Wednesday, March 3, 2010

مركب المحروسة بتغرق ليه؟

الحكايه ان مركب المحروسه ده كان مركب ولا في الاحلام. نظام ونضافه وناس عايشه مع بعضها كافيه خيرها شرها وفي يوم نط عليهم جماعه كبار في العدد وقالولهم ارفعوا المراسي. الناس قالوا: خير ليه؟ ردوا الكبار مفيش وقت للرغي والكلام الكتير. نتحرك بس وبعدين نبقى نحكيلكم عن موضوع خطير. الناس سمعت الكلام، رفعوا المراسي وبعد شوية سمعوا صوت نفير. ده تنبيه وتحذير الجماعة قررت تغمي عينيكوا اصل البحر هيبقى عالى والمشوار زي مانتوا عارفين طويل. قالوا:طب والموضوع الخطير
اتغموا بس
دلوقتي بس نقدر نقولكم عالموضوع الخطير
الموضوع يا سيدي انت وهو "ان ربكم في خطر والتانين اعداء الدين بيدبروله مؤامرة. خدوا بالكم ده فيه كمان اجنده خارجيه وتربص دولي. هتعلموا ايه يا مؤمنين؟". يا نهار اسود مؤامرة على مين؟! محدهاش هيبات الليله دي سليم
قامت الناس على بعضها. ناس ماتت وناس اتعورت والمركب طبعاً اتأثرت
واتفتح تحقيق اسألته واحدة لكل التانين
عددكم كام؟
ايه اللي فاضلكم في المحروسة؟
مين واقف وراكم من برة؟
ليه بتلجأوا لمنظمات بره؟
سافرت ...... قبل كدة؟
عندك اقوال تانيه؟
ايوه يا بيه عايز اعرف كرهتونا في بعض ليه؟ ومركب المحروسه بتغرق ليه؟
هشششششششششششششششش
"خد بالك فيه اجندات خارجيه وتربص دولي"
انت نسيت ولا ايه؟
من وحي حوارات المصري اليوم مع رؤساء الطائفه اليهوديه في مصر (السيدة كارمن والسيد بن جدعون) والنوبين في الداخل والخارج - بتواريخ 16، 17 فبراير 2010

Love,
MishMish

21 comments:

rony said...

هى مركب المحروسه بتغرق لييييييييه؟
اكيد اتخبطت فى جبل تلج ولا حاجه
زى تيتانيك يعنى
امال هيكون ايه مثلا
قضاء وقدر طبعا
ربنا يرحمنا وينجينا من شر الغريق والحريق
وبس خلاااااااااااااااص

mony said...

لان مافيش اخلاص للمركب لازم تغرق
لو كل حاجه بتتعمل بجد مش هتغرق
لكن لو الحياه اتاخدت بمظهريه
لازم المركب تغرق

hellmr said...

طبعا ازي دي تفزتك السبب
عاطل او مختل عقلياً!

Migo Mishmish said...

Rony
ركب المحروسة بتغرق علشان بيخرموها من جوه
لو الضرب كان جاي من بره كان الدفاع عنها بقى سهل
لكن لما يبقى الكل عدو للكل
محدش يبقى مركز مع الجماعه الكبار
Love,
MishMish

Migo Mishmish said...

Mony
عندك حق
الاخلاص راح لما الصح والغلط بقى نسبي

Hellmr
لا مفاتتنيش
الشعب اللي رضي يغمض عينه بقى كله عواطليه مختلين عقلياً

love,
MishMish

م/ الحسيني لزومي said...

المهم المركب فيها ناس

Migo Mishmish said...

م/ الحسيني
الناس عميانه عمالين بيلطشوا في بعض
وفاكرين انهم بيحموا ربهم (فكرة - قوميه - عقيدة - توجه سياسي - اوحتى وظيفه) والجماعه الكبار عاملين يتفرجوا ويضحكوا
Love,
MishMsih

لاديني said...

عندما تتعرض المركب لعاصفة من الداخل وتلف من الداخل ويكتفي ركابها بنهب بعض مع التضرع لله والخرافة
فإنها حتماً ستغرق

بلكونتك شِرحة
:)

عمو عصام said...

بالذمه ده سؤال؟؟؟المركب بتغرق لأن كل الأسباب تؤدى لغرقها وأكيد لنا لقاء نتناقش فيه بعيدا عن أعين أ.دحتى لانتهم بقبول تمويل خارجى والعمل بأجنده أمريكيه

strategicalone said...

هى لسة بتغرق ؟ ما غرقت من زمان . من اول ما اتقتل الربان وسلمنا بايدينا الدفة للدجالين والغوغاء مدعى الدين .
وتاريخهم فى الخيانة يبتدى من اول كهنة امون اللى قضوا على الديانات الاخرى علشان يفضلوا لوحدهم الممثلين لله مروراً بكهنة المسيحيين حتى كهنة المسلمين فى اقرب محطة باعوها بفلس الجاز .
وارجع واقول على الباغى تدور الدواهى
اسف على الاطالة
تحياتى

Migo Mishmish said...

لا ديني
صح كدة
من يقدم اخوه ذبيحه بشرية ليتضرع بها الى الله ماهو الا عابد وثن وخرافه

عمو عصام
هاهاهاهاها
تمام يا عمو
احلى حاجة في الموضوع اننا هنتناقش
صدقني اكتر وقت بحس انه مضاعش مني هو الوقت اللي بنتناقش فيه مع بعض

strategicalone
و لا تتأسف على الاطاله ولا حاجة براحتك يا عم احنا قاعدين في البلكونة
انت عارف مصر ديه لو الحاله الاقتصادية فيها كويسة والقانون بيتطبق صح كانت هتبقى نسبه المؤمنين - اللي بجد مش اللي وشهم عكر - ماتعديش
10%
عدد كبير من رجال الدين ساديين وعايزين اي فرصه يركبوا بيها على دماغ البني ادمين
Love,
MishMish

أحمد .خ said...

أستاذى الفاضل مضى زمن الأسئله و لم نعد نحتاج لمن يتساءل لماذا مركبنا تغرق بل أصبحنا فى حاجه لمن يلقى لنا أطواق النجاه هذا لو أسعفه الوقت فتقريبا كل شئ إنتهى

Ms Venus said...

بتغرق ليه ؟

الاسباب كتيرررررر

ربنا يرحمنا

صوت من مصر said...

جميل وهايل
بس المحروسه ليست كما هى الى الان

فرعون said...

المركب بتغرج ليه غراب البين ريس عليه

فرعون said...

المركب بتغرج ليه غراب البين ريس عليه

Migo Mishmish said...

ا. احمد
انا المدام مش استاذ ميجو
عندك حق
ساعات بحس ان ممكن يبقى في امل وساعات تانيه بحس اننا لازم نعلن موت مصر ولا عزاء للرجال او النساء

Ms. Venus
السبب الوحيد اللي مالوش حل انها اتخرمت من جوه.
واللي جواها مش همهم انها بتغرق


صوت من مصر
يا رب يا اخويا يا رب
واحنا نطول
انا نفسي يسبوها للي بيحبوها
انما هما مصرين على خرابها
واللي مابيقدروش يبعوه بيبوظوه


فرعون
طب مفيش حل
يعني ما ينفعش نهشه ولا نسمه ولا تجيله مصيبه تاخده

Love,
MishMish

Tears said...

المشكلة ان مافيش حد حكم البلد و كان بيحبها اكتر ما حب كرسيه

الخراب فى النواحى الطائفية ظهر فى عهد أنور السادات و تفشى الان و ده لان الدولة بتزايد على المتطرفين و المتأسلمين و سايبالهم الشارع لما خربوا الدنيا

Migo Mishmish said...

Tears
عندك حق
بس انا مش شايفه ان الحكومة بتزايد على الاسلاميين علشان الدين نفسه
ديه بتعمل كدةعلشان خاطر الناس هابله
وبعدين الحكومة بتاعتنا عامله زي الحربايه
مع كل واحد بلون تضايق المسيحين وتقول المسلمين هما السبب
وتضايق المسلمين وتقول امريكيا هي السبب
وتضايق الليبراليين وتقول الدين هو السبب
وتضايق المتشددين وتقول المثقفين هما السبب
وهلما جرجر
Love,
MishMish

أحمد.خ said...

أستاذتى الفاضله أرجو قبول إعتذارى عن الخطأ غير المقصود فى إسمك وليس لى فى ذلك أعذار

Migo Mishmish said...

ولا يهمك يا احمد باشا
في بيتها
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق