Wednesday, August 20, 2008

شعب اولمبيكي

مش عارف إزاي ماجبناش ميدليات اوليمبية في اولمبيات بكين؟


حاجة تحير...... بصراحة منظرنا كان فضحيه.... اللاعب من دول تلاقيه شحط طويل عريض وينزل الماتش من هنا ...... ياخد حته علقه ويخسر الماتش باقل مجهود من اللاعب المنافس لدرجه ان مستشفى أم المصريين واحمد ماهر شغالين على ضحايا الاولمبياد من اللاعيبه المصريين


دا حتى كرم جابر....قلنا هيجيب دهب اتغلب في اقل من دقيقتين وخد الطريحه التمام من لاعب غلبان من البانيا


وده بيفكرني بموقف تاريخي ساعه لما المصريين كافحوا وحاربوا وخرجوا الانجليز و الفرنسيين والمماليك من مصر قام الحاج عمر مكرم وصحابه راحوا لعسكري الباني اسمه محمد على وقالوله ورحمه ابوك يا شيخ لا تحكمنا


من سنه 84 واحنا عايشين على ذكرى فضيه محمد رشوان في الجودو والاسطوانه المشروخه بتاعه انه ملعبش عالاصابة بتاعه اللاعب الياباني .... بالظبط زي حكايه خط بارليف الذي لايقهر واسطورة الجيش الاسرائيلي وانا على الربابه بغني


اصلنا شعب غاوي يقف عند كل خطوة ويقعد يطبلها ويرقصلها لغايه اما يتعب وينام جنبها . احنا شعب .....مصر هبه النيل ...... وهبه بنت الجيران وحضارة السبع تلاف سنه..... وفي كل مناسبه لازم يبقى الشعار والتميمه الاهرامات وابو الهول وتوت عنخ امون واللاعب اللي ربنا ينفخ في صورته يبقى الفرعون الصغير....ابن النيل....إلخ


احنا شعب عايش على قفا الفراعنه وهما اللي بيصرفوا علينا وعاملين لنا سمعه لا عندنا تخطيط ولا فكر منظم وكل حاجة ماشيه بالفهلوة والشعارات والدجل والشعوذه. كل شوية يحضرولنا روح...ايشي روح اكتوبر .....وروح الفانله الحمرا.... وروح كاس العالم سنه 90 ..وروح طنط..... وروح يا شيخ... لحد ما طلعت روحنا


بالذمة واحد زي مايكل فيلبس جاب شأله مدليات دهب تحس انه شاريها من الموسكي مش واخدها لوحدة في مسابقه من المسابقات الاولمبية معرفناش نجيب ربعهم بكل الجيش اللي احنا بعتينه. ومع كدة ماطلعش عالتلفزيون يقول انا بهدي الميداليات لراعي الرياضه الامريكية (سيادة الرئيس جورج بوش) و لا قال انا كنت بلعب بروح حرب الاستقلال ولا الصحف قالت عليه ابن المسيسبي

وبما انها وعلى رأى مغني الجيل - اللي معرفش اسمه - الدنيا خربانه يا عم خربانه. انا عندي خطه جهنميه يمكن تحل المصيبة اللي احنا فيها ونلحق اي حاجة قبل الاولمبياد ما تخلص
اول حاجة نبعت نجيب العيال اللي عرتنا دول من الصين ونبعت بعثه تانيه يكون التشكيل فيها كدة


مثلاً في سباق الجري: احنا مش عايزين لاعيبة فرافير بيدربوا في النوادي احنا عندنا اجدع عدائيين في العالم في الجري ورا لقمه العيش وورا الاتوبيسات. الناس ديه تتلم وتطلع على بكين


السباحة الايقاعيه: واعضاء الفريق ده ساهل انك تلاقيهم في الاحياء الراقيه زي ما تلاقيهم موجودين بنفس الكثافه في العشوائيات من التطنيط على الطوب وعجل العربيات القديم علشان يعرفوا يخرجوا من بيوتهم ويرحوا على مصالحهم لما المجاري عادة تكون ضاربة


الغطس: اهو ده ملهوش حق انهم ما يلاقوش حد يمثلنا فيه. يا ناس داحنا عندنا في كل شارع بلاعه او اتنين من غير غطا وبمزاجك او غصب عنك هيجيلك يوم تاخدلك غطس في واحدة منهم. بلاش دول ناخد من بتوع العبارة اللي قعدوا في المية 18 ساعه لغايه لما جم بتوع الانفاذ لا تقولي مكنش فيه سترات نجاه ولاسمك قرش ولا ميه ساقعه. الكلام ده مايكلش معانا


سباق السيارات: ننزل نلم العيال بتوع الميكروباصات اللي بيمشوا من غير نمر ولا رخص ولا اشارات وعكس الاتجاه ونعملهم تصفيات في موقف عبود ونطلع بيهم على الاولمبيكيات ويبقى يقابلني شوماخر لو عرف يعدي من واحد فيهم او يكسر عليه. ده يبقى نهار اللي جابوه مش فايت


رمي الجله والقرص : انزل في اي حته في مصر فيها حته ارض فاضيه بتاع 2 متر * 2 مترتلاقي الحي كله عملها هدف وكله بينشن بكياس الزباله وناس بتنشن من البلكونات وناس تانيه من العربيات يعني كمان يبكون اللاعب متحرك وديه مش اي حد يعملها على فكره


المصارعه: ابطالها بنشوفهم كل يوم واقفين من الساعه 5 الفجر في طوابير العيش ودول معندهومش تفاهم. ننقى اتنين تلاته من كل طابور ونعملهم تصفيات واللي يكسب ياخد بجنيه عيش ويطلع عالاولمبيكيات عدل


التايكندو والكاراتيه: نجيب فرق الكارتيه اللي بطلعهم الحكومة من العلب في المظاهرات ونقولهم على المنافسين ان العيال دول من حركة كفايه. عليا النعمه دول يكسروا عضم اللعيبة على المتفرجين كمان

رفع الاثقال: يعني اي موظف حكومة بياخد مرتب 200 جنيه في الشهر يجبهم بصباع رجله الصغير. احكموا انتوا واحد شايل حمل مصاريف المدارس والدروس وفواتير الغاز والكهربا والميه والايجار و....و....و.....هايعجز يعني عن شيل
150 كيلو
الجمباز : احنا نلم كل الناس اللى بتزوغ فى المترو وبتنط من فوق ماكينات التذاكر وبدل مانعملهم غرامات ..ناخدهم ندربهم على الجمباز لانهم مشروع ابطال اوليمبيين
بعد مانجمع الابطال الاوليمبيكيين دول نطلع بيهم على مصنع اوليبمبيك اليكتريك ونخللي اللمبي رئيس البعثه

وانا متأكد انه بفريق زي ده هنحتكر الاولمبيكيات زي احتكار عز للحديد ومحدش هيعرف يتحصل على مفتاح حتى مش ميداليه

مش بقولكم شعب اولمبيكي


ميجوووووووووووووووو

8 comments:

Mikoo said...

على فكرة لو الافكار اللى قولت عليها دى اتعملت بجد مافيش مدلية هاتفلت مننا .... دى أقل حاجه عندنا .... دا احنا ممكن كمان نخلى الصينين عنيهم واسعة من الصدمة

Anonymous said...

فعلا الأفكار اللي قلت عليها ياميجو لو اطبقت مش حتفلت مننا اي ميداليه
فعلا اتفضحنا في الدوره الاولمبيه و ال صرفوا علي البعثه حوالي 60 مليون جنيه و المحصله صفر لأ و الكوميدي تقري تحليل ماتشاتنا هناك يقولك اصل الحكام هناك ظلموا اللاعبين المصريين علي حساب اللاعبين الاوروبيين
شوفت الخيبه اللي احنا فيها؟

سلملي علي مشمش و تحياتي ليكم

Migo Mishmish said...

ان شالله في الاولمبكيات الجايه يا ميكي نبعت البعثه ديه
اما موضوع عنين الصنيين فيتيهألي هي وسعت من المرة ديه لما اتفرجوا على خيبتناعلشان احنا سوق كبير ليهم وعارفنا بالاسم بدليل الفانوس اللي عملوه على شكل توك توك شعب عددة 80 مليون وباعتين بعثه فيها 100 لاعب الظاهر ان كلهم من ذوي الاحتياجات الحاصة ( مكسحين يعني)ومعرفناش نجيب غير ميدليه واحدة ومش فاكرة ان كانت فضه ولا برونز. تبقى ديه حاجة كبيرة قوي قوي قوي قوي
love,
MishMish

Migo Mishmish said...

حمدلله على السلامة يا جميله
بصي يا ستي هو موضوع الاولمبكيات ده موجود جامد جداً انا فعلاً اعتقد ان الحكام ظلموا اللاعبيين المصريين دوناً عن بقيه الللاعيبن من الدنيا كلها علشان هما متغاظين مننا. والنبي يا اختي ده حتى لو الحكام حطوا للاعيبة بتوعنا كل درجات الرافه كانوا فشلوا برضه. بس انا اعتقد ان كان لازم البعثه كلها تتبخر ويلبسوا احجبه علشان العين والحسد. المرة الجايه نبقى نعملهم طاسه الخضه
love,
MishMish

نيران said...

السلام عليكم..
معلش انا لظروف قاهرة غبت شويتين

حبيت اقول كل سنة و انتو طيبين بمناسبة الخطوبة الميمونة و بالمرة شهر رمضان:)
و لو انها جت متأخرة..

ثانيا بقى..
على فكرةاحنا كنا سهل اوي ناخد الأولمبكيات ، بس احنا اللي قلنا لا
عشان نسيب بقيت الشعوب تفرح

احنا عندنا الخير كتير اوي
و من كتر الرفاهية قلنا نتغلب لهم

اصل مش منطقي نتغلب الغلبان اللي اتغلبناه دا
و دا اكبر دليل على انه بمزاجنا.. بمزاجنا اوي يعني

دا انا حتى عرضوا عليا اروح هناك سباق الجري بس انا اللي مرضيتش مع ان الميدالية في جيبي

بلاش تظلمو القائمين على الرياضة المصرية
مش كفاية بيشوفوا مشاكل الكورة
يعني هم هايكتعو نفسهم ولا يكتعو نفسهم؟؟

تحياتي

بجد ضحكت من قلبي..
هم يضحك و هم يبكي

على باب الله said...

ههههههههههههههه

انت موتني من الضحك

يخرب بيت سنينك

Desert cat said...

فضحونا الفراعنة فضيحة القرعه فى الكوافير
ورايحين جايين وبيصرفوا من فلوسنا طيب يعملوا حاجه بالملايين الى صرفوها دى لاطفال الشوارع طيب يصلحوا البلاعات اللى الناس بتقع فيها على الاقل يعنى
تحياتى

Anonymous said...

مفيش داعي للزعل يا جماعه في اكتشاف مذهل يلغي كل الحزن والياس ده
اكتشفوا علي ورق حيطه من ايام الفراعنه ان المصريين هما ابطال الاوليمبيكيات القديمه ف مختلف الالعاب من حكشه(الهوكي حاليا) و تريك تراك
(البيسبول حاليا)
و اولها اسكندراني(حصان الجمباز)والبلي والحنونه(الجولف حاليا)وكهربا شد الكبس(سباق التتابع )و العاب اخري لم تظهر بعد ف الاوليمبيكيات زي عم عنكب شد واركب و طقه وشبر وبرطوس الجميع وقفاشه الملك.....الخ و لكن لحقد العالم علينا مقالوش ده ف التاريخ الاوليمبيكي ولكن ملحوقه هيتكتب ده كله وزياده كمان ف كتب التاريخ الحقيقي واخدين بالكم الحقيقي بتاعنا!!!!!!!!!

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق