Thursday, September 27, 2012

بص العصفورة ... هاهاهاها تعيش وتاخد غيرها يا حاج


عندي إحساس كدة ان العبث اللي احنا فيه ده مقدمة لنعم كبيرة قوي في استفتاء الدستور. الكلام عن زواج الاطفال وتهمته الاساءة للذات الالهيه ما هي الا فرقعات للرغي وسبوبة لبرامج التوك شو علشان في كف كبير قوي هاينزل على قفا المصريين يتولهم

الاحداث اللي حوالينا بتاعه هوجه ازدراء الاديان (او قول دين الدولة الرسمي بمعني اصح) وخطب السيد الرئيس وصلاوته المذاعه في كل القنوات واعلان تعداد المسيحيين من غير مناسبه ولو كان مناسبته هو اعلان تعداد الاقليات مش عارفه متضمنش النوبيين (بمن فيهم الكنوز وجماعات أخرى) والارمن واليهود والبجا (ومنهم البشارية) والبربر (السيويون)، والافارقه والغجر اللي هما اقليات موجودة في مصر برضه والا يبقى تعداد طائفي متخلف زي اللي شار بيه والغرض من اعلانه سبب في نفس ابن يعقوب. 

خلينا فاكرين انه لما تيجي سيرة الدين في الموضوع بنلبس قفا كبير قوي

زي تعديل المادة التانيه من الدستور اللي كانت في دستور 1954 "لإسلام دين الدولة واللغة العربية لغتها الرسمية" الى  الى "الإسلام دين الدولة، واللغة العربية لغتها الرسمية، ومبادئ الشريعة الإسلامية المصدر الرئيسي للتشريع" في دستور 1971 اللي هي كانت العصفورة

 اما القفا فكان تعديل المادة 77  اللي بقى نصها "مدة الرئاسة ست سنوات ميلادية تبدأ من تاريخ إعلان نتيجة الاستفتاء، ويجوز إعادة انتخاب رئيس الجمهورية لمدد أخرى".

تعديلات 2007 برضه ساعتها العصفورة كانت المادة التانيه: المسيحيين قالوا نشيل الالف واللام والمسلمين قالك تبقى المصدر الوحيد ... بينما القفا كان التعديلات اللي تضمن ان السيد جمال مبارك يبقى الرئيس القادم واللي كان فاضل يحطوا فيها مادة تنص على ان رئيس الجمهوريه لازم يكون ليه اخ اسمه علاء وام اسمها سوزان واب اسمه مبارك



وطبعاً اخيراً وليس اخراً الصناديق اللي قالت نعم للدين 

سياسه بص العصفورة ديه مش حكر علينا بس .... اعرف كدة لما الاعلام كله يبقى معندوش غير موضوع واحد يرغي فيه طول اليوم ... يبقى الموضوع ده العصفورة 
زي الاعتداءات على السفارات الامريكيه بسبب الفيلم المسيء واللي كانت حديث الصباح والمساء على كل قنوات العالم  (العصفورة)


بينما كانت اسرائيل بتجهز للعرب والمسلمين هذا القفا


  • لاحظوا كدة ان القاعدة التصويتيه لجماعات الاسلام السياسي في جزء كبير جداً منها غير واعي ... جزء كبير بيعتبر ان تصويته بنعم للدستور الجديد زيه زي ما يكون حط كولدير في الشارع علشان الناس تشرب وتدعي للي حاطه ... هو رايح الانتخابات علشان يكسب في البلد ثواب 
  • الناس ديه عاشت مهمشه ومداس عليها من طبقات المجتمع بتوع التجمع الخامس وحفلات مارينا ومصر الجديدة والزمالك والحتت ديه فلما يحسوا ان نعم هتحرق دم الناس النضيفه هايقولوا نعم
  • الناس ديه حطوا في دماغهم ان البلا اللي هما فيه ده سببه الربا بتاع البنوك ومحلات الخمرة وعرى النساء وفلوس السياحه ... واول ما الحاجات ديه كلها تقف هنبقى زي السعودية
  • الناس ديه معظمها ينتمي للمرحله الاولى من هرم ماسلو همهم الاساسي اشباع احتياجاتهم الاساسيه (التنفس، الطعام، الماء، الجنس، الاخراج، النوم) دول اللي ازازة الزيت وكيس السكر بيفرق معاهم صحيح 
  • الناس ديه معندهاش وقت تشوف برامج توك شو والجنيه اللي بيشتروا بيه العيش مش هايدفعوه في شرا جرنان 


رفض الدستور الجديد واجب وطني وانساني ... لا حالنا ولا العالم هيسمح لنا اننا نغرق في الجهل ونرجع 100 سنه لورا نستنى فيهم ظهور محمد على جديد ورفاعه طهاوي جديد وقاسم امين جديد وطلعت حرب جديد لان تقريباً هتكون القيامة قامت واحنا لسه بنلف في دواير
مصر تستاهل احسن من كدة .... واحنا كمان نستاهل احسن من كدة

MishMish

Saturday, September 15, 2012

العالم لن ينسى نطحه زيدان!!!!!!


فى نهائى كأس العالم 2006 بالمانيا استفز ماتيرازى (الايطالى الجنسيه) المعروف باسلوبه الاستفزازى زيدن الدين زيدان (العربى الاصل) بكلمه لم يسمعها احد او يراها غير زيدان حتى ان الكاميرات لم تلتقطها ... يقال انه سبه بطريقه (عنصريه) مستفزة اخرجته عن شعوره ... ولأن زيدان من اصول (شرقيه) ودمه حامى ... شاهده الجميع فجأة يتجه ناحيه ماتيرازى وينطحه فى صدره ليسقط على الارض ... وعلى الفور يمنحه الحكم بطاقه حمراء ... ليخرج من الملعب مطرودا ويخسر فريقه كاس العالم (بضربات الترجيح) ...
تلك هى قواعد المحترفين فى كرة القدم ...ولا مجال للهواة
 فالعالم لم يتذكر  ماذا قال ماتيرازى...لكنه لن ينسي نطحه زيدان

ميجووووووووو

Wednesday, September 5, 2012

...اللي قالقني ...

من يوم إعلان نتايج انتخابات الرئاسه وانا قررت ابطل سياسيه وابطل قرايه جرايد وفرجه على برامج ... لاقيت ان كلها محصله بعضها منا اهتميت ايه اللي حصل يعني ... قولت لانزع البلف واعيش في البخاخة يمكن الاقي في التوهان راحه البال ورغم كدة لسه قلقانه
  • قلقانه على مستقبل بنتي اللي دفعتلها 7000 جنيه مصاريف للمدرسه علشان بس اضمن انها تلاقي كرسي تقعد عليه وانا عارفه كويس ان مناهج التعليم اللي هتدرسها ماتساويش تمن الورق والحبر اللي مطبوعة بيه الكتب وانها في ظل التوجهات الظلاميه الجديدة مستقبلها هيتحكم فيه امثال الاخ اللي متكسفش يقول "اشفق على المرأة في ظل احوال البلد الان من تحمل تلك المسئوله" لما سألوه عن سبب تجاهله لترشيح المرأة لمنصب محافظ واحنا في اقرن الـ 21. 
  • قلقانه علشان كل الاعتصامات والمظاهرات بتطالب بزيادة الحوافز الماليه والثبيت ورفع الاحد الادني للاجور ومفيش مظاهرة واحدة او اعتصام واحد من المدرسين مثلاُ يطالبوا فيه بتطوير مناهج التعليم او من عمال المصانع بيطالبوا بحقهم في التدريب على الاساليب الجديدة والمكن الجديد علشان يزودوا الانتاج او علشان يعملوا استجواب للحكومة وقطاع الصناعه عن خروج المنتجات المصريه عن المنافسه
  • قلقانه من شيوع ثقافه الانتقام واخلاق الزحمة في كل حته في البلد وظهور بوادر لحروب اهليه وتطهيرات عرقيه بسبب خناقه عادية كانت زمان بتخلص بعد شويه شتايم بالاب والام وسب دين وبعدين قعده عرب يقوم منها الطرفين حباب ... دلوقتي مبقاش عندنا واحد بتخانق مع واحد بقت حروب ما بين مليشيات مسلحه
  • قلقانه علشان الحال بقى سمك لبن تمر هندي ... ومحدش عارف ياخد موقف تلاقي واحد بلطجي فجأة وبدون مقدمات خد حته من الرصيف عملها تعريشه وخد قدمها مترين من الشارع وساب الناس على العربيات وخنق المنطقة بحالها علشان يعمل كشك طبعاً ما ينفعش تقوله اللي انت بتعمله ده غلط واعتداء على الطريق العام لانه ببساطة هايكالك ... انما لو فكرت فيها هتلاقي انه عمل كل ده علشان ياكل لقمه عيش بشرف بدل ما يقف بمطوة على اول الشارع يثبت الناس وياخد اللي معاهم ويبقوا بيبوسوا ايديهم وش وضهر انه ماغزهمش
  • قلقانه لان مش كفايه الديون اللي كانت علينا وعلى اهلينا من ايام عصابه المقلوع وحاشيته لا ده كمان النظام الجديد اللي جه بعد الثورة داين ولادنا وولاد ولدنا وباع مستبقلهم لصندوق النقد الدولي علشان يقعدله شوية على الكرسي
  • قلقانه لان في ناس ماتت وناس هتعيش بعاهات طول عمرها وناس اتجرحت انسايتها للابد وناس اتسجنت علشان كان عندها امل في بكرة احسن ومحدش داري بيهم ولا حتى معروف لهم عدد محدد ولا في سجل باسميهم
  • قلقانه لان اللي بيدوروا على مصلحتهم بس من البلد دي وعندهم استعداد يدوسوا عليها في اقرب فرصه اكتر بكتير قوي من اللي بيحبوها ومستعدين يضحوا علشانها.
  • قلقانه لان من بدايه 2012 وانا معظم عيلتي وصحابي هاجروا لدرجه اني بقت انا اللي في غربه مش هما ... انا فعلاً مش لاقيه حد اعرفه اخرج معاه
  • قلقانه لاني زمان كنت لما بسمع "انتي هتفضلي في مصر لحد امتى؟" كنت بضحك واقول لحد ما اموت فيها ... دلوقتي بسأل نفسي بجد وبقلق "هو انا هافضل في مصر لحد امتى؟؟؟؟؟؟؟؟؟؟؟؟"
  • قلقانه لاني اول مرة من يوم 25 يناير 2011 اقول الثورة ديه جات نكبه على البلد ورجعتها 100 سنه ورا ... ربنا يخرب بيوتنا خربنا البلد.

MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق