Tuesday, March 16, 2010

حكام اجانب


انتشر العنف فى الدورى المحلى ..الملاعب فوق فوهه بركان ..الجماهير تقذف وتشعل الشماريخ فى اماكن مختلفه من الملعب ..انهم يشعرون بالظلم التحكيمى الفادح ..فتلك الفرق المهدده بالهبوط لا تملك المال والسلطه التى تجعلها فى قمه الدورى او حتى تتنافس منافسه شريفه مع باقى الانديه بالرغم من ان هذه الانديه انديه جماهيريه وعريقه تضرب جذورها فى اعماق الارض المصريه ..هذه الانديه على سبيل المثال : نادى الاقباط ونادى النوبه ونادى البدو الرياضي ونادى المثقفين مضطهددون ونادى المصريين الغلابه ..هذه الانديه ظلت تطالب بحقوقها المشروعه بطرق قانونيه داخل اطار محلى ..لكن رئيس لجنه الحكام الرئيسيه سرعان مايخرج امام الفضائيات ويؤكد : التحكيم المصرى بخير ..لا مساس بوحده الدورى المصرى ...الدورى المصرى نسيج واحد...وان جميع الافرق متساويه فى الحقوق والواجبات ..وان ما يحدث هو تنفيذ لاجنده خارجيه تستهدف ضرب الدورى المصرى .وانهاء دوره الريادى فى المنطقه ..لقد نفذ صبر هذه الانديه ..ولم تلجأ للاتحاد الدولى خوفا من اتهامهم بزعزعة استقرار الدورى المحلى والاساءة الى سمعه مصر فى المحافل الدوليه ... بعض هذه الفرق اوشك على الهبوط الى الدرجه الثانيه وبعضها هبط فعلا الى الدرجه الثالثه والرابعه وقد يختفى اسمها من الوجود ويصبح وجودها مجرد ذكرى تاريخيه تحكيها الاجيال ...هذه الفرق لم تجد من يحل لها مشاكلها بطريقه حاسمه ..كل الحلول عبارة عن مسكنات ...ولم يعد اى اختيار باق اما تلك الفرق حتى لا تنقرض الا اختيار واحد فقط .... وهو طلب حكام اجانب
تحيااااتى
ميجوووو
من مدرجات الدرجه الثالثه
دورى المظاليم

21 comments:

عصام said...

عزيزى ميجو..أولا ألف حمدا لله على سلامتك وثانيا مبروك الشكل الجديد للبلكونه رغم أنه جعلنى أعتقد أننى دخلت بلكونه غلط وثالثا بإعتبارى أحد أفراد فريق الدرجه الثانيه والمهدد بالهبوط للدرجه الثالثه دعنى أوجه لك سؤالا وهو:ماهى إحتمالات اللجوء للتحكيم الأجنبى خاصه بعد أن طلب هذا التحكيم التدخل متطوعا؟وماهى إحتمالات نجاح الفريق فى الحصول على حقوقه فى ظل التحكيم الأجنبى؟ دعنى أجيبك بأنه ليس مثل الله فى عدله وهو الذى قال أن شعور رؤوسنا محصاه وأن من مسنا فقد مس حدقة عينه أما التحكيم الأجنبى فقد يحولنا لورقه يلعب بها فوق الترابيزه ثم عندما يتقاضى الثمن يلقى بنا فى أقرب سلة مهملات خصوصا وأنت تعلم أن رئيس لجنة التحكيم أصبح عاجزا عن إدارة اللجنه ويفكر جيدا فى تركها لإبنه وهوعلى إستعدادتام لتقديم أى تنازلات كى يصل لهدفه..خالص أمنياتى بتمام الشفاء والعوده لشرب الشاى فى البلكونه وإن كان ذلك صعبا لأن الشاى عاوز غاز والغاز خرج من مصر ولن يعد ..عرفت يعنى إيه تنازلات؟

Migo Mishmish said...

عمو عصام
الله يسلمك ..اما بالنسبه لموضوع النيولوك فده اختراع مشمش
اما بالنسبه للموضوع الرئيسي ..انا مايدتش التحكيم الاجنبى لانى عارف نتيجته هاتبقى ايه ..ولو فيه ديمقراطيه فى مصر هانروح فى داهيه لانه ممكن توصل اى حد للكرسي مانت عارف شعبنا ممكن يتضحك عليه ازاى ..انا بقول ان ده نتيجه حتميه لعدم حل مشاكل هذه الانديه ..لان شم هايبقى فيه اى اختيار لان الغريق بيتعلق باى قشه ..وده من خوفى عليهم من الاندثار
تحياااتى
ميجوووووو

hellmr said...

ميرزك الشكل الجديد تدوبه في عرق العفية :D

mony said...

اولا حمدله على السلامه
ثانيا مبروك النيولوك
ثالثا انا مع عمو عصام
رابعا ربنا موجود هو العدل الوحيد ولا امل لنا من غيره

Anonymous said...

مع الاختلاف مع عمو عصام ليه لآ منجرب
التحكيم الاجنبى مش يمكن ينفع

بس المهم يكون اجنبى مش يجى من السعوديه و تقلولى اجنبى
ممكن اسال سؤال
هل سيتم تغيير رئس لجنه الحكام او رئيس اتحاد الكوره فى 2011؟؟؟؟؟؟؟

George USA

مواطن مصري said...

لا بس التراس وايت نايتس اجدع

مشجعين في مصر و هفكرك الدوري للزمالك

الاهلي من عادتة يشتري الحكام بس الزمالك بيلعب بمبدأ يالنصر يالشهادة

:D

Sahran said...

ميجو الحبيب مرحباً بك

أتمنى أن أكون ذكياً بما فيه الكفاية كي أفهم ما وراء السطور ,,,

إنما في اعتقادي (و خلينا نضرب أمثالنا بالكورة ) هو أنه عندما لا يكون هناك تحكيم جيد , فهذا أساسه فشل في المؤسسة الكروية بأكملها ,,

يفترض بأن هذه الفرق ( القبطية , الإسلامية , العلمانية , وغيرها ) أن تكون على أعلى قدر من الأخلاق والمسؤولية , وحينها قد لا يحتاجون أبداً لأي تحكيم

واللبيب من الإًشارة يفهم


تحيااااااااااااااااتي لك


ودمت سالماً

strategicalone said...

اهلا يا ميجو
احب ابلغك ان الدورى اتباع
واللى موش عاجبة يدور لة على اجمد حيطة يخبط دماغة فيها
وما تصدقشى اللى بيقولك دى حاجة ها تعك على كل الفرق لا لان فية طرف مستفيد من ظلم الحكام بامارة ما فريق فريق القوطة بقالة عشرتاشر سنة بيفوز بالدورى وماسك البرامج الرياضية اللى 12 ساعة متواصلة والقضاء والشرطة وامن الدولة علشان كدة ما تلاقيش ولا واحد ابيض فى امن الدولة ولا منتخب عضو فى البرطمان .
باختصار طول ما فية فريق الاغلبية مستفيد من الظلم يبقى موش ها يوافق على التحكيم الاجنبى.وها يقلبها ضلمة
يعنى لما ييجى فريق الابيض يبنى مركز فى اى مدينة، وبعد ما يجيب التصاريح ويدفع الرشاوى ويبتدى العمل يقوم واحد من كباتن الفريق الاحمر يعلن فى الميكرفون ان الفريق الابيض عاوز يدنس المدينة يا جدعان ، بعد كدة تلاقى كل الجماهير الحمراء اخذت فى تكسر محلات وصيدليات الفريق الابيض والحرق اهم حاجة الحرق والصيدليات (بالمناسبة لية كل مرة تتحرق صيدليات يمكن علشان يخلوا الناس تلجا للضب العبطى
لا ولا عمو عصام بيقولك ربنا موجود وهو الحكم يا راجل هو دة حُكمة بيرضى حد فى الزمان دة طب انا قابل برايك هى الاحكام دى ترضيك؟
انا اّسف على الاطالة لكن انا قلت ياد اتكلم براحتك مانت واقف فى بلكونة بحرى وقدامها المحيط
سلام

عصام said...

عزيزى ميجو..أنا آسف لإضطرارى دخول البلكونه مره أخرى وأرجو ألا أكون مزعجا ولكن دعنى أهنئك على ضيوفك الذين جعلوا من البلكونه منفذا للهواء النقى بتعليقاتهم الذكيه مهما إختلفت أو إتفقت معها فى النهايه لازلت عند رأيى برفض التحكيم الأجنبى ليس ثقة فى التحكيم المصرى لأنه ببساطه غير موجود أصلا ولكن هناك حكما كل أحكامه عادله قد يصمت قليلا أوكثيرا ولكنه يمهل ولا يهمل ويوما ما سيرى الجميع أن تدبيره يفوق العقول أم نحن فسنظل أمام الناس كضعفاء ونحن الالأقوياء..كحزانى ونحن الفرحون كفقراء ونحن نغنى كثيرين كأن لاشئ لنا ونحن نملك كل شئ

أحمد.خ said...

أستاذى الفاضل يبدو أن اللاعبين جميعا قد إتفقوا على تغيير الحكم رغم أنف لجنة التحكيم ورئيسها وسيبدأالتغيير بقواعد اللعبه نفسها لأن الحكم المتفق عليه لم يسقط فى الفخ ويوافق على مجرد الترشيح ولكنه بذكاء يحسد عليه أصر على تغيير القواعد أولا وسعى إلى جميع اللاعبين يستطلع رأيهم وقبل أن يتبادر إلى ذهنك أننى إبتعدت عن الموضوع أطمئنك بأنه فى حالة نجاحه هناك أمل أن يكون الدورى كله درجه واحده وليس عدة درجات وسيحصل كل من ينتمى للدرجه الثانيه والثالثه على حقوقه غير منقوصه وقبل أن تتهمنى بأننى أحلم دعنى أرجوك بأن تحلم معى فبلا أحلام لن نعيش وبلا أمل لن نحيا وفى حال فشل مخطط التغيير فليشملناالله جميعابرحمته بجميع درجاتنا

Migo Mishmish said...

hellmr
الله يبارك فيك يالورد
ميجووووو

Migo Mishmish said...

مونى
الله يبارك فيك
ميرسي على سؤالك
بالنسبه لموضوع ربنا موجود فانا متفق معكم
ميجوووووووو

Migo Mishmish said...

جورج
اهو راى برضه ..بس انا مش متفق معاك لاننا هانتعامل معامله الكلب اول مايحققو مصالحهم
ميجووووووووووووو

Migo Mishmish said...

مواطن مصرى
مش فاهم ...انت بتتكلم بجد على الكورة ولا على حاجه تانيه؟
تحياااتى
ميجووووو

Migo Mishmish said...

سهرااااان
كلامك فى الجون وهو ده المطلوب ..تتحلى جميع الفرق بالاخلاق وساعتها لن يكون هناك حاجه للتجكيم
ميجوووووووو

Migo Mishmish said...

strategicalone
موافق على رايك ..بس عمو عصام يقصد انه ربنا موجود وانه هايتدخل فى الوقت المناسب وانه اهم من اى حد تانى ..وانا بصراحه بالرغم من ان الحكام الاجانب على الاقل اعدل من الحكام المصريين ..لكن فى النهايه هايرمونا رمى الكلاب لما تتحقق مصالحهم ..ولك فى العراق اسوة ..بص العراقيين المسيحيين ايه الى حصلهم؟
تحيااااتى
ميجووووووو

Migo Mishmish said...

استاذ احمد خ
والله ماحدش يعرف ايه الى هايحصل لو الحكم الجديد جه
بس متهيالى مش هايوصل لانه هايتعطل فى المطار او يتقفل عليه باب بيتهم او يجبر على السفر للخارج ..انا معاك انه ذكى ومرشحش نفسه للتحكيم المحلى وهذه خطوة تحسب له ...لكن عشم ابليس انه يحكم الماتش
تحيااااات
ميجووووو

Anonymous said...

انت معاك حق بس ليه منجبش لعيبه من بره

يعنى الناس دى عندهم علم و دارسين كويس
ليه منجبش واحد من المدربين يدرب السكه الحديد
انا بكلم جد ليه منجبش وزير من اوروبا او امريكا يمسك وزارة النقل كفايا الناس اللى بتموت احنا و الحمد لله عندنا اعلى معدل و فيات على الطرق و لا حوادث القطارات المشكله اننا عايزين حد متعلم يعنى عايزين واحد للتعليم كمان وواحد للاقتصاد وطبعا للصحه و لو فعلا جبنا كل دول يبقى احنا نقصنا مين

George USA

Anonymous said...

انت معاك حق بس الحكام عندهم زهايمر فى القوانين ابقى تعالى زورنى www.mahmodalmasre.blogspot.com

Anonymous said...

Anyone knows what happened to Hassan el Helali's blog (hegab neqab), I can't find it. I can't find him on facebook also.

Marika

Desert cat said...

هو لا تحيكم اجنبى نافع ولا مصرى نافع مع العقول اللى بتاكل فول وبتمشى ورا اى حد مدرووش

سورى على الاحباط بس معنديش اى ذرة تفاؤل من اللى بشوفه

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق