Thursday, June 3, 2010

هل انت مصرى بجد؟

اذا اردت ان تعرف انك مصرى بجد ام لا ..حاول ان تجيب على الاسئله التاليه بصراحه شديده

هل عندك مشكله ان تحتفل بعيد الميلاد او القيامه مع اصدقاؤك وتهنئهم من قلبك اذا كنت مسلما ..او تحتفل بالمولد النبوى وتشترى حلويات او تشارك اصدقاءك المسلمين عيد الفطر او الاضحى وتهنئهم من قلبك اذا كنت مسيحيا ؟

اذا كان هناك مبارة لمنتخب مصر ضد امريكا ..هل تتمنى الفوز لمصر ام تتمنى الفوز لامريكا لانك مضطهد بصفتك قبطى ..واذا كنت مسلما هل تشجع مصر ليس لانها بلدك ..ولكن لنصرة الاسلام ؟
فى حاله هزيمه مصر امام امريكا ..هل تفرح وتقول (احسن) ماهو من عمايل المسلمين فينا ولو كنا كسبنا كانو هايقولو نصر للاسلام ..واذا كنت مسلما هل تحزن لهزيمتك امام الصليبيين الكفار ام انك تاخذ الموضوع بروح رياضيه فالرياضه فوز وهزيمه ؟
هل تحب منتخب مصر لانه منتخب الساجدين ام لانه منتخب مصر ؟
هل احيانا لا تشجع مصر لان ليس بها لاعب قبطى واحد ؟ ام انك تشجعها لانك بتحبها ؟
ايهما اهم فى نظرك من الشخصيات الاتيه ؟ بن لادن - احمد زويل - موريس صادق - ابوتريكه- مجدى يعقوب -محمد حسين يعقوب - فاروق الباز - نجيب محفوظ -مايكل منير
القناه المفضله لديك : الرحمه -اون تى فى - الحياه - الناس -سي تى فى - ناشيونال جيوجرافيك -روتانا سينما
هل تشترى من سوبر ماركت صاحبه مسيحى ..او من سوبر ماركت صاحبه مسلم ..او انك لاتهتم بمن هو صاحب المحل ..وما يهمك هو المعامله الجيده والامانه فى التعامل ؟
اى علم يبهرك من الاعلام الاتيه : علم مصر - علم امريكا - علم السعوديه ؟
ما هى الاغنيه التى تهز مشاعرك : اغنيه ياحبيبتى يامصر - انا شارب سيجارة بنى - اناشيد سامى يوسف -ام انك لا تحب الاغانى وتحب ان تسمع اناشيد دينيه ..او تسمع ترانيم مسيحيه... باعتبار ان الاغانى حرام ؟
حينما تذهب الى مكان جديد مثل شركه او مدرسه او كليه ..اول ماتبحث عنه هو : مكتبه الكليه - السي اتش ( المكان المخصص لتجمع المسيحيين )- تبحث عن المسجد لتقابل الاخوة
فى المترو حينما تجد سيده غير محجبه : هل تقوم لها باعتبارها كبيرة السن - ام انك ترفض ان تقوم لها لانها غير محجبه - تنادى على سيده محجبه لتجلس مكانك
اذا كنت مسيحى ومهمل فى عملك : تعترف انك مقصر وتحاول ان تصلح من نفسك - تقول ان المسلمين يضطهدونى
فى العمل : تلعب سوليتير وفيفا وتتحدث فى تليفون الشركه وتقوم بالشات مع اصدقاؤك وتتفرغ لفقع الزنب فى زمايلك - ام انك تتهرب من العمل بحجه الصلاه
اخر عمل جيد قمت به هو : المشاركه فى حمله خيريه لمساعده اطفال الشوارع - التبرع لبناء كنيسه - التبرع لبناء مسجد-مش لاقى تاكل اصلا ومحتاج حد يتبرعلك
اى بلد تفضل العيش فيها :امريكا -السعوديه - مصر
اى جمله تعجبك من الجمل الاتيه : ان مصر وطن لا نعيش فيه ...بل يعيش فينا - طظ فى مصر وابو مصر والى مش عاجبه يمشي -اضربو الرصاص على المتظاهرين - ماحنا لو دخلنا الجنه مش هانلاقى حد نعرفه (عادل ادهم )-اننا نعيش ازهى عصور الديمقراطيه -وطنى لو شغلت بالخلد عنه ..نازعتنى اليه فى الخلد نفسه-جمله مكتوبه على سيارة نقل :ماحدش فاهم حاجه
هل تعتبر نجيب محفوظ : كاتب عالمى - كاتب اباحى - كافر لانه لا يكتب فى الدين- مبفهمش منه حاجه
تاريخ مصر :الحقبه الفرعونيه -الحقبه القبطيه - الحقبه الاسلاميه-جميع ماسبق
تخب زيارة الاماكن الاتيه : المتحف القبطى - المتحف الاسلامى - المتحف المصرى - ساقيه الصاوى والاوبرا -جميع ماسبق؟
مارايك فى الاسماء الاتيه : نجيب الريحانى: ممثل رائع بس عيبه انه مسيحى
الشيخ النقشبندى : انا مالى ومال التراث الاسلامى ..مصر كانت قبطيه
النتيجه : طبعا انت هاتجاوب بينك وبين نفسك ومش من حقى ادخل جواك ..واكيد مش هاعرف النتيجه .بس لو طلعت مصرى بجد هارفعلك القبعه وانحنيلك وتبقى شرفتنى ..ولو انت مش مصرى وبتتمحك فى اى دوله تانيه لاى سبب من الاسباب فمالكش عندى اى قيمه او اعتبار اما بقى لو كنت مكبر دماغك وجواك مصرى نايم ومكسل .حاول انك تدور جواك على انسان مصرى صميم ..انسان معتدل بيحب الخير بفطرته - مش مهم تكون متدين ولا لا ..لان ده حريتك الشخصيه ومش من حق اى حد انه يحاسبك ..المهم انك تشارك بجد وتحلم بجد ..روح الجامع زى مانت عايز ..روح الكنيسه زى مانت عايز ...بس اهم شيئ ماتنساش انك مصرى .
مع تحياتى
ميجوووووو
من فوق كوبرى قصر النيل
باكل ترمس ودرة مشوي

26 comments:

Anonymous said...

لو كلنا جاوبنا بصراحه المصريين بجد مش هيزيدوا عن عشره

آخر أيام الخريف said...

حلوة قوى قوى بجد ...اقدر احط لينك البوست عندى على مدونتى؟؟

Migo Mishmish said...

المجهول
تقريبا عمو عصام
انجزت واوجزت
بس صدقنى اعتقد ان فيه الاف وملايين مصريين بجد
اتمنى بجد ان العدد يزيد وكل واحد يدور جواه على مصريته
تحياااتى
ميجووو

Migo Mishmish said...

اخر ايام الخريف
يشرفنى ياباشا انك تنور البلكونه ..ويشرفنى انك تعمل لينك للتدوينه عندك
يامصرى
تحياااتى
ميجوووو

آخر أيام الخريف said...

ميرسى جدا لذوقك ... على فكرة انا هانم مش باشا :D :D

و بالمناسبة أدعوك لتشريف مدونتى الصغنتوتة

http://reeeshkalam.blogspot.com/

صوت من مصر said...

انا مش من مصر انا من بنها العسل

Anonymous said...

هل تعتبر نجيب محفوظ : كاتب عالمى - كاتب اباحى - كافر لانه لا يكتب فى الدين- مبفهمش منه حاجه

سؤال جوهرى جدا يا ميجو و يمكن هو و السؤال الاول بيختصر فكرة البوست

الشخصانية ام النظام
الثبات ام الحركة
التعدد او التجمد

بس جالك قلب تحط اسم نجيب محفوظ فى وسط اسماء اللى ما يتسموش
انت ما فيش فى قلبك رحمة
صحيح زنديق
مع تحيات اخوك فى الله
البطريرك

MSMO said...

انحني واخلع القبعة من جديد لك
أسئلة في الجون زي ما الناس بتقول لوكل واحد قعد مع نفسه شوية وفكر
هيكون لسه في أمل إننا نرجع مصر زي زمان لما كان الإنسان المصري فعلا إنسان

Migo Mishmish said...

اخر ايام الخريف
اسف ياهانم ..ماكنتش اعرف
انا زرت مدونتك الجميله..واشكرك على صداقتك لينا ..احنا تشرفنا
ميجو وزوجته مشمش وابنتهم ساندو

Migo Mishmish said...

صوت من مصر
انت كده مصرى صمييييييم
انا بقى جدى من سوهاااج ..يعنى من الصعيد الجوانى
تحياااتى
ميجووووو

Migo Mishmish said...

المجهول : اخى فى الله
احيانا الابيض بيبان باللون الاسود ..عشان كده تعمدت احط اسماء مختلفه ومتنوعه جنب بعضها ..وانت تحدد بقى مين فيهم ابيض ومين فيهم اسود
تشرفت بمعرفتك
اخوك فى الانسانيه
ملحوظه : تقريبا انا عارف انت مين

Migo Mishmish said...

msmo
انا اللى انحنى وارفع القبعه لاى انسان مصرى صميم زى حضرتك
شرفت يا لورد
ميجوووووو

strategicalone said...

اولا شكرا ليك على المحاولة البائسة للبحث عن شخص بيحب مصر بجد
لكن انا شبة موقن ان مفيش حاجة اسمها كدة دولقت . يعنى انا مثلا فرحت كثيرا لفوز امريكا على مصر ولو حدث العكس لاغتميت جدا ليس بسبب مصر ولكن وانت فى القهوة تحس ان الاسلام يلعب مباراة مع المسيحية الكافرة فكنت تسمع من الجالس بجوارك (حلوة الجالس بجوارك دى) الفاظ مثل اكسرة المسيحى الكافر دة . ايو كدة طلع دين امة . الله اكبر (هذا هتاف اسلامى بيفكرنى بايام حرق الكنائس فى كل مكان فى مصر) والجميل فى الموضوع ان فريق الساجدين لم يسجل ولا هدف يتيم او حتى لقيط لكى يُحرمون من السجود فى ملعب الكفار. الحقيقة حاجة جميلة عاوزينها تتكرر .
طبعاُ انا اسف على الاطالة لكن انا قلت اهى كدة كدة وقت ضايع فى الشغل وزمايلنا المسلمين اتحججوا بالصلا وخرجوا يتفسحوا برة الشركة واحنا بنعمل شات وتدوينات وسلملى على الانتاج والصناعة اللى كانت وطنية قبل ما نسرقها من اليهود ونسميها تابين وبعدين فصفصة .

آخر أيام الخريف said...

الشرف ليا انا ..و تحياتى لميجو و مشمش و ساندو

:)))

على فكرة انا عجبنى جدا تعليق

strategicalone

Migo Mishmish said...

strategicalone
نورت البلكونه ياسعاده الباشا
ميرسي اولا على ذوقك
ثانيا : انا معاك اننا بنسمع الكلام ده كله علطول و انتشر بطريقه واسعه ساعه الماتشات ..تحس ان فيه ناس عايزة تسلخك من وطنيتك وتقولك انت مالكش دعوة بينا مصر دى بتاعه المسلمين ..يعنى بعد ماتش ايطاليا مكنتش بشجع ايطاليا عشان فيها الفاتيكان ..كنت بشجع مصر بجد ..لكن بعد الماتش لقيت الكلام كله عن انتصار الاسلام والمسلمين ..يعنى انا اطلع برة الموضوع ..لكن مع ذلك برضه مصرى ولسه بحب مصر وعندى امل ..لان فيه لسه ناس كتيييير كويسين ومصرييين من قلبهم .ومش عايزين ندى فرصه لحد انه يستحوذ على البلد لوحده سواء كان مسيحى او مسلم ..عايزين يبقى لينا صوت عالى ونحافظ على هويتنا المصريه بكل مافيها من خليط ومزيج رائع
تحياتى
ميجووووو

آخر أيام الخريف said...

تصدق يا ميجو انا ما لاحظتش انك مسيحى غير فى ردك على

strategicalone ???

وهو ده صح الصح ... الدين دى حاجة بيننا و بين ربنا ,مش بيننا و بين بعض.

على فكرة انا مسلمة.... و بعانى زيك بالضبط من الفكر ده

Desert cat said...

بسم الله الرحمن الرحيم

الاجابة
تونس

Mowatten Ardi - مواطن أرضى said...

Kalam gameel ya Migo, buss ya reet el nas tefham. El wattan lelgamee3. 7atta shouf belad barrah(el 3alam el mota7aderr) mafeesh 7ad me7tag yes2alak enta deenak eeh.

Ta7eyatty

Mowatten Ardi.

Migo Mishmish said...

اخر ايام الخريف
انتى مخدتيش بالك انى مسيحى غير من تعليقى ..طب ونجيب الرحانى الى معرفش ان بديع خيرى مسلم غير لما شغلو قرأن فى جنازته والناس ضحكت على نجيب الريحانى لما عرفو كده ..وانا برضه مسألتش انتى مسيحيه ولا مسلمه ومش يهمنى
وعلى راى يوسف شاهين
يهمنى الانسان ولو مالوش عنوان
تحياااتى
ميجووووو

Migo Mishmish said...

قطه
ياااااه ..بجد لينا زعله عندك عشان بقالك كتير مش بتيجى ..انتى عارفه ان البلكونه بتبقى مضلمه من غيرك ..لو سمحتى ماتغيبيش تانى والا هاعملك استدعاء ولى امر
اما بالنسبه للاجابه ..انا معاكى ..اجابه صح
تحيااااتى
ميجووووو

Migo Mishmish said...

مواطن ارضى :يارايت ياخويا هو انا فى ديك الساعه لما يبقى كل واحد فى حاله زى البلاد المتقدمه ومحدش يسال التانى عن دينه ..وكله يتفرغ لشغله وبس
تحيااااتى
ميجوووووو

آخر أيام الخريف said...

يهمنى الانسان ولو مالوش عنوان

انت لخصت فلسفتى فى الحياة بالضبط

انا بجد مبسوطة قوى قوى انى لقيت حد بيفكر زيك...مش عايزة اقولك انى غلبت اقول الكلام ده فى كل حتة بس مين اللى يسمع ...؟؟ الناس حولت الدين من علاقة روحانية مع الله لماتش اهلى و زمالك ...!!!!
تحياتى يا ميجو , انا خلاص قاعدة هنا فى البلكونة و مش هاروح,هستناك تزورنى بقى بره الشبابيك :)

Anonymous said...

تصدق يا ميجو يهمني الانسان ولو مالوش عنوان...........دي مش جملة دي امنية
بجد بوست رائع


تحياتي
ام البنات

Migo Mishmish said...

ام البنات
منورة البلكونه كالعاده
اشكرك على تعليقاتك الجميله
فعلا دى فلسفتى فى الحياه : يهمنى الانسان ولو مالوش عنوان ..يوسف شاهين قدر يلخصها فى جمله واحده ..ولو فعلا طبقها كل واحد ..هانرجع لانسانيتنا الى فقدناها من زمان
تحياااتى
ميجووووو

Ms Venus said...

معلش انا مش هجاوب على الاسئلة

لانى فعلا حزينة على بلدى

Anonymous said...

First time here, and loved your post. You touched a nerve. I truly love Egypt with all my heart, the problem is, I feel I'm constantly being excluded. I am amazed at how any subject is being brought back to religion, whether it was sports, arts, or politics. Honestly, I feel like an unwanted guest in my own country. Sad but ture.

In those good old days, we made friends and didn't know which religion they belonged to until Christmas time or Ramadan, not that we even cared. Now, I can't go on a two-minute conversation with a cab driver or sa alesperson in a store without being asked about my religion, directly or indirectly.

I cheered for the Egyptian soccor team in the African Cup until I lost my voice, but the media killed my joy with Islamizing the whole issue.

I can't express a point of view about a political issue without getting reactions that my motives are questionable.

Recently, I feel that decisions that affect the lives of all Egyptians are made without taking me into consideration, as if I'm just a guest here.

Anyways, despite all that, I am still madly in love with Egypt and when it comes to dealing with people, religion is not in the picture for me.

Sorry for the long comment.

Masreya men Canada.

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق