Saturday, January 24, 2009

انت لقيط ..فاهم يعنى ايه لقيط؟

الناس زعلانه اوى اليومين دول من عصابه الدكاترة والممرضات الى بيبيعو العيال للامريكان ..انا مش عارف الناس دى زعلانه ليه ؟ حزب اعداء النجاح دايما كدا مش عاجبه حاجه ..ولان الناس دول نظرهم مش بعيد كانو عرفو يعنى ايه خطط طويله واستراتيجيات طويله المدى ..هما كدا دايما بيبصو تحت رجليهم ..انا بقى هافهمهم : اولا العصابه دى اصلا من تدبير المخابرات عشان تبيع العيال لامريكا ومش بس امريكا ..لأ دى خطه مدروسه اننا نبيع العيال لمختلف انحاء العالم لاهداف استراتيجيه لا يفهمها الغوغاء والدهماء وعامه الشعب بل يفهمها المتخصصين من امثالى ..اول هدف استراتيجى هو القضاء على ظاهرة التشرد الاطفالى وتصديرها الى الدول المختلفه ..بدل ما العيال دول يشدو كله تحت كوبرى الملك الصالح يروحو يشدوها تحت برج ايفل او تمثال الحريه او جنب نفق ابو تشارلز فى جنوب ايرلندا ..وساعتها بقى وكالات الانباء مش هاتسكت وهاتفضح البلاد دى ..ولا تلاقى واحد متخلف زى خالد يوسف يعملك فيلم زى حين ميسرة ويشوه صورتنا قصاد الاجانب ..لا تعايرنى ولا اعيرك الهم طيالنى وطايلك ..يبقى بكدا قضينا على التشرد الاطفالى وبعتناه على الدول التانيه ...الهدف الاسمى بقى هو ان ممكن حد من العيال دول الى سافرو امريكا وخدو الجنسيه حظه يضرب ويكسب انتخابات الرئاسه ويبقى الرجل الاول فى العالم ..وساعتها بقى يبقى احنا امنا داعيالنا ..لاننا هانبقى عارفين حقيقه الرئيس دا ..يعنى مثلا هايبقى اسمه جون تيرى مارك ..احنا بقى عارفين انه مش ابن تيرى مارك وانه ابن عبده بزازة سواق التوكتوك الى كان ساكن فى الدويقه الى ضحك على البت عواطف بياعه الفجل واغتصبها فى التوك توك ...وساعتها لو حب يلعب معانا نقوم نفتحله الملفات القديمه ..يعنى لو حب يقطع المعونه عن مصر نقوم نهدده بفضحه امام العالم ..فيطاطي راسه ويعمل الى احنا عايزينه ونعمل زى عماد حمدى فى الخطايا : انت لقيط.. فاهم يعنى ايه لقيط؟ ..احنا لميناك من الشوارع ..بس العيب الوحيد ان ممكن عبده بزازة تكبر فى دماغه ويطلب انه يروح يعيش فى البيت الابيض مع ضناه الى هو الرئيس الامريكى ونبقى وقعنا فى مشكله ..فهمنا بقى ياعالم ان الموضوع مش زى مانتم فاكرين ؟ بطلو حقد بقى وتفكير سطحى ساذج... سيبو الناس تشتغل فى صمت
دى ناس مش بتلعب دى بتخطط جامد اوى .. دى عمليه سريه باسم : انت لقيط فاهم يعنى ايه لقيط؟
ميجوووووووو

28 comments:

Anonymous said...

الا العيال دي بعد التبني هايطلعوا على انهي دين؟ مسلمين ولا كفرة؟

Anonymous said...

بالمناسبة عرف ازاى يغتصبها فى التوكتوك ياه دول رفيعين اوي بقى على كده

Unknown said...

ممكن ادخل البلكونه وابص معاكو شويه على اللى بيحصل
الحمد لله ضمنا مستقبل مصر العيال دى بقا لما تكبر كدة وتتجوز وتخلف هيزيد عدد المصرين في امريكا ساعتها نقدر نتحكم فى القرار السياسى الامريكى تجاة الشرق كله
طبعا امال ايه ماحنا نسبنا الحكومه
تحياتى والى الامام

Anonymous said...

حبيبى ميجو
انا اظن انك نسيت نقطه هامه وانت بتوضح اسباب تصديرنا للاطفال اللقطا يا ابني هى دى البضاعة اللى عندنا منها فائض انتاج واللى من الاساس بنعرف ننتجها واللى اساسا مش بنفكر فى حاجه الا انتاجها
بالاضافة الى لما العيال دى تمسك مناصب فى البلاد اللي خيرها علينا ويعملوا فينا زي اللي بيحصل دلوقتى نقدر نقول بثقه ابن الحرام ماخلاش حاجه لابن الحلال
اخوك المبالغ فيه

Migo Mishmish said...

مصرى
مش عارف ليه اليومين دول انا مش فاهمك ومش فاهم انت عايز ايه؟
انا حاسس ان اراءك بقت غريبه ومش واضح موقفك
ميجوووووو

Migo Mishmish said...

medus
ممكن اوى انك تدخل معانا البلكونه وتشرفنا علطول ..البلكونه تساع من الحبايب الف ..بس انا زعلان انك ماشربتش حاجه
اما بالنسبه لموضوع العيال دول احنا مستقبلنا فل اوى ..دول زخيرة المستقبل وهانشيلهم لوقت عوزة

Migo Mishmish said...

المبالغ فيه دائما
رأيك ياعزيزى هذه المرة واقعى جدا ويخلو من المبالغه
متهيالى ان لو عيل من العيال دول طلع مبالغ فيه هو كمان يبقى وقعتنا سوده ..تخيل رئيس امريكا مبالغ فيه دا لا هاتحوأ فيه جزم ولا دياولو

Anonymous said...

لما كتبت التعليق فوق كنت بتتريق
ده سبب تلاقي الناس زعلانة على موضوع التبني ده ان العيال مش هاتطلع مسلمين

Migo Mishmish said...

مصرى
انا مافهمتش فى التعليق الاول انت تقصد ايه ..لكن انا زعلان انك خدت سكه كدا مش هى ..الموضوع كله مالهوش علاقه بالدين الموضوع كله انسانى بحت يتعلق بالاخلاق ..مش فارق بقى ان العيال دول مسلمين او مسيحيين انا معاك ان فيه بعض المغفلين بيفرحو او بيزعلو بسبب نظرتهم الضيق وتفكيرهم السطحى ..انما حضرتك راجل مدون يعنى ثقافتك اعلى من الناس دول ومش مفروض ان نظرتك تبقى ضيقه زيهم وكل حاجه تحولها لموضوع دينى ..انا ملاحظ دا من تعليقاتك ومن البوستات الى بتكتبها فى مدونتك ..ماتزعلش منى انى اتكلمت معاك بصراحه ..عشان كدا انا قلتلك انت واخد سكه مش هى
مع تحياتى ميجوووووووو

Anonymous said...

انا اقصد الناس هي اللى هاتفكر كده فى نقطة الدين بالذات

ثم مين قال مادام مدون ابقى مثقف

انا بقرا لمدونين بحس انهم مش بيعرفوا حتى يفكوا الخط

Layla said...

هههههههههه

عملية (انت لقيط) الان بنجاح ساحق في جميع دول العرض

Anonymous said...

انت صح بس انت مفكرتش بعد العيال بتاعة الشوارع لما تخلص ها نعمل ايه؟

هانروح نستورد عيال من الصين و نخليهم شويه تحت كوبرى الملك الصالح يشمو كله و بعدين نصدرهم و لما يكبر انشاء الله يبقى الرئيس شن هن عبدالطيف جمس
و سلملى على البلكونه

Anonymous said...

الى الاخ المصراوى
انا مش فاهم هو ياما مسلم ياما كافر

Desert cat said...

تصدق يا ميجو العيال دول لما يكبروا هيدعوا على الحكومة
اللى لا بترحم ولا بتسيب رحمة ربنا تنزل
مش كفاية العواطلية اللى رايحين جايين باوراقهم الفين مرة فى السنة نفسهم فى طلب هجرة
كانوا سلكوا العيال الصغيرة بره بالتدريج خليها تخف شوية بدل الازمات اللى تحت الكبارى صعبان عليهم الكبارى تنضف من العيال اللى بتنام تحتها

Anonymous said...

ياحبيبي منك ليه انا بتتريقو ماقصدش ان غير المسلمين كفار

^ H@fSS@^ said...

مممممممممممم
عندي كذا نقطة احب اعلق عليهم
اولا: لسه كنت داخلة اقولكوا حطوا صورة جديدة لسنسن لقيتكوا ما شاء الله حاطين
البنت تجنن و زي القمر
حندورلها على عريس بسرعة

^ H@fSS@^ said...

النقطة الاساسية هو موضوع اللقيط ده
انا فاهمة طبعا ان ميجو بيهزر
لكن انا كل ما بسمع كلمة لقيط بفتكر قصة حصلت من كام سنة و الى الان تعباني

مش عارفة اذا تفتكروا من كام سنة يحيي الفخراني عمل مسلسل بس مش فاكره اسمه ايه و كان قام بدور رجل اعمال ناجح لكن يتهم في قضية قتل
و تتكشف الاحداث انه لقيط او ابن ملاجئ يعني مش فارقين عن بعض
و انه انتحل اسم شخصية لقاها بطريق الصدفة و على حظه الاسود طلعت الشخصية دي قتالة قتلة
المهم وقتها المسلسل ده عمل ضجة نوعا ما بطرحه لمشكلة متواجدة و بكثرة و مع ذلك محدش قرب منها
غير انه نكا جرح ناس تانية كتير
بعد عرض المسلسل بفترة قصيرة فوجئت في بريد الجمعة برسالة من شاب في سن المراهقة حكى فيها ازاي انه نشا في بيت كبير
عنده اخوات و اخوان كتار
عندهم راجل بينادوه بعمي او خالي
و مرات قليلة والدي
و نف سالشئ لمن تقوم بدور الام
و كان كل شئ بالنسبة له كويس و عال اعال
لغاية ما شاف المسلسل و اكتشف انه حيواجه موقف سئ اجلا ان لم يكن عاجلا لكونه لقيط و ابن ملاجئ
فيا اما حيضطر يكون صادق مع الناس
لكنهم بشكل قطعي حيرفضوه
و يا اما انه يضطر يكذب عشان يتقبل لكنه مش حينفع يستمر بالكدب اذا قرر يرتبط و يبني حياة

انا كنت نفسي ابعت رد و اقله خلي عندك امل و ان الناس المفروض تقيمك بشخصيتك انت مش بحاجة تانية
لكن مكنتش عارفة اعبر عن نفسي كويس
حسيت ان انا نفسي اللي تعاطفت معاه اوي ممكن اقوله كلام حلو اوي لكن وقت الجد لو اتحطيت في موقف مماثل ان حد يجيي يخطب بنتي و مالهوش عيلة يا ترى حرد عليه ازاي؟
هل حكون قد كلمتي ولا انا كمان حأجبن و ارفضه؟

انا مش قصدي اقلبها مناحة هنا
لكن بجد
مافيش مرة تيجي سيرة اللقطاء و ابناء الملاجئ غير و يجيي خيال الولد ده في بالي
و للاسف لان المشكلة اساسها بايدينا احنا
احنا اللي بنحكم على الشخص من عيلته
حتفق مع مصري انه ابسط شئ ممكن يترفض بسببه هو ان الناس حتقولك يا عالم دين اهله كان ايه
طيب و انتوا مالكوا يا بعدا باهله
ما ياما ناس اهاليهم مسلمة و هما مش كدا
و العكس صحيح.
انا مش عارفة ليه فتحت الفاتوحة بالموضوع ده لكن يعني حسيت اني عاوزة اشارككم دين بيقلقني في حياتي كل فترة والتانية
دين اني ممدتش ايدي للولد ده و ولو بالمؤازرة النفسية
خوفا على مستقبل ليا انا لسه محصلش
للدرجة دي احنا وحشين من جوا و منافقين بين اراءنا و افعالنا؟


اسفه لطول التعليق

تحياتي

Blank-Socrate said...

اتيت هنا معجبا بارائك المتفتحه عند المصرى المتعصب
الذى يرى غير المسلمين كفرة
و يرى السود نجسين
و يرى نفسه غير مخطىء فى استخدام البذائات لان الكل يفعل
سورى فقط اردت ان ارسل تحياتى
ساعود مرة اخرى للاستمتاع بمدونتك

Migo Mishmish said...

الاخ مصرى تانى
بصراحه مش هارد عليك ..لأنك بتجادل جدل بيزنطى ..ومش هافضل اضيع وقتى معاك لانك نفسك مش عارف عايز ايه

Migo Mishmish said...

مارفل
منور البلكونه..فعلا العمليه تتم فى نجاح وهدوء ..ارجو الكتمان

Migo Mishmish said...

الاخ جورج
ماتضيعش وقتك مع مصرى عشان هو مش عارف عايز ايه

Migo Mishmish said...

قطه
معاكى حق والله ..الحكومه لا عايزة ترحم ولا تسيب رحمه ربنا تنزل ..اقرى مقال سليمان جوده فى المصرى اليوم ..حلو اوى

Migo Mishmish said...

حفصه
منورة البلكونه ..بالنسبه لموضوع الصورة ..ميرسي جدا على ذوقك وعلى الكلمتين الحلوين فى حق ساندرا
اما بالنسبه لموضوع العيال دول ..ماتحمليش نفسك مسئوليه حاجه لانك مش لوحدك الى مسئوله ..كلنا مسئولين عن العيال دول وعن الى بيحصلهم طالما احنا مجتمع قلبه اسود ومعندهوش ذرة دم او تعاطف تجاه المساكين دول ..بنكتفى بمصمصه الشفايف ومافيش اى عمل ايجابى ناحيتهم ..وفى الاخر كمان نقعد نقول دول مجرمين ..مش انتى لوحدك مسئوله ..كلنا مسئولين

Migo Mishmish said...

بلانك
على فكرة انا دخلت مدونتك ..وهى مدونه جديرة بالاحترام
انا عارف انك مسيحى ..وانا والمدام (مشمش) برضه مسيحيين ..لكن الاخ مصراوى ماعرفش واخد سكه غريبه كدا ..مش عارف هو اسمه مصرى ليه ؟ مافيش مصرى حقيقى متعصب وبيكفر الناس التانيين ..هو بيدخل على البلكونه لمجرد اننا اقباط مش لان مدونتنا عاجباه
تحياتى ومنور البلكونه

صفا سارة said...

فعلا هى دى النظرية جبت المفيد :D

على فكره ساندرا قمر ربنا يخليها :)

Anonymous said...

على فكره يا جماعه انا مش عارف احنا ليه بنكلم كتير عن الموضوع ده انا لما فتحت البلكونه من 7 شهور مشوفتش فيهم موضوع مسيحى و مسلم
و معرفشى ليه احنا فتحنا الموضوع ده دلوقتى انا عن نفسى مش هارد على حد تانى يجيب سيرة الموضوع ده
هنعد نرد على بعض فى موضوع انا شايفه تافه انا اصلن نسيت الموضيع دى و معنديش استعداد اخش فيها تانى

Migo Mishmish said...

صفا
ميرسي على ذوقك ..ساندرا بتسلم عليكى هى كمان
تحياتى

Migo Mishmish said...

جورج الامريكانى
انت كلامك صح ..بس الاخ مصراوى هو الى بيتكلم لوحده فى المواضيع دى ..انما باقى الناس زى الفل ..عشان كدا انا مش هارد عليه لو اتكلم بالاسلوب دا
تحياتى ومبروك وانت عارف ليه
ميجوووووو

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق