Sunday, February 3, 2013

يتهيألي ان ده تار بايت والله اعلم

بطلت اتفرج على اي حاجة وبطلت اتابع اي توك شو وبطلت اقرا جرايد علشان حاسه اني مش قادره احزن تاني ... حزنت حتى احترق الحزن 
كل اللي بقيت اسال عليه هو: في حد مات؟ صغير؟ الله يرحمه ... كام واحد اتفبض عليهم ... ربنا يتولاهم ... يا رب انت سندهم في وسط اللي ملومين عليهم
ومع ذلك مش قادرة افك دماغي من اللي بيحصل ... لما بقعد مع نفسي واحاول اوصل الخطوط ببعضها واركز في اللي ما بين السطور ... بلاقي اني اقدر اقول  وبمنتهى راحة الضمير ان مصر واقعه تحت ايد ناس بتخلص منها تار ...

بص كدة مثلاً عن لصوص الثورة اللي ماليين الدنيا كلام ومتاجره بيها ... اللي كانوا "قاعدين كلهم على حجر امن الدولة" .... بيجروا ثورة قامت تقول كفاية ظلم بقه كدة كتير. المصرى اكبر من انه ينذل ... الى كلام عبثي عن القصاص ودم الشهداء ... وكل يوم واحد يموت وتتشكل لجنه ويقولك هياخد تعوضيات زي شهداء الثورة ... وكانها مش ثورة للكرامة لا ده مشروع استثماري ... اعترض ... نقتلك ... تبقى شهيد ... نصرف لاهلك تعويض .. يشتروا بيه تلاجه ... يلزقوا عليها صفحه الجرنان اللي فيها صورة جثتك وتاريخ الوفاه
حولوا الثورة اللي قالت عنها النيويورك تايمز "مصر: الثورة الثقافيه" الى مصيبه سودا حطيت على البلد وطلعت اوسخ مافيها

كون ان الاخوان يتختاروا تمثال نهضه مصر من دون التماثيل والميادين يتظاهروا عنده لتأييد قررات المورسي والاعلان الدستوري مش ممكن تبقى صدفه خصوصاً لو عرفت ان التمثال ده اتعمل في الفتره اللي مصر كانت بتطالب فيها بالاستقلال (1918 - 1919) بأكتتاب عام للشعب علشان يلموا تكلفه التمثال والحكومة كملت الباقي ... التمثال اللي بيشبهه مصر ببنت فلاحه رافعه طرحتها وبتبص للمستقبل وايديها على راس ابو الهول رمز اصلها ومجدها ... التمثال ده هما شايفينه انه بيصور امراه في ملابس الفلاحة المصرية ترفع عن وجهها بيدها اليسرى (حجابها) - وهو احد رموز الاسلام - بينما يدها اليسرى مفردوة لتلمس باصابعها راس تمثال ابي الهول ......  وشايفين في النحت عموماً واستخدام الاثار الفرعونيه للفت انتباه المسلمين عامه والمصريين خاصه الى العناية بالاثار القديمة وحثهم على العناية بها والغيرة عليها بعد ان كانوا لا يكثرون بها

المحكمة الدستورية اللي هي الغرض من تاسيسها مراقبة تتطابق القوانين مع مواد الدستور ومهمتا إلغاء القوانين التي تخالف نصوص ومواد الدستور ... المحكمة ديه وجودها المفروض يضمن ان الكلمة الاولى والاخيرة في بلدنا للقانون ... الحاجة لوجود المحكمة الدستورية فكرة فضلت تراوض المصريين من العشرينيات لغايه لما صدر قرار من عبد الناصر بتشكيلها سنه 1970 وترتيبها التالت على مستوى العالم ... 

اعتصامات مدينه الانتاج الاعلامي ... سيبك من اسباب الاعتصام بص لقيمه الفن المصري عموماً ... اكيد سمعتعبارة " انا بعرف اتكلم مصري" من ضيف عربي لبرنامج فيه مجموعة من العرب من جنسيات مختلفه ... افتح اي قناه عربيه في اي وقت هتلاقيها بتعرض فيلم مصري او اغنيه مصريه او مستضيفه فنان مصري  ....مصر كانت جوه كل بيت في الشرق الاوسط بفنها ...  الفن المصري كان راقي وبيقدم قصص ليها معنى ساهمت في تشكيل وعي الجماهير وعاداتهم. لما وقع الفن المصري دخل التركي بسخافته واعتمادة على غباء الجمهور وصبره الطوووووووووووووويل في ان الواحد  يغيب عن المسلسل تلات سنين وميلاقيش حاجة جديدة حصلت ... ومع كدة اتفتحتله كل المحطات والبيوت
ومع كدة
تلاقي محطات زي الجزيزة مباشر مصر وام بي سي مصر وروتانا مصرية وغيرها من المحطات اللي ملاكها مش مصريين ومع ذلك فاتحين قنوات باسم مصر واكيد مش عاملين كدة لله

ده حتى شلل الاطفال بعد ما البلد خلصت منه رجع تاني مع العائدين من باكستان وافغانستان 

قيس بقه على كدة: الجيش والشرطة (مع تحفظي على اداهم)، المسيحيين، وسطية المصريين، المرأة، حقوق لطفل، السياحة، قناة السويس، الزراعة، الصناعات المحلية، ....

في حد قليل الاصل بينتقم من مصر ....
MishMish



المصادر
http://www.nytimes.com/2011/02/20/books/review/Creswell-t.html?_r=2&scp=4&sq=egypt&st=cse&

http://albayan.co.uk/article.aspx?id=1173

http://www.akhbarak.net/news/2012/12/01/1668283/articles/10347086/%D8%A7%D9%84%D8%B1%D8%A6%D9%8A%D8%B3_%D9%88%D8%A7%D9%84%D9%85%D8%AD%D9%83%D9%85%D8%A9_%D8%A7%D9%84%D8%AF%D8%B3%D8%AA%D9%88%D8%B1%D9%8A%D8%A9_%D9%88%D8%AC%D9%87%D8%A7%D9%8B_%D9%84%D9%88%D8%AC%D9%87

5 comments:

الميكروباص said...

اللي احنا فيه ده عباره عن اجتماع الأغبياء والطامعين وأصحاب النوايا السيئه
ده كوكتيل
لكن الضايع في النص الناس اللي زينا واللي مش طالبين أي حاجه من البلد إلا انهم يتركونا في حالنا وان الواحد يروح الشغل ويرجع ويمشي في الشارع بشكل مطمئن
حتى دي أصبحت صعبه
لكن مع الاغبياء والطامعين لكن يكون هناك شيء محترم يمر بنا قريبا

بنت النيل said...

للاسيف ... زادت مؤشرات الاكتئاب فى الصعود ... وبات الامل ينخفض تدريجيا ... هجرت مجتمع الفيس بوك كى أستطيع ان احيا من جديد استجمع قواى ومعنوياتى التى انخفضت بشكل هائل من الاخبار التى تصل لى والتى اسعى لها بنفسى كى اتابعها وانتقد ماجاء فيها ... ولكن يبدو أننى سوف اعود قريبا ... لانى لم اعتد على هجرة الاحداث اكثر من هذا فيجب ان نلبى نداء الوطن بكلمة ندعو بها قد تزيح عنه غمامة الحزن وغمامة الفكر الجاهل التى قد يضيع معها نبض الامل الذى ينخفض ... لنعلو به من جديد

Unknown said...

أيوه عندك حق في حد بينتقم من كل مصر ناس وأرض.
د. محمد زكريا الأسود

Unknown said...

عايزة اعرف اسمك الحقيقى عشان هننشر مدونتك فى موقع اليكترونى باسمك
ممكن تبعتيهولى على
sara.alsherif@gmail.com

Migo Mishmish said...

اشكرك سارة على اهتمامك
مش لازم اسمي الحقيقي علشان انتي عارفه احنا بنعيش في ازهى عصور الديموقراطية
فلنكتفي بميجو وزوجته مشمش
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق