Sunday, November 25, 2012

دانت جاي بـ 51.7% اومال لو كنت جايب 90% كنت عملت فينا ايه؟

 ألا تكون نسيت انت جيت إزاي؟ 
ألا تكون نسيت ان الناس عصرت على نفسها لمون علشان تنتخبك؟
ألا تكون نسيت ان اللي اعضاء جماعتك قالوا عليهم بلطجيه زي اليومين دول السنه اللي فاتت هما السبب في اللي انت فيه دلوقتي؟
ألا تكون فاكر انكوا اغلبيه ... طلعتوا ولا نزلتوا انتوا جماعه ... ديه بلد فيها شعب مرزوع فيها من قبل التاريخ ...من ايام ما كانت دولة عظمي يحكمها القانون والعالم كله بيتنطط على الشجر زي القرود.... دانت جاي بـ 51.7% اومال لو كنت جايب 90% كنت عملت فينا ايه؟
ألا تكون فاكر ان الهتيفه اللي لموهملك من الساعه 3 علشان يأيدوا قرارات مهماش عارفينها هاينفعوك ...... فاكر اخره الرئيس المؤمن كانت ايه ... خد بالك لان اللي بياع دماغه لغيرة عبيط وولائه مش مضمون
طب ماكنت تفضل رئيس للحزب وكنت طلعت انت واهلك وعشيرتك مظاهرات واعتصامات وكدة طالما انت مبتتكلمش غير معاهم
 فكرتني بواحدة صاحبتي - الله يمسيها بالخير - اول ما اتعلمت السواقه ... كانت بتسوق العربيه وكانها سايقه موتوسيكل ... مركزة مع الناحيه اللي هي قاعدة فيها ... اما الناحيه اللي جنبها فمتجهلاها تماماً ... طول ما هي ماشيه في الشارع تسمع صوت المرايه وهي بتخبط في - لا مؤاخذة - موخرات كل اللي ماشي جنب العربيه 
باااااك .... آآآآآآآآه .....باااااك .... آآآآآآآآه .....باااااك .... آآآآآآآآه.....باااااك .... آآآآآآآآه يلعن تيت ام اللي ركبك عربيه

وبعدين اعلان الديكتاتوريه ده علشان خفت لا التاسيسية تتحل فبتحصنها ... احيه على ديه تأسيسية لامه السوابق وقتالين القتلى والمتحرشين بالاطفال الا من رحم ربي
وخايف على مجلس الشورى ... اللي محدش نزل انتخاباته ... 

عايز تحاكم قتله الثوار ... محاكمة الثوار حلوة مفيش كلام
هل عندك تقرير رسمي عن عدد الثوار دول؟
تعرف اسماميهم؟ تعرف كام واحد اتصاب؟ عارف كام واحد اطفى نور عينه؟ 
وبتمن عليهم بالتعويضات ... يا سلام ... حاجة ظريفه والله ... واللي ابنه مات ياخد تعويض يشتري بيه تلاجه يحط عليها صورة الشهيد اهي تبقى حاجة من ريحه المرحوم ... التعويضات حلوة مفيش كلام 
اللي انت مش واخد بالك منه ان اهالي الشهداء (او اي اب وام في الدنيا) مش تجار مواشي ... لو حد موتله بهيمة ياخد ديتها
الام اللي دفنت ابنها ... دفنت حته منها معاه ... يمكن اللي ممكن يريحها شوية ان موته ابنها جات بفايدة ... مش راح فطيس ...وفر شوية الورق الملون ... انها اشياء لا تشترى يا عم الحاج
وبالمناسبه ... شهداء محمد محمود 2012 من اللي هيحاسب عليهم؟

لا وكله كوم وموضوع ابلج ولجلج ده كوم تاني؟ ... يعني ايه ابلج ولجلج ديه؟ .... حاجة كدة زي جوج وماجوج ولا ايه؟ مش فاهمة والنعمة

الاخوة في الداخليه (اللهم اجعل كلامنا خفيف عليهم) ... اوعوا تفتكروا انكم في امان فاكرين 8 اكتوبر 1981 ... لما دخلوا عليكوا في اسيوط وادبحتوا ... مانتوش كلاب حراسه ... انتوا بني ادمين ... انتوا منا مش منهم ... كفايه كدة ... 
اخواتنا في الجيش ... هايفضلوا يصطادوكم واحد واحد زي العصافير ... انتوا اللي هتدفعوا التمن ... انتوا اللي هتخشوا حروب بره وجوه ... كفايه كدة
كفايه كدة........
MishMish

7 comments:

Tarkieb said...

هو انت عايز ديمقراطية ومش عايز اسلامجية؟ اللي يخاف م الدح مايقولش اح...نفسي افهم هي فين دي الديكتاتورية لواحد اجبر انه يحمل السلطة التشريعية عشان ماحدش طايق المجلس وتركيبته؟؟ واجبر انه يحصن المجلس الوحيد اللي فاضله من كلاب مبارك ؟ واللجنة اللي عليها خناقة ومحتاجة هدوء وتفاهم بيتلعب بيها من ناس اهم حاجة مصلحتهم.......منين بتقول ديمقراطي وبتعايره انه جاب فوق الخمسين؟ اذا كان ميركل جابت تلاتين في الميه...

Migo Mishmish said...

تصدق مش عارفه ارد عليك
هو انت مش عايش معانا يا عم الحاج
الاعلان الدستوري ديه بيقول كدة بالظبط مورسي ربكم الاعلى
وبعدين حصن تأسيسيه محدش طايقها لان اللي فيها ظلاميين كون انهم اسلامين ده مشكلتهم هما مش مشكلتنا احنا
مش يقعدوا يهذوا ويبتزونا باننا مش مسلمين نبقى منتكلمش علشان بنكره الاسلام
والله مصر موجودة من قبل الاديان كلها
ثم اهو موضوع اعادة التحقيقات رد عليه النائب العام الجديد انه مش هايحصل غير لما تظهر ادله جديدة
هايوصل لايه ... يعدم حسني مبارك ... حسني مبارك كدة كدة ميت
وضحايا ماسبيرو ومحمد محمود ومجلس الوزراء والقطارات اللي عماله تلبس في بعضها مين هايحاسب عليها
ممكن يعدم مبارك انما هايقدر يعدم طنطاوي؟ ماظنش
وبعدين انت فاكر اني متضايقه على عبد المجيد محمود والله لو كان ضربه بالنار ولا كانت تفرق ... ده خاربها من ايام المقلوع الله يحرقه
ثم رئيس ايه ده يا اخويا اللي بياخد قراراته من بديع
ماكان بديع يكلمنا هو اسهل
مكتب الارشاد بيحشد الاخوان من الساعه 3 الضهر ينزلوا يأيدوا قرارات مورسي يبقى المرشد عارف ومستشارين الرئاسه مش عارفين
بلاش والنبي تحط ابو قرش على ابو قرشين وتقول ديموقراطيه وبطيخ دول مش بتوع ديموقراطيه دول بتوع لا تجادل ولا تناقش يا اخ على
كفايه ان محدش بيدافع عن القرارات المهببه ديه غير الاخوان ... الا عمري ما شوفت ولا قرايت ان حد مؤيد الا اما كان اخوانجي
MishMish

العصفورية said...

إلي ميجو ومشمش
أوافقك الرأي أما اللجان الإليكترونية التي تتلقي الأوامر بالرد علي كل رأي يخالف آراء السيد الرئيس وجماعته والمؤيدين والمنافقين الذين تعودنا علي تصفيقهم لأي رأي يصدر من الكرسي بصرف النظر عمن يجلس عليه فقد تعودنا علي إسقاطهم منذ أزمان. أدعو الله لمصر بالنجاة من الفتنة التي يزرعون بذرتها هذه اليام.
د. محمد زكريا الأسود

العصفورية said...

إلي ميجو ومشمش
أوافقك الرأي تماماً. وأدعو الله أن ينجي مصر من الفتنة التي يزرعون بذورها هذه الأيام. د. محمد زكريا الأسود

العصفورية said...

إلي ميجو مشمش
لا أعرف لماذا لا تظهر تعليقاتي عندك. مش مشكلة احاول تاني.
اوافقك ياميجو وأذكرك أنني كتبت بوستا ايام الانتخابات بعنوان " الله يسامحك ياشفيق خليتني انتخبت مرسي" وقلت إني وإن كنت أري ان انتخاب رئيسا من الإخوان خطأ بسبب أدائهم السياسي من بعد الثورة وحتي الانتخابات غلا أن انتخاب شفيق جريمة. إذا ياميجو والكلام لأصحاب اللجان الإليكترونية إياها زي صاحب التعليق الأول، ناس كتير انتخبت مرسي علشان مايجيش شفيق ونظام مبارك (ودي حاجة تتحسب فضيلة ومعروف لأهل مصر اللي مش من الإخوان)، وليس لكي يصبح مرسي فرعوناً آخر بمباركة جماعته وشوية الفلاحين اللي شحنوهم النهاردة زي .... أمام جامعة القاهرة. أوافقك وتحياتي.
د. مجمد زكريا الأسود

بنت القمر said...

ابلج ولجلج :)

بنت القمر said...

ابلج ولجلج :)

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق