Monday, July 14, 2008

موت وخراب ديار

عمري في حياتي ما قدرت افهم معنى "موت وخراب ديار" غير لما عرفت الحكاية ديه. هي مافيهاش حاجة جديدة. حكاية مش عاديه بس لانها اتكررت كتير مبقتش تفرق. ايه يعني اهو واحد تاني من الناس
الحكاية باختصار حكاية عامل من الالاف العمال ماهواش مختلف عن غيره كتير. سنه مش كبير متجوز ومخلف وعلى قده يعني كل اما يوم يعدي عليه يشكر ربنا انه وصله لغايه الليل مستور ويطلب منه ان يترآف عليه بكرة ويساعدة يعديه هو كمان على خير

ولاني مش عارفه ليه لما الدنيا تحب تدوس على حد تدوس على اللي طالع عينه وسافف التراب انما البشوات والبهوات زي ما يكون متأمن عليهم ضد بلاوي الدنيا

صاحبنا جاله الكبد - بعيد عن السماعين - وزية زي غيرة راح المستشفى اللي تبع التأمين - مستشفى النصر - داخل حالته خطر ومحتاج نقل دم لكن بتوع المستشفي طلع معندهومش دم اه والنعمة مكنش في في المستشفى دم سابوه على ماجتمعوا وكلموا بعض وقالوا "هذا الرجل يحتاج دم. فماذا نحن فاعلون؟" قال احدهم " نبعت عيل صغير لغايه التلاجه علشان يتأكد ليكون في كيس دم تايه كدة ولا كدة في التلاجه" ولما ملقوش وعلى ما ابتدوا يدوروا ياخدوا من اهله. ربنا رحمة وطلع من الدنيا ب 3/4 المدة حسن سير وسلوك

زي ما يكون ربنا قال كفاياه بهدله لغايه كدة "لقد اكمل السعي وحفظ الايمان واخيراً وضع له اكليل البر"زي ما مكتوب في الانجيل عن الانسان اللي بيتألم علشان خاطر ربنا

لغايه هنا وديه لوحده مأساه
بس طلع لسه المأساه جايه ورا. ارملته راحت المصنع تصرف مستحقاته - على فكرة هو شغال في مصنع من المصانع الحربية - ولان الحكومة ما يجيش من وراها غير حرق الدم والكفر
البهوات في المصنع ادوها شيك غلط الاول - آي والنعمة كان غلط وبعد مالست داخت السبعين دوخة طلعولها الشيك الصح راحت تصرف بقه وكانت المفأجاه زي مانتوا شايفين

الرصيد غير كافي للدفع اه والنعمة وختم البنك والتوقيع قدامكم اهو

Love,

MishMish

21 comments:

Desert cat said...

رصيد ايه اللى غير كافى يا مشموشة رصيد المصنع الحربى
Loooooool
والله وعملوها الرجاله
امال فين فلوس الراجل وحقه ومستحقاته
ده حتى تلاقيهم مش جايبين الالفين جنيه
رصيد المصنع فيييييييين
الحكومة ودت فلوسنا من ضرايب لتامينات لحجوزات لغرامات لغيره فييييييييين
يكونشى خلاص نوى يكت بره البلد بفلوسنا ونهبوا المصانع
ولا ايه انا مش فاهمه حاجه
حد يكسب ثواب يناولنى فريزر ادخل جواه لمدة نص ساعه يمكن افوق

اجندا حمرا said...

بجد يامشمش العمليه بقت تغم و تسد النفس

بيجوا بس علي الغلابه اللي مالهمش ضهر لكن لو واحد له ضهر الشيك حيكون له رصيد و كمان فلوسه و مستحقاته حتوصله لحد عنده و لا حيتعب و لا حيروح و يجي
يابنتي دأنا سمعت كمان ان واحد مستشار يعني بيخدم البلد احتاج لعمليه زراعه كبد و لما حاول انه يتعالج علي نفقه الدوله عشان مصاريف العمليه فضلوا يمطوحوا فيه لحد مامات شوفت الغابه اللي بقينا عايشين فيها؟نيجي نسمع بقه ان الاستحقاقات الضريبيه زادت يعني بيلموا فلوس كويسه من الناس طب بيودوها فين؟و ايراد قناه السويس اللي بيقولوا زاد بيروح فين؟ماحدش يرد و لا يبل ريقنا
:(
علي فكره الصوره الجديده في واجهه المدونه جميله مبروك عليها ياقمر

Migo Mishmish said...

اه يا قطة رصيد مصنع 99 الحربي للأدوات المائدة والاسلحة والذخيرة صفررررررررررررررر
رصيد المصنع غير كافي انهم يصرفوا للوليه 10000 ويمكن اقل مكأفاه نهاية الخدمة
مع كل الخصومات بتاعه التأمينات وصندوق الزمالة وكله كله مفيش في رصيد المصنع 10000 جنيه لأرمله العامل اللي مات من الاهمال
دانا بأسأل الحد اللي طلب مني اني انشر الموضوع ده عن الراجل لما دخل المستشفي محدش من اهله اتبرعوا ليه قالي لان المستشفي ماطلبتش. اهل العامل لقوه وشه مصفر ومعلقينله محاليل فسألوا ماله قالوا لهم في المستشفى ده اصله بنزف ومحتاج نقل الدم واحنا معندناش. على ما اهله لموا بعض علشان يتبرعوا كان الراجل مات
Love,
MishMish

Migo Mishmish said...

الاجندة الحبيبة
زيادة على كلامك المصنع بيديره لواءات الجيش المتحالين على المعاش اللي طبعاً لا ليهم في الهندسه ولا في البطيخ. دول عيال الحكومة المدلعين علشان ما يقلبوش عليها بتعينهم رؤساء قطاع ومستشارين ووحاجات كدة يعني
مش فاهمه انا واحد كان عايش طول عمره في الجيش تعلمية وشغله عسكري يبقى مدير على مهندسين وكميائيين إزاي يعني
ماعندهومش غير الزعيق وقله الادب طول اليوم فاكرين نفسهم في الجيش
واخر الشهر ليهم حوافز تمييز وبدلات ومرتبات ارقامها تعدي الـ 5 ارقام
ولما بيوصلوا لسن المعاش بيمدلوهم كمان علشان يخربوها اكتر
صدقني انا مابقا ليا نفس للكتابه ولا الكلام. يمكن قبل مابدا تدوين كنت متخيله ان الدنيا لسه فيها امل لكن لما ابتديت اهتم . بقيت اخاف اقرا الجرنان او اتفرج على التليفزيون علشان مش عايزة اعرف حاجة تاني
ربنا يستر على اللي جاي
Love,
MishMish

اجندا حمرا said...

مشمش العزيزه

بالاضافه لكلامك ياقمر و اللي صحيح ميه بالميه دلوقتي اللي بقيت بلاحظه انهم فعلا بعد ماالواء من هنا يطلع معاش يقوموا يعينوه في مكان و يكون مدير علي دكاتره مثلا زي اللي حاص في مكان شغلي طب و هو ده ايش فهمه بقه في شغلنا؟زي ماقلتي بيخافوا يقلبوا عليهم فبيدوهم سبوبه ياكلوا منها عيش و لاعزاء للخريجين الجدد اذا كان الموضوع بالشكل ده يفضل لحد مايتحال علي المعاش الظابط من دول و بعد كده يروح يشتغل في مكان و يفضل مدير برضه و يمدوله طب الجداد حياخدوا فرصتهم امتي؟
صدقيني انا زيك بظبط اول مابدأت عالم التدوين كان عندي بصيص امل و قلت ان كل حاجه ميه فل و اربعتاشر لما بدأت اقري و اتفرج علي التليفزيون و اقري الجرايد المعارضه حسيت ان مفيش امل و بيكون عندي شعور اني مش عايزه اعرف حاجه تاني
ربنا يستر فعلا علي اللي جاي
محبتي ياقمر

نيران said...

دي واحدة من الحكاوي الكتيييييييير
اللي في اخرها بيجي تتر الأغنية اللي بتقول

يبقى انت اكيد في مصر!!


و لا تعليق..

بس انا عندي سؤال تاني خالص

هل في طريقة نقدر نساعد بيها الست الأرملة دي لحد ما تصرف فلوسها.؟
يعني هل هي محتاجة لمساعدات مالية،
ولا بتشتغل
ولا ايه وضعها

مهو احنا مش عايزين نكون سلبيين و نقرا و نمصمص شفايفنا و نقعد زي حكومتنا مش بنعمل حاجة؟

ولا ايه رأيكم؟

appy said...

والله انا جيت امبارح قريت الموضوع
ومشيت تانى ورجعت دخلت ومشيت تانى
اصل بصى انا مؤدبه والله ومش بأعرف اشتم ولا اعرف افرش البادى لحد
فعموما ربنا يرحم الراجل ويرحمنا جميعا وبصى بجد لو تعرفيهم معرفه شخصيه يا ريت تقوليلى ولو عندهم اطفال قولى سن كام بجد بليز ودى حاجه لربنا مش لحد تانى عندك الميل بتاعى فى مدونة بيكيا روبابيكيا بتاعتى ولما تروحى هتفهمى ليه

على باب الله said...

حكاية فعلاً مؤلمة .. ربنا يكون مع الأرملة و أطفالها .. و يا ريت نقدر نساعدها

Migo Mishmish said...

انا مقدرة شعوركم الطيب كلكم
بس اللي اداني صورة الشيك وحكالي الحكاية عامل من عمال المصنع وبيشتغل نقاش بعد الضهر وكان بيدهن شقه ناس اعرفهم ولما عرف اني عندي مدونة - هو مكنش فاهم هو ايه الموضوع بالظبط - قولته ده مكان ليك عالنت تقدر تقول فيه كل اللي انت عايزة وساعات الحاجات ديه بتوصل
انا فعلاً معرفش الست ديه شخصياً لكن هو قالي ان العمال لمولها اللي فيه النصيب. انا كلمت حد تاني شغال في المصنع انا عارفه علشان يوصل للرجال اللي اداني الحاجات ديه بعد ماقرايت تعليق نيران علشان اعرف ازاي ممكن نتصل بالست ديه ونساعدها. وقالولي هنشوف ونرد عليكي
ولو وصلت لحاجة هبعتلكم على الايميلات إزازي توصلولهم
ويا رب يكون حالهم اتعدل
Love,
MishMish

محمد الكومي said...

بابا الله يرحمه مات بالكبد في مستشفى حكومي
و كان متغطي تامينيا بدرجة كبيرة و الروتين اخر وصول الدم رغم وجوده

و يومها كنت هروح السجن في مدير المستشفى

بجد المنظومة الطبية حاجة وحشة اوي

ربنا يشفي مرضانا

و يرحم موتانا

Migo Mishmish said...

الله يرحمه يا محمد
انا دلوقتي عندي قناعه اللي بيروح لدكتور او مستشفى في مصر ويخرج منها لسه حي ولو حتى بعاهه مستديمة ده لان لسه ليه عمر. غير كدة مفيش يا ابني دانا حامل وكل اما افكر انا هاولد في مستشفى ببقى عايزة اكتب وصيتي. وعماله ادور مين هياخد باله من العيال وميجو لما اموت
انت عارف بالامانه انا كنت شغاله في معهد ناصر لفترة كدة. كنت مندوبة مبيعات في شركة ادوية وكان شغلي بتطلب اني ابقى حاضرة العمليات كلها. بس للامانه هما ناس محترمين واوض العمليات كانت كويسة. وكان بيخشها الكل وبيعملها نفس الدكاترة انما الفرق كان في الممرضات والاوض. بتوع الخاص بيطلعوا على اوض مكيفه فيها تليفزيون والممرضات فوق شكلهم عاملين زي مضيفات مصر للطيران. انما بتوع العلاج على نفقة الدولة بينزلوا تحت في اوض مشتركة والممرضات طبعاً من الوزن التقيل زي البغال بالظبط. والرعايه بتبقى زباله انا سمعت بودني ممرضه في الرعايه - اللي بيتحط فيها العيان بعد ما يخلص العملية لغاية لما يفوق من البنج - بتضرب مريض او مريضة مش فاكرة قوي بالالم ضرب مخبرين علشان كان بيخترف وهو بيفوق من البنج وبيتألم بصوت عالي بس ده طبعاً كان من بتاع ابو بلاش
والغريب بقه اني روحت مع دكتور لمستشفى خاص من اللي موجودين على كورنيش المعادي اللي بتاخد منك فلوس تجيب شقه تمليك في عمليه لوز. صدقني يا محمد اوضة العمليات كانت اشبه بمحل مرقص بتاع لحمة الخنزير اللي في شبرا. نفس ريحه لحمة الخنازير والبلاط بتاع الارض بلاطة راكبه وبلاطة مخلوعة
وده ان دل على حاجة فبيدل على ان الموضوع كله حظ مش اكتر لا الخاص عدل ولا برضه اقدر اثق في الحكومة
يلا ربنا يرحمنا
Love,
MishMish

Migo Mishmish said...

لكل المهتمين بموضوع الست ديه:
انا جبت نمرة الراجل المسئول عن الست اللي انا كاتبه عنها في البوست الاخير
حاولوا تبعتولي ايميل ولو حتى على ايميل المدونة بتاعي اللي هو
migomishmish@gamil.com
وانا ابعتلكوا فيه كل اللي انتوا محتاجين له وكلموا الراجل وشوفوا تقدروا تساعدوها ازاي
Love,
MishMish

Anonymous said...

حبايبى ميجو و مشمش انا ماكنتش عايز اعلق على الموضوع ده بس بصراحه انا دمى محروق فى البلد دى لقد نفذ رصيد كل حاجه نفذ رصيد الدم نفذ الرصيد النقدى نفذ رصيد الادميه انا فاكر انه مره حصل حادثه و كانت لناس غلابه من بتوع الاقاليم المنفيه امر المحافظ بصرف4000جنيه لاسرة كل متوفى فى الوقت اللى كان الحمار في سوق امبابه للحمير يباع بمبلغ5000 يعنى الواحد اللي يموت اخوه يكمل على تمنه 1000 ويجيب حمار يونسه بدل اخوه امتى الانسان فى مصر يكون له تمن ميرووووووووووووووو

Desert cat said...

ازيك يا مشموشة
انا جاية اشرب شاى الساعه 5 معاكى فى البلكونة
و كمان علشان اقولك ان بوست مولد سيدى بلوج
ان شاء الله يتم اذاعته فى برنامج
انت تسال والكمبيوتر يجيب
الساعه 9.10 صباحا يوم الاتنين 21/7/2008
على اذاعه البرنامج العام

بالاضافه كمان لتعليق حضرتك

انا الشاى بتاعى مظبوط على فكرة
:)
مودتى

essam said...

عزيزتى مشمش لاحظى إن الزعل وحش علشانك ياريت بلاش تكتبى حاجه تنرفزك لغاية ميعاد ولادتك .ملحوظه أنا عمو عصام.

عاليا حليم said...

ولاني مش عارفه ليه لما الدنيا تحب تدوس على حد تدوس على اللي طالع عينه وسافف التراب انما البشوات والبهوات زي ما يكون متأمن عليهم ضد بلاوي الدن

--------

بصراحة مش قادرة اقول حاجة بعد الكلمتين دول

Migo Mishmish said...

حبيبي عمو عصام
الكتابة بتريح شوية بتخليك على الاقل تحس انك سجلت اعتراضك سواء غيرت في حاجة او مغيرتش اهو انت احسن من غيرك
الزعل وحش علينا كلنا. الشعب كله هيطرشق يا عمو من الغيظ
Love,
MishMish

Migo Mishmish said...

الحبيبة عاليا
والله وانا كمان مش قادرة اقول حاجة خالص
كل شوية ميجو يقولي مش هنكتب حاجة على البلكونة وانا اقوله عايز تكتب اكتب انت. انا خلاص حاسه اني مش قادرة اقول حاجة
وخصوصاً بعد حكم العبارة وازمة المترو البنزين وغيرها وغيرها ارفت
والغريب اننا بنزيد فقر والناس ديه بتزيد غنا فاحش وحالهم احسن مننا ميت مرة
اللي واكالين البلد وسرقين الشعب كله والاعانات اللي بتجي كمان. عمرهم ما هيعرفوا ولا هايحسوا باللي جرى لللأرمله ديه. ولا عمرهم هيخشوا مستشفى تأمين صحي ولا هينفذ رصيدهم ابداً
يلا، شكراً على مرورك. انا لازم اروح عندك كل يوم. بس زي ماقولتلك جالي حاله خرس. لا عارفه اقول ولا عايزة اقول حاجة
love,
MishMish

HafSSa said...

مافيش رصيد؟
طيب لما هما دول معندهومش رصيد يبقى مين لالي عنده؟؟
انا كنت بتشغل في بنك محترم و فيه حاجة اسمها مسؤول عن حساب الشركات و المؤسسات
و لما يجيي شيك بيشيك هو اذا مثلا جايالهم فلوس في السكة و فبكشف الحساب و كله في سبيل ان الشخص ياخد فلوسه اولى

بس حقولك ايه
انا يعني قلت حسبي الله كتير بس جاسة انه خلاص مافيش فايدة
انت قلتي جملة خطيرة اوي ان الكبار اياهم زي اكن ربنا باعد عنهم المصايب
طيب ليه؟
ليه المصايب بتحل علينا احنا و هما لا؟
انا بجد خلاص
حاسة انه اخر جور من اخر برج في عقلي
ايل للسقوط

تحياتي

رئيس جمهوريه نفسى said...

هى اللى تستاهل الرصيد فى البنك اللى فى مصر لا يكفى تخطف اول ايرباص على سويسرا حتلاقى الفلوس كلها هناك تصرف وتاجى

Migo Mishmish said...

حفصه الحبيبة
كل حاجة في البلد ديه تقرف. عارفه

سيادة الرئيس
نشكر سرعة ردكم ونظرتم الحانيه التي شملتم بها هذه الارملة المحظوظة بإهتمام سيادتكم واحب او اؤكد لكم اني: هاقولها
:-)
Love,
MishMish

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق