Saturday, January 30, 2010

شطرنج

الشطرنج حرب دايرة، وزرا وحاشية وعساكر ملهمش غير هم واحد: يحموا الملك سيد الدولة
. مش مهم قوي اللي هيموت عسكري ولا وزير،المهم الملك يعيش.

هما ليهم لازمة من غيره؟

مين يهمه حال العباد ولا الرعيه في البلاد. طالما الملك موجود، هو حد يقدر عالبعاد؟



بس يا خسارة، الدور لازم في يوم ينتهي

والملك يموت زيه زي اي واحد من العباد

Love,

MishMish

Friday, January 22, 2010

سجل مدنى قريش

كان ثلاثه من كفار قريش يجلسون على مكاتبهم فى سجل مدنى قريش ..كان امامهم الكثير من الاوراق التى تدل على كسلهم فى اداء العمل وخدمه المواطنين ..الثلاثه تبدو على ملامحهم الجاهليه ..الثلاثه ملامحهم عابثه ولحياتهم تصل الى بطونهم اما حواجبهم كثيفه مثل المقشه الليف بتاعت جدتى ..حضر الحاج حسنى الذى امن بالدين الجديد الى المكتب للمرة الخمسون ليستخرج شهاده تفيد ان ابنه شيرين ذكر وليس انثى ..فالناس يعاملونه على انه انثى ويطالبونه بالنقاب باعتبار انه انثى بينما شنبه على وجهه مترين لكن الناس فى المجتمع البدوى يرفضون ان يعاملوه على انه ذكر فطالما اسمه شيرين فهو انثى لذا وجب عليه النقاب والا يخرج وحده بدون محرم ..لدرجه انه تعرض للجلد ثلاث مرات عندما تم ايقافه من قبل ضباط قريش فى كمين على طريق نجد الصحراوى ومرة اخرى تم ايقافه عندما شاهده الضابط فى الكمين القبلى بين الحائل وعسير ولما طلب رخصته القبليه وجد انه اسمه شيرين فسلمه لمحكمه الطائف بتهمه التبرج والخروج بدون محرم وهناك تم جلده للمرة الثانيه اما المرة الاخيرة فكانت على يد عكرمه عضو مجلس القبيله عندما سمعه يهتف للمرشح الاخر فتوعده وسلمه لمباحث امن عسير فى منطقه بقيق وهناك تم جلده للمرة الثالثه بطريقه وحشيه واشياء اخرى حدثت له عندما عرف المخبرون ان اسمه شيرين فتبادلو عليه حتى سقط من الاعياء وحينها ادرك انه طلع بقيق امه ..كانت هذه الحادثه بالذات سبب رئيسى لكى يفكر فى الهجرة الى الحبشه عند الملك النجاشي لكن مشكلته انه مطلوب فى الجيش ولا يستطيع ان يثبت انه وحيد وعائل قبيله .. فاتى والده الحاج حسنى الى سجل مدنى قريش حتى يريح ابنه من عناء الجلد والاشياء الاخرى ..
طلب الحاج حسنى من خزاعه موظف الارشيف استمارة 9 ليملأها ..لكن خزاعه نظر اليه بسخريه وقال :
خزاعه : الا تعلم يارجل ان موعد تقديم القرابين للاتى والعزه الان ؟ انتظر حتى اذهب واتعبد فالدنيا لن تطير
الحاج حسنى : ياعم هو انا كل لما اجى الاقيك بتصلى ؟
خزاعه : خسئت يارجل ؟ اتنهانا عن الصلاه؟ اتريد ان تغضب علينا اللات والعزى ؟
الحاج حسنى : وهو اللاتى و العزة قالولك تعطل مصالح الناس ؟
خزاعه : وانت مالك انت انت هاتكفرنا ولا ايه ؟
هنا انفعل الموظف الذى يدعى مغيرة بن الكلبى : ماذا تريد يارجل ؟ اصبئت بديننا وبدين ابائنا واجدادنا ؟ دعه وشأنه ليصلى وانتظر قليلا .
الحاج حسنى : انتو الى هاتخلونا نصبأ بدين ابونا ودين اهلنا حرام ياعالم بقالى شهرين عمال الف على المكاتب وانتو مدوخينى السبع دوخات ...الواد ابنى اتبهدل بسببكو
مغيرة بن الكلبى : احنا مالنا يا اخى ..حد قالك تسميه شيرين ؟ هذا خطاك
الحاج حسنى : غلطت يا اخى تقومو تعذبونا كدا ؟ فيه ايه يعنى لما تمضولى على ورقه فى دقيقه واحده
خزاعه : واللات والعزى ما امضى لك قبل الصلاه ..مناه وهبل بنادونى ويجب ان ألبى
الحاج حسنى : طب اتفضل وانا مستنى لما نشوف اخرتها معاكو
انتظر الحاج حوالى ساعه وربع ولم ياتى الاستاذ خزاعه موظف السجل ..واخيرا اتى وجلس على مكتبه
الحاج حسنى : اتفضل يا استاذ امضيلى بقى على الورقه دى عشان امشي
خزاعه : مالك متعجل يا رجل ؟ انتظر حتى التهم العجوة لافطر ثم امضي لك على الطلب
الحاج حسنى : والله حرام كدا ماتمضي الاول وبعدين تفطر
هنا ثار كعب بن صندل الموظف الثالث ..ايه يا اخى حرام عليك انتو مش بنى ادمين ؟ استنى الاول لما الراجل يفطر ..انتو مفيش فى قلوبكم رحمه؟
الحاج حسنى : انت مالك انت ..ماتخليك فى حالك
كعب بن صندل : مالى فىجيبى يا اخى انا ساكتلك من الصبح عمال تبهدل فى الراجل تكونش شارينا بفلوسك ؟ ولا شغالين عندك ؟
الحاج حسنى : اه شغالين عندى انتو بتاخدو مرتبكو من بيت المال يعنى من فلوسنا
خزاعه : والله ماهامضيلك غير لما اكل العجوة وافطر ولو مش عاجبك اضرب دماغك فى اقرب حيط
انتظر الحاج حسنى على مضض ولايم اموره وكله عشان خاطر شيرين ..وهنا مسح خزاعه يده وشكر الالهه على نعمه العجوة وبدا يسلك اسنانه من بقايا العجوة ..ودار حديث بينه وبين كعب بن صندل
خزاعه : عجوة هايله يا اخى ..الواحد لو مفطرش يوماتى بنص كيلو عجوة ..يفضل هفتان طول النهار
كعب بن صندل : فعلا معاك حق انا بضرب عالصبح عالاقل كيلو عجوة ..بس انت بتجييب عجوتك منين ؟
خزاعه : بتجيلى مخصوص من قوافل الشام تحب اجيبلك ؟
كعب : ياريت ..ابقى وصيلى على قفتين تلاته لحسن النوع الى بجيبه البذر فيه كبير
خزاعه : عينيا الاتنين
كان عم حسنى يتابع الحديث ويكتم غيظه بداخله ..
اتفضل يا استاذ بقى امضيلى على الطلب وادينى استمارة 9
خزاعه وجد نفسه فى مأزق وانه لن يجد حجه ليهرب
خزاعه : حاضر ..هات الطلب ..يمد يده لياخذه وفجأه يصيح
لقد شلت يداى لقد شلت يداى
جرى كعب ومغيرة على خزاعه ليطمانو عليه
الحاج حسنى : طب والطلب مين هايمضي عليه
مغيرة : عيب يا اخى هو احنا فى ايه ولا فى ايه ؟ الراجل ايده اتشلت يا اخى ابقى تعالى بكرة
الحاج حسنى : حسبى الله ونعم الوكيل فيكو يابعدا ربنا يرحمنا منكو (يمشى منكس الرأس )ولكن قبل ان يخرج سمع خزاعه يقول لزملاؤه : ولا شلت ولا حاجه ..انها سليمه ..فعاد عم حسنى لينهال بالضرب عليهم جميعا ويتصل ابولهب مدير المكتب بالبوليس ليتهم الحاج حسنى بضرب موظف اثناء تأديه وظيفته ..كما قام البوليس بتلفيق تهمه تزوير فى مخطوطات رسميه ..فاتهموه بتزوير بطاقته القبليه وتغيير اسمه من حسنيه الى حسنى ..كما تم توجيه تهمه الخروج متبرجا وبدون محرم ...وتم جلده 150 جلده وحبسه مع مجرمى قريش بدون محرم فى زنزانه واحده ليفعلو به كما يحلو لهم ..ويحكى ان احد المارة سمع انين من داخل التخشيبه يبدو انه للحاج حسنى كان يقول ..واللات والعزى لاوريكم ياجزم ...
تحياتى
ميجوووووووووو


Monday, January 18, 2010

وما تبقى منهم سوى بعض قصيدة

يا قمري الذي طمروة بين الحجارة
الان ترتفع الستارة
الان ترتفع الستارة
سأقول في التحقيق
أني اعرف الاسماء...والاسباب...والسجناء ...والشهداء
والفقراء...والمستضعفين
واقول اني اعرف السياف قاتل اخوتي
وشن اعضاء في المجلس من الحزب الوطني هجوماً على "قلليني" لمنعها من الكلام قادة عبد الرحيم الغول واحمد ابو عقرب ووصفها الاول بأنها مجرمة
ووجوه كل المخبرين
واقول ان عفافهم عهر
واقول ان دفاعهم كذب
وان لا فرق بين السياسة والدعارة
سأقول في التحقيق
اني قد عرفت القاتلين
محافظ قنا الذي كان يؤكد في الساعة الثامنة ان الامور هادئة بينما كانت قرية بهجورة يتم حرقها من الخامسه حتى الثانية عشرة مساء
قصيدة بلقيس بتصريف - للرائع نذار قباني
May our martyrs reast in peace,
MishMish

Wednesday, January 13, 2010

لأي حد عنده دم

شوفت قبل كدة بلد معظم اللي فيها معندهومش دم زي هنا

شوفت في حياتك واحدة معندهاش دم زي لبني عسل مذيعة قناة الحياة لما طلعت في برنامج "الحياة اليوم" بعد مذبحة نجع حمادي وقالت بمنتهى البرود والتناحة "...بعض وسائل الاعلام من خارج مصر حاولت تصور الاحداث على انها فتنه طائفية. الحادثة ديه أدت إلى مقتل 6 مسيحين وفرد شرطة مسلم وإصابة 9 مسيحين اخرين أثناء تجمعهم للإحتفال بأعياد الميلاد". ديه مش بس معندهاش دم ! لا ديه البعيدة غبية كمان



خدت بالك لما بيتكلموا عن الناس اللي ماتت بيقولوا عليهم "قتلى"في حين ان في نفس وسائل الاعلام ديه لما حد بيموت من بتوع حماس بيقولوا عليه "شهيد" مع ان معظمهم ارتكبوا جرايم حرب ضد شعبهم وحنودنا على الحدود

شوفت كم الخطاب الديني في برامج التليفزيون المصري والفضائيات والجرايد والمجلات وجزء اساسي منه هو اتهام العقيدة المسيحية بالشرك والتحريف والعنف الديني والتاريخ الدموي. ولما تحصل حاجة زي كدة نفس الناس اللي بتشتم تطلع تتكلم عن تعاليم المسيح وإدارة الخد الآخر وفلسفة محبة الاعداء ويطالبون المسيحين بضبط النفس!!! يعني لما اضربك تخليك راجل كدة وتمسك نفسك وماتعيطش

حتى لما تلاقي حد بيشجب تلاقيه في اخر الشجب راح قايل كلمتين يخليك تبقى هتعض في الارض من الغيظ. زي بتوع الجماعة الاسلامية اللي ايديهم غرقانه في دم المسيحين والمسلمين والسياح دعوا "إلى مواجهه ما سمته بتنامي التطرف داخل الاوساط الفاعلة في الكنيسة الارثوذكسية وفي قطاعات مسيحية شابة وضرورة وقف النشاط التبشري الذي وصفته بالمحموم وما يصاحب ذلك من حملات إساءة إلى الاسلام والرسول الكريم". بالذمة دول عدهم دم؟

مروة الشربيني اتقلت في ألمانيا قامت الدنيا ولسه لغاية دلوقتي ماقعدتش ومظاهرات ومطالبات بقطع العلاقات مع ألمانيا وطلب اعتذار رسمي من الحكومة الألمانية ووفد كبير من نقابه المحامين سافر إلى ألمانيا لمتابعة القضية ولما القاتل كان هياخد مؤبد تفتق ذهن البعض عن اجبار ألمانيا على إعدامة او تسليمه لنا لنعدمه. وفي مصر اهلها اتعاملوا معاملة الابطال وسموا شارع بإسمها في اسكندرية. ولما حاول المتهم يعمل مجنون رفضت المحكمة واتعاقب على اساس انه عارف هو بيعمل ايه. في حين في اي حادثه يتقتل فيها مسيحين بيكون الجاني دايماً مختل عقلياً او ماس كهربائي!!! لا وايه الامن المصري صاحب كليبات التعذيب الشهيرة تفاوض مع الجناة لتسليم انفسهم

العيال اللي ماتت لسه دمها مانشفش وتلاقي ابو الغيط بيطالب واشنطن بالضغط على اسرائيل لرفع الحصار "الجائر" على غزة... طب وبالنسبة للحصار الجائر للأقباط في نجع حمادي بين قوات الامن والبلطجيه اللي حرقوا ودمروا ممتلكات الاقباط ظروفه ايه؟

خش اي موقع بيتكلم عن مذبحة نجع حمادي تلاقي عدد مش قليل من اللي بيعلقوا يقولك "احسن يستاهلوا هما اللي ابتدوا. فين الحكومة من كنايسهم واديرتهم مليانه اسلحة". وسؤالي للبهيم... مابندافعش بالاسلحة ديه عن نفسينا ليه؟

تحديث: ده تعليق واحد بهيم على مقاله "هو في النار" لنجاد البرادعي - تعليقاً على كلام ا. جورجيت قليني عن محافظ قنا

التاله على الله

تعليق: مسلم تاريخ 14/1/2010

من هذا الذي يتأله على الله عز ويدخل النار من يشأ. ان الله لا يغفر ان يشرك به ويغفر ما دون ذلك لمن يشأ. فليس بعد الكفر من ذنب. ان الدين عند الله الاسلام ومن يتبع غير الاسلام ديناً فلن يقبل منه وهو في الاخره من الخاسرين

May our martyrs rest in peace,



MishMish

Thursday, January 7, 2010

البريئ



البريئ








حلمت الليلادى, بإنى في موقف رهيب,بأقول ، والكلام منى طالع نحيب ...سيادى القضاه ,دفاعي بسيط.كلامي ماهواش غويط


وماهواش عبيط.....بسيط


بساطة هدوم الغلابا الفقارى الحُفاه ....بسيط، زى اسم صديق على شِفّة صديق ...بسيط زى دمعة برئ ...بسيط زى وحش جعان فى الفلاه ،بسيط زى حفنة دقيق



سيادى القضاه ، يا ذمم يا همم يا قمم يا عتاه...دفاعي قوى.. قوى زى صرخة غريق ...بينده لقارب نجاه بينده بينده بآخر قواه , للحياه.. دفاعي قوي زى دقماق حديد ،قوي زى نظرة وعيد ،قوى زى تمثال اله ،قوي زى بلطة الحريق فوق بيبان


الحريق
سيادي القضاه،سيادي الكرام العظام الفخام العلاه ,دفاعي مؤيد ،بتوراه , بإنجيل ، بمزامير داود ،بقرآن كريم دفاعي مؤيد بكل أنين الكمنجات فى كل الوجودبكل حفيف النسيم بتهنينة الأُمهات للعيال فى المهود ,بقولة "باحبك" , و "آه" ,بصوت القُبل،وكل ابتسامة بحق وحقيق ،تؤيد دفاعي وبارفع صباعي الضعيف وباقول كلمتى ...




سيادى القضاه



سيادى الحدادى اللي حايمه على رمِّتى.....ح أقول كلمتى ... ...لكين قبل ما انطق واقول كلمتى ...

قولولي انتوا ..إيه تهمتى . . ؟ ؟

ميجوووووووو

Wednesday, January 6, 2010

عيد سعيد

كنت رايح مشوار صغير ..فركبت ميكروباص ..بعد شويه طلع واحد ركب جنبى ..طلع يعرف السواق ..دفعله الاجرة ..فالسواق مرضيش
ياخد اجرة عشان يعرفه ..متشكرين ياعم حسن ..عيب ياعم احنا اهل ..معقول اخد منك اجرة ؟ ..ربنا يكرمك ويرزقك ويكفيك شر اليهود والنصارى ..اهو ال(تيييييييييييييت ) عيدهم النهارده ولا بكرة ..مش عارف اهو هايجيبو ابوهم شنوده النهارده فى التليفزيون ويقرفونا ..الله يحرقهم بجاز وسخ الكفرة ..ياعم ربنا يكفينا شرهم
عيد سعيد وكل عام وانتم بخير
اهداء الى الشيخ يوسف القرضاوى

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق