Friday, November 28, 2008

البتنجان مايدخلش البيت


عودة تدوينيه مرة اخرى ...ما احلى الرجوع الى البلكونه ..بعد اللحوسه الى كنا فيها ..نأسف للتاخير بسبب استقبال العضو الجديد المنضم حديثا للبلكونه كعضو اساسي ..الانسه ساندو بنت الاستاذ ميجو ومدام مشمش

انتهى كل شيئ على خير الحمدلله بعد معاناه لاكثر من ثلاثه اسابيع وقامت مشمش بالسلامه هى وساندو ..اخيرا رجعنا لبيتنا الجميل بعد شحططه وبهدله ..كنا عاملين زى المهجرين بتوع السويس ..شويه عند حماتى وشويه عند والدتى ..وقفل شنط وافتح شنط ..التجربه كانت قاسيه جدا لكن الحمدلله .. المعاناه بدات لما مشمش تعبت ورحنا بيها على المستشفى وقعدنا حوالى 3 ايام فى انتظار الفرج ..الحقيقه كنا فى حاله من التوتر ..الى زاد وغطى التليفونات الى كانت بتجيلنا يوميا من الاهل والاصدقاء وكل واحد بيحاول ينقل خبرته لينا ..الى يقولنا بلاش الدكتورة دى والى يقولنا خلى بالكو من الشيئ الفلانى وطبعا كانت الاراء بتتضارب ..واحنا نزيد توتر قال يعنى ناقصه ..المهم ربنا سترها معانا وكل شيئ كان كويس ..لكن بدأ وجع الدماغ من بعد وصول ساندو بالسلامه .. كل واحد عمال يدى رايه .. والى عايزنى اسميها على اسم امى والى عايز اسميها على اسم خالته بمبه الله يرحمها .. المعاناه الحقيقيه بقى كانت مع الممرضات والعاملين بالمستشفى ... من بعد ما الاخت ساندو وصلت لقيت جيش طويل عريض من الممرضات والعمال واقفين طابور طويييييييل ..لدرجه انى شكيت ان فيه ناس كومبارس لابسين لبس ممرضات عشان يلهفو الحلاوة ..وكل واحد يقولك : الف مبروك ..عقبال ماتخاويها ..تتربى فى عزك ( قال يعنى ابوها مليونير ) ..وهكذا الى اخر عبارات الشحاته وطبعا الجمله من دول على الاقل ببريزة .. اتنفضنا تمام التمام ورجعنا على بيت حماتى ..وبدات اسمع حاجات غريبه لاول مرة استخدمها فى حياتى .. كنت بشوفها بس فى الافلام العربى ..وبالذات فيلم الحفيد ..لازم يعنى الناس تشرب( مغات) ..يعنى لو عملنا سحلب ولا اى حاجه تانيه يبقى بوظنا الدنيا

وتلاقى بقى الستات وتقاليعهم الغريبه : اوعى تخش على مراتك وانت حالق دقنك ( بالذمه مش احسن اخش عليها وانا حالق بدل من شكلى الى عامل زى المساجين؟ والبت تتسرع؟ ) ..الى زاد وغطى يقولك ايه بلاش تخش عليها بلحمه مش عارف ليه ( دا اليوم الى بدخل عليها بكيلو لحمه بتزغرط )

كله كوم وموضوع البجنجان (البتنجان الاسود يعني) ده كوم تاني. واحدة صعدية نعرفها اتصلت وقالت اوعوا تدخلوا البجنجان الاسود البيت وإذا كان عندكوا بجنجان ارموه. ليه يا ستي؟ قال علشان مشمش ما تكبس. تكبس يعني ايه يا طنط؟ تكبس يعني ما تقدرش ترضع ساندو طبيعي. وغير كدة ما حدش يخش على مشمش, مشمش هي اللي تخش عالناس, ليه يا حجه؟ علشان مشمش متتكبسش الله يمسيك بالخير ياعدويه ( تعالى وخش عليا ). ولما سالت علشان تطمن هو حد جالها ولا لا قلتلها اه. قالت يا نهار اسودددددددددددددددددددددددددددددددددددددد! قولتلها في ايه يا ست؟ قالت لازم تربط فتله سودة على اديها سبع لفات وبعدين تمسك بطنها ومكان الغرز حتى لو كانت كويسة وطبعاً السبب معروف من غير سؤال

العجيب في الموضوع ان كل التوتر اللي احنا كنا فيه ده كان سببه ناس بتحبنا. والمفروض انهم بيحاولوا يساعدونا ويعملوا الاصلح لينا لكنهم من غير قصد خلونا داخلين اوضه العمليات واحنا شاكين في الدكتورة والمستشفى والقطاع الطبي كله. خرجت مشمش وساندو كويسين والحمدلله. عملنا قعده عرب علشان الاسم ماما عاجبها اسم وطنط عاجبها اسم تاني وبقيه العيله كل واحد عاجبه اسم مختلف عن التاني ومشمش مدهولة في البنج وبعد ما ربنا كرمنا بالاسم. وروحنا وبعدين طلعت طنط بتاعه الصعيد اللي عايزنا ندعي المرض. هو في ايه لما نقول الحمدلله ساندو حلوة ومشمش حلوة. ومحدش ينفع يروح عند حد يسأله هي المدام بترضع طبيعي ولا لا. علشان ده موضوع عائلي مش موضوع مطروح للمناقشه ..

دخلنا بعد كدا فى مرحله السبوع .. ودا بقى اغرب حاجه فى الدنيا لان له شروط ومتطلبات : لازم المنخل يبقى جديد عشان ماينفعش انه يكون بتاع سبوع قديم ..مش عارف ايه فايده المنخل ؟ ؟ هى دقيق مدعم؟عمالين يفرهدو فيها ويدقوا هون فى ودانها ..ويقولك سبع حبوب يعنى لازم نجيب صينيه ونحط فيها سبع حبوب ..يعنى فول وعدس ورز والذى منه ..وناس ولاد حلال اتطوعو وقالك كل الستات تلم الدهب بتاعها ونحطه فى العروسه بتاعه السبوع عشان البت يبقى رزقها واسع ..طبعا المتطوعين دول احرجونا مع ستات العيله وكان منظرنا زى الشراب المدلدل ..يعنى بالليل لو طلع حرامى وقشط الدهب دا على حظنا الاسود هايبقى ايه منظرنا ساعتها ؟ ..

الحقيقه احنا شعب بنضيع وقتنا و فلوسنا وفرحتنا فى كلام فاضي بنسيب الحدث الرئيسى الى يفرحنا وندور على تفاصيل وحاجات فرعيه بتسبب مشاكل ..بصراحه مافيش اجدع من الاجانب فى المواضيع دى بيتعاملو مع الحياه ببساطه وسهوله ومن غير تكليف ..يعنى بدل ما اهتم بصحه مراتى وبنتى وافضل جنبهم ..اسيب شغلى وانزل الف على حاجه السبوع واقعد اعبى اكياس مكسرات عشان شويه تقاليد فارغه ..مش كلام منطقى ؟

سلام بقى عشان ساندو بتعيط .. هاروح احطلها ريشه غراب احول فى البامبرز يمكن تنام يا حوريه

وعقبال عندكو

ميجووووووو

12 comments:

Anonymous said...

هاها يخرب بيت الكلاكيع احنا شعب يحب يكلكع كل حاجة

بس كله كوم و كوم طابور البقر بتاع الحلاوة ده كوم تاني انا لو منك كنت سبتهم يندعقوا

اصل صرف الفلوس بطريقة تفسد النفوس و الجيوب اوحش حاجة

Anonymous said...

عسل بجد ياميجو
خبرات الناس فعلا تودي في داهيه

المهم ان مشمش قامت بالسلامه و هي و ساندو كويسين
عجبني جزء الممرضات اللي كنت شاكك ان فيهم كومبارس مدسوسين تصدق ممكن
:))))))

حمدلله علي سلامه مشمش و ساندو تتربي في عزك و انشاء الله هي اللي تجيبلك الخير كله
السلام امانه لمشمش و ساندو

Fantasia said...

ألف ألف مبروك يا ميجو ويا مشمش على القمر الجميل.. ربنا يجعلها نور لحياتكو وفرحة قلوبكم وتشوفوا احفادها ان شاء الله وتعملولهم سبوع فيه منخل وعروسة ومغات

عندك حق يا ميجو في كل كلمة قولتها.. احنا نحب نبوظ فرحتنا بأي حاجة والناس بتنتهز الفرص اللي زي دي عشان تحشر نفسها وتستعرض مدى الخبرة اللي عندها.. حاجة تفقع المرارة

بس كله يهون عشان عيون ساندو

قبلاتي لساندو ومامتها

Anonymous said...

ألف مبروك ياميجو بس نصيحه لله إرفع التدوينه دى من المدونه لأنك هتزعل ناس كتير كل ذنبهم إنهم كانوا قلقانين عليك ..ولااقوللك ترفعها مترفعهاش انت حر مش من حقى انصحك.

Migo Mishmish said...

An Egyptian
اه يا اخي كل حاجة عندنا ليها قواعد ورياح. السبع حبوب لازم تبات جنب البت. ولازم اعدي من فوق البت وجنبها سكينه كبيرة ومقص.
وموضوع الحلاوة دة موضوع تاني. ده حتى الكناسين عايزين الحلاوة. طب دول عملوا ايه ما تعرفش.
بس معانا برضه

اجندا وهارت بيت
الله يسلمكوا ونصحيه لما حد يروح مستشفى ولادة لو جه البيبي ولد يقوم الاب ضارب بوز ويقول حلاوة ايه احنا كنا عايزين بنت والعكس. علشان يفضل فلوس مع اهل المولود يحاسبوا بيها الدكتور والمستشفى

فانتا الحبيبه
شكراً يا جميله على شعورك الجميل
عندك حق والله يا فانتا. احنا عندنا قدرة غريبة على قلب اي مناسبه الى موقعه حربية ملهاش علاقة بالمناسبة والواحد بدل ما يعيش لحظات المناسبة ويحسها تضيع المناسبة وحلاوتها في التعقيدات. والذكرى اللي تفضل تبقى على طريقة: "فاكر ليله دخلتنا يا حسب الله"
Love,
MishMish

Unknown said...

السلام عليكم ورحمة
الله تعالى وبركاته
مبروك ما جالكو وتتربى
فى عزوكوا وعقبال ما تخاووها
وبعدين اللى مزعلك ده هو التراث والموروث الشعبى اللى بيقولوا عليه حتى الاجانب اللى انت بتقول عليهم دول وعجبك تفكيرهم بيدوروا وبيبحثوا عن حاجات فى تاريخهم يعملوا بها تاريخ وعوايد والا الديك الرومى بتاع عيد الشكر والحلويات والاشكال التنكرية لعيد الهلويين يبقى ايه
ماكل ده اصل واحد
مرة تانية مبروك
وحمدلله على سلامة
مشمشة وساندو
احتراماتى

Migo Mishmish said...

عزيزى عمو عصام
انا مستغرب جدا انك زعلت من البوست دا وشايف انه مش مناسب ..مع انك اول واحد مفروض توافقنا على راينا ..لانك بتحب تتعامل مع الحياة ببساطه شديده ووضوح ..ومش بتحب الكلاكيع ..وانت اول واحد اثرت فيا فى الموضوع دا ..يعنى مثلا انا واخد منك موضوع الكرافته ..انت طول عمرك مش بتحب لبسها هى والبدله ..صح؟ انما احنا مش قصدنا اننا متضايقين من الناس الى حاولو يسألو علينا وينصحونا ..انت حاولت تنصحنا بس مافرضتش رايك علينا بالعافيه ..فيه ناس بقى تانيه فاكرة ان دا حق مكتسب ليهم ..
وبيعملو مشاكل كتيييير بسبب الحاجات دى وبسبب التفاهات وانت سيد مين يعرفهم ..انت مثلا ظهرت بهدوء وحاولت انك تسال علينا وتطمن علينا ويكفينى فرحك التلقائى بساندو ..صدقنى انا تعبت جدا انا ومشمش بسبب اشخاص دماغهم فاضيه وتافهه بيسيبو الاصل ويمسكو فى الفرع ..
انا يستحيل اسيب مدخل لحد انه يدمر حياتى ويقتحم الحدود الى مفروض انه مايتعدهاش
شكرا على محبتك وبساطتك ودماغك الكبيرة ..بس الناس كلها مش عمو عصام
واعتذار منى ومن مشمش وساندو لو كلامى اتفهم غلط

Migo Mishmish said...

الاستاذه نورا
نورتى البلكونه ولو انك ماشربتيش حاجه ..
اولا احنا مش معترضين على التقاليد والعادات الجميله بتاعتنا ..وماعندناش عقده الخواجه ..كل الحكايه اننا معترضين على انها تبقى كل حاجه وهى الاصل ..لما الحكايه تتحول الى قوانين يبقى فيه مشكله ..مش لازم اعمل سبوع يعنى ..لو ماعملتش يبقى خلاص كفرت؟ ..
وبعدين الاجانب بيعملو اعياد هدفها المتعه والترفيه مش للمشاكل ووجع الدماغ ..احنا بقى حولنا اعيادنا ومناسباتنا الى وجع دماغ وحطينا نفسنا فى قيود ...لو العادات دى هاتخلينى ابقى مقيد ..يبقى مالهاش لازمه اجدع ..يعنى عمرك شفتى فى امريكا مثلا واحد قتل مراته بسبب الديك الرومى ؟؟ احنا بقى عندنا الى بيقتل مراته عشان طلبت منه كحك العيد ..
عمرك شفتى واحد مش لاقى ياكل فى امريكا ويروح حفله الهالوين؟ ..احنا بقى عندنا ناس مش لاقيه تاكل وموظفين غلابه ويتدبسو ياعينى فى حلاوة المولد ..واحده للبيت وواحده لوالدته وواحده لحماته ..يبقى هنا التقاليد اصبحت قيود
شكرا واحتراماتنا ليكى يا اخت نورا
ونورتى البلكونه

Alkomi said...

طب الف مبروك يا ميجو

انا حلاوتي ريال و مش اقل منه

المهم حمد الله على سلامة مشمش

ماحدش قالك بلاش بيض مسلوق جنب القايمة دي ولا ايه

عندنا في اليكس السمك برضه ممنوعات ياترى ايه الاخبار عندكم

Anonymous said...

يابو ساندو حصل معايا نفس الكلام و انا فى امريكا مش فى مصر
نفس الكلام متخشس على مراتك وانتى حالق دئنك وحط سكينه تحت المخده بتاعته و لعلمك الكلام ده مش بس من الستات الكبار لا و من ناس فى سنى و سنك
بص دى معتقدات مش ممكن نغيرها و لا هي كمان تغيرنا يعنى انا مش ممكن احط سكينه تحت دماغ ابنى بس اهو نسمع الكلام و نقول حاضر و متزعلش الناس منك
اما بالنسبه لطابور التهانى اللى فى المستشفى الله يعينك
مش هاينفع احكيلك على طابور الممرضات اللى كانو بيساعدو الدكتوره و من غير اى فلوس منى مافيش حاجه اسمها كل سنه وانتى طيب يا باشا و عايزين نشرب شاى كله بيشتغل و بيعمل دوره بس تكلفة المستشفى فى امريكا غاليه جدا
هى فى الاخر هتدفع فلوس كتير ها تاخد خدمه كويسه
و مفيش فرق بين اقل عامل و حاكم الولايه كله هياخد نفس الخدمة
بدام هتدفع نفس الفلوس

المهم ان مشمشه رجعت السويس اقصد البيت بالسلامه
و ادى ساندو بوسه كبيره و قولها د من عمك جورج

Anonymous said...

انا عايز اقول حاجه على موضوع الديك الرومى و الهالويين
الناس دى فعلان ما عندهمش اى حاجه ولا تراث و لا معتقدات
بس هما بيعرفو يعملو تاريخ لنافسيهم و يتباهو بيه كمان
اناعايش فى مدينه اسمها ناشفل وفى سط البلد عباره عن جنينه كبيره فى وسطها معبد كبير شكل المعابد اللى عندنا فى الاقصر و اسون بقالو حوالى عشر سنين مبنى انا مش فاهم دا بتاع ايه و لا هما كمان فاهمين ده بتاع ايه بس انا كل لما اروح هناك اشوف ناس كتيره من كل حته فى امريكاجايين يتصوره فيه بقى تاريخ عندهم

بس فى الاخر العيب مش منهم هما العيب مننا احنا احنا عندنا تاريخ بقالو عشر تلاف سنه و مش مستغلينه وناس عندها حاجه مش ادر اقول عليها تاريخ بقالها 10 سنين و بقت تاريخ و عارفين يسوقوها انا عايز حد يقولى عدد السياح اللى بيجو مصر كل سنه كام و نا اوعدكو اقولكو عدد السياح اللى بيجو ناشفل اد ايه و ساعتها نعرف الفرق
عارفين الناس هنا علشان تاكل ديك رومى بتدفع كام يجى 10 دولار
و لبس الهالويين اول كمان 10 دولار
يعنى 20 دولار علشان العيله تنبسط نقدر احنا ننبسط فى مصر ب 20 جنيه
فى عيدين

Desert cat said...

ربنا يخليها ويحفظها
والف الف حمد الله على سلامة مشمش وساندو
التقاليع اللى قولتها دى يا ميجو موروث شعبى فى جمهورية الباميا العظمى التى نحيا فيها

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق