Saturday, January 30, 2010

شطرنج

الشطرنج حرب دايرة، وزرا وحاشية وعساكر ملهمش غير هم واحد: يحموا الملك سيد الدولة
. مش مهم قوي اللي هيموت عسكري ولا وزير،المهم الملك يعيش.

هما ليهم لازمة من غيره؟

مين يهمه حال العباد ولا الرعيه في البلاد. طالما الملك موجود، هو حد يقدر عالبعاد؟



بس يا خسارة، الدور لازم في يوم ينتهي

والملك يموت زيه زي اي واحد من العباد

Love,

MishMish

27 comments:

Tears said...

بس ياريت الملك يفهم الحقيقة دى و يعرف ان فيه حاجة اسمها موت مش يتصرف كانه عايش أبد الدهر

Desert cat said...

هع هع هع الملك كان بعد كل جون يبوس حفيده ودى اهم انجازاته

Migo Mishmish said...

Tears:
مش الملك بس اللي لازم ياخد باله
لا والحاشية كمان وعادتاً دول محدش هيرحمهم
Love,
MishMish

Migo Mishmish said...

قطوطة
يا عيني والنبي صعب عليا
امال لما ماتشات الكورة تخلص وياخدوا اجازة اخر السنه هيعمل ايه
love,
MishMish

نونا مجدى said...

؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!أنا مقريتش البوست ده ولاأعرف عنه حاجه

Migo Mishmish said...

ليه يا نونا
دانا بتكلم عن الشطرنج
حد ما يعرفش الشطرنج
Love,
MishMish

mony said...

الملك كمان مالوش قيمه من غيرهم

عمو..ععع عصصصاااااااااام said...

عزيزتى مشمش...بلاش تكتب عن الملك كفايه ميجو يكتب فى السياسه وخليكى انتى بعيد عشان تربى البنت وياريت تغيروااسم المدونه وتخلوها( ميجو من غير مشمش)أوميجو وبرتقال مثلا

Migo Mishmish said...

عمو عصام
انا لا بكتب فى السياسه ولا نيله ..هى الى بتكتب ..وبعدين انت كارهنى اوى اليومين دول عمال تقولها غيرى اسم المدونه لميجو ومش عارف ايه ..ميجو ميجو ميجو ..انت حاططنى فى دماغك ليه مش كفايه الملوحه ؟ عايز تسجننى كمان ؟
تحياتى
ميجوووو

Anonymous said...

هو سؤال لما الملك بيموت فى قانون الشطرنج يبقى الدور خلص يعنى مينفعش الملك يجيب ابنه و يكمل الدور صح و لا غلط ممكن تبقو تسالو خبير شطرنج

حاجه كمان ميجو اسمع كلام عمك عصام علشان لو مشمشه اتقفشت هايجبوك معاها و هايجيبو كل اللى يعرفوكو بما فيهم انا و انا مش عايز اجى
وساعتها فؤش هايعدى علينا و يقولك هئ هئ هئ رجليا وسخه
George USA

Migo Mishmish said...

Mony
احياناً الملك من كتر ما بعد عنهم بيفكر انه ممكن يستبدلهم. بس الملك مش شاغل دماغي زي بقية الحاشية والعالم اللي وراه
تلاقي حياتهم ووجودهم كله مرتبط بيه وازاي ياكلوا من حواليه
بس لازم الدور يخلص والملك يموت
دول هتبقى ظروفهم ايه؟
Love,
MishMish

Migo Mishmish said...

عمو عصام
اخيراً رجعت تاني
برضه لسه مستنين مدونتك الخاصة
اما بخصوص السياسة مين جاب سيرتها
انا بتكلم عن الشطرنج يا عمو
حتى اسأل نونا
Love,
MishMish

Migo Mishmish said...

جورج
الشطرنج عندنا مختلف يا عم
لما الملك بيموت بيجي ابنه - في الشطرنج يعني وبعدين خاله وابن عمه وجوز عمته والسواق- في مصر احنا بنحب اللمه وانت عارف
Love,
MishMish

عمو عصام said...

خلاص ياميجو خلي اسم المدونه ميجو وملوحه وبلغ مشمش ان نونا ماتت بالسكته القلبيه وقول لها جهزى الليمون وطبعا انت وهى عارفين ليه

فرعون said...

اول مره ادخلعندكم الاقىالكلام ده نصيحه لله اتكلموا عن الطاوله احسن وبلاش الشطرنج لانك ممكن تلاقى نفسك فى القسم بتلاعب نفسك تمهيدا لنقلك لمستشفى الامراض العقليه وعموما منه لله اللى عرفنى سكة مدونتكم وحلفنى اكتب تعليق

كافى خيره شره said...

من كافى خيره شره الى السيد ميجو والسيده مشمش:ازى صحتكم؟وعلى فكره هو كيلو الحلاوه بقى بكام؟

Mowatten Ardi - مواطن أرضى said...

Mish Mish!

Shokrun 3ala el keleteen doal.
Kan zamaan fee7 masra7eya esmaha "Elmalek howa Elmalek" (Mounir 3'ana feeha) we kol ma basma3 3un a7'bar el ma7rousah aftekerha :-)

Migo Mishmish said...

حبيبي عمو عصام (الل مظبطني بالملوحة واللي محدش بقى يجبهالي بعد ابويا الله يرحمه)
ولعلمك ميجو وملوحه احسن من ميجو ومشمش
على الاقل انا بعشق الملوحة انما المشمش والفاكهه كلها ماليش فيها
مستنين اكله الملوحة 2 في اي وقت

Love,
MishMish

Migo Mishmish said...

اهلاً اهلاً بالفرعون واللي جي من ناحية الناس العظيمة ديه
والله ماليشس في الطاولة يا باشا
مشكله المشاكل اني محبش غير الشطرنج
عموماً لو اتسحبت على القسم هاقولهم اني مختله عقلياً او ان مخي حصل فيه ماس كهربي
ما هي كل حاجة في مصر بيعملها واحد من اتنين ياما مختل عقلياً ياما ماس كهربي
وعموماً احنا بنشكر اللي عرفك سكة مدوناتنا
Love,
MishMish

Migo Mishmish said...

كافي خيره شره
كويسين والحمدلله ودايماً بنبسط لما بنقرا تعليقاتك
اما بالنسبة لكيلو الحلاوة مش فارق هو بكام. وانا مالي. الحلاوة عليكم. ولا هتيجوا تزرونا ايد ورا وايد قدام
love,
MishMish

Migo Mishmish said...

مواطن ارضي
انا مشفتش مسرحية منير بس ما يتهيأليش الفكرة هتختلف كتير. الناس ساعات بيتهيالها انهم اكبر من الزمن واقوى من الطبيعيه
مع ان اي بني ادم مفيش في حياته غير حدثين مهمين يوم ميلاده ويوم موته وكل اللي في النص مش بالاهمية ديه
Love,
MishMish

فرعون said...

أنا مش فاهم حاجه هو ملك؟ولا فرعون؟ولارئيس؟لو ملك يبقى ولى العهدجاى ولو فرعون يبقى مين فرعنه؟ولو رئيس يبقى قاعد على لوحة الشطرنج المده دى ليه؟يااخوانا حد يفهمنى

م/ الحسيني لزومي said...

بيقولوا الملك لازم يورثوا وزير وللا ده مش مطبق عندنا

Migo Mishmish said...

فرعون
احمد ربنا انك مش فاهم حاجةونكتفي بهذا القدر علشان انا عندي عيال
انا معنديش مشكله مع ملك الشطرنج لانه امر واقع
انا عندي مشكله مع الحاشية
بعد ما باعوا البني ادمين في العبارات وضحايا البلطجيه والعنف الطائفي والبطاله ونزيف الهجرة
ادوروا على الاثارات علشان يبعوها
يعني مش كفايه حضرنا زفت ومستقبلنا في علم الغيب. لا دول عايزين يبعوا اللي باقي من الماضي كمان
يلا ادينا قاعدين اما نشوف الدور هيخلص على ايه
love,
MishMish

Migo Mishmish said...

م الحسيني
لا يا فندم النظام هنا مختلف
الحاجة الوحيدة اللي بتطبق هنا هو الغسيل على المستوى الشعبي وقانون الطوارئ على المستوى الحكومي
Love,
MishMish

احمد.خ said...

على فكره المشكله ليست فى الملك بل فى الرعيه التى تعلم حقوقها ولكنها صامته عن المطالبه بها ويتضح ذلك من تعليقات ضيوف المدونه الناضجه وبالمناسبه مشمش مفهومه بس يعنى ايه ميجو؟

Migo Mishmish said...

الاستاذ احمد خ
منور البلكونه يا استاذى العزيز
الحقيقه معاك كل الحق ان الاغلبيه مش بتطالب بحقوقها ..بتطالب بيها فى المنتديات السريه زى البلكونه
على فكرة المدونه بتاعه ميجو الى هو انا وزوجتى العزيزة مشمش وابنتنا العضو الثالث ساندو..نحن الثلاثه شركاء فى البلكونه
تشرب ايه حضرتك؟
تحياااتى
ميجو وزوجته مشمش وابنتهم ساندو

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق