Monday, March 14, 2011

لا للتعديلات الدستوريه ... علشان كدة

علشان ما نقعدش نزيد ونعيد في النصوص المقترحه في التعديل
هما 8 مواد اتعدلوا وحذفوا المادة 179 اللي بتيح للحكومة انها تنتهك حريتك الشخصيه إذا شكوا لاقدر الله انك خطر على الامن العام
المواد بالترتيب هي
المادة 75: اللي معناها ان الرئيس الجديد لازم يكون مصري هو وابوه وامه ومراته ومايكنش حد منهم قد حمل جنسيه اجنبيه
الاعتراض هنا: زي مانتوا عارفين ان مصر كانت طاردة لكل الكفاءات منذ ثورة العسكر 52 وطبعاً اخر 30 سنه كانوا خراب تام وكامل في البلد فبقى اللي قاعد في مصر قاعدة لواحد من تلاته ياما مابيفهمش وعاجبه الحال ومبسوط بيه ياما علشان متنيل على عينه وبيحبها وعنده ظروف تمنعه من انه يهاجر ياما مستني جواب الهجرة او اي عقد عمل في اي مصيبه بره الحدود
المادة ماطلبش حد معين من التعليم او المعرفه او العمل الميداني
يعني بمنتهى البساطة المادة ديه بتقفل على دكتور احمد زويل باب الترشيح وتفتحه قدام واحد زي عصام العريان او عبود الزمر
المادة 76: بتقول ينتخب الرئيس عن طريق الاقتراع المباشر ويلزم ان يكون حاصلاً على ما لا يقل عن 30000 صوت موزعه على 15 محافظة إذا كان مستقل ويجب مراعاه عدم تكرار الاصوات - يعني لو في اتنين مستقلين ما ينفعش ادي صوتي للاتنين هو واحد بس ولو غيرت رأيي في النص يبقى الصوت راح عليا
اما اذا كان ليه كرسي في مجلس الشعب او الشورى فيمكنه الترشيح.
وغير كدة كمان قرارات اللجنه المنظمه نهائيه لا يجوز الطعن فيها - يعني لو شكينا في نتايج الانتخابات مش حقنا رفع قضيه
الاعتراض هنا: اولاً عدم المساواه بين اعضاء المجالس والمستقلين
ثانياً ان القوانين المنظمة للاحزاب لسه ماتنظمتش وان الاحزاب الوحيده اللي ممكن تخش انتخابات دلوقتي هي بقايا الحزب الوطني والاخواااان وسواء دول ولا دول فهم حريفة انتخابات. وخصوصاً ان بقايا الوطني والاخوان والسلفيين طالبوا كلهم بالتصويت بنعم للتعديلات الدستوريه !!! وده في حد ذاته يخوف
المادة 77: بتقول مدة الرئاسه 4 سنين تجدد مرة واحده - وديه معندناش مانع عليها
المادة 93: تختص المحكمة الدستوريه العليا- يعني لا يمكن نقض حكمها - بالفصل في صحه عضويات مجلس الشعب وتعتبر العضوية باطله من تاريخ ابلاغ المجلس - وده حلو برضه علشان ما يطلعش علينا واحد ويقول المجلس سيد قراراة
المادة 139: يعين رئيس الجمهوريه في خلال 60 يوم من توليه الحكم نائب للرئيس تنطبق عليه نفس صفات الترشيح للرئاسه
نفس الحدوته مش مهم هو دارس ايه او عمل ايه المهم انه يكون مصري هو واللي خلفوه وغير كدة ده بقه هايتعين يعني ممكن الرئيس الجديد يجب اخوه ...ابنه ..جوز خالته ... محمد حسان ...او اي حد من الحلوين اللي ماليين التليفزيون المصري دلوقتي
المادة 148: يعلن رئيس الجمهوريه حاله الطوارئ وتعرض على المجلس في خلال 7 ايام ... وفي كل الاحوال لا تزيد عن 6 اشهر ولا يجوز تمديدها الا باستفتاء عام
وطبعاً لو وافقنا على السرعه في الانتخابات هيجي رئيس مايختلفش كتير عن اللي قبله يخطط حادث ارهابي او طائفي ويعمل شويه اصلاحات ومن ضمنها تمديد الطوارئ زي ما عمل الرئيس المخلوع وعلشان نصوت لازم نصوت عالحزمة كلها بما فيها تمديد الطوارئ لغايه لما تفرج
المادة 189 فقرة مضافه - وديه اللي عثل عثل عثل: بتقول بقه لكل من رئيس الجمهوريه بعد موافقه مجلس الوزراء ولنصف اعضاء مجلسي الشعب والشورى طلب إصدار دستور جديد
وتتولى جمعيه من 100 عضو ينتخبهم اغلبيه اعضا مجلس الشعب من غير المعينين اعداد الدستور في مدة 6 اشهر ويعرض على الرئيس ثم للاستفتاء العام
المشكله هنا فين بقه
اولاً قانوناً مجلس الشعب لازم يحتوى على 50% عمال وفلاحين (يعين جهله او انصاف متعلمين) وديه مش لعيب فيهم لا ده لعيب من النظام حتى بعد هوجه العسكر بتاعه 52 لما خلت التعليم مجاني فضل عندنا برضه 50% من المصريين غير متعلمين
ثانياً زي ما اتفقنا ان اللي مستعد لدخول المجلس هما بقايا الوطني والاخوان وشويه ناس تانيه اللي هايلحقوا ينظموا نفسهم قبل انتخابات المجلس
يعني ببساطة اللجنه اللي هتعمل دستور مصر واللي هاتخرجها بيه من المستنقع ده للعالميه هتكون منتخبه من مجموعه نصها من الجهله وانصاف المتعلمين والاخوان والسلفيين ونسبه قليله من الناس اللي فعلاً بتمثل التيارات السياسيه الجديدة بعد الثورة
امبارح في اون تي في واحد من اللجنه اللي عملت التعديلات ديه قال لو كانت اغلبيه الاصوات بالرفض يبقى هنعمل دستور جديد
الناس اللي بتقول احنا عايزين استقرار ... احنا معاهم بس دي بلد وبلد حلوة كمان وكل واحد فيها طمعان في حته
مش كل 30 سنه هانعمل ثورة
اللي حصل ده عظيم بكل المقاييس بلاش نضيعه
وبعدين احنا متضايقين من ايه ؟ من البلطجه؟ هما مش قالوا ان البلد كانت داخله على ثورة جياع
متضايقين من اللخبطه اللي احنا فيها؟ طيب ما هو ده كان متوقع لان السنه ديه نهايه حكم الرئيس المخلوع يا كان هيرشح نفسه تاني ياما ابنه كان هايترشح وفي الحالتين مكنش حد هايوافق والعادلي كان لازم هايتصرف
زعلانين ان مفيش فلوس طب استنوا لما فضيحه تصدير الغاز تكمل وتبان معالم اللغوصه اللي كانت فيها
حد يصدق ان بلد فيها 1/4 اثار العالم وعندها بدل الساحل اتنين وفيها بترول وغاز ومعادن ودهب ونهر النيل وشمس وهوا وقمر وناس زي الفل يبقى اكتر من 40% من سكانها يعيشون تحت خط الفقر
انا هاروح واقول لا
علشان احنا نستحق اكتر من كدة ومصر تستحق اكتر من كدة
if we have nothing we have nothing to lose
ان شالله هتبقى احسن
MishMish

9 comments:

Tears said...

طبعا لا للتعديلات بس مش عشان بس الاسباب اللى ذكرت لكن عشان الاهم

الاهم دلوقتى هو فكرة تعديل
دستور سقط و اللى ح يؤدى لمجلس شعب مسيطر عليه التيار الاسلامى و فلول النظام و ينتج عنه دستور يعبر عنهم..امبارح احد السلفيين اللى بيروجوا فى كل مكان نعم للتعديلات قالى دى فرصتنا الوحيدة للسيطرة على البلد قبل ما الليبراليين يعملوا احزاب نكون احنا عملنا دستور

فيه على مدونتى فيديو لمحامى شاب من الائتلاف بيشرح فيه الفخ لاننا كده بنستفى على دستور اسقطنا شرعيته عشان نعيدها له

Migo Mishmish said...

Tears
ديه الاسباب اللي انا فهمتها بعد قرايه وفرجه على كل برامج كتير
وطبعاً السبب اللي انتي بتقولي عليه
احد اهم الاسباب لرفض التعديل
المهم اننا متفقين اننا نقول لا وخلاص
Love
MishMish

Tears said...

مش المهم احنا المهم نشر التوعية دى للناس فى التجمعات بسرعه

اللى فاهمين ان نعم يعنى استقرار و نخلص من الجيش مع ان واقعيا كده كده الجيش قاعد نفس الفترة تقريبا و ده مش ح يكون استقرار انما اجهاض للثورة

هنا فيه مقال ممتاز و سهل
http://www.masrawy.com/News/Writers/AmmarAliHassan/2011/March/14/poll_const.aspx

ELVIRA said...

انا كمان هاقول لا

الميكروباص said...

النيا خلقت في 6 أيام ولم تخلق في يوم واحد

صفا سارة said...

وانا متفقة جدا مع الكلام ده
كفاية بس ان الاخوان والوطنى عايزين الناس تقول اه عليها ده فى حد ذاته يموت من القلق بغض النظر عن اى حاجة تانية

Ms Venus said...

متفقة تماما مع رأى تيرز

Boneta said...

لا للتعديلات الدستوريه
نعم لدستور مدني جديد يليق بنا كمصريين

Tears said...

استمارات التصويت اصلا بتوزع فى الشارع و مع الناس حتى فى الصعيد و بيتعلم فيها نعم و يدوها للناس عشان يحطوها فى الصندوق و يرجعوا بالفاضية فياخدوا مكرونة و زيت و فيه ناس تانية بياخدوا منهم صورة الرقم القومى (زى الوراق مثلا) و يدوهم اى حاجة فى المقابل

كده بقت تمثيلية زى كل مرة و مش فارق حاجة و الاسوأ ان دى بروفة لانتخابات الرئاسة و بالتالى احنا رجعنا لنقطة ما قبل 25 يناير و همه ح يعملوا اللى عايزينه و الاهم ان التعديل بتاع المادة 76 اللى المفروض ان يتوافق عليها بيمنع الطعن على نتيجة انتخابات الرئاسة يعنى ح يزوروا و ماحدش يفتح بقه و لما يبقى يجى رئيس جديد نتيجته مشكوك فيها يبقى يحط دستور هو و مجلس الشعب اللى ح يبقى مش ممثل للشعب بعد فيلم الاستمارة الدوارة ده

الاستمارات اللى فى الشارع بقالها
تلت ايام هنا
http://www.facebook.com/album.php?aid=647424&id=522785413&fbid=10150448781095414

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق