Friday, January 22, 2010

سجل مدنى قريش

كان ثلاثه من كفار قريش يجلسون على مكاتبهم فى سجل مدنى قريش ..كان امامهم الكثير من الاوراق التى تدل على كسلهم فى اداء العمل وخدمه المواطنين ..الثلاثه تبدو على ملامحهم الجاهليه ..الثلاثه ملامحهم عابثه ولحياتهم تصل الى بطونهم اما حواجبهم كثيفه مثل المقشه الليف بتاعت جدتى ..حضر الحاج حسنى الذى امن بالدين الجديد الى المكتب للمرة الخمسون ليستخرج شهاده تفيد ان ابنه شيرين ذكر وليس انثى ..فالناس يعاملونه على انه انثى ويطالبونه بالنقاب باعتبار انه انثى بينما شنبه على وجهه مترين لكن الناس فى المجتمع البدوى يرفضون ان يعاملوه على انه ذكر فطالما اسمه شيرين فهو انثى لذا وجب عليه النقاب والا يخرج وحده بدون محرم ..لدرجه انه تعرض للجلد ثلاث مرات عندما تم ايقافه من قبل ضباط قريش فى كمين على طريق نجد الصحراوى ومرة اخرى تم ايقافه عندما شاهده الضابط فى الكمين القبلى بين الحائل وعسير ولما طلب رخصته القبليه وجد انه اسمه شيرين فسلمه لمحكمه الطائف بتهمه التبرج والخروج بدون محرم وهناك تم جلده للمرة الثانيه اما المرة الاخيرة فكانت على يد عكرمه عضو مجلس القبيله عندما سمعه يهتف للمرشح الاخر فتوعده وسلمه لمباحث امن عسير فى منطقه بقيق وهناك تم جلده للمرة الثالثه بطريقه وحشيه واشياء اخرى حدثت له عندما عرف المخبرون ان اسمه شيرين فتبادلو عليه حتى سقط من الاعياء وحينها ادرك انه طلع بقيق امه ..كانت هذه الحادثه بالذات سبب رئيسى لكى يفكر فى الهجرة الى الحبشه عند الملك النجاشي لكن مشكلته انه مطلوب فى الجيش ولا يستطيع ان يثبت انه وحيد وعائل قبيله .. فاتى والده الحاج حسنى الى سجل مدنى قريش حتى يريح ابنه من عناء الجلد والاشياء الاخرى ..
طلب الحاج حسنى من خزاعه موظف الارشيف استمارة 9 ليملأها ..لكن خزاعه نظر اليه بسخريه وقال :
خزاعه : الا تعلم يارجل ان موعد تقديم القرابين للاتى والعزه الان ؟ انتظر حتى اذهب واتعبد فالدنيا لن تطير
الحاج حسنى : ياعم هو انا كل لما اجى الاقيك بتصلى ؟
خزاعه : خسئت يارجل ؟ اتنهانا عن الصلاه؟ اتريد ان تغضب علينا اللات والعزى ؟
الحاج حسنى : وهو اللاتى و العزة قالولك تعطل مصالح الناس ؟
خزاعه : وانت مالك انت انت هاتكفرنا ولا ايه ؟
هنا انفعل الموظف الذى يدعى مغيرة بن الكلبى : ماذا تريد يارجل ؟ اصبئت بديننا وبدين ابائنا واجدادنا ؟ دعه وشأنه ليصلى وانتظر قليلا .
الحاج حسنى : انتو الى هاتخلونا نصبأ بدين ابونا ودين اهلنا حرام ياعالم بقالى شهرين عمال الف على المكاتب وانتو مدوخينى السبع دوخات ...الواد ابنى اتبهدل بسببكو
مغيرة بن الكلبى : احنا مالنا يا اخى ..حد قالك تسميه شيرين ؟ هذا خطاك
الحاج حسنى : غلطت يا اخى تقومو تعذبونا كدا ؟ فيه ايه يعنى لما تمضولى على ورقه فى دقيقه واحده
خزاعه : واللات والعزى ما امضى لك قبل الصلاه ..مناه وهبل بنادونى ويجب ان ألبى
الحاج حسنى : طب اتفضل وانا مستنى لما نشوف اخرتها معاكو
انتظر الحاج حوالى ساعه وربع ولم ياتى الاستاذ خزاعه موظف السجل ..واخيرا اتى وجلس على مكتبه
الحاج حسنى : اتفضل يا استاذ امضيلى بقى على الورقه دى عشان امشي
خزاعه : مالك متعجل يا رجل ؟ انتظر حتى التهم العجوة لافطر ثم امضي لك على الطلب
الحاج حسنى : والله حرام كدا ماتمضي الاول وبعدين تفطر
هنا ثار كعب بن صندل الموظف الثالث ..ايه يا اخى حرام عليك انتو مش بنى ادمين ؟ استنى الاول لما الراجل يفطر ..انتو مفيش فى قلوبكم رحمه؟
الحاج حسنى : انت مالك انت ..ماتخليك فى حالك
كعب بن صندل : مالى فىجيبى يا اخى انا ساكتلك من الصبح عمال تبهدل فى الراجل تكونش شارينا بفلوسك ؟ ولا شغالين عندك ؟
الحاج حسنى : اه شغالين عندى انتو بتاخدو مرتبكو من بيت المال يعنى من فلوسنا
خزاعه : والله ماهامضيلك غير لما اكل العجوة وافطر ولو مش عاجبك اضرب دماغك فى اقرب حيط
انتظر الحاج حسنى على مضض ولايم اموره وكله عشان خاطر شيرين ..وهنا مسح خزاعه يده وشكر الالهه على نعمه العجوة وبدا يسلك اسنانه من بقايا العجوة ..ودار حديث بينه وبين كعب بن صندل
خزاعه : عجوة هايله يا اخى ..الواحد لو مفطرش يوماتى بنص كيلو عجوة ..يفضل هفتان طول النهار
كعب بن صندل : فعلا معاك حق انا بضرب عالصبح عالاقل كيلو عجوة ..بس انت بتجييب عجوتك منين ؟
خزاعه : بتجيلى مخصوص من قوافل الشام تحب اجيبلك ؟
كعب : ياريت ..ابقى وصيلى على قفتين تلاته لحسن النوع الى بجيبه البذر فيه كبير
خزاعه : عينيا الاتنين
كان عم حسنى يتابع الحديث ويكتم غيظه بداخله ..
اتفضل يا استاذ بقى امضيلى على الطلب وادينى استمارة 9
خزاعه وجد نفسه فى مأزق وانه لن يجد حجه ليهرب
خزاعه : حاضر ..هات الطلب ..يمد يده لياخذه وفجأه يصيح
لقد شلت يداى لقد شلت يداى
جرى كعب ومغيرة على خزاعه ليطمانو عليه
الحاج حسنى : طب والطلب مين هايمضي عليه
مغيرة : عيب يا اخى هو احنا فى ايه ولا فى ايه ؟ الراجل ايده اتشلت يا اخى ابقى تعالى بكرة
الحاج حسنى : حسبى الله ونعم الوكيل فيكو يابعدا ربنا يرحمنا منكو (يمشى منكس الرأس )ولكن قبل ان يخرج سمع خزاعه يقول لزملاؤه : ولا شلت ولا حاجه ..انها سليمه ..فعاد عم حسنى لينهال بالضرب عليهم جميعا ويتصل ابولهب مدير المكتب بالبوليس ليتهم الحاج حسنى بضرب موظف اثناء تأديه وظيفته ..كما قام البوليس بتلفيق تهمه تزوير فى مخطوطات رسميه ..فاتهموه بتزوير بطاقته القبليه وتغيير اسمه من حسنيه الى حسنى ..كما تم توجيه تهمه الخروج متبرجا وبدون محرم ...وتم جلده 150 جلده وحبسه مع مجرمى قريش بدون محرم فى زنزانه واحده ليفعلو به كما يحلو لهم ..ويحكى ان احد المارة سمع انين من داخل التخشيبه يبدو انه للحاج حسنى كان يقول ..واللات والعزى لاوريكم ياجزم ...
تحياتى
ميجوووووووووو


16 comments:

نونا مجدى said...

واللات والعزى لقد أخطأت فى إسم الإله فهو العزى وليس العزه ممايستلزم لتصحيحه إحضار نموذج (6كفر)من مكتب بريد قريش والحصول على شهاده من إثنين موظفين بمعبد النار على أن تكون ممهوره بختم صقر قريش ثم تقديم ثلاثة عجول كقربان للإله العزى حتى يعفو عنك...وإبقى قابلنى بقى

Desert cat said...

ده اللى جرى للحاج حسنى اهون الف مرة من اللى بيشوفه اى حد داخل مصلحة حكومية النهارده ويا حبذا لو فى رمضان يبقى استنى لما الشهر يخلص وعليك خير اصل الدنيا بتكون صيام والناس مش بتشتغل فى الصيام مع انه المفروض شهر العبادة حولوه لشهر الاكل والنوم والكسل وسمعنا سلام فوت علينا بكره يا معلم

ELVIRA said...

بصراحة أنا ليا تجربة من النوع دة علشان أدفع مصاريف و دمغات و حاجات ملخفنة كدة
بعد ماوقفت فى طوابير و لا طوابير قطر الندى قالو لى أستنى لما الولد اللى واقف ورايا ناخد منه الأول
أنا من غيظى أتخانقت معاهم و قفلتلهم الشباك خالص

على باب الله said...

قريش بلدي ، نظيفة .. جميلة .. و معرصة

كافى خيرى شرى(سابقا برضو)وكلك نظر said...

ياه انا شفت الفيلم ده فين قبل كده؟اه افتكرت فى مليون مصلحه حكوميه بس مكانش فى اللات والعزه كانوا بيفرشوحاجه على الارض و....يوووووه الباقى انت عارفو بقى

كافى خيرى شرى said...

نسيت اقوللك ياميجو بعد مايرجعومن الصلاه ممكن تخلص طلبك بسرعه بس بلاش تقفيل المخ

Migo Mishmish said...

الاستاذه نونا
منورة البلكونه دايما وشكرا على التصحيح
على فكرة ..بقالك كتير بتيجى عندنا البلكونه ومنوراها ومش بنسألك تشربى ايه ..اصل حديثك ممتع وبننسي تعليقاتك الساخره
تشربى ايه؟
تحياتى
ميجووووو

Migo Mishmish said...

قطه العزيزة
منورة ياقطه كالعاده
معاكى كل الحق ياقطه ولن اضيف عليكى حاجه تحياااتى
ميجوووو

Migo Mishmish said...

elavira
تحيااتى ومنور البلكونه
هى دى مصر ياعبله
تخياااتى
ميجوووو

Migo Mishmish said...

الاستاذ كافى خيرى شرى
بقالك فترة مابقتش كافى خيرك وشرك بقيت بايع القضيه عالاخر ..ابوس ايدك ..اللات والعزى ليها ودان وممكن نروح فى مباحث امن الجزيرة بالبقيق
منور يا استاذ كافى خيرى شرى
وياريت ترجع تانى كافى خيرك شرك ..الكفار مابيرحموش
تحياااتى
ميجوووووووو

Migo Mishmish said...

على باب الله
دى زى مدرستنا ذمكتوب عليها ..مدرستى نظيفه وجميله ومتطورة بس الحته الاخيرة دى مغرقه فى الواقعيه ..بس جديده
تحياتى
ميجوووو

كافى خيرى شرى said...

شكرا يااستاذ ميجو واوعدك تكون دى اخر مره ادخل فيها البلكونه

نونا مجدى said...

شكرا عزيزى على ذوقك ولكن يبدو أنك لم تدخل مصالح حكوميه قريشيه من قبل ياأستاذى الفاضل فلا أحد يسأل تشرب إيه؟ولكنهم يقولون عادة(شايك ياباشا)ويبدو أنك تتهرب من دفع الشاى بصنعة لطافه مما يهددبتعطيل التعليقات على هذه المدونه لحين إستيفاء الأوراق اللازمه

Migo Mishmish said...

الى الاستاذ كافى خيرى شري
من حكمداربوليس العاصمه الى الاستاذ كافى خيرى شري
ارجوك لاتترك البلكونه ..ماتخليش البلكونه يعشش عليها العنكبوت
البلكونه من غير الناس الحلوة الى زى حضرتك تبقى مالهاش لازمه ..هاتبقى مهجورة
انا اسف لو فهمت كلامى غلط ..مجرد هزار عشان اوصلك معنى معين واكيد انت فاهمه
ياريت تفضل صديقنا فى البلكونه علطول ..وخليك ياسيدى مش كافى خيرك شرك ..قول اللى نفسك فيه ..هاستنى رد حضرتك عشان اعرف انك مش زعلان ..
تحياااتى
ومنتظر الرد بسرعه فالبلكونه لاتستغنى عن حضرتك
ممكن تكون حضرتك زعلان عشان ماقدمنالكش شاى ؟
شايك سكره ايه؟
ميجوووووووووو

كافى خيرى شرى said...

من كافى خيرى شرى الى حكمدار العاصمه صافى يالبن وبينى وبينك مقدرش استغنى عن بلكونه فيها هوا نضيف وناس جدعان ومش مهم الشاى المهم الناس الحلوه

Anonymous said...

جامدة جدا وفكرة احلى تعيش وتكتب كلبيزو

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق