Sunday, May 20, 2012

ويسألوك يا ودع "نتنيل ننتخب مين؟"

فاكر انت وانت صغير لما كانوا في العيله يحطوك في النص ويسألوك عايز تطلع ايه؟ وتكون الاجابه النموذجيه ياما دكتور ياما مهندس. على ما اعتقد مفيش حد كان طموحه انه يطلع حرامي او بلطجي او متحرش بس للاسف الظروف اللي بيتربى فيها الطفل هي اللي يإما بتطلعه مهندس او دكتور ياما بتنزله تخليه حرامي او بلطجي.
فالخلاص من وجود النوعيات ديه من البشر في مجتمعنا مش هايكون عن طريق رئيس يامر بقطع الايدين والرجلين ويعملنا حفلات رجم جماعي على طريقه عصور ما قبل الحضارة. الخلاص من النوعيات ديه من البشر بيكون عن طريق القضاء على الاسباب اللي جعلتهم مجرمين وحتى لو اجرموا نديهم فرصه تانيه يمكن لما الظروف تتغير حالهم يتغير بدل ما نوصمهم بالعار الى الابد. يبقى ربنا بيرحم واحنا لا. والدليل على كدة ان المجتمعات اللي بتحل مشاكلها كلها بالبتر والقتل لا هي مجتمعات ملائكيه ولا متحضرة ولا متقدمة.
احنا محتاجين لرئيس لينا كلنا مش لرئيس لمعظمنا والباقي "يموت بغيظه" .... محتاجين رئيس يعيشنا في جنه على الارض ومالوش دعوة بأخرتنا .... احنا هنتصرف.

لو قالك "اللي تعرفه احسن من اللي متعرفوش" قوله "كان زمنا لسه عايشين على الجمع والالتقاط وبنلبس جلود الحيوانات". اللي نعرفه زفت وقطران وهو اللي وصل نفسه ووصلنا للي احنا فيه.

"والله الاستاذ خالد علي راجل محترم بس فرصته قليله واحنا مش عاوزين نفتت اصواتنا." جمله بسمعها من معظم الناس اللي اعرفهم. ما هو لو كل اللي مقتنعين بخالد على انتخبوا خالد على فرصته مش هتبقى قليله. انتخبه لو انت فعلاً مقتنع بيه. حتى ولو فرصته قليله يا سيدي اهو على الاقل نبقى صوتنا كراماً
وريح نفسك مسرحية الانتخابات الرئاسيه وتسليم السلطة لا يعلم نهايتها الا المخرج اللي مطلع تيت ام المشاهدين والممثلين على حد سواء.


 انا عارفه اني المفروض ابقى حياديه وان سي الاستاذ ميجو من مؤيدي حمدين ولكن صوتي لخالد على




Love,
MishMish

9 comments:

Ramy said...

طب متخليكى جدعة و تنتخبى حمدين

(:

اسف على انى تباسط فى الحديث

Migo Mishmish said...

لا تباسط براحتك انت في البلكونة
انا بحب اراهن على الحاجات اللي فرصتها ضعيفه عملاً بمبدأ
when u got nothing, u got nothing to lose
بحترم حمدين والسيد ميجو هايرشحه بس انا مع خالد على
Love,
MishMish

جيمي said...

لما كنت بتسأل السؤال ده و انا صغير كنت بجاوب : مخرج سينمائي
عموما خالد علي زي الفل بس بتوع حملته الانتخابية غرقوه تماما ده غير ان نشاطة قبل الثورة كان ضعيف شوية مقارنة بابو العز الحريري و بسطويسي و حمدين .. فالراجل بيزكلي يعني كان بيبني على الزيرو .. يمكن في الانتخابات ما بعد القادمة - ان وجدت- يكون ليه حظ
و هنتخب حمدين صباحي

Unknown said...

MishMish إلي
اختيار موفق رغم إني انتخبت حد تاني برضه علشان ما نفتتش الأصوات لكني أتمني للأستاذ خالد علي كل التوفيق بسبب اقتناعي بصدقه ووضوحه وانحيازه للناس ولفكرة التغيير عن كل القوالب المجمدة التي عشناها ولا نريدها لأولادنا. تعرفي أنا كان لي زمان زميل كان يحكي عن شبابه وكيف كان يخرج من المدرسة ليساعد أبيه في صنعته الصغيرة وكنت حين أسمعه تحدثني نفسي أن ليتني كنت بهذه القوة وأن أحكي عن أيام ضعفي أو فقري بهذا الفخر. حينما استمعت للأستاذ خالد علي يجكي سيرته تذكرت ملامح هذه القوة فيه وأدركت أن هذا الرجل يستحق أن يكون في الصفوف الأولي. هو عندي رجل قوي وصادق وواضح مع نفسه والآخرين. أحييك علي اختيارك، وأحيي كل الذين انحازوا لفكرة التغيير سواء الذين ذهبوا مع الأستاذ حمدين الصباحي أو غيره من وجوه صادقة وواضحة. تحياتي وتقديري
د. محمد زكريا الأسود

Tarkieb said...

انت فكرتيني بفيلم في بيتنا رجل لما عمر الشريف وجع دماغنا في الفيلم وقال انه عايز يعمل عمل كبير والدنيا كلها تتكلم عنه وفي الاخر رسيت على انه حط قنبلة في كوم رمل وعملت فس هههههههههه....لو عايزة رأي فس على فس نعمل صوت لصباحي بدل ما نضيع الفس مع خالد على....هو معلوهوش حاجة بس اسمعي كلام الودع قال الفس قالي الفس قالي ياحلوة يالي صباحي اولى

Unknown said...

سواء جاء حمدين او خالد علي فكلاهما يعني نجاح الثورة..وان كنت ارى اننا محتاجين لكل صوت ومش لازم الاصوات تتفتت والا هنلاقي يا فلول يا تاجر دين على الكرسي..ياريت لمصلحة مصر تختاري حمدين..تحياتي

Migo Mishmish said...

احب اقولكم جميعاً اني في اخر لحظة اخترت حمدين علشان خاطر الاصوات ماتتفتتش
وادينا رجعنا تاني لنقطة الصفر يا نظام مبارك بفساده وعساكره وقرفه
يا حكم جماعه فاقت ميكفيلي بذات نفسه
MishMish

enas ahmed said...

كل حاجه قريتها في مدونتك عجبتني ومش عارفه اعلق على ايه بالظبط
وطبعا طبعا سلام بير اوي لصورة البوب اللي في المدونه وكمان قصيدة الاحزان العادية وكنت عايزه اسألك عن مين كتب كلمات أكون أو لا اكون ؟؟

Migo Mishmish said...

اهلاً يا ايناس وشكراً ليكي على ذوقك
كلمات اكون او لا اكون من بلاك تيما
الرابط اهو
http://www.youtube.com/watch?v=Ixu8ED7ZTOQ

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق