Wednesday, December 19, 2012

الايام دول ...وكله بيجي على حجر كله يا صاحبي


  • اللي كان زعلان قوي على مبارك ومكنش شايف انه بقاله 30 سنه بيخرب فيها وقال على الثورة مموله وقام بيها الخونه والعملاء وفضل حابس نفسه في نظرية المؤامرة ... لبس حكم الخونة والعملاء 
  • اللي زاط زي العبيط وفضى الميدان وخلص الثورة وروح بيتهم واداها للعكسر (زمايل المقلوع اللي كانوا قايمين نايمين مع بعض) بيضه مقشرة .... العسكر طلعوا تيت امه 
  • المسيحيين اللي في قطاع كبير منهم مدجن ومبيتكلمش غير في اللي يخصه ... كنيسه اتحرقت او حد مسيحي اتقتل وعايشين مدروشين ومختفيين ... زعلوا ليه لما طلعوا في ماسبيرو والجيش كان بيجري وراهم بالمدرعات في الشارع في مشهد عبثي اظنه محصلش في الحرب مع اسرائيل ومحدش اتعاطف معاهم وفي ناس منهم لسه مقبوض عليهم لغايه دلوقتي ... هو حد عارف انتوا مين ولا حد بيشوفكم في اي حته؟
  • الاخوة بتوع عجله الاستقرار وحزب الكنبه وخلونا نخلص اللي قالوا على ست البنات هي ايه اللي وداها هناك ... احب اقولهم الف مبروك على علقه الاتحادية وحكم الاخوان ومليشيات الجماعة . يمهل ولا يهمل
  • المسلمين اللي صدقوا ان الاقباط بيعتدوا على الجيش المصري وكانوا مصدقين ان الاقباط سرقوا فعلاً المدرعات وداسوا بيها على بعض علشان يورطوا الجيش وقاصري الفكر والعقل اللي فاكرين ان مفتايح الجنه معاهم وقالوا دول ما يتقالش عليهم شهداء علشان كفار ... احب اقولكم انتوا في عرف الاخوان والسلفين كفااااااااااااااااااااااااار في حين ان النصارى اهل ذمة هاهاهاهاههاهاها.
  • القنوات الفضائيه اللي تحت حصار الشيخ بيبسي واتباعه زعلانين ليه مش هما اللي طلعوه هو وكل معتوه وضيعوا وقتنا معاهم في حورارت بيزنطيه ملهاش اي معنى وساهموا في تلميعهم ونشر وساختهم الفكرية على الملاء؟ .... مش خدتوا فلوس الاعلانات ... ادفعوا التمن على ايدين حازئون.
  • السادة ظباط الداخليه اللي مبيتشطروش غير على النشطاء السياسين وبتوع الاعتصامات اللي اكيد مش غاويين مرمطة ونوم في الشوارع واللي كانوا  حاضرين وشايفين حفلات تعذيب معتصمين الاتحادية على ايدين مورسي وميليشياته ... جالكم اللي يحط السيف على رقبه مدير مباحث الجيزة علشان يفرج عن 4 ارهابين انتوا عارفين ومتاكدين انهم خطر على المجتمع بجد.
  • الاخوة في الجيش مش فضيتوا اعتصامات بالقوة وطرطروا وسحلتوا وعريتوا وقتلتوا ولاد بلدكم اللي مكانوش عارفين يدافعوا عن نفسهم قدامكم ... اديكم بتتقلوا من غير ديه ولا تمن على الحدود وانتوا مش قادرين تدافعوا عن نفسكم.
  • الاخوة اللي كانوا مقطعين نفسهم على غزة لمولها تبرعات وعملوا لها قوافل طبيه في حين ان الصعيد مهري فقر وامراض وجهل .... غزة كويسه كلموني عن مصر بقه؟
  • اللي طول الوقت بيتريقوا على الصعيد وبتعاملوا معاه على انه منفى .... الصعيد هو اللي بيدمر اي فرصه ليكم في التطور في كل استفتاء او انتخاب ... اتريقوا بقه.
  • اللي كانوا بيقولوا احنا عايزين حاكم مؤمن يراعي ربنا فينا ... اهو جالكم اللي بيقول على نفسه "انا ربكم الاعلى" ..... شخصياً.

MishMish

5 comments:

لورنس العرب said...

الحقيقه مش عارف اقول ايه

Tears said...

ايه يا ميجو الاحباط ده...حاسة ح انتحر من اليأس بعد الكلام ده

اكيد ح تحصل حاجة كبيرة تغيير الوضع اللى احنا فيه ده

Migo Mishmish said...

ما تقولش حاجة يا اخويا ... انا شايفه اننا نعمل هجرة جماعيه سنتين تلاته بره مصر يكونوا السلفين على الاخوان على المعارضه والفلول والكنبه خصلوا على بعض ونكون احنا عملنالنا قرشين كويسين نرجع نستثمرهم هنا


Tears
انا مش ميجو ... انا مشمش المدام ...ام العيال ... الست امينه (مش امينه قوي يعني) ايدي على كتفك يا حاجة يا رب حصل حاجة كبيرة ... يا رب علشان خاطر ناس اداس عليهم 30 سنه ونفسهم يعيشوا كبني ادمين ولو سنه واحدة ولا سنتين قبل ما يموتوا
MishMish

strategicalone said...

انا عندى احساس شرير وشمتان فى المصريين موش عارف لية

nabil sami said...

احسنت

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق