Sunday, September 19, 2010

حد الردة


انا: عمري ما فهمت الغرض من حد الردة
صديقي: حد الردة يحمي الامة من الفتنه. المرتد لازم يتقل
انا: ليه؟
صديقي: لانه قال انه اكتشف غلط في كتاب ربنا
انا: طيب ما المفروض يبقى في ناس مختصصين للتعامل مع الحالات ديه. ان كان فاهم غلط او مش فاهم خالص يرشدوه. ولو كان عنده حق يبقى حرام قتله وحرمان الناس من المعرفه. مش الساكت عن الحق شيطان اخرس
صديقي: ....اممممممممممم .بس لازم يتقل
انا: ليه؟
صديقي: لانه اكتشف غلط في كتاب ربنا

هذه التدوينه لا يقصد بها الاساءة لاي ديانه او معتقد ولكن الهدف منها كشف عقليه من يدعون احقيتهم في الوصايه على ارواح وعقولهم البشر
Love,
MishMish

23 comments:

Kontiki said...

كلمة الشريعه او الحكم وفقا للشريعه شائعه جدا عند الاسلاميين و الاصوليين والان اصبحت متداولة عند الاخوان وبالطبع هى اساس عند جماعات السلف
الشريعه هى حكم القرآن على انسان ما فى حالة ارتكابة اثم ما مثل الزنا والردة و الربا و الحجاب وغيرها
الحكم مصدرة اية من ايات القرآن تؤخذ بدون كامل سياقها و يستنتج منها الحكم بمعنى ان تكون الاية نزلت فى مناسبة او حالة معينة اتفقت وقتها مع ظروف الزمان و المكان وقت نزولها ويجد المتسلطون فيها حجة او ذريعه جيدة لاصدار حكم فقهى يظنون انه صالح لوقتنا و ظروفنا حاليا مع انه غير صالح فاحكام الرجم مثلا او الجلد لا تصلح لوقتنا ولا لظروفنا حاليا ومع ذلك ستجدى من يستمر فى التشدق بها والسبب انه اذا اعطينا الدين لمجموعه متحضرة من البشر فهمت افضل ما فية واذا تلقى الدين مجموعه تتسم بقلة الوعى و التسلط اختارت ان ان تطبقة بأسوا صورة
عموما من دراستى وقراءتى للفلسفة الاسلامية و قراءة القرآن كاملا اكثر من مرة
جوهر الدين الاسلامى هو التوحيد و التسليم وليس معنى التسليم هو الاسلام التسليم يشمل معانى مثل التوكل تسليم كل الامور لله اعترافا بقدرتة معنى التسليم يشمل الثقة فى الله كما تقول الزوجة لزوجها مثلا انها سلمت له كل امورها
واعتقد هذا المعنى وهذا الجوهر اتفقت علية كل الاديان السماوية و الغير سماوية
واعتقد ايضا انه من الافضل التركيز على نقاط التلاقى بين البشر وبين الاديان بدلا من التركيز على نقاط الاختلاف كى لا نكون كمن يطفىء نارا بالقاء مزيد من الحطب
love :)

Kontiki said...

قصدت ترك الحجاب *

Tears said...

يا اخوانا بلاش ناخد معلوماتنا من الجهلة

القرآن هو المرجع الرئيسى للاسلام و مافيش آيه بتقول قتل المرتد بالعكس من شاء فليؤمن و من شاء فليكفر و بعدين ما فى حياة الرسول لم يحدث ان قتل اى شخص ارتد و كان بيعاملهم بالحسنى

اللى حصل ان فيه احاديث كتير مغلوطة و ملفقة و غير متفق عليها يتم تداولها على انها صحيحة زى مثلا حديث من راى منكم منكرا فيغيرة بيدة ...الى اخره و ده كله مثبت فى بحث للمستشار سعيد العشماوى فى كتاب الحجاب و حجية الحديث اما خرافة قتل المرتد فهناك بحث شامل للدكتور احمد صبحى منصور فى هذا الشأن

هنا ملخص و يشرح اهمية الدفاع عن حقوق الاقباط

http://www.ahl-alquran.com/arabic/show_article.php?main_id=6296

Migo Mishmish said...

tears
يا ستي انا كاتبه بالاحمر ان البوست مش القصد منه مهاجمه الاسلام بحد الردة
ده حوار حقيقي دار بيني وبين واحد زميلي في الجامعه
اللي اقصده من الحوار ده ازاي الناس عندها استعداد تقتل بعضها لكن لا عندها استعداد تشغل عقلها ولا عندها استعداد تعترف بالغلط
وبعدين ماهي محاكم التفتيش كانت سبب في قتل الالاف البشر والتهمة كانت الهرطقه والجريمه قراءة الكتاب المقدس
حاولي تتطبقى ده على السياسه بصي للي بيحصل فينا وبصي للمدونين اللي بيتقبض عليهم
بصي للي بيتعمل لبتوع حمله التوقيعات بتاعه البرادعي
هو ده اللي اقصده بأمانه لكن عمري ما قصدت تجريح ولا اهانه للدين الاسلامي
حتى البوست اللي فات كتبت تحديث وضحت فيه موقف الازهر من جمعيه علماء الازهر وعملت رابط من اسلام اون لين علشان اللي مش مصدق يخش يقرا
بجد انا ماقصدش اي اساءه
Love,
MishMish

على باب الله said...

القتل اسهل بكتير من الإقناع

Tears said...

يا مشمش انا فاهمة المقصود كويس و كان كل قصدى بس اوضح معلومة كتير من الناس و بالذات المسلمين فاهمينها غلط

فقلت دى فرصة لكن ما عنديش مشكلة حتى لو اى حد هاجم الاسلام لان كل انسان حر و ربنا لا يحتاج احد بل نحن من نحتاج اليه



تمنياتي بالتوفيق و زوال الغمه عن بلدنا
:)

آخر أيام الخريف said...

بصى انا ممكن افهم ان يكون فيه حد للردة لما كانوا المسلمين يتعدوا ع الصوابع لما واحد يغير العقيدة يجر معاه عدد و هم اساساً مجتمع قبلى ما ينفعش معاه غير عقوبة شديدة زى دى عشان ما تلاقيش اللى واخدها لعبة النهارده انا مسلم بكره بعبد اصنام بعده لألألأ انا عايز اعبد النار .... الدين لسه هش و ده اجراء تأمينى ..ماشى نعديها . لكن لما يبقوا المسلمين ملايين يسدوا عين الشمس و زى قلتهم يبقى مش منطقى ابدا نتكلم عن عقوبة للردة حتى و لو كانت انهم يضربوه على ايده و يقولوله : عيب يا ولد :)))

Migo Mishmish said...

Knotiki
معنديش مانع على كلامك وزي ما كتبت في ردي على
Tears
ده حوار دار فعلاً بين وبين واحد زميلي في الجامعه واتسغربت من مدة غباوة الرد. يعني احنا كنا في كليه العلوم مش اي كليه ومع ذلك الكلام معاه كان عامل زي اللف في دايرة مفرغه
قد كدة قتل الناس لبعض اسهل كتير من محاولة التفكير في الامر بموضوعيه
تحسي انه تار


على باب الله
صح يا جيمي
هو احنا لسه هانشغل دمغنا
ده حتى في مصر لما واحد بيشغل دماغه بيعملوله زار علشان الفكر اللي عنده يروح

اخر ايام الخريف
كلامك مظبوط بس انا ليا رأى تاني
ان كان حتى العدد قليل يبقى اللي بتتكلملي عليه ده اللي النهاردة مسلم وبكرة اصنام وبعده ملحد ثم يعبد الشمس ... لما يكونوا المسلمين خمسه وهيبقوا 4 من غيره
هيبقى احسن كتير لو اصروا على وجوده
ده اللي تسمعي منه انا مسلم / مسيحي بس اللي في القلب في القلب. ده بخصوص حد الردة عن الدين
اما حد الردة اللي بيمارسه المجتمع مع اي واحد بيحاول يختلف ده اللي مصيبة
بصي لخالد النبوي واللي اتقال عليه. بدل ما نبص انه رفع اسم مصر فوق وماشي في سكه عمر الشريف وجميل راتب
قالوا ده الفيلم اللي اشترك فيه كان في واحدة اسرائيليه او يهوديه وابتدوا تقطيع فيه
محدش فكر في ان ما هو كمان عربي وهي نجمه كبيرة ومشهورة ممكن تطلب انهم ما تبعاملوش معاه وساعتها هايجيبوا بداله 1000
طب ما ممكن هي تكون مش موافقه على سياسات اسرائيل
طب ماهو الاسرائيلين كمان مؤمنين انهم في حرب مقدسه يعني بيبصوا للارض بنفس نظرة المسلمين ليها
بس محدش بيحاول يشغل دماغه
نقتله اسهل
Love,
MishMish

آخر أيام الخريف said...

"ده اللي تسمعي منه انا مسلم / مسيحي بس اللي في القلب في القلب. ده بخصوص حد الردة عن الدين
اما حد الردة اللي بيمارسه المجتمع مع اي واحد بيحاول يختلف ده اللي مصيبة
بصي لخالد النبوي واللي اتقال عليه. بدل ما نبص انه رفع اسم مصر فوق وماشي في سكه عمر الشريف وجميل راتب
قالوا ده الفيلم اللي اشترك فيه كان في واحدة اسرائيليه او يهوديه وابتدوا تقطيع فيه
محدش فكر في ان ما هو كمان عربي وهي نجمه كبيرة ومشهورة ممكن تطلب انهم ما تبعاملوش معاه وساعتها هايجيبوا بداله 1000
طب ما ممكن هي تكون مش موافقه على سياسات اسرائيل
طب ماهو الاسرائيلين كمان مؤمنين انهم في حرب مقدسه يعني بيبصوا للارض بنفس نظرة المسلمين ليها
بس محدش بيحاول يشغل دماغه
نقتله اسهل"

متفقين تماااااااااااااااماً

Desert cat said...

الناس عندها استعداد تام تقتل وتسرق وترتكب كل الموبقات طالما وضعى فى نهايتها كلمة جهاد

MSMO said...

أنا متفق مع علي باب الله
إنالقتل أسهل بكثير من الإقناع وخاصة لبعض الأوغاد المتشككين أمثالي

Layla said...

(^_^)

Kontiki said...

are u Ok ? No hard feelings girl
love & friendship :)

Migo Mishmish said...

إلى كل الناس اللي بحبهم انا وميجو كويسين بس المشكله اني مبقتش عايزة اكتب ولا اتكلم. اكتب عن ايه وليه. الكلإبه في مصر اصبحت اكثر مما نطلب او نسأل

عبد الرؤوف بن عبدالسلام (أبوهارون) said...

جوهر الدين هو التوحيد
raouf

عبد الرؤوف بن عبدالسلام (أبوهارون) said...

كل انسان حر و ربنا لا يحتاج احد بل نحن من نحتاج اليه

عبد الرؤوف بن عبدالسلام (أبوهارون) said...

سلامي
رؤوف

Migo Mishmish said...

اهلاً رؤوف
جوهر الدين بالنسبه لك انت التوحيد في ناس تانيه جوهر الدين اللي بيعتنقوه هو البركات الجزيله والعظيمة للبقرة (ودول بالملايين في الهند)
عارف اغنيه حدوته مصرية الحته اللي بتقول يهمني الانسان لو كان مالوش عنوان
كل واحد حر يبقى متدين ولا ملحد ولا نص نص
الفكرة ان محدش يقرر يتقرب لإله اللي بيعبده عن طريق تقديمي ذبيحه لذلك الاله
Love,
MishMish

Zeus said...

ليس بالضرورة يرتد من يكتشف خطأ في كتاب الله ، الجانب المخطيء في مناقشتك هو زميلك فمبرراته ناقصة

هناك من يرتد لأنه غير مقتنع و لم يجد أخطاء ، و على سبيل المثال نرفض نحن المسلمون عقائد المسيحيين المتعلقة بالصلب و الفداء ليس فقط لأن القرآن ينفيها و لكن لأن الأمر غير منطقي أيضاً

أرجو تشريفي في منتدايا لتكون المناقشة أكثر ثراءاً

http://www.free-eg.com/forum/

Zeus said...

ملحوظة هامة :

تعليقي على موضوعك لا يعني أني أتفق مع حد الردة فهو حد مشكوك فيه و في شرعيته لكني وددت توضيح منطقية الحوار بينكما فقط من وجهة نظري

Migo Mishmish said...

Zeus
اسفه على التاخير في الرد
وزي ما مكتوب في البوست انا مش بنقد دين انا بنقد فكر بيفضل يرتكب جريمة قتل عن انه يناقش ويحاور ويدور على الاجابه الصح او يكون عنده شرف الاعتراف بالخطاء

اما فيما يخص صلب السيد المسيح فهو امر منطقي جداً ولا ينفيه او يعيبه عدم اقتناعك بيه
love,
MishMish

Anonymous said...

شو هاي الصوووووورة .....الصراحة أنا مسكر عيني لان حرررررام

Migo Mishmish said...

طيب كويس اخيراً لاقينا واحد بيغض البصر
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق