Sunday, February 20, 2011

استغاثه لمجلس قيادة الثورة - الاصلي

يا جدعان والنبي اللي يعرفهم يقولهم
يا ايها الثوار ... احنا ماشين وراكم وحبنكم وعايزنكم تكملوا
مش عايزين اللي يحصل يبقى هوجه وتخلص
حد منكم يقولي ازاي سبتوا القرضاوي ينزل ببراشوت على الميدان. إزاي وائل غنيم يتمنع من الكلام في الميدان ومين اللي يمنعه البودي جاردات بتوع القرضاوي ايه كينونته ده علشان يبقاله بودي جاردات؟
ازاي تكون مطالب الثورة الافراج عن المساجين السياسين يقوم اليوم السابع ينشر النهاردة الافراج عن 10 من معتقلي الجهاد بالوادي الجديد من رافضي المراجعات - يعني ارهابيبن ويفتخروا
يعني ايه النهاردة اول حزب ينشأ بعد الثورة وياخد تصريح يكون حزب الوسط ذو المرجعيه الاسلامية
يعني ايه ظهور الاخوان المسلمين في كل القنوات وكأن الثورة بتاعه ابوهم
يعني ايه الاهرام تعمل يوم السبت استفتاء على المادة التانيه في الدستور وايه الحرب اللي قامت وماقعدتش ما بين المسيحين والمسلمين في التصويت
ليه دلوقتي ثار الحديث عن المادة التانيه في الدستور مع انها مش مطروحه للتعديل
ليه بيتم اظهار المظاهر الاسلاميه بفجاجة دلوقتي في حين ان العالم كله بينظر لمصر نظرة اعجاب - النيويورك تايمز سمت الثورة بالثورة الثقافيه في مصر
لصالح مين يتم تغير اوجه الشباب المثقف بأوجه ملتحيه غاضبه
إزاي سايبين ثورة عظيمه زي ديه نهيبه لكل واحد يجي ينط عليها ويتكلم باسمها
سمعت عن مظاهرة ميلونيه يوم التلات هل لما ننزل المره دي هنلاقي ايمن الظواهري في ميدان التحرير؟
انتوا خاطرتوا وحطيتوا رقابيكو على كفوفكم ونزلتوا واحنا صدقناكو والعالم كله بيشجعكم اعلنوا عن نفسكم وامسكوا زمام الامور قبل ما المصريين يتفتتوا تاني. بقايا النظام القديم شغاله الله ينور وبتستخدم نفس الورقه اللي بتقش كل مرة والناس بقالها 30 سنه مفسيه دماغها والناس اللي ماسكه البلد هما هما نفس الوشوش
اي حد عنده اكتر من 45 سنه خطر على نفسه وعلى البلد لان مخه تبلد
فين دكتور احمد زويل مابدأش في تفعيل مبادرة نهضه التعليم ليه
حد يقولي عمر سليمان وزكريا عزمي بيشتغلوا ايه دلوقتي بالظبط
حاجة كمان من صفحه ميجو عالفيس بوك "إذا كان النائب العام يبقى ابن خالة وزير الداخليه الحالي محمود وجدي وزوجه احمد شفيق رئيس الوزرا تبقى عمة خديجه مرات جمال مبارك وابن الفريق احمد فاضل رئيس هيئه قناه السويس متجوز بنت عمر سليمان نائب رئيس الجمهوريه السابق ومرات حبيب العادلي وزير الداخليه السابق تبقى طليقه اشرف السعد حرامي الاموال المعروف وفي نفس الوقت تبقى بنت عمه سوزان مبارك السيدة الاولى سابقاً - زهير جرانه وزير السياحه السابق يبقى ابن خالة محمد منصور وزير النقل السابق والمغربي وزير الاسكان السابق واحمد عز امين التنظيم السابق... وابنته الزعيم عادل امام متجوزة حفيد المرشد العام" يبقي الموضوع كده فيه اشتغاله الحكومة بتشتغلنا ومش بعيد بعد شهر لو استمر الوضع على ما هو عليه تلاقي حسني مبارك رجع تاني وهو وبقيه العصابه ويطلعوا علينا في التليفزيون يقولوا الثورة اتصورت تحبوا نزيع
يا جدعان الموضوع كده هيفرط من فضلكم اعلموا حاجة
اعملوا على الاقل حزب او جهه واحده ليكم ناخد منها معلومات
يعني من كام يوم دخلت على صفحه وائل غنيم لاقيته عامل اعلان لصفحه البرادعي - انا مع كل اللي بيتقال لسه ورا ترشيحه رئيس جمهوريه - وبعدين النهاردة الاقي اعلان لترشيح عمرو موسى لرئاسه الجمهوريه وبرضه عليه صورة وائل غنيم
طيب هو وائل غنيم من قواد الثورة ولا المسأله مسأله حظ
طيب هنعمل ايه دلوقتي؟
تحيا مصر
MishMish

8 comments:

Tears said...

كنت بقول كده من نص ساعه لغاية ما د.يحيي الجمل اتعين نائب رئيس وزراء و عمل تشكيل كويس و كمان قريت كلام ابراهيم عيسى و اقتنعت بيه هنا

http://www.dostor.org/editorial/11/february/20/36599


فاضل نخلص من شفيق و ابو الغيط و بتاع الداخلية و الخارجية و العدل اللى اشرف على تزوير الانتخابات بالنائب العام و تبقى تمام

الميكروباص said...

الهرج والمرج

لا تعليق لي سوى ذلك

!!!

mony said...

هو صحيح اللى اتفضحوا واتقبض عليهم دول حراميه..لكن فيه كتييييييييير لسه متداريين
وحراميه كبار برضه
ربنا يرحمنا ويستر على اللى جاى
انا حاسه ان مصر بتقع مش بتقوم

Kahi ra said...

بص يا سيدي انا كنت فرحان قوي علشان الثورة نجحت بس دلوقتي قلقان اكثر وحاسس ان الثورة هتبقي ثورة اسلامية وقدمنا ٣٠ سنة تاني علشان ننزل الشارع ونعمل ثورة تاني علشان نخلي مصر علمانية ولا اقولك بلاش علمانية علشان الناس متفتكرشي اني كافر او حاجة نخليهي مدنية
المهم تصوري ان الاخوان هيوصلول للحكم واحفادنا انشاءالله هيبقوا اكثر شجاعة مننا وينزلو الشارع وهيتقتل منهم كثير بحكم ان الخارج عن ولي الامر كافر بس في الاخر التنوير والعلم والديمقراطية هتبقى هدفنا وساعتها الناس هتعرف في مصر ان اي دولة دينينة هي دوله فاشية وفاشلة
يارب اكون غلطان

Migo Mishmish said...

Tears
طب انا شايفه ان شفيق رجل محترم والباقين اي كلام ماشي
بس الوضوع في منتهى الضبابيه

لورنس
اقولك كمان امبارح دار السلام وحدايق المعادي وامبابه وحلوان كان فيها حرب عصابات بمعنى الكلمة وضرب نار وصريخ ومتعرفش مين بيتخانق مع مين ووشوش غريبه مش من المنطقه

Mony
لا وغلاوتك النظام خلنا شعباً فاسداً
كل واحد فينا مشترك بشكل او بأخر
الفساد اكبر مما ندرك اونفهم
ربنا يستر وتعدي الايام على خير

Kahi ra
بص بقه يا باشا
اولاً احنا هنا في المدونة ديه نؤيد العلمانيه اخر حاجة واعتقد ده رأى معظم الناس اللي هنا
انما فكرة الاخوان ديه مع انها بتخوف لكن طالما الحكم مصفرش والمبارة ما خلصتش يبقى لسه في امل
الامل في اننا نجمع بعض كل من يؤمن بالحريه والعداله بعيداً عن اي صبغه دينه ولا يؤمن باهميه فرض الدين بالقوة الجبريه
ونبدأ نشتغل
إزاي لغايه دلوقتي كفايه مش عامله حزب
إزاي لغايه دلوقتي اللبيراليين مش عاملين احزاب
مفيش حد اشتغل غير الاخوان
ثم ليه الاخوان فجأه بقوا نجوم
هي ديه سمات المرحله
ان الاخوان يطلعوا ولاسلفين يظهروا علشان العالم كله يرجع يشيد بنظام مبارك
انا مش عارفه
بس شايفه اننا مانرفعش الرايه البيضا ابداً

يا رب تحيا مصر
MishMish

الميكروباص said...

أنا امبارح باليل كنت جالس في ميدان الاتحاد بشارع 105 ومسكو حرامي
لقيت امة لا إله إلا الله على الواد
ومش عارف مين مع مين وفجأه حصل خناقه جانبيه
وكنت واقف في الشارع الساعه 1 باليل بس عشان عاوز اعرف مين له علاقه بالتاني ومين بيتخانق مع مين بالظبط
ولكني في النهايه فشلت فقلت اروح اشتري العشاء وآكل وأنام احسن دماغي تضيع اكثر ماهي ضايعه

Kontiki said...

وحشتينى يا مشمش انا دماغه فاصلة من يوم 1 يناير وكل يوم فى احداث عاوزة اجندات تفسير و تحليل معاكى فى مخاوفك و خايفة اكثر من اللى جاى وربنا يستر

Migo Mishmish said...

Kontiki
مرسي يا جميله على ذوقك. خلينا نعمل اللي علينا وربنا يستر
السنه ديه غريبه قوي
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق