Friday, April 25, 2008

ريحه الجوافه



فى شهر سبتمبر من كل عام
لما السما تبدأ تغيم
والصيف يشد الرحال
اشم ريحه الجوافه
واشوف شنط المدرسه
متعلقين فى الفاترينات
جنب الكوتشيات
افتكر لما كنت لسه بحلم
وحلمى لسه نونو
لسه بيفتح عيونه
ايام التلمذه
والمريله ..ام زراير من ورا
وافتكر كتاب القراءة وكتاب الحساب
والبت رحاب
لما كنت بمسك ايديها
ونروح المدرسه
والتكت والجلاد
وعمو فؤاد
وطبق البليله
وانا باسمع ابله فضيله
ولما نلبس لبس جديد
من بنزايون وصيدناوى
والفرحه جوة عيوننا
وياسلام لما نطلع رحله
ولا نخرج يوم العيد
نجيب صواريخ وبمب
ولما تيتا تعمل محشي كرنب
وتلم العيال حواليها
................
اشم ريحه الجوافه
افتكر الصحاب والحبايب
وافتكر الى غايب
ايام ما كنا شله
ايام ماكنا لمه
اصل الحياه روايح
ودلوقتى حتى الورد
ماعدش له ريحه
مجرد منظر جميل
حتى شوف النيل
زعلان متضايق
لانه معادش فيه حبيبه
يرمو همومهم فى حضنه
وكل شيئ بقى صينى
سهل يتكسر
حتى مشاعرنا برضه صينى
وما عادش باقى منها
غير ريحه الجوافه
ميجووووووووووووووو

11 comments:

عمو said...

الله عليك
وعلى كلامك

خليتنى مبسوط جداااا
ان لسة فى حد بيحس كدة

كلامك جميل ومش معقد
وفيه الفايدة
وملكك بتقوله زى مانت عاوز
كأن الحروف دى بتاعتك

ومش هزود ولا كلمة تانية طالما عمنا الكبير قاعد عندك فى السايد بار....ـ

تحية وتقدير
ودعوة وطلب بالستمرارية

عمو said...

عفوا هعلق تانى
انا منذ توقيت الاتعليق الأول للآن قرأت المدونة بالكامل
وطبعا فهمت
ان المدونة مشتركة بينكم

الحقيقة اندهشت
وسعدت
بكما
كثيرا

مستوى ثقافى واحساس عالى
لايقين على بعض

وان شاء اللة ابنكم اللى جاى تربوه على نفس القيم والموروث
ويكمل المسيرة

سؤال صغير
هتتخانقوا انتوا التلاتة على المدونة برده؟
:)
مش عارف لية حاسس انكم ساكنين فى العمارة اللى حنبى

ربنا يوفقم ويسعدكم

كل سنة وانتم طيبين
عيد ميلاد مجيد

تحياتى

Migo Mishmish said...
This comment has been removed by the author.
Migo Mishmish said...

الاستاذ عمو : شرفت البلكونه معانا ولو انك ماشربتش حاجه... انا مبسوط ان فيه حد بيسمعنى وبيحس بنفس احساسى انا ومشمش ولما بسمع تعليق حد زى حضرتك ..باحس ان الدنيا لسه بخير وان مصر ممكن تتغير بيا وبيك وبكل الى زينا ..الله عليك ياعمو خليتنى مبسوط ومنتشي انا و مشمش وحسستنا ان فيه حد معانا عالخط ..شرفت البلكونه ياعمو

^ H@fSS@^ said...

انت فنان انسان يا ميجو

انا حاسة انك و مشمش قدي في السن
يعني زي كانك بتتكلم عن نفس ايامي لما كنت في ثانوي
ياااااااااه
و هي بس ريحة الجوافة
و صوت الشرق الاوسط الصبحية
و لما نعدي جنب محل الفول والطعمية الصبح و نخطف كام سندوتش
و بياعين الفراوية و الدوم اخ رالنهار
و زحمة المدارس وقت لما تخرج كلها مع بعضها
و المعاكسات البريئة اللي على جنب
و المعاكسات اللي مش بريئة

ههههههههههههههههههههه
ياااااه
ايام زمان دي مترجعش ابدا
م شعارفة اشكرك و لا ادعي عليك
فكرتني باللذي مضى
ايام لما كنت في ثانوي
يعني من يجيي 15 سنة كده
يااااااااااااااااااااااه
بعد اربعتاشر سنة خدمة في ثانوي بتقلي اقف


تحياتي

Migo Mishmish said...

شكرا ياحفصه على تعليقك ..انا برضه كنت فى ثانوى من حوالى 14 سنه ..انا متخرج سنه 94 فى الثانويه ..انا حاولت فى القصيده دى انى اعبر عم احساسى بالفتره دى ايام ماكان كل حاجه ليها طعم تحسي انها ايام من زمن اسطورى ..لكن دلوقتى ماعادش حاجه ليها طعم ..مع ان الحاجات هى هى مابتتغيرش لكن احنا الى احساسنا بالحاجات هو الى بيتغير ..فاكرة البوم بم بم وفاكرة عمو فؤاد والمسلسلات بتاعه اهلا بالسكان والبرادعى وفطوطه وميزو والبلى فى الشارع ولما كنا نعمل طيارات ولما نقعد نحكى عالعفاريت ياااااااااااااه كانت ايام جميله

أحساس لسه حى ...أنا مش موافق said...

عزيزتى

معلش انا حبيت اوريكى حقيقة قطة

واظن انك اكيد هتتصدمى من الكلام اللى هتشوفيه

بس الحقيقه دايمن بتصدم

خشى المدونه وهتعرفى

سلام

Desert cat said...

يااااااااااه فكرتنى يا ميجو بايام المدرسة
الهى لا يرجعها تانى ايام كنت بكرهها جدا علشان الصحيان بدرى والمذاكرة
الحمد لله انى خلصت بعد سبعين سنة تعليم

بس بموت فى ريحة الجوافة وفى الجوافة

طبعا مكانش ينفع يعدى النهارده من غير ما اقولكو عيد سعيد
كل سنة وانت طيب ومشموشة حبيبتى طيبة وبالف خير
والسنة اللى جاية نشوف بلكونات صغنونة مالية النت
كل سنة وانتوا بالف خير
عيد سعيد

Migo Mishmish said...

وانتي طيبه يا قطة يا كيداهم
معلش انا وميجو كنا مشغولين امبارح معرفناش نرد عليكي علشان التعليق الغريب اللي قبل بتاعك ضيع وقتنا
انا هاسيبه مش هاشيله لكن هاردلك اعتبارك يا قطة
اخلص بس شوية الشغل اللي في ايدي وارجع تاني
Love,
MishMish

Empress appy said...

انا بحب الجوافه قوييييييي
بس كل الذكريات دي حلوه قوي ورقيقه
وكلنا لنا نفس الذكريات

Anonymous said...

الله يا ميجو يخرب عقلك يا مجرم رجعتنى 15 سنه يا ولدايام المدرسه .انت يا ميجو بدعت اوي في القصيده دى و وصلت لمرحله متقدمه من النضج بالاضافه للبساطه اللي هي اهم حاجه فى شخصييتك انت يا ولد صاحب عمرى و انا قريت كل اعمالك الادبيه و الشعريه و انت عارف انها كلها بتعجبنى بس دى انا حاسسها اوى .اخوك زخارى

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق