضمان تنفيذ مطالب الثورة ثم الاستفتاء ثم هبوط القرضاوي على الميدان ومنع وائل غنيم من التحدث على المنصه

المرحلة التانيه "استخدام الورقه الرابحه دائماً" وتحويل شعار "الهلال مع الصليب قشطة ومربى وحليب" الى "يا ايها الكافرون" - من الناحيتين عموماً
 عن طريق 5 احداث طائفيه كبرى - لم يقدم احد فيها للمحاكمة كالعادة - علاوة على الحديث عن غزوة الصناديق وعودة 3000 قيادي من الجماعات الاسلامية من اجمل بقاع الدنيا "افغانستان والشيشان والبوسنه والصومال وايران" وختمت بجمعه الوحدة الوطنيه اللي حولها صفوت حجازي فجأة الى جمعه ظهور جيش محمد والزحف لتحرير القدس
وطبعاً كانت الاحداث ديه سبب ان المسيحيين يروحوا لانهم مالهمش لازمة ولا ديه

المرحلة الثالثه "تفيت القوى السياسية" 
وديه اللي دق اول مسمار في نعشها الاخوان والسلفيين وبعدين بقيه الاحزاب والقوى السياسيه وقعت لوحدها. فبعد ما كان شعار الاخوان "دولة مدنيه بمرجعيه اسلامية" بقى "اسلامية اسلامية رغم انف العلمانيه" وقامت حرب التصريحات والتوقيعات والمليونيات وانتهت بمليونه ما تمت "في حب مصر" 

المرحلة الرابعه "تشويه الثورة"
وديه بدأت بحرب هوجاء من العوام ضد النخبه والمثقفين ثم التصريحات بتلقي حركة 6 ابريل تمويل امريكي وتدريب في صربيا (واي حد يعرف مدى حساسيه عوام المسلمين ناحيه البلدين ودول على فكرة مش قليلين) الى محاكمة كل من ينتقد المجلس العسكري

المرحلة الخامسة "تحجيم الثورة"
وديه ابتدت بتجريم الاعتصامات و فض الاعتصام بالقوة الغير مباشرة مرة عن طريق ادعاء وجود بلطجيه وفلول الحزب الوطن ثم فض الاعتصام بالقوة وبعدين طلعت مليونيه "قندهار" بتاعه 29 يوليو حرمت الميدان على بقيه الشعب وكرهتهم فيه ومن ساعتها والميدان ثكنه عسكريه محدش عارف يجي ناحيته.
وطبعاً ما نسيوش اخوانا اعضاء حزب الكنبه العظيم وادوها تصريحات بقه عن توقف عجله الانتاج وانخفاض الاستثمارات وحالة مبارك الصحيه وقطع المعونة وانتشار التنظيمات المسلحه واعلان سينا امارة اسلامية
ثم التصعيد ضد اسرائيل وبعد ما كانت الدعوة الى مليونيه 9 سبتمبر بقى الخطاب الرسمي في الاعلام الرسمي واللي مش رسمي هي : دلوقتي مش وقت مليونيات او اعتصامات دلوقتي وقت وحدة الصف لازم كلنا نقف ورا الجيش لمواجهه اسرائيل

وتوته توته انا مش عايزة اكمل الحدوتة




خلينا نركز شوية في اللي حصل من يوم التنحي ١١ فبراير

١- بدايه التقسيم
  • ١٤ فبراير " انقسم متظاهرو ميدان التحرير بين قرار البقاء فى الاعتصام والعودة إلى منازلهم، وفى الوقت الذى قال فيه مؤيدو البقاء إن جزءا من مطالبهم فقط هو الذى تحقق، بينما تتبقى مطالب إلغاء قانون الطوارئ والإفراج عن جميع المعتقلين، قرر عدد من المتظاهرين تفكيك خيامهم، داعين زملاءهم إلى الاكتفاء بما تحقق من نصر بتنحى الرئيس مبارك" وفي نفس العدد من الجريدة "مصادر: مبارك يخضع للعلاج فى شرم الشيخ بعد دخوله فى غيبوبة تامة" - المصري اليوم

  • ١٦ فبراير "«لجنة جديدة» لتعديل الدستور برئاسة «البشرى» وعضوية فقهاء قانون وإخوانى وقبطى.. وتسليم التعديلات خلال ١٠ أيام" البشري المعروف بتوجهه الاسلامي والاخ صبحي صالح (الفلوطة) - "توقف السياحة فى الأقصر وأسوان.. و«المالية» و«القوى العاملة» تتحملان رواتب عمال الفنادق" - " مصادر: «مبارك» يعتزم مواصلة تسجيل مذكراته صوتياً.. ويصر على «الموت فى مصر»" - المصري اليوم

  • ١٧ فبراير "مسؤول سعودى: مبارك مستسلم ويريد الموت فى شرم الشيخ.. والرياض عرضت استضافته لكنه رفض" انتوا عارفين اخوانا بتوع الجاز فتحينها سبيل لكل المقلوعين - "٣١ منظمة حقوقية: تشكيل لجنة إعداد الدستور لم يعكس التنوع السياسى والمجتمعى وتفتقر للفقهاء المستقلين" - المصري اليوم

  • ١٩ فبراير "القرضاوى يخطب الجمعة فى «التحرير» ويدعو لتسميته «ميدان الشهداء».. ويؤكد: إرادة الشباب من إرادة الله" - "حرس «القرضاوى» يمنع وائل غنيم من الصعود للمنصة" الكلام ده كان في جمعه النصر اول مليونيه بعد التنحي واللي حصل ده خلى الناس تقلق لانه كان شبه الي حصل في ايران - المصري اليوم
  •   


2- استخدام الورقة الرابحه دائماً
  • 6 مارس "العنف الطائفى يعود بعد فترة هدوء أيام «ثورة ٢٥ يناير»: مقتل شخصين وإشعال حريق فى كنيسة بـ«أطفيح» بسبب علاقة بين مسلمة ومسيحى" - المصري اليوم 

  • 10 مارس "ليلة دامية فى منشأة ناصر: اشتباكات مسلحة بين الأقباط والمسلمين تسقط ١٣ قتيلاً و١٤٠ مصاباً واحتراق ٢٠ منزلاً وعدد من السيارات" - المصري اليوم

  • 22 مارس "محمد حسين يعقوب: انتصرنا فى «غزوة الصناديق» والبلد بلدنا واللى مش عاجبه يروح أمريكا" - المصري اليوم

  • 1 ابريل "٣٠٠٠ قيادى بالجماعات الإسلامية يعودون من أفغانستان والشيشان والبوسنة والصومال وإيران" - المصري اليوم

  • 3 ابريل "«الجماعة الإسلامية» تطالب بإنشاء شرطة لـ«تغيير المنكر والأمر بالمعروف» - المصري اليوم 

  • 18 ابريل "اعتصام قنا يدخل مرحلة العصيان المدنى للمطالبة برحيل المحافظ.. واستمرار توقف حركة القطارات" - المصري اليوم

  • 9 مايو "التطرف يحرق «الثورة» الطائفية تقتل ١٢ وتصيب ٢٣٢ فى «إمبابة».. ومجلس الوزراء: «سنضرب بيد من حديد»" - المصري اليوم

  • 14 مايو "مليونية «الوحدة الوطنية» و«دعم فلسطين»: «جيش محمد» يظهر فى «التحرير».. والمتظاهرون: «لا للفتنة»" - مع ان الدعوة كانت لجمعه وحدة وطنيه تحولت الى "حمل المتظاهرون الأعلام الفلسطينية، وطالبوا بطرد السفير الإسرائيلى، وقطع العلاقات مع إسرائيل، ورددوا هتافات «على القدس رايحين، شهداء بالملايين»، و«الشعب يريد العودة إلى فلسطين»، وارتدى عدد كبير منهم شارات خضراء فوق رؤوسهم كتبوا عليها «جيش محمد»، وقال الشيخ صفوت حجازى فى رسالة للمتظاهرين، إن الجموع المحتشدة فى الميدان على استعداد لأن تسير إلى تل أبيب" - المصري اليوم

  • 16 مايو "«المصري اليوم» ترصد اشتباكات ماسبيرو: ٥ ساعات من المعارك بالحجارة والمولوتوف والرصاص" - المصري اليوم20 مايو "أقباط «ماسبيرو» يتراجعون عن فض الاعتصام بعد اشتباكات فى عين شمس بسبب افتتاح كنيسة" - المصري اليوم

  • 23 مايو "«الجلسة العرفية» تربط الموافقة على افتتاح «كنيسة عين شمس» بالتخلى عن بناء القبة وتعليق الصلبان" - المصري اليوم

3- تفتيت القوى السياسيه
  • 16 ابريل "«الإخوان»: نسعى لإقامة الحكم الإسلامى وتطبيق «الحدود» بعد امتلاك الأرض" - المصري اليوم
  • 17 ابريل "شباب الثورة والقوى السياسية ضد «دولة الإخوان»" - المصري اليوم 

  • 13 مايو "«بديع»: «الإخوان» تتعامل مع الأحزاب بمبدأ «الأم».. والصحفيون العلمانيون يحرضون ضد الدين.. والبابا لم يجد ضمانة غير الشريعة" - " الأحزاب ترد على «بديع»: «الإخوان» ليست «أمنا».. والجماعة أصيبت بأمراض تضخم الذات والاستعلاء مثل نظام مبارك" - المصري اليوم
  • 21 مايو "انقسام حول قانون «الحقوق السياسية»: «الإخوان» ترحب.. والأحزاب تنتقد تجاهل استخدام «المال والدين» فى الانتخابات" - المصري اليوم
  • 23 مايو "مشادات عنيفة واتهامات بـ«التخوين» فى أولى جلسات الحوار الوطنى بسبب حضور رموز من «الحزب الوطنى» المنحل" - المصري اليوم 
  • 26 مايو "٢١ من القوى السياسية تشارك فى «مليونية تصحيح المسار».. والإخوان والسلفيون يصفونها بـ«ضد الشعب»" اللي هي كانت ميلونية الدستور اولاً - المصري اليوم
  • 3 يونيو "اتحاد شباب الثورة ينسحب من الحوار بسبب «عدم الجدية».. و«ينتقد سيطرة شباب الإخوان والإسلاميين»" - المصري اليوم 
  • 7 يونيو "اتهامات متبادلة بين القوى السياسية و«الإخوان» فى مناظرة «الدستور أولاً أم الانتخابات؟»" - المصري اليوم
  • 21 يونيو "قوى «الثورة» تعلن جمع «٥ ملايين» توقيع لتأييد «الدستور أولاً».. وفقهاء قانون يؤكدون «مشروعية الحملة»" - المصري اليوم
  • 24 يونيو "شباب ثورة الغضب الثانية: «الدستور أولاً» لم يعد مطلبنا الأساسى.. و«مليونية ٨ يوليو» لتحقيق باقى الأهداف" - المصري اليوم
  •  5 يوليو "رئيس «الحرية والعدالة»: من يطالب بتأجيل الانتخابات هم الصهاينة وأذناب النظام" - المصري اليوم
  • 6 يوليو "«المجلس الوطنى والوطنية للتغيير» يهددان بمقاضاة قيادات «الإخوان» بسبب تصريحات «مرسى» - المصري اليوم
  • 6 اغسطس "القوى السياسية توافق على مشاركة الطرق الصوفية فى مليونية «حب مصر» للرد على «جمعة لم الشمل»" - المصري اليوم
  • 9 اغسطس "الحكومة تفشل فى إقناع القوى الثورية بالتراجع عن «مليونية حب مصر»" - المصري اليوم
  
4 - تشويه الثورة
  • 30 يونيو "ساويرس: لم أقصد الإساءة للإسلام وخصصت جائزة باسم «طنطاوى» وفوضت «الطيب» فى وحدتنا الوطنية" بدايه اسقاط ساويرس وزعزعة استثمارته وقوة الحزب الذي يمثله وقناة اون تي في وجريدة المصري اليوم - المصري اليوم
  • 24 يوليو "«الروينى»: لدينا أدلة على تلقى «٦ أبريل» تمويلاً أجنبياً .. وكفاية غير مصرية" - المصري اليوم
  • 14 اغسطس "مجهولون يسرقون «حمزاوى».. ويختطفون الفنانة «بسمة» تحـت تهديـد الســلاح" - المصري اليوم والتلميحات القذرة زي التعليق ده على جردية اليوم الساقع "ياسيدي علي الليبرالية ....الباشا رايح يتسحر مع واحده صاحبته الساعة واحدة بعد نص الليل .. اللهم تقبل صيامنا" 
  • 17 اغسطس "إحالة «أسماء محفوظ» إلى المحكمة العسكرية بتهمة «إهانة المجلس العسكرى» " - المصري اليوم  

 5- تحجيم الثورة
  • 5 مارس "أزمة خامات فى مصانع الأغذية والمطاحن: الموردون الأجانب يصرون على التحصيل نقداً.. والمصانع تعمل بنصف طاقتها" - المصري اليوم 
  •  24 مارس "قانون لتجريم بعض حالات الاعتصام والحبس وغرامة ضخمة لـ «المخالفين»" - المصري اليوم
  • 17 مايو "الجيش يطلق صرخة تحذير: الاستثمار الأجنبى «صفر» .. والفقر يصل إلى ٧٠٪" - المصري اليوم  

  • 29 يونيو "عصام شرف يطلب استبعاد ٧ وزراء بسبب عدم تنفيذ «أهداف الثورة».. والمجلس العسكرى يرفض" - المصري اليوم

  • 30 يونيو" عودة الدماء و «الدموع» لميدان التحرير" وديه احداث التحرير اللي وقعت بعد احداث مسرح البالون - المصري اليوم

  • 22 يوليو "«الكونجرس» يناقش مشروع قانون قطع المعونة عن مصر" - المصري اليوم

  • 30 يوليو "جمعة «تفريق الشمل» .. الإخوان والسلفيون يهتفون: «إسلامية إسلامية».. و٣١ من القوى السياسية تنسحب" الجمعه المعروفه بجمعه قندهار ومن ساعتها محدش هوب ناحيه الميدان - المصري اليوم

  • 2 اغسطس "الجيش يفض الاعتصام .. ويفتح «التحرير» للمرور" - المصري اليوم

  • 10 اغسطس "«السلفية» تشكل لجاناً شرعية لفض المنازعات فى سيناء وتستعين بـ٦ آلاف مسلح لتنفيذ الأحكام بالقوة" - المصري اليوم

  • 13 اغسطس "«التحرير» يتحول إلى ثكنة عسكرية فى «حب مصر»" وفي تفاصيل الخبر بيقول: "اصطف عساكر الأمن المركزى والشرطة العسكرية حول حدائق الميدان لمنع المواطنين من التواجد داخلها، وزار المشير حسين طنطاوى الميدان لمدة ٥ دقائق عقب صلاة الجمعة للاطمئنان على قوات الشرطة العسكرية." - المصري اليوم

  • 20 اغسطس "الإسلاميون يحذرون «المجلس العسكرى» من «ثورة ثانية» بسبب «المبادئ فوق الدستورية»" - المصري اليوم

  • 21 اغسطس "القوى السياسية تتمسك بطرد السفير الإسرائيلى واستدعاء المصرى و«الوطنية للتغيير» تنظم مسيرة لدعم الجيش" - المصري اليوم

  • 22 اغسطس "تواصل الاحتجاجات الشعبية فى المحافظات ضد الاعتداءات الإسرائيلية.. ومطالب بـ«طرد السفير وإغلاق السفارة وقطع الغاز» - المصري اليوم

 ارهاصات: علامات .. يعني ما قبل حدوث الشيء .. فتستخدم مثلاً للحديث عن دلائل نبوة



ربنا يستر
MishMish

9 comments:

Ms Venus said...

للاسف مش غلط

دى صح جدا يا مشمش

Kontiki said...

المشكلة انك لسة فاهمة انها ثورة

ياسمين said...

..ثورة وهتفضل ثورة وهنرجع كل حقوقنا...المعلومات بصراحة..مش مقنعة ال ممبارك كان عقبة ف سياسة أوباما...والله أول مرة أعرف\
أولا : أمريكا لا يهمها الإ أمن الصهاينة..
وعارفين كويس مفيش حد بيخضع للصهاينة الإ مبارك ورفض الشارع المصري لأي أعتداء من الصهاينة...!!
ومبارك هو اللي مقلل إقمتنا أدامهم ..يعني سقوطه معناه حاجات كثيرة أوي
ثانيا: مبارك رجل أمريكا
ثالثا: الدليل الأكبر أيام الثورة ..كان كل شوية بتاع أمريكا يطلع ويقول كلام أهبل مرة مع النظام وبعد لما عرف ان النظام هيقع قال خليني مع الشعب أحسن..!!لو كان المعلومات صحيحة ليه بئا مش انضموا لينا ف أول أيام الثورة..
وثم طبيعي جداا اللي بيحصل ف مصر وشايفه انه ظاهرة صحية
دلوقتي لما واحد بيكون مصاب بسرطان ونستأصل السرطان بنقوله يلا اجري ع طول لا طبعا يبقي لازم فترة نقاهة ف فترة النقاهة حتي بيكون بتخبط..لكن مسيرة يقف ع رجله...
ثم اعتراض ع كون مصر إسلامية أو علمانية أو جن أخضر هيكون ف صندوق الانتخاب كل واحد هيقول كل اللي نفسه بئا ولاول مرة ف تاريخ مصر منعرفش مين الريس الجاي ع العموم هيكون أحسن من حسني مليار مرة ....وان شاء الله الخير قادم وبلاش يكون عندنا يأس وإحباط لأننا عايزين بلدنا أحسن أكيد.....

Migo Mishmish said...

انا مكفرتش بالثورة انا لسه عندي امل
انا من الناس اللي تحب ترمي نفسها في المجهول احسن الف مرة من الخضوع لواقع مرفوض
انا بس حاسه ان الثورة بتتسرق ..بتضيع ... والناس رجعت اتفرقت تاني ...ومش حاسه ان اي حد من اللي بيطلع في التليفزيون دول همه على البلد
دلوقتي اتحطينا تاني قدام نفس السؤال المجلس ولا الرجوع لـ 1400 سنه ورا

بصي يا ياسمين كون ان الراجل بيقول ان حسني مبارك كان شوكة ميتهيأليش انه يقصد انه كان وطني قوي بس يمكن كان عايز يمرر حاجات تخلي شكل امريكيا وحش وانتي عارفه امريكيا يهمها الشكل لكن المضمون ولا يفرق
انا خايفه من صندوق الانتخابات لان مش كل الناس اللي هتنزل الانتخابات هتلعب
fair game
وده اللي مخوفني

شاكرة مروركم جمعياً وربنا يستر على مصر
MishMish

Anonymous said...

تحليل سليم للكارثة اللي احنا فيها بس إن اللي بيحصل ده فيلم من اخراج ماما امريكا واسعة شوية. دحنا بيتلعب بينا شطرنج بسهولة بقى.

التفريق والتخوين والتشويه والتخويف موجود بس عملناه في نفسنا. طبعا ممكن جدا عوامل خارجية تكون ساعدت عليه وبتخطيط وتعمد قذر بس احنا بلا فخر زي المش دوده منه فيه.

خايفة عليها قوي.

ياسمين said...

الشعب المصري خليطي من الأفكار السياسة المختلفة فكون مجموعة التوجهات المختلفة تتحد ف الثورة تحت هدف واحد فمش معناه مطلقاا ان كل واحد فيهم موافق فكر التاني او توجهاته..احنا بنتحد ف الأزمات..لكن بعد لما تخلص الأزمة كل واحد بيروج لفكرته بطريقة اللي تخدم الفكر ...حتي لو اختلف مع الآخر...يعني لا قدر الله لو مصر الثورة حصل لها حاجة متأكدة انهم هيجتمعوا تاني وبقوة كمان...
......
الجاذبية الإعلامية كبيرة جداا وخطيرة فلما واحد يقف لأول مرة ويكون محل اهتمام للجمهور والرأي العام واتصالات عشان يعمل لقاء مع دا ودا ودا فأمر كبير ع النفس البشرية اللي بتحب الظهور ..بيكون مؤثر أوووي
فمعظمهم بيظهروا لإشباع غريزة الظهور ولا يهمه مصلحة مصر ولا اللي ف مصر..!!
..
أمريكا فعلا انا متفقة مع حضرتك ..هي كل اللي يهمها..أن..تكون مع الأقوي وتهتم بشكلها والأقوي كان الشعب عشان كدا تقول حسني شوكة ..سمكة المهم انها تظهر بدور حامي حمي الشعوب المستضعفة ف الأرض
...
المجلس العسكري ولا مش المجلس العسكري قد نختلف معاهم اومش نختلف بس المهم ان قوة الجيش من قوة مصر وهو اللي بيحمي مصر ..وكدا او كدا فترة هيسلم السلطة ومع السلامة وهتوحشوناا...
الانتخابات دا انا ممكن اكون متفق جزئياا مع حضرتك انه مش هيكون فيه نزاهة لدرجة 100 في الميه دا طبيعي بقالك سنين وسنين حكامنا بيجوا كدا بالبركة..لما مات عبدالناصر جيه السادات ولما اقتلت السادات جيه مبارك ومبارك زور انتخابات 2005 وعدل الدستور ع المحروس ابنه..فمش معقول بعد كل الحاجات دي مصر بتبقي برفكت مليون ف الميه مرة واحد الأمر محتاج صبر شوية
بس يمكن يكون لدرجة 90 ف الميه ودي نسبه كويسة جداا..مكناش نحلم بها وحتي اللي هيزور لو فرضنا مجازاا مش هيزور ف اللجنة محدش يتمني يأخذ حكم عسكري لكن هيستغل ويروج لحاجات غريبة بس بردو مش طبيعي ان 45 مليون مصري بعد حذف منهم 40 مليون
أطفال وشيوخ مش هيروحوا وكمان أميين مش هيروحوا يبقي فاضل 45 تانيين..مستحيل كلهم هيضلوا ..وهيموشوا ورا اي كلام..بس اللي هيكون كويس ف التجربة دي حتي لو كان فيها شوائب ان صوتنا لأول مرة هيكون ليه قيمة..!! يكفي..وهنمشي ع رأي الشعب حتي لو مكناش متفقين معاه ف الأول..
وبالتدرج هتوصل مصر للأفضل وللأفضل..وان شاء الله ربنا يحفظ مصر من كل سوء يارب..إن شاء الله خير...

على باب الله said...

مش متفق قوي مع الخبير المصري ده .. لازم نراعي انه طالع على قناة ( روسيا اليوم ) اللي كانت لوقت قريب بتسمي ثوار سوريا بالإرهابيين

أعتقد أن الثورة علشان مكانش ليها قائد محدد و ده سبب مهم من أسباب نجاحها و حاجة فشخت أمن مبارك اللي مكانش لاقي للثورة دراع يلويه هي كمان السبب اللي خلى فصائل إنتهازية - طول عمرها - تحاول تبرشط على الحكم دلوقتي

بكره ايه اللي هيحصل؟ معرفش بس لازم إحنا اللي نروح نجيبه من قفاه و منتسناش حد يسرقه

Migo Mishmish said...

Anonymous
بصي انا يعجبني في امريكيا انها مبادرة مابتستناش الحدث امريكيا بتحاول يا تصنع الحدث يا تكون مشاركة فيه
لعلمك انا مش فارق معايا مين كان السبب في الثورة انا عندي استعداد اقدم شكر حتى للشيطان نفسه لو كان ليه يد في تغيير اللي احنا كنا فيه
بس انا خايفه من ان المطلوب من التغيير ده انه يكون للاسواء ... يعني بدل ما تبقى مصر دولة محترمة زي ما كانت تتقسم دويلات وتضيع الى الابد


ياسمين
طيب هي ليه الدنيا ضباب ومش باين لها اي حاجة وكل حاجة خارج منها ريحه عفن
حاسه ان الثورة فضت كراسي فكل واحد جه عجبه كرسي قعد عليه ومش عايز يقوم
ازاي اثق في ناس ممكن تبيع بلدها بعلبه صلصله او كيلو سكر
تفتكري الفلاح اللي بيخرج ابنه من المدرسه علشان يشتغل بـ 2 جنيه من الفجر لغايه غروب الشمس ويحطهم على يوميته هو اللي هي 7 جنيه بالكتير فارق معاه ان البلد تبقى احسن
دانا لو منه اروح اتطوع في جيش اسرائيل
يعني الفلاح اللي بياكلنا كلنا بتعامل معماله اسواء من الكلاب ده على الاقل الكلاب ليها جمعيات رفق بالحيوان لكن احنا معندناش جمعيات رفق بالفلاح
وبعدين طب مش شوفتي حماس عملت ايه لما مسكت السلطة في غزة ... بدل ما تقف في وش اسرائيل ...كانوا بيقتلوا في بتوع فتح وكل القوانين كانت تصب في غلق مقاهي الانترنت والزام البنات بالحجاب وتحريم شرب الشيشه للنساء ومنع ركوب اي رجل وامراه على موتوسيكل ورفضوا يعملوا انتخابات تانيه ... قعدوا خربوها ومش عايزين يمشوا وصدروا صورة سيئه جداً عن الشعب الفلسطيني .. يعني المطلوب من المجتمع الدولي انه يساند فلسطين علشان يلاقي نفسه قدام افغانستان اخرى
الخوف من دول واظنك سمعتي عن الشيخ حاتم فريد وهو بيدعي على العلمانين والليبراليين - المصريين - والكلام ده كان في اسكندريه مش في غياهب الصعيد
تفتكري ده هاينفع معاه ثورة تصحيح
هو واللي زيه هيخلوا البلد تقع في حرب اهليه
ربنا يستر بجد
MishMish

Migo Mishmish said...

على باب الله
ازيك يا رفيق
بص هو في جزء من كلامه شويه صح وجزء من كلامه انا خايفه منه اصلاً ومش عايزة اصدقه
يعني لما بيقول ان الاخوان المسلمين تم وضعهم للامساك بالحكم ده بيفزعني
وبعدين انت بتقول "بكره ايه اللي هيحصل؟ معرفش بس لازم إحنا اللي نروح نجيبه من قفاه و منتسناش حد يسرقه" السؤال بقه مين "احنا" اللي هانجيبه ما مولد الثورة انفض وكل واحد روح بيته مش فاضل غير شوية ناس عندها امل في بكرة ودول مش كتير
هما الاخوان مش نزلوا في جمعه الهوية "جمعه قندهار" اهم عايزين ينزلوا يوم 9 سبتمبر
اللي يركز في تصريحاتهم يجيله لوثه ومعندهمش اي دم ولا احترام للذات
عارف السلفيين انضف منهم على الاقل عندهم مبدأ متغيرش انما دول ينزلوا مع السلفيين يقولوا اسلاميه ...اسلاميه
ينزلوا مع شباب الثورة يقولوا مدنيه .. مدنيه
في تصريحات ليهم لوحدهم يقولوا الثورة كانت انتقام من ربنا علشان الظلم اللي اتعرضوله ... في جلسات الحوار المشتركة يقولوا مفيش فصيل ليه فضل على فصيل تاني في الثورة
ومعرفش هي مقصوده ولا بتيجي صدف كل اما تفتح اي قناه تلاقيهم فيها
هو في ايه يا جدعان
MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق