Sunday, August 3, 2008

نبتدي منين الحكاية

لو انتوا ملاحظين....انا وميجو بقالنا كتير مش بنكتب حاجة خالص ولا حتى بنعلق عند اي حد مع اننا متابعين لكل اللي بيتكب وبيتقال. ومعتقدش اننا لوحدنا عايشيين الحالة ديه. حالة الارف العام من كل حد ومن كل حاجة. بس لاقيت اني لازم اتكلم حتى لو مش هاضيف جديد لكن اهو. البلد ملوم عليها ناس من مختلف الاتجاهات والخلفيات لا تجمعهم ببعضهم غير الغباوة المفرطة. ركزوا كدة في اللي هاقوله وعايزاكم بس تتخيلوا على اي اساس الناس ديه اتكلمت ولا خدت رد فعل. يعني عقلهم كان حاضر ولا ضرابين حاجة مضروبة

بداية الارف كان خبر في المصري اليوم بتاريخ 20 / 7

تصريحات الانبا توماس في معهد معرفش ايه في امريكا
سيدنا لا فض فوه قال ايه "القبطي يشعر بالاهانه إذا قلت له أنك عربي" ومسلمين مصر بيقول عليهم "إن هؤلاء لم يعودوا اقباطاً، ولكن شيء آخر" وبعدين قدح زناد فكره وقال "لا يمكن تدريس اللغه القبطية التي وصفها باللغه الام لمصر في المدارس العامة في الوقت الذي يمكن فيه تدريس اي لغه اجنبيه"........حد يقدر يقولي ايه لازمة الكلام ده وكان طموح سيدنا ايه لما قال كدة؟
اقولكم انا

اولاً اي واحد مصري بيشغل دماغه منتمي للبلد بيحس بالاهانه لو اتوصف على انه عربي لسبب واحد بسيط احنا جدودنا كانوا الفراعنه اللي علموا الدنيا كلها الحضارة وعمرهم ماكانوا رعاه غنم رحل تاريخهم كله حروب على الميه والعشب. فنيافه الاسقف خسر بكلامة ده تأيد المصريين الحقيقين بغض النظر عن انتمائهم الديني

ثانياً تهمة التخوين او عدم الانتماء ديه اسخف واسواء تهمة ممكن انسان يوصف بيها انسان. يا سيدنا مشاكل الاقباط او المسحيين في مصر مش هايحلها المسيحيين بس لاننا لو تجاهلنا دور المسلمين في حل مشاكلنا يبقى كاننا بنكلم نفسنا. وبعدين احتياجنا للمسلمين زي احتياجهم لينا بالظبط. يعني ببساطة مها عملوا ندوات ومؤتمرات ومواقع النت تتكلم عن سماحة الاسلام وتيجي تدور في البلاد الاسلامية على مواطنين من اديان تانيه ومتلاقيش يبقى ده معناه ان كل الحورات ديه كدب وإلا يكون التسامح اللي بيقصوده معناه انك تتخلص من المختلف عنك علشان ما يبقاش في مشاكل. يبقى اللي اتقال ده مالوش لازمة حتى لو ده اعتقاد شخصي. كل واحد حر يعتقد او يفكر بالطريقة اللي تريحه لكن في كلام يتقال وكلام ما يتقالش
ثالثاً لغه ايه يافندم اللي عايز تدرسها في المدارس. هنعمل بيها ايه في الخراشوف اللي احنا فيه ده. ده الهنود اللي احنا
بنتريقا عليهم بقوا احسن مننا. طب اتكلم على انخفاض المستوى العملي للبلد نتيجه تقييد البحث العملي لارتفاع موجه الوهابيه. يعني انا افتكر لما كنت في كليه العلوم كان عندنا جزء بيتكلم عن التطور ودخل الدكتور معلم الاجيال وفتح اول محاضرة بان الكلام ده حرام بس ديه سياسه دوله اننا ندرس منهج مستورد من بلاد الكفرة. وادنا محاضرتين بالظبط وادانا اسئلة الامتحان وخلاص على كدة. علشان الكلام في التطور حرام. مع ان الطور من غير دك نسي اهم قاعدة علمية ان العلم بيتكون من بعض اراء النهاردة ممكن تبقى صح وممكن بكرة تطلع خطأ علاوة على ان التطور نظرية موجودة وعلم قائم بذاته وبتصرف عليه ملايين يبقى على الاقل لازم يبقى عندنا فكرة عنه. محدش سأله عن رايه. مش بيدور على تدريس القبطي في المدارس
المصري اليوم 24/7

علماء أزهريون يرفضون تهديدات "السياحة" لصاحب "جراند حياة" بسبب رفض بيع الخمور
الاخ بتاع الجاز جاي من بلدهم اشترى فندق كبير وعمله تجديدات وسماه جراند حياة وهو عارف كويس ان الفنادق جزء اساسي من الخدمة فيها تقديم الخمور. يعني محدش ضحك عليه. يقوم يجي هو هنا فاكرلي نفسه من بتوع الهيئة وهو اللي هينضف اليساحة من المنكر

يا بهوات التقدير بتاع الفندق وعدد النجوم بتحكمه قوانين قياسية دوليه. يعني طالما اشتغلت في حاجة لازم تتلزم بقوانينها مش هتمشي الكون على مزاجك بفلوسك اللي غرقانه جاز. وبعدين بتوع الازهر وغيرهم من اصحاب العمائم ايأ كان انتمائهم لازم يعرفوا انهم من ساعه مابقى لهم صوت والبلد خربت. بتاع الجاز زعلان من الخمرة محدش قاله يشرب منها. عايز فندق طاهر يروح على السيدة زينب او الحسين ويعمل لوكاندة يمسيها اهل البيت ويشرب الناس فيها تمر هندي وعصير قصب

وبعدين توالت الاحداث الكئيبة ورا بعضها
ازمة البنزين: وديه طبعاً مش مشكله لاننا من ساعه ما مسكتنا الحكومة الذكية واحنا نخرج من ازمة نقع في واحدة تانيه.
بس احلى حاجة بقه في الموضوع هي تصريحات«مسؤول البترول»: الطوابير تعني وجود المنتج!!!!!!!!!!!!!!!!!!!!!!مع احترامي لكلام سيادتك وليكن ما يكون إزاي يعني يا باشمهندس
اعتقال شباب 6 ابريل: العيال دول كانوا ماسكين علم مصر -اللي هي البلد اللي احنا فيها والسيد وزير الداخليه بيشتغل فيها - وبيغنوا اغاني وطنيه في ذكرى انقلاب العسكر او زي ما بيقولوا عليها في التليفزيون - ثورة يوليو- ايه بقه الازمة مش فاهمها. طب ما هو محطات التليفزيون اللي مملوكة للحكومة ومحدش بتفرج عليها -ولا حتى الحكومة بس هما مش قايلين - كانت مليانه اغاني وطنيه وافلام وطنيه من نوعيه على ابن الجنايني اللي عايز يتجوز انجي بنت البرنس ويقعدها في البيت مع امه تخبز عيش وتحلب الجاموسة وتزغط البط وتلبس جلابيه وطرحة وتقعد في البيت تستنى حالظابط لغاية لما يجي من الشغل
يعني الشباب يدوروا على شغل ما يلاقوش تقولوا عليهم عاطلين. يشتغلوا تدوهم مرتبات هزيله ماتكفيش تمن المواصلات وخصوصاً بعد الزيادة المباركة في تمن البنزين ما يبقاش قدامهم غير الرشوة والاكرميات علشان يمشوا حالهم تقولوا الفساد انتشر بشكل كبير كأنه مش تطور طبيعي للحاله الساقعه. يتحطوا في مركب صيد ويعدوا بيها البحر ويتنيلوا يموتوا وبعد ما يتكرموا اصحاب البلاد التانين ويلموا اللي فاضل من الشباب في علب ويبوعتوها تقوموا حتى في موتهم مش عايزين تدوهم لقب شهداء وسمتوهم طماعين. يبعوا نفسهم لليشتري ويعملوا جواسيس تمسكوهم بتهمة التخابر ومحدش حاول يعترف ان فشل الدولة والحكومة فإنها تلبى احتياجات شعبها الاساسية هي الخيانه بعينها. يقولوا طب نصلح بلدنا علشان نعيش فيها ويحاولوا يشاركوا في الحياة السياسية تقبضوا عليهم. يسبوهم من الدنيا كلها وينضموا للجماعات الدينيه علي اساس طالما ملناش في الدنيا نبقى نحاول نظبط الاخره تقبضوا عليهم. حتى لما رفعوا علم بلدهم وعنولها اتقبض عليهم بالذمة مش مكسوفين من نفسكم

السلام98
وطبعاً قضية الساعه وكل الساعه واللي الفساد فيها ظهر بشكله وعنوان بيته ورقم تليفونه واسماء جميع المتعاملين معه مش محتاج تعليق وما ينفعش نقول عليه حاجة. يعني لما الواحد تتسحب منه الرحضه مرتين ياخد سنه سجن - قانون المرور الجديد- لكن لما يتسبب في موت1034 بني ادم ما ياخدش حاجة خالص
يبقى مينفعش الواحد يقول اي حاجة
كنت من كام يوم كنت في قصر الرياسه عند سيادة رئيس الجمهوريه وقال احنا محتاجين "شوية إيجابيه" وانا هنا انطلاقاً من توجيهات السيد الرئيس شايفه ان الحل هو


Love,


MishMish

12 comments:

Desert cat said...

يا مشمشة ازيك الاول وعودا احمد
بالنسبة لنيافه الاسقف
فشكله والله اعلم مش عارف كلمة قبطى معناها ايه لان قبطى يعنى مصرى يعنى لما اتكلم عن الاقباط مش خص لا مسلمين ولا مسيحين هو بكدا اتكلم عن جميع المصريين
بالنسبة للاخ بتاع الجاز اللى جه اشترى الفندق ومنع بيع الخمور فيه وزعلان ودمه محروق وبيطالبوا بعدم مضايقة وزارة السياحة ليه تناسوا فضيحته السابقة قبل بيع الخمور ان كان تاب واناب فربنا يتقبل منه واحنا مش بنحاسب العباد على حاجه بس البلد مش ناقصه فيها اللى مكفيها
باقى الاخبار
مضطرة اسكت علشان منظرى العام بس
مودتى

Migo Mishmish said...

الحمدلله يا قطوطة
مشكله نيافه الاسقف انه عارف كويس معنى كلمة قبطي بس بيستهبل. لاننا معظمنا ان مكنش كلنا بنتعلم قبطي في الكنيسة ونقدر نفهمة ونقراه كويس. المشكله فإنه لما هو يقول كدة الكلام مش هو بس اللي بتحاسب عليه. دا مسيحين مصر كلهم بتحاسبوا عليه. حتى لو هو بيكره المسلمين مش ينفعش يعلن ده على الملاء هو حر في رايه لكن مكانته ماتسمحلوش انه يقول كدة.
وبعدين الغريب بقه ان في ايات كتيرة في الانجيل ضد كلامة ده بوضوح لا يحتمل التأويل. يعني في ايه تقول "ان جاع عدوك - واخدة بالك عدوك مش جارك اللي انت متربي معاه - اطعمة واسقيه" وبعدين امريكا ايه اللي بيعرض فيها القضية هو مش الانجيل قال "معلون من اتكل على ذراع بشر" يعني اللي بيدور على انه لو مظلوم وبيستنجد بإنسان ومابيطلبش المعونة من ربنا يكون ملعون. وكلمه لعنه ديه كلمة كبيرة في الكتاب المقدس وقليل لما تتذكر. ولو اتذكرت بتبقى بتبين ان ربنا اتخنق من حماقة البني ادمين
الاخ التاني بتاع الجاز اللي مضايقني فيه انه عمل كدة وهو عارف ان مفيش حد هيقف له. اولاً اللي هيعترض يبقى بيشجع شرب الخمور وده حرام طبعاً. علاوة على ان المناخ العام بيخلي الناس تخاف لانها لو اعترضت تبقى اعترضت على تعاليم اادين نفسها.
يعني يجوا يعملوا اللي هما عايزينه وعارفين انهم يقدروا يكسروا القوانين بسهولة. زي الاميرة الجربوعه اللي خبطت تاكسي بالعربية الهامر في بلدها ديه متقدرش تمسك دريكسيون عربية وراحت قاتله تلاته وبعدين دفعت الديه وغارت لبلادها ولا كانها خبطت شوية فراخ في الشارع. واللي هيعترض هيعترض ليه؟ ما الديه موجودة في الشريعه ومش مهم بقه اللي مات كان وراه مين ولا ايه. وبعدين ابسط حاجة كل كائن حي ربنا خلقه اداله الحق في الحياة وكل كنوز الدنيا لا تساوي الحق ده
البلد بقه حالها يقرف. انتي عارفه قبل الحمل كنت عايشه على مضادات الاكتئاب هي اللي كانت بتخليني اعرف اقوم من النوم وانزل الشغل انما دلوقتي هاطق ومش عارفه اعمل حاجة. والله انا شايفه لو الحال فضل ذي ما هو كدة الحكومة تدعم البروزاك -من مضادات الاكتئاب الشديدة- وتحطة على بطاقة على بطاقة التموين
love,
MishMish

على باب الله said...

نيافة الأسقف قال كلام غريب جداً , أقترح يخليه في المسائل الدينية أبرك

و بتاع الجاز مش ها يبيع خمرة , لكن يا تري هل ها يمنع السائح أنه يجيب خمرة معاه بنظام التيك أواي يعني ؟

و موضوع العبارة بقي , فحتي لو كان أتحكم فيها طب ما هو هرب هو و عيلته من زمان .. يعني الحكم كده كده كنا ها نبله و نشرب ميته و هو كده كده مش راجع مصر تاني

أما موضوع بيع بنك القاهرة فأنا شايف أننا كرأي عام أتصرفنا فيه بشكل خاطيء

Migo Mishmish said...

على باب الله
كلامك حق يا ريت كل السادة لابسي العمائم يسكتوا خالص وكفايه اللي جرلنا من وراهم. سواء ان كانوا من عندنا او من عندكم
بتوع الجاز بقه مش عايزين يسبونا في حالنا. مش كفايه المصريين اللي راحوا هناك وعملولهم غسيل مخ وجم هنا يلبسوا زيهم ويأكلوا بإديهم زي الانسان البدائي لا دول جايين يكملوا على الباقي
وممدوح اسماعيل زي مانت قولت خلاص شكراً كده. انت عارف انا كنت فاكرة زيك كدة ان الموضوع انتهى لقيت في الدستور بتاع اول امبارح عنوان كبيررررررررررررررر باللون الاحمر في الصفحه الاولى بيقول: عبارات ممدوح اسماعيل تعود للعمل قريباً!!!! تقريباً الحكومة هتكرمة لانه من اكبر المساهمين في حل الازمة السكانيه في مصر. ولا وسائل منع الحمل ولا بطيخ الحاجات ديه بتاخد وقت. انما وسيله ممدوح اسماعيل مفعولها اكيد 1034 بني ادم في دقايق. مش الحكومة ذكيه وحلولها لاوذعيه
اما بالنسبه لموضوع البيع فانا شايفه انه مش بنك القاهرة بس اللي يتباع انا شايفه ان البلد كلها تتباع بينا. ما كل حاجة اتخصخصت ومحدش عارف فين الفلوس ديه يبقى نبيع اللي فاضل والفلوس تتوزع علينا بالتساوي ونشتغل باليومية عند المالك الجديد. ما هي كدة كدة ملناش فيها حاجة
يلا
Love,
MishMish

Anonymous said...

يامشمش الأنبا توماس مظلوم والمحاضره بتاعته راقيه جداوعلميه بالدرجه الأولى وأنا قابلته وعرفته عن قرب وهو شخص مستنير جدا لكن يبدو أن محاولة صنع جماهيريه للبلكونه جعلتك تتعجلين الحكم ضده وأنا زعلان من نقدك غير الموضوعى

Anonymous said...

مشمش تحياتي ليكي انت و ميجو واهنئكم علي الموضوعات المطروحه ف المدونه......ليا تعقيب بسيط علي ماقلتيه بخصوص الانبا توماس من ابسط قواعد الاختلاف مع شخص اني اختلف مع رايه وليس شخصه وهذا يلزمني الا اصفه بصفه تحمل معني الاهانه(بيستهبل).هذا يننطبق علي جميع البشرولكن تعلمنا انه كلما كبر قدر الانسان و مكانته لزم الدقه اكتر ف اختيار الالفاظ انا شخصيا قد اختلف مع البابا في وجهه نظر ما ولكن لا يمكن ان اتجاوز ف الكلام عنه ليس لانه معصوم من الخطا ولكن لان مكانته و ابوته لي تجعلني وانا اختلف معه لا اتجاوز ف استخدام الفاظي اؤكد مره اخري اتفق معكي ف الاختلاف مع وجهه نظر اي شخص وزير ..غفير..رجل سياسه .. رجل دين ولكن لكي انصت الي رايك و اقدره ارجو ان تحاولي بجديه اكثر الا تسفهي من صاحب الراي و راعي الدقه ف الالفاظ و نصيحه تناقشا انت وميجو في كل بوست قبل ظهوره للنور فانتما يمكنكما ان تتكاملا انت بجراتك ورؤيتك المميزه و ميجو بشاعريته و افكاره المتجدده......يوم ان يحدث هذا هاجيب كرسي و ادخل البلكونه و مش طالع منها.

Migo Mishmish said...

عمو عصام
احنا شوفنا الكلام بتاعه مكتوب في المصري اليوم ومع ان الجريدة ديه ابتديت تاخد منحنى مش اللي هو بس على الاقل ملقناش رد.
يعني هو ممكن يبعت رد للجريدة يكذب فيه الخبر او يشرح وجهه نظره وده ماحصلش. انا بحترم رجال الاكليروس كلهم. بس فرض مبدأ الوصايه على الناس والعك في الكلام منهم هما ده اللي مش مقبول . يعني المفروض هو واللي زيه ياخدوا بالهم قوي من كل كلمه بتتقال ياما يسكتوا خالص لان كلامهم بتاخد على انه كلام كل المسيحيين. احنا بنضايق من تصريحات الاسلاميين اللي بيقولها عمال على باطال يبقى منعملش زيهم. وبعدين ما سيدنا البابا بيقول اللي هو عايز يقوله من غير مواربه ومن غير ما يخل بثوابت العقيدة ومع كدة محدش بيحس انه اتجرح منه او اتضايق من تعبيراته
ومع احترامي الكامل لرايك انا شايفه اني معكتش قوي
وللكلام بقيه
Love,
MishMish

Migo Mishmish said...

وبعدين يا اكرم
بتحرجني دايماً بعقلانيك ورائيك اللي دايماً بيبقى صح ومع كدة بعاند وبكابر معاك علشان بس ماطلعش غلطانه. وكل مرة هاقول المرة الجايه هنتصر عليك انتصار ساحق وبعدين بجر اذيال الخيبة كالعادة.
بص يا اكرم انا فعلاً حسيت ان الكلام استفذني بجد. يعني اول حاجة خدنها في المشورة لو تفتكر اننا نبطل نعمم. وهو بكلامه لم المسلمين كلهم حطهم في سله واحدة. وحط المسيحيين كلهم في سله واحدة. يعني انا مبحبش اللغه العربية تماماً مش لاي اعتبار ديني لكن لانها لغه مش علمية واظن انت عارف ان العلم بالنسبة لي الاساس وبعدين تترتب وراه كل حاجة. اما ميجو بيحبها جداً وشايف انها لغه غنيه - علشان هو شاعر بقه وحركات - وكل ده ملوش علاقه بالدين خالص ينفع بقه يتقال ان كل المسيحيين مابيحبوش اللغه العربية علشان هي لغه اتفرضت عليهم. الجمله ديه لغت بتعميمها تفرد حالتي انا وميجو
حاجة تانيه احنا الوضع عندنا مختلف شوية. يعني مين اللي فايد المسيحين انا كنا بندور على التمييز مجدي يعقوب مثلاً ولا المعلم نعيم اللي عندنا في الكنيسة. ده بعلمه خلى الناس تحترمة التاني يعرف القبطي احسن من العربي استفدنا منه ايه في الحياه العملية في نظري ولا حاجة لان فايدته في محيط ضيق.
اه بعترف اني ساعات بستخدم اسلوب مش قوي وممكن اغلط او اشتم وعارفه ان ده اسلوب اللي معندوش رد منطقي على اللي بتقال
بس عارف لما ساعات يتملكك الغيظ وتحس ان دماغك بتغلي وان في دخان خارج من ودانك ولو ما صوتش علشان تخرج الطاقة الشريرة ديه من جواك هيجرالك حاجة فيبقى اقل واجب انك تقول انه بيستهبل
اتمنى انك تفضل معانا في البلكونة وما تخرجش منها ابداً
وبعدين الشتمية ما هي الا كلمات مختصرة تؤدي اللغرض من استخدامها في توصيل المعنى المطلوب وتمنع اي تراكم للطاقه الشريرة. يعني زي ماتقول كدة نشتم بدل ما نطق طالما لاشتيمة مش هتلزق
Love,
MishMish

Anonymous said...

مشمش
احب اقولك انك بجد المره دي انتصرت عليا عارفه ليه؟ عشان انا توقعت انك مش هتعترفي بحده اسلوبك واقولك علي سر يمكن انا لو مكانك كنت هاكابر واعاند..... انا شايف بذره صفه جميله بدات تنبت فيكي ومي مراعاه مشاعر الاخرين والحكمه في اختيار اسلوب الكلام(بركاتك يا عم ميجو) و برضه عند ميجوشويه صفات حلوه انت رميتي بذورها اتعبوا في سقيهم وربنا ينمي اكتر ويخلي البلكونه ملتقي لكل من يبحث عن مكان يشكو فيه همومه وينعش فيه اماله و يجد من يحترمه لذاته ويحترم عقله

Gogo said...

Pasha

wade7 an Eman betera el masry el yom keter

anto betadaho fee malta a7na meta7'ren 1000000000000000000000 sana

ta3alo sofo el american peytkalmo fe ah
sory homa mesh bytkalemo homa bya3melo

George USA

Gogo said...

I miss you ya Amged

EL ento katbeno ham yebaky we ham yeda7ak

salemely 3la el balakona

George
USA

Gogo said...

Every time I send comment I put my name and were I liveing now


sorry ya pasha
Ma7zoz bah ya pasha

George
from tora - el fostat - kahwet mohamed omer - USA

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق