Tuesday, February 15, 2011

حتى لا تضيع الثورة

اللي كنت خايفه منه حصل وبدأ المعممون واتباعهم من المغيبين في التحرك لتفتيت الوحدة والركوب على ثورة لم يكونوا مؤيدين لها من البدايه
هو هو اللي كان بيحصل ايام الرئيس السابق. اي حديث او محاولة جديه للتغير تنتهي قبل بدايتها على ايدي المعممين
لجنه تعديل الدستور الحاليه رئيسها له توجهات اسلامية واحد اعضائها عضو من جماعه الاخوان المسلمين يعني هما 6 اتنين منهم املهم في الحياه تحويل مصر الى افغانستان او سودان او غزة او صومال تانيه -احنا وحظنا
وسمعت عن مظاهرة الاخوان في شارع الهرم وهم يهتفون "اسلامية .. اسلامية" وجماعات الفيس بوك اللي مش بس بتدعو الى الحفاظ على المادة التانيه وتفعليها لكن ايضاً تغير نصها من (الشريعه الاسلاميه هي المصدر الاساسي للتشريع إلى الشريعه الاسلاميه هي المصدر الوحيد للتشريع) يعني اسقطنا نظام سياسي بوليسي علشان نلاقي نفسنا محكومين بنظام ديني متعصب

هي الناس لغايه دلوقتي لسه مش عارفه ان المادة التانيه عضمه رماها السادات - الراعي الرسمي للفتنه الطائفيه في مصر - سنه 1971 لتمرير المادة 77 من الدستور واللي كان الغرض منها ان يفضل في الحكم الى النفس الاخير

ونفس اللعبه لعبها النظام السابق في تعديلات الدستور في 2007 وانا زي العبيطة روحت وقلت نعم للتعديلات اللي كانت متفصله على مقاس الرئيس الابن جمال مبارك خوفاً من الاسلاميين

هي مش الثورة قامت علشان ما يبقاش في ظلم وتبقى مصر لكل المصريين

هي مش الثورة قامت علشان ما يبقاش في حد احسن من حد قدام القانون

هي مش الناس اللي نزلت كانت بتهتف تحيا مصر


يا ناس قبل ما تولع

لازم نعرف ان القمع هو القمع سواء باسم الوطن او الدين

الدولة البوليسيه يكون فيها المعترض عدواً للدولة وخائن - اللي هما كانوا في ميدان التحرير قبل سقوط النظام وبالتالي كان واجب الشرطة القضاء عليهم لانهم اعداء النظام

اما في الدولة الدينيه فالمعترض عدواً للدوله وخائن وكافر - برضه زي اللي كانوا في الميدان بس ساعتها هيبقى واجب الشرطة والشعب المؤمن القضاء عليهم لانهم اعداء الدين

بس نفسي اقول لكل واحد بيدور على حشر الدين في السياسه

تخيل نفسك اقليه مختلفه وسط اكثريه مؤمنه وليس لديها اي نيه للتفاهم
فكر في جميع البلاد اللي ليها انتماء ديني وشوف قدمت ايه للبشريه

فكر في حال بلادنا واللي حصل في الـ 18 يوم اللي فاتوا لما الناس نسيت اي انتماء ليها وافتكروا بس انهم مصريين

فكر في الاساءة لمعتقدك لما تبقى وسيله الحفاظ عليه هو فرضه بالقوة الجبريه على الجميع

فكر في مصر

تحيا مصر

MishMish

22 comments:

Mafrousa said...

ما تخافوش
المستشار ماهر سامي موجود فى التشكيل

الميكروباص said...

ولله انا غير متفائل
وخاصة أن سقف الاماني عند الناس مرتفع للغايه ويتوقعون تحول مصر إلى أمريكا بعد سنه او سنتين

Migo Mishmish said...

Mafrousa
ربنا يستر بجد
من ساعه سقوط النظام والقنوات كلها مابتجبش غير بتوع الاخوان واللي زاد وغطى خبر اجتماع الجماعه الاسلاميه لاول مرة من 20 سنه في اسيوط وقرار عودتهم للعمل مرة اخرى
يعني هانبقى زي السودان الشقيق في خلال سنه بالكتير
بجد انا خايفه
الناس مش قادرة تصدق ان الدين علاقه بينها وبين ربنا مش وصايه على الاخرين
تحيا مصر
MishMish

Anonymous said...

It was all very clear to me since day one (25)... I can't believe that all of you didn't see that this will be the outcome.

Marika

Tears said...

صراحة انا شايفة ان الجيش ح يخرب الدنيا لانه مدخل نفسه فى كل حاجة و اصلا احنا من البداية بنقول عايزين نشكل مجلس رئاسى من اربع او خمس شخصيات من الموثوق فيهم الغير منتمين لاى حزب او تيار و تشكل حكومة محترمة بدل حكومة الحزب الوطنى و ساعتها كان ح يبقى الشغل صح لكن فجاه لقينا الجيش حاطط ايده على كل حاجة و غير لجنة تعديل الدستور اللى كان فيها الدكتور يحيى الجمل و جابلنا الاخوان و مش بيشيل حكومة الحزب الوطنى

لازم المظاهرة المليونية بتاعه الجمعة اللى بتطال باسقاط حكومة الحزب الوطنى لان دول جزء من النظام و بعدها تتولى حكومة انتقالية فيها جورج اسحاق و يحيى الجمل و ابو الغار و كل الشخصيات المحترمة كحومة انتقالية تتصدى للفساد و تهريب الفلوس

Migo Mishmish said...

لورنس
انا لسه على موقفي من الثورة وشايفه انها انجاز كبير وشايفه ان لولا ان الشباب اللي قاموا بيها كانت احلامهم كبيرة مكنتش اتحققت
لو اتعودنا نحلم احلام متواضعه مش هنحقق حاجة
بس انا بطني بتوجعني لما بشوف اي متحدث رسمي باسم دين معين على التليفزيون
لانه بيفرق ما بين الناس على اساس احنا وهما
بقولك انا كنت عارفه كويس ان التعديلادت الدستوريه كانت معموله علشان جمال مبارك يمسك الحكم ومع ذلك روحت وخدت صحابي معايا نقول نعم بس علشان خايفين من الاخوان

Marika
لا خالص انا كنت شايفه انها كويسة يعني البنات المحجبات اللي نزلوا مانزلوش علشان بعد الثورة يلبسوا نقاب ويقعدوا في البيت يربوا العيال
اللي طالبوا بالمساوة والحريه مش ممكن يرضوا انهم يبقوا جواري
انا بس متضايقه من تنطيط الاخوان والسلفين الزائد
انتي عارفه مرة سمعت واحد واقف بعربيه كارو بيتكلم عن الانتخابات بيقول انتخب مين ؟ واحد من الحزب الوطني يسرقني ولا واحد بدقن يسرقني ويحرم عليا السلام على امي
يمكن تنطيط الاخوان والسلفين ورقه اخيرة من بقايا نظام مبارك لفض الناس وتخويفهم من الثورة
انا معنديش مانع ان الاخوان يبقالهم حزب سياسي بس طالما هايعملوا كدة يبقى لازم يسمحموا بحزب سياسي مسيحي وبهائي ويهود واللحادي و...و.. لكن نظريه الديموقراطيه العورة ديه بتخوف


Tears
بصي الضمان الوحيد دلوقتي الجيش. سوا اختلافنا عليه او اتفقنا عليه
اديكي شوفتي لجنه تعديل الدستور كانت اولها كفر امال لو كان الحكم مكون من 3 او 4 كل واحد منهم بشكل ولون مختلف
ومين اللي هيسمح بأنهم يكونوا غير منتمين لحزب او تيار ديني معين
انا شايفه ان المسيرة المليونيه اللي بتتكلمي عنها الاخوان بيتكلموا عنها على انها احتفال بنصرهم وده بصراحه يخليني افكر الف مرة قبل مانزل حاجة زي كدة
البابا شنودة قال احنا مع الريس - لبس المسيحين في الحيطة
والاخوان قالوا احنا مش هاننزل المظاهرات
والسلفين قالوا ان الخروج عن طاعه ولي الامر حرام
ولما الموضوع مشي كل واحد فيهم جه ياخد نصيبه
الكنيسة عايزة دستور مدني
الجماعه عايزة حزب سياسي بجانب الجماعه
السلفين هايستنفوا نشاطهم مرة اخرى في اسيوط بعد توقف 20 سنه
اما الخراب اللي البلد كانت فيه ده وهما متوقفين امال لما يشتغلوا هايعملوا ايه
انا شايفه ان اهم من المظاهرات دلوقتي هو التثقيف الشعبي
الثقافه على كل انواعها الاخوان يتكلموا بصراحه عن رؤيتهم والسلفيين والعلمانيين
والفرق يبقى صندوق الانتخاب والمحاكمات الدستوريه

تحيا مصر
MishMish

Tears said...

مشمش

اتفرجوا على الجزيرة مباشر الان ح تتطمنوا و تفهموا لان فيه مؤتمر صحفى لائتلاف الشباب فيه امين اسكندر و بلال فضل و محمود سعد و عبدالله الاشعل و منى مكرم عبيدو نادر السيد و بتضم مختلف الاطياف حتى الشيوعيين و همه برضة نازلين المظاهرة المليونية لان مافيش حل غير بالتخلص من حكومة الحزب الوطنى و البلتاجى بتاع الاخوان اخد الميكروفون و قال لازم مصر دولة مدنية و الاخوان لن يترشحوا للرئاسة و يكفينا العمل الاجتماعى و نحن مجرد فصيل داخل الشعب المصرى منا من شارك و منا من لم يشارك

انا مطمنة مادام بلال فضل و حمدى قنديل و جورج اسحاق و منى مكرم عبيد معاهم

لو الناس مافهتش كويس و نزلت ح ينجح اعوان مبارك فى تفريق الناس بتخوفيهم من بعبع التيار الاسلامى و اشاعه اخبار ان مبارك ياعينى عيان مع ان رويترز قالت ان صحته كويسة

صفا سارة said...

فعلا المخاوف اللى قبل الثورة بدأت تظهر
بس على امل ان الشعب يكون فاهم وان الاخوان فعلا اتكشفوا
اما الجماعة الاسلامية اللى بقالها 20 سنة دى اللى حاجة عجيبة

واللى نزلوا الثورة كانوا عايزنها مدنية يعنى هيحموها عندى امل اننا نحميها ونساعد فى توعية الناس للى بيحصل ده

Ms Venus said...

لما قولت انا خايفة

الكل قالى متخافيش


سكت وقولت لما نشوف اللى هيحصل


الاخوان والسلفين والمادة التانية و و و


هقول ايه غير احمى شعبك يارب

Unknown said...

ادعوكم للانضمام لجروب(انا قبطي..انا مصري) والذي يؤمن بتمصير مصر ويدعو لانسلاخ مصر من الفكر القومي العروبي لصالح الفكر القومي المصريوهذا هو اللينك

http://www.facebook.com/search.php?q=%D8%A7%D9%86%D8%A7+%D9%82%D8%A8%D8%B7%D9%8A&type=all&init=srp#!/group.php?gid=95263135874

Boneta said...

معلش برضه انا عاوزه افهم حاجه مهمه اذا كانت من اهم اسباب الثوره احساس الشباب بالقهر وعدم الحريه وطلعوا ايد واحد بيطالبوا بالحريه والعداله الاجتماعيه وبيطالبوا بدوله مدنيه والجيش قال انه بيحترم رغبه الشعب ومتفهم ثورتهم لكن اللي بيحصل دلوقتي مش مفهوم بالنسبه لي لان اللجنه الدستوريه بتضم 3 اشخاص معروف عنهم انتمائهم للاخوان المسلمين اللي هما في الاساس افكارهم ضد الديمقراطيه والمدنيه وبيستغلوا الدين للعب علي مشاعر اخواتنا المسلمين البسطاء ونواياهم ظهرت للكل ايام الثوره .ازاي ناس زي كده هايخرجوا لنا بدستور مدني لمصر؟ انا اعتقد ان الحكايه اكبر من كده وفي حلقه مفقوده في الموضوع .

Boneta said...

Ms Venus
فاكره يا فينوس لما قولتلك اني خايفه افرح .كنت شامه ريحه مش مظبوطه في الموضوع خصوصا بعد ظهور ناس غريبه في الصوره

strategicalone said...

شوفتوا ازاى ان رائ الحمار فى الاستقرار كان افضل للحمير المصريين

Mohamed said...

Hi:
This is my first time commenting here:
**As some said Ikhwan did not waste a chance to say they ask for (Dawla madaneya), and that they do not seek presidency.
=============
**This is an article by NY-Times that might be useful to read for yourself and make your own conclusion about the relation between different factions
http://www.nytimes.com/2011/02/10/world/middleeast/10youth.html?pagewanted=1&_r=1&src=un&feedurl=http://json8.nytimes.com/pages/world/middleeast/index.jsonp
===============
**I was discussing with a friend the stance of Salafis throughout the past three weeks.
1-Total oblivion at the beginning, as if this is of no concern to them.
2-Outrage that there was a christian mass held in Tahrir on Sunday......so their filter left out everything and spotted this as a reason for outrage !!!
3-Participation by some of their prominent figures in the media campaign to calm the people, synchronized and orchestrated by .........I leave the dots for all to guess, even going to the limit of demonstrating for Mubarak..and publicly supporting him "source for this info is a trustworthy friend of mine"
============
This is a quote I found somewhere that I really found interesting
وجدتني أفرك عيني كثيراً وأنا شاهد الشيخ "محمد حسان" في برنامج "هناء السمري" وهي تحاوره.. فمنذ متى والسلفيون يظهرون أمام مذيعات غير محجبات؟؟
لكن لا تقلق.. فالغاية تبرر الوسيلة..
فالشيخ "محمد حسان" ظهر علينا في تلك القناة المملوكة لرجل أعمال مصري له مصالح مع النظام من أجل تهدئة المتظاهرين! في أكثر تواطؤ مفضوح بين النظام الديكتاتوي والسلفية المنقرضة!
وتنتهي الحلقة بأن يقوم فضيلة الشيخ بنصح المتظاهرين بالكف عن التظاهرة والعودة إلى بيوتهم!!

Sorry for the long post but Ifelt I needed to write it, We better see through the labels to be able to navigate these rough times given that the system is still kicking and fighting for its life and may use anything to fight with.

Migo Mishmish said...

قبل ما ارد لعى كل كل الناس انا عايزة بس اوضح شوية حاجات
اولاً: انا شايفه ان الثورة احسن حاجة حصلت في تاريخ مصر وقيمتها عندي تساوي قيمه الهرم والسد العالي
ثانياً: الاحداث سريعه جداً وكل ساعه في حدث جديد وانا مبسوطة بس خايفه
ثالثاً: كلام جورج اسحاق بتاع كفايه صح المظاهرات الفئويه والمطامع الشخصيه هتضيع الثورة
ثالثاً: محدش بيتكلم عن ماذا بعد
MishMish

Migo Mishmish said...

Tears
على اي اساس القرضاوي بينزل بالبارشوت على ميدان التحرير
ثم ده راجل بتاع دين ليه يبقى ليه بودي جارد
ثم ايه كيونه البودي جارد اللي معاه علشان يمنعوا وائل غنيم او غيره من الكلام عن المنصه
هي الثورة بتاعه اللي هيجي الاول


صفا سارة
احنا دلوقتي املنا في بعض
ملناش غير بعض والمثقفين كل واحد مننا دلوقتي عليه دور لنشر الوعي
مصر لو وقعت تحت حكم الاسلامين يبقى احنا السبب
MishMish

Mohamed said...

My second comment in less than 24 hours sorry if I spam your post:
http://twitter.com/Ghonim
this is Ghonim's twitter account..nothing at all of being denied the stage he even posted these:
# سعدت بحضور خطبة الشيخ القرضاوي اليوم وأكثر ما أعجبني فيها قوله: لن أقول أيها المسلمون بل سأقول أيها المسلمون وأيها الأقباط لأن كلنا مصريون about 18 hours ago via web

# I loved Sheikh Qaradawi Khutbah today. Was truly inspired when he said: Today I'm going to address both Muslims and Christians. Respect! about 18 hours ago via web

There were also Coptic Taraneem recited on Friday morning before the Muslim prayers in Tahrir no mention of these except on sites with correspondents on the ground not in Maspero..

I urge people to take the extra effort to verify the news I truly believe we are in the midst of a mighty mis-information campaign aimed at cracking the solidarity shown by the people during the last three weeks before the job is completely done !

Migo Mishmish said...

Ms. Venus
ما هو ده اللي يقلق
الوضع اللي احنا فيه ده كان هيحصل هيحصل لو كان مبارك هايموت - ماعتقدتش انه كان هيموت في يوم من الايام
صعود الاسلاميين ديه نتاج طبيعي لسبب واحد بس انهم كانوا الوحدين المسموح لهم بالكلام طول العهد البائد
فكانت القضايا الكبري هي الحجاب فريضه ولا لا
الاكتشافات العلميه الهائله لفوائد العسل
وبول الابل
والمسيحين كمان كنا عايشين حاله من التوهان داخل الكنيسة وخايفين من الناس ومن المجتمع
وكل ده كن من تأليف الحكومة علشان كل واحد فينا يحس من جواه ان مفيش فايدة
فطبيعي العفريت اللي الحكومة كانت بتربيه على ايديها هو اللي يطلع
ايه دلوقتي لازمة الكلام عن المادة التانيه
لسبب واحد بسيط هي المادة اللي قاسمه البلد نصين
طلعوها امتى لما لاقوا البلد بقت ايد واحدة
دلوقتي دورنا اننا ننشر الوعي
احنا عندنا ادواتنا
المدونات
الفيس بوك
كلامنا مع اللي حوالينا
واهو نعمل اللي علينا
علشان على الاقل لو حصل حاجة لا قدر الله مانقعدش نقول يا ريتني


Medus
على الله نفهم اننا مش محتاجين
وانا قيمتنا فينا مش بناخدها من اللي حوالينا
وانا اشتركت يا سيدي انا وميوجو زوجوجي

Boneta
ما هو ده اللي مخوفني
بس ارجع واقول دول 6 مواد خاصه بالانتخابات والرئاسه
تحيا مصر
MishMish

Migo Mishmish said...

strategicalone
لو انجازات الثورة ديه بس نتج عنها محاكمه احمد عز والعادلي وضياع فرص المحروس انه يمسك الحكم فكفايه
سمعت النكته اللي بتقول يا ريت مبارك كان ضرب مصر الضربه الجويه وحكم اسرائيل 30 سنه
دا اسرائيل لو حكمتنا مكنتش عملت فينا كدة
بص طالما الحرب ما خصلتش والحكم ماصفرش صفارة النهايه
يبقى لسه في امل
فتفوتته امل
وكل واحد ملزم انه يعمل حاجة اي حاجة بس يشارك
اللي الناس المؤمنه محتاجه تصلي من اجل السلام ومن اجل حمايه مصر من الشر ويشتغلوا على قد ما يقدروا في بنا مصر ونشر الوعي
والناس اللي ما بتخضعش لسلطان غير لسلطان العقل - ولهم مني كل الاحترام - محتاجين يشتغلوا على قد ما يقدروا في بنا مصر ونشر الوعي - برضه - ويتمنوا ان الحظ يقف معانا ونتنفس حريه
انما مصر مبارك كانت غلط على كل المقاييس


Mohamed
انا مبطمنش للاخوان حتى لو نزل ملاك من السما يساندهم
بس مع كدة ماقدرش اصادر على حريتهم في عمل حزب سياسي
بس هما كمان من حقنا عليهم انهم ما يصادروش على حقوق الاقباط والبهائيين والملحدين انهم يعملوا احزاب سياسيه هما كمان
مش هما يعملوا حزب تيجي انت بهائي مثلاً هتعمل حزب للبهائين يروح مطلعلك المادة التانيه من الدستور اللي بتنسف اي كلام عن الحريه والمساواه
الاعتماد على الناس المثثقفه واللي بتفكر الفترة الجايه انهم يتكلموا بدل الهذيان الديني - من الطرفين - جزء اساسي من تشكيل مصر بعد مبارك

بالنسبه لتعليقك التاني
انا قرايت موضوع وائل غنيم على المصري اليوم وحاجة تانيه اجنبيه مش فاكرة هي ايه
ولعلمك انا دخلت على الصفحه بتاعه عالفيس وسألته عن الموضوع ده ومستنيه رده
وعلى فكرة هو كان كاتب الجمله اللي انت كتبها على الصفحه بتاعه عالفيس

خلاصه الكلام انا مش هافرح لما اسمع انهم قالوا ترانيم في الميدان
اصلاً اصحاب العمائم من الطرفين هما سبب خراب البلد
دول مش مؤهلين غير للكلام عن تخصصهم اللي هو ازاي البني ادم يسمو بنفسه ويكون علاقه بالله بس خلاص
اي حاجه تانيه تبقى فتي
يعني احنا مبنشفش مهندس يقعد يفتي في عمليات القلب المفتوح مثلاً يبقى هبل
ثم اصلاص يبقى في صلاه ليه في الميدان
ما الجوامع والكنايس مفتوحه في كل حته الناس تصلي وتيجي تحتفل
ايه البواخه ديه
طب واللي مش مسيحي ومش مسلم يبقى كلب يعني مالوش فيها
طب واللي ما بيحبش صلاته تبقى مشاع وتمثليه تتنقل على الفضائيات ظروفه ايه
اهو موضوع الصلوات ده معكنني لانه بشكل او باخر بيفكر الناس انهم مختلفين

تحيا مصر
MishMish

Mohamed said...

Thank you for taking the time to reply to my comments!
I agree with you , and when I said Dawla Madaneya I meant it with all its attributes.
The point I was trying to make had to do with paying attention to media manipulation not to try to pacify you by saying that a christian prayer was said, I wanted to point out the selectivity of the disseminated news, and the consistent effort to sabotage the unity shown so far. And yes clergy men should stick to the places of worship, I do not like Ikhwan either, but the solution for their dilemma is for them to form a political party and get down to politics for all people to see what they can do to improve their daily lives not their hereafter.
I liked very much this post
http://voice-of-egypt.blogspot.com/2011/02/blog-post_19.html
and the best line was this :
كلمة أخيرة: قيام جريدة الأهرام التي لا يزال يرأس تحريرها اسامة سرايا بوضع هذا الاستفتاء علي هذه المادة في هذا التوقيت دليل ان نظام مبارك لسة صاحي وبيلعب
Best Regards!

Brunette said...

السادات فعلاً رماها عضمة على سبيل النفاق السياسى،الناس اكلتها و نامت ولا الداتورا!
بعدين مادة تانية ايه..انا نفسى اقول للناس الى حرقاهم المادة التانية أوى و عشانها صوتوا بنعم و لبسونا فى الحيط و حرقوا مكتسبات الثورة بجاز، انت بتسئ لدينك بشبطانك فيها،يا حبيبى انت بتقول بالمفتشر انا دينى اضعف من ان يحتمل اقصاء مادة دستورية،انت بتقول انا مش واثق من ايمانى لدرجة انى بضغط على الناس تصدق اللى انا مصدقه عشان مراجعش نفسى و افصل حاسس انى صح،بجد بحس المتشنج ده بيحرج نفسه و بيطلع نفسه حمار.
اللى فاكر نفسه فظيع اوى و يقدر يخرج من براثن الحكم الراديكالى،يبقى برضه حمار،لأن الراديكالية لا مخرج منها الا بتيار الحادى عنيف دموى،لو انت عاوز تعمل كده بدينك انت حر.دول لا هينفع معاهم مظاهرات ولا اعتصامات،احمدى نجاد بيضرب فى المليان على طول!
ده غير انك هتبقى دايماً فى نظر الناس متمرد و كافر،ابقى شوف يا حلو مين هيسندك.

Brunette said...

الاخوان يعملوا حزب يمينى على راسى..لكن حزب دينى..هاهاهأو..كان على عينى يا لمبى.
و لعلمك عمرهم ما هيرضوا الا بحزب دينى و حكم دينى..كتب محمد و سيد قطب تشهد.

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق