Thursday, June 5, 2008

حاجة تقرف

بقالي كتير مابكتبش ولا بطلع البلكونة علشان العيشه بقئت تقرف مفيش حاجة واحدة عدلة بتحصل. مش مصدقين؟ عدوا ورايا

واحد: قانون الطوارئ اللي صوتوا عليه ساعه وسكتوا في مجلس الشعب وبقه امر واقع وقالوا اللي يخاف منه الارهابين وتجار المخدرات ومثيري الشغب. طيب ماشي هاحط جذمة في بقي ومش هتكلم طالما هيخوف الارهابين وتجار المخدرات ومثيري الشغب. بعد تطبيقه بـ 48 ساعه مش اكتر حصلت حادثه الزيتون في عز الضهر في ازحم شارع فيكي يا مصر. عمل ايه قانون الطوارئ للعالم اللي اتقتلت ولاالهوا ازاي حاجة زي كدة تحصل في عز الضهر محدش عارف. بالزمة حاجة تقرف ولا لا؟


اتنين: بعد حادثة الزتيون بـ 24 ساعه اتكرر نفس السيناريو تاني في عز الضهر في ازحم منطقة فيكي يا اسكندرية. عمل ايه بقه قانون الطوارئ محدش خاف اهو. ولا يمكن محدش قال في اسكندرية ان القانون اتطبق تاني. طب كان حد من الحكومة بعت رساله من موبياله لبتوع اسكندريه علشان يخوفوا بيها الارهابين وتجار المخدرات ومثيري الشغب. بالزمة حاجة تقرف ولا لا؟


تلاته: احداث دير ابوفانا ازاي يعني يبقى في ضرب نار وقتلى وجرحى واسرى والناس تتصل بالبوليس ويجي بعد البلاغ باربع ساعات ايه مكنوش لاقين مواصلات ولا العربية عطلت في الشارع فنزلوا يزقوا. وسيبكم من الهم ده كله بيقولوا ان المشكله اساسها ان في نزاع ما بين الدير والعرب- ايه اللي جاب دول يا اخويا عندنا احنا اللي عايش عندنا في مصر بنقول عليهم مصريين-على حته ارض هي المفروض من اراضي الدولة. وبعدين المحافظ يقول لبتوع الدير لو عايزين الارض لازم تراضوا العرب. يا سلام يا سلام


يراضوا العرب؟! ........-مش عارفه اكتب الكلمة علشان ميجو بيزعل لما بقبح- تبقى الارض ملك للدولة ولما نحب نشتريها نراضي العرب مش الدولة يا اخي ...... تاني. العرب دول ايه كينونتهم؟ وفين قانون النيله الطوارئ ولا ده بيمشي عالغلابة بس. هما محدش فيهم بيفكر ليه قبل ما يتنيل يفتح بقه ويخرج زباله. اللي فهمته من تصريحات الحكومة الذكية هو كالتالي:


اولاً: لو انت بني ادم مسالم وعايز تمشي بالقانون وماليكش في البلطجة هتاخد على دماغ امك ويوم ما تحب تعترض هتاخد بقانون الطوارئ على دماغ ابوك وبقيه عليتك


ثانياً: لو انت بلطجي او تنتمي للعرب وعايش على قفا الخلق وبتفرض اتاوات عليهم وتاخد من ارض الدولة زي مانت عايز. الدولة هتجيبلك حقك وتلملك الاتاوة من الناس وتقولهم راضوا العرب وقانون الطوارئ (يمسحوا بيه .....) -بلاش علشان ميجو بتضايق- تنتهي صلاحيته عند بدايه بواظان اهلك. بالزمة حاجة تقرف ولا لا؟


اربعة: كنت ماشية انا وميجو من كام يوم جنب جامع ليه الفضل من تحويل منطقتنا من منطقه عادية جداً الى قطعة من افغانستان كلها من الملتحين والمنقبات والاطفال الصغار في عمر 5 او 6 سنوات بعباءات سودا. وبغض النظر عن رائي في العالم ديه - شفت واحد ملتحي ماسك مفاتيح الجامع وافش عليها زي ما تكون مفاتيح الجنه وتلات ستات منقبات وواحدة منهم معاها عيلين صغيرين عايزين يصلوا في الجامع- وساعتها كان في صلاة بس طبعاً انا مش عارفه كانت ايه- المهم الدنيا كانت حر موت ودول كل واحدة فيهم لابسه اتواب من السواد وسايبين بيوتهم وعيالهم ونازلين الجامع علشان يصلوا وصاحبنا بكل تناحة واقف ماسك المفاتيح في ايد والباب في ايد تاني وراح قاليهم- وبرضه معرفش ده حديث ولا قران- خير صلاة المراة في بيتها. يا سلام يعني كل واحدة سايبه وراها اللي وراها علشان تنزل تأدي الفرض وتقابل ربنا في الدقتيتن بتوع الصلاة بعيد عن الدوشة والتشتت يقوم البهيم ده يقفل باب بيت ربنا في وشها


ليه ان شالله بتاع ايه يعني. هو ماله هي تصلي في بتها ولا في الشارع هو يفتح الباب ويحط لسانه في بقه علشان ده مش بيت ابوه

طيب والعيال الصغريين اللي شافوا امهم بتتعامل بقله الادب ديه تفتكروا هيبصوا ازاي لاي واحد ملتحي بعد كدة. ولا لما يحسوا ان الستات ربنا خلقهم وقرفان منهم يعني لولا العوزة بس لا ومش كدة وبس عليهم فروض زيهم زي الرجالة بس بس بشرط ربنا مايشوفش خلقهم في الجامع. بزمتكم حاجة تقرف ولا لا؟

تحديث
العزيزة حفصة بعتت تعليق تقول فيه الحل اننا ننضم الى البدو العرب علشان نعرف ناخد حقنا وانا عايزة اقولها نروح بعيد ليه . ما الجيزة قريبة الناس زهقت من تطنيش الحكومة عملوا لشارعهم سايت عالنت
http://giza.7p.com
يا سلام لما تنتصر العشوائية والغوغائية على النظام المتهالك

Love,

MishMish

15 comments:

belal said...

أول حاجة شكرا عالشاي كنت مكسل أقوم أعمل لنفسي واحد


المهم .انا عاوز أعرف انت تقصد ايه بالعرب..دول خليج يعني..وللا مصريين..وللا كائنات مريخية يعني..وللا المسلمين يعني

في النقطة الرابعة : أنا مستغرب برضك من موقفك ..واحد مربي دقنه..وانت مالك انتا ..ما يربيها ..حد زعلك في حاجة..وللا دقنه بتشوكك ..مش فاهم ..وللا هيا حرية الدين..بتيجي هنا ..وهوووب..ستوب..وقف يا سطى...واحد عايز يربي دقنه ..يربي دقنه..واحدة عاوزة تتنقب..هيا اللي هتلبس النقاب مش انتا يعني

بخصوص الموقف بقى ..دا راجل ..ربنا خلقه غبي ..هنعمل فيه ايه

واحد مش فاهم حاجة في أي حاجة ..راجل جاهل

وشكرا عل الشاي مرة التانية ولاونه ناقص سكر

Desert cat said...

سورى يا مشموشه سؤال بس للاخ نار ده هو اللى مربى دقنه ده مش المفروض انه مربيها سنة على الرسول صلى الله عليه وسلم مش المفروض انه اقتدى بيه فى اللحية يبقى ميقتديش ليه باخلاقه .. هل الرسول اللى قال استوصوا بالنساء خيراً .. ورفقاً بالقوارير كان بيتعامل معاهم بالشكل كدا ... والله تلبس نقاب تلبس كفن والراجل يربى دقنه بس قبل ما يربيها يكون ربى نفسه الاول هو حر
محدش اعترض عليهم انما طالما اختار او اختارت لنفسها الهيئة دى يبقى يا اما يكون قدوة للمسلمين ومراية لغير المسلمين يا اما يسيبهم علشان الاسلام مش ناقص تشويه اكتر من كدا وفى الاخر نيجى نقول الناس بتشتم فى المسلمين من اييييه ماهو من الافعال دى مش كل واحد عمل دقن بقى ملاك ولا كل من لبست نقاب الطاهره الشريفه
ومتنساش وانت جاى المرة اللى جاية نقدم لك الشاى سادة

belal said...

يا أختي تعالي على نفسك شوية واقري التعليق الكامل

انتي شايفاني قلت على الراجل دا ايه

اقري ربنا يكرمك ...قلت إنه غبي ومش فاهم حاجة في أي حاجة ..راجل جاهل

يعني مش مختلف معاكي في أي حاجة

أنا معترض على التعميم....مربي لحيته...ياااااااااي ..يع..منقبة ....إفيه ..وعن النظرة العامة منهم ..والإشمئزاز

belal said...

ثم أي مسلم واجهة للمسلمين مش لازم يعني يكون مربي دقنه عشان يكون مسلم...أي حد في تصرفاته يكون عارف إنه واجهة

Fantasia said...

هي فعلا حاجة تقرف.. أنا معاكي
وسعيدة جدا انك بتنتقدي اللي شوفتيه قصاد الجامع.. أيوة كدة.. الدير والجامع الاتنين في مصر.. وأي مصري من حقه انه ينتقد الاوضاع الغلط اللي في بلده

شوفي يا ست الكل.. قانون الطواريء مالوش دعوة فعلا لا بجرايم القتل ولا السرقة بالاكراه
قانون الطواريء دا بتاع التنظيمات السرية والخلايا الارهابية, والغرض منه منع حدوث الجريمة أكتر من كونه بيقبض على المجرم بعد تنفيذها. هو صحيح بيستخدم للغرض التاني برضه, لكن هدفه الأساسي هو القبض على العناصر الارهابية والمثيرة للشغب قبل ما تقوم بتفجير أو غيره

ورغم ان الهدف لا خلاف عليه, إلا أن تحقيقه عن طريق قانون زي قانون الطواريء هو اللي عامل المشكلة, عشان كدة كانوا عايزين يستبدلوه بقانون الإرهاب, لأن مافيش أي بلد تفضل ماشية على قانون الطواريء لأكتر من ربع قرن زي حالاتنا كدة.. ودا بسبب غياب قانون بديل لمكافحة الارهاب

موضوع الدير بقى اللي عجيب جدا.. نفسي أفهم الأرض دي بتاعة مين بالظبط؟ وحتى لو حد واخدها بوضع اليد, مافيش قانون يفصل في الموضوع؟ ولا عشان الحكاية فيها دير يبقى لازم مجلس عرفي ونراضي بعض عشان الليلة تعدي؟
نفس الموضوع دا بيحصل كل مرة لما تنشب خناقة أحد اطرافها مسيحي والتاني مسلم, يقولوهم بوسوا راس بعض كأنها خناقة في حوش حضانة, ولا قانون ولا هيبة دولة ولا كأننا عايشين في قبائل ما قبل التاريخ! تفرق إيه لو كان الطرفين المتنازعين مسلمين ولا مسيحيين ولا واحد كدة وواحد كدة؟ مش القانون واحد؟

والمصيبة الأخيرة دي بقى اجتماعية صرف.. راجل ممسكينه مفاتيح الجامع يقوم يتحكم في مين يدخل ومين ما يدخلش! طيب الست المنقبة عملت إيه لما قالها كدة؟ مشيت؟ خافت منه؟ هما كمان عايزين يقطعوا رجل الستات من بيت الله؟ طب واحد زي دا مش حلال فيه قانون الطواريء بذمتك؟ مش دا إرهاب برضه؟

لا اللحية ولا النقاب لهم دعوة بالتدين, واللي بيتركن على المظاهر والمبالغة فيها بيكون غالبا فاضي من جوا, زي ما انتي شوفتي كدة. النقاب دا كمان منعه أهم من قانون الطواريء, حفاظا على الأمن. أقل حق للمجتمع هو التأكد من هوية أفراده. إزاي يعني حد يمشي زي اللهو الخفي كدا في وسطنا؟ إيش عرفني مين اللي تحت السواد ده؟ يعني لو واحد لابس لبس منقبة وراح غازز واحد بمطوة في الشارع وجري! خلاص كدة؟ محدش يقدر يعرف دا يطلع مين.. بالسلامة بقى. واللي عايز يسرق يسرق واللي عايز يفجر مكان يفجره, ومحدش يقدر يجيبه

لأ بلد الأمن والأمان فعلا

Fantasia said...

دي قصة حقيقية كتبها واحد اسمه رامي جلال

القناع

كانت تجلس معى في نفس العربة وقد توارت تماماً خلف السواد, لم يظهر منها غير عينيها, وبالطبع لم أستطع تبين ملامحها.. الطريق طويل والمشوار يستغرق حوالى الساعة, وعلى مدار الرحلة ترجل الركاب واحداً تلو الآخر, ولم يبق في النهاية سوانا.. كان السائق ينظر في مرآته من فترة لأخرى "ليؤمن" علينا; فالسائقون في مثل هذه الحالات يخشون تحول عرباتهم إلى "ملتقى العشاق".. كنت أختلس النظر إلى عينيها بين الفينة والأخرى وقد بادلتنى نظراتى أحياناً, شعرت أنها أرادت تبادل أطراف الحديث إلا أن أعرافاً معينة قد منعتها من ذلك..
لم تكن تصدر أية إشارات من هذا الجبل الأسود الجالس بجانبى, فقط بعض التنهدات من فترة لأخرى, ربما بفعل الحر.. كنت أعرف أن هذا السواد يخفى خلفه ملامح رقيقة أجبرتها الظروف على التوارى.. هذا الجسم الضئيل الجميل وتلك العيون الزرقاء السماوية يشيان بما تحمله صاحبتهما من نقاء وصفاء, لم يكن جسمها فائراً ولكن تولد عندى شغف لأتعرف على ما يخفيه هذا الساتر.. ثم عرفت فقد حان دورى في النزول, فطلبت من السائق التوقف, وحين غادرت العربة كان الهدوء يلف المكان, ولم أسمع شيئاً سوى صوت السائق مخاطباً الجبل الأسود القابع في العربة:
- "أجهز.. خلاص عدينا كمين الشرطة يا مدبولى".

Anonymous said...

العزيزه مشمش

قانون الطوارئ بيقولوا انهم عاملينه عشان المجرمين لكن اللي باينلنا عكس كده لا الجرايم اختفت و لا قلت بالعكس ده كأنهم بيتحدوا القانون تمام زي حوادث الاغتصاب بيعدموا الجناه و برضه الناس اللي عقلها بيوزها تعمل نفس العمايل ديه مابتتعظش

و بخصوص المنطقه اللي بتتكلمي عنها انا كل يوم تقريبا بمر من عليها و فعلا بحس اني في افغانستان من اللي عاملينه هناك

للاسف النموذج اللي اتكلمتي عنه اللي ماسك مفاتيح الجامع و كأنه ماسك مفتاح الجنه فيه منه كتير
بيفسروا الدين علي مزاجهم
طب انت مالك الست عايزه تاخد ثواب و تصلي في الجامع ايش حشرك انت
للاسف الرجاله بيدوا نفسهم صلاحيات فوق العاده عشان يتحكموا في الستات

تحياتي ليكي علي الموضوع المميز و التساؤلات اللي في محلها

سلامي لكي و لميجو

Migo Mishmish said...

الاستاذ نار شكرا على وجودك فى البلكونه وشربك شاى معانا ..ولو ان مش من اللياقه والذوق انك لما تكون عند ناس وتقولهم الشاى بتاعكم سكره ناقص او طعمه وحش ..المرة الجايه هانجيبلك شاى بلبن يتناسب مع سنك ..لانك مش هاتنبسط بالشاى التقيل بتاعنا ..واضح انك لسه طالب فى الكليه ..وطبعا انا مقدر حماسك ..انا فاكر ايام لما كنت عيل فى الجامعه كنت بعمل كدا ..واضح انك مافهمتش اى حاجه من الكلام الى اتكتب
اولا المقصود بالعرب فى البوست البدو هما اسمهم كدا فى اللغه الدارجه
ثانيا احنا ماهاجمناش الى مربى دقنه ولا جبنا سيرة الدين احنا بنتكلم على واحد غبى.. فيه منه ملايين زييه بيفكرو بنفس طريقته وواضح انك بتفكر بنفس طريقته ..
ثالثا احنا ماجبناش سيرة النقاب او اللحيه وان احنا معاهم او ضدهم احنا مش عاجبنا موقف الراجل فين بقى التعميم على النقاب واللحيه ؟فهمت ياناااااااااااار؟
كفايه عليك كدا النهارده والمره الجايه اتمنى انك تفهم المكتوب فى البوست وبعدين تعلق عليه

Migo Mishmish said...

القطةالحبيبة
بصي انا بعض الوقت اللي ضيعته على الاخ مش ووقتكم كمان اللي ضاع قررت ماردش على العالم ديه
واللي رد ميجو على فكرة مش انا. الاخ نار مش فاهم هو الغرض من الكلام ايه
الستات دول صعبوا عليا قوي لاني فاكرة اني كنت هاطق من الحر ودول لابسين اسود وهدوم كتير قوي فوق بعضها وجايين علشان يصلوا وهو مش عايز يدخلهم. افرضي حتى ده مش وقت صلاة وهما داخلين يقروا قران او يقعدوا يريحوا اعصابهم في حضرة ربنا
انا بعمل كدة لما ببقى مضايقه باروح الكنيسة اقعد هناك لغايه لما نفسيتي تستريح ومش لازم اكون رايحه بغرض الصلاة. عارفه لو انا داخلة الكنيسة ولاقيت الراجل اللي معاه المفاتيح اتكلم معايا بالطريقة ديه كنت نطيط في كرشه
ليه بنظلم بعض وبتعامل مع بعض بالطريقة ديه. طريقه كلامة مع الستات كانت نيله يتكلم معاهم باسلوب كويس طيب مش خناقه تلم الناس. انا بطبعي ماليش دعوة باللي بيحصل في الشارع خالص لكن الطريقه كانت بايخه شدتني
يلا منهم لله
Love,
MishMish

Migo Mishmish said...

فانتا الحبيبة
انا مش بتكلم في موضوع الدير على اساس ديني خالص. انا بس مضايقني ان القانون مابيمشيش غير على الغلابة
في ناس كتير ومنهم ميجو قالي ان العرب والبدو دول ليهم قانونهم الوضعي بيمشي على الكل بس انا شايفه ان ده وضع غلط يا فانتا
يعني هما ممكن يحوطوا حته ارض ويرفعوا عليها علم ويغيروا اسمها ويستقلوا عن البلد
مفيش حاجة اسمها كدة ازاي يبقى في سلطة فوق القانون. يعني دول ليهم الحرية انهم يخطفوا ناس ويطلبوا فديه مثلاً ويفرضوااتاوات عالناس ده كلام ما يمشيش
قانون الطوارئ حول الظباط الى لمحترفي تعذيب. قانون الطوارئ بيطبق عليا وعليكي وعلى اسراء واحمد وغيرهم لكن العالم ديه قانون الطوارئ لا يعني ليهم شيء
Love,
MishMish

Migo Mishmish said...

الحبيبة فانتا (تاني) انا انتقدت طريقه تعامل الراجل ده مع الستات
يعني شوفي كم البرامج الدعوية والبرامج اللي بتفهم الناس ان الارهاب حاجة والاسلام حاجة تانيه
تصرفات واحد بهيم زي ده بتضيع كل حاجة
Love,
MishMish

Migo Mishmish said...

الاجندة الحبيبة
اللي بيخليني افرقع من اي قانون في البلد ديه ان مفيش تنسيق. انا مش عارفه هما لما بياخدوا بيعملوا ايه. قانون الطوارئ معمول علشان توريث الحكم اكتر من كدة مفيش
فاكرة حادثه التحرش بتاعة وسط البلد ما عربيات الامن المركزي ملقحة عند دار القضاء العالي محدش اتدخل ليه. فين عربيات الدورية فين التواجد الامني المكثف عملنا ايه بالقانون ولا الهوا
وبعدين انا مش مضايقه من موضوع التوريث الريس عايز يلاقي شغل لابنه ايه الازمة في كدة احنا حاسين بيه لكن حبه عليه وحبه علينا مش كله علينا

والاخ بواب الجنه من الواضح انه بني ادم تافه محدش بيسمعله فمصدق لاقي حد اعتقد انه اقل منه فطلع عقدالنقص بتاعته عليه
Love,
MishMish

Migo Mishmish said...

الكابتن نار ياحبيبى نار ..تانى
انا قريت تعليقك فى البوست بتاع الباشا ظابط امن دوله ..قول كدا بقى انك من بتوع الجماعه المعصورة وانا قول الواد متعصب ليه ونافش ريشه ..انا كدا فهمت الفوله !!
سؤال ليك يابو(.....) انتو اكتر ناس بتحبو مصر فى ايه؟ عايز اعرف؟ لما الكابتن ابو (....) الكبير يقول طظ فى مصر؟ ولا لمايقول الى مش عاجبه يسيب البلد؟
هما بيلعبو على العيال الى زيك ودقنهم لسه مانبتتش وبتشوكهم
انا قلت الاسلوب المتخلف دا مايطلعش غير من واحد من بتوع الجماعه المعصورة

^ H@fSS@^ said...

انا بقول كلنا نحول لبدو عرب من بتوع صحاري الصعيد و الجبال عشان نعرف ناخد حجنا بايدينا ما دام الحكومة مش عارفة تجيب لنا حجنا من العرب دول
و لا ايه قولكوا؟؟
و يا مشمش اتكلمي براحتك يا حبيبتي عن اي حد تشوفيه ظالم و مفتري و فاكر نفسه مندوب ربنا على الارض
دي مافيهاش مسلم ومسيحي
دي شامها مناظر مقرفة في شارعنا و لازم ننضفها

تحياتي

Migo Mishmish said...

حفصة الحبيبة
ماشي كلامك ماشي
نبقى بدو نبقى عرب نبقى زي مانبقى بس ناخد حقنا مش طول الوقت عمالين يسحبوا من المساحة القليله اللي بنتحرك فيها
الجلاد كان كاتب مقاله في المصري اليوم امبارح بيقارن ما بين حالنا دلوقتي وحالنا من 4 سنين
الراجل حصرنا على عمرنا بفضل الحكومة رجعنا تاني لورا 8 سنين شفتي الهنا اللي احنا فيه
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق