Monday, May 16, 2011

حل ازمة ماسبيرو في دفع الجزية

اه بجد .... هو ده الحل .... ماحنا علشان نعرف نحل مشكله لازم نسمي الاشياء بأسمائها الصحيحة.
اولاً: العالم كله يعرف إننا في مصر بندفع تمن حقنا الطبيعي في الوجود وحرية العقيدة. علشان الاسطوانة المشروخة بتاعة أننا قاعدين هنا علشان سماحة الاغلبيه واللي لولا كرمهم العظيم مكنش بقى ولا واحد مسيحي في مصر. المسحيين المصريين بيدفعوا الجزية من يوم دخول الاسلام مصر إلى عام 1855م في عهد محمد علي

ثانياً: "في مقابل دراهم معدودة يدفعها الرجال القادرون على القتال من اهل الذمة فإنهم ينعمون بالعيش الآمن والحماية المطلقه لهم من قبل المسلمين علاوة على امنهم على كنائسهم ودينهم" . واهو بدل ما كل واحد وواحدة مش مظبوطين يتعمل علشانهم حرب اهليه. ندفع تمن حمايه الكنايس وتكون ساعتها الحكومة ملزمة انها تقبض على الجناه -علشان ديه ناس تخاف متختشيش - مش كل مرة تنتهي بصلح او بمختل عقلياً او بماس كهربائي ودلوقتي زاد عليهم الثورة المضادة والفلول والايدي الخارجيه

ثالثاً: إننا نبقى قدام العالم كله ليس لنا ناقه ولا جمل في اللي رايحين على القدس شهداء بالملايين - او اي حته تانيه لاني سمعت كلام عن تحرير الاندلس من الصلبيين. لان الدولة الاسلامية لها حدود وثغرات وتحتاج الى مقاتلين يدافعون عنها ويحافظوا على حدودها ويؤمنون أهلها والذي يقوم بهذا الدور انما هم المسلمون لانهم مؤمنون بمبدأ دولتهم ويعلمون ان الجهاد فرض عليهم ... وليس ثمه شيء من هذا لدى اهل الكتاب. يعني تبقى قاعد في بلدك بأمان الله فتتحول بقدرة قادر لدولة اسلامية وتتحول انت من مواطن الى ممول للحروب المقدسه .... وده كان واضح يوم الجمعه اللي فاتت بدل ما المصريين يتلموا علشان يعملوا جمعه وحدة وطنيه ويحلوا مشاكل بلدهم .... طلعوا باعلام فلسطين والسعودية ورايحيين يحرروا فلسطين مشي

رابعاً: لتبرير موقف الجيش والحكومة المتخاذل امام الاعتداءات المتكررة على الاقباط - بسبب ديانتهم وليس لأي سبب اخر - فكانوا كلهم في قنا نعام ولكن في ماسبيرو اسود

إن كان لديك فؤائد اخرى لدفع الجزية فارجو ذكرها حتى يتم تجميعها وتقديمها للمجلس العسكري. والله الموفق والمستعان
MishMish

9 comments:

Ms Venus said...

حاجة توجع القلب

مش عارفة اقول ايه

ربنا موجود

وشايف

وهيتصرف اكيد

Tears said...

معلش ح قولك نفس اللى بقوله للكل

خلينا نتفق ان اللى قام بالثورة حوالى 12 مليون من اصل 85 و دول همه الاكثر وعيا

الشعب مشكلته ان حظة ان حكامة خونه..مبارك ماكانش خاين لوحدة و احنا لم نتخلص من باقى فريقه على عكس ما الناس معتقده و بالتالى الخيانة مستمرة و ان كان تم تحجيم الفساد نسبيا

ولان الشعب ضحية اساسا فتعليمه و الاهم وعيه بما يدور محدود فبياخد وقت طويل ومجهود جامد مننا على ما يفهم ان فيه خونه لازم نتخلص منهم

الخونة الحاليين زملاء الخاين الاول اللى كان فى الواجهه بيشيعوا الفوضى و بيمنعوا تدخل الامن بالساعات لاحداث فتنه طائفية و ربما حرب اهلية و بيتحالفوا مع قوى الظلام لتثبيت اقدامهم و امتصاص ثورة لو اتت ثمارها لشرفوا طره جنب زملائهم

لا اعتقد ان ح يكون فيه ديمقراطية و لا انتخابات نزيهه لان الاستفتاء لو فرضنا ان الفرز نزيهه فلم يكن طرحه او دعايته نزيهه

فى ظل التواطىء الحالى نحن مقبلون اما على مصير الثورة الايرانية التى بدات ليبرالية ثم انقض عليها التيار الظلامى فخربت ايران او مصير ثورة الجزائر الذى حدث لها نفس ماحدث فى ايران من انقضاض لكن قادة الجيش انقلبوا لياخدوا الحكم و عاد للديكتاتورية

الميكروباص said...

ولله أنا شايف الحل من وجهة نظر أخرى

من الآخر لكي نوفر على أنفسنا الكلام الكثير

المسيحي لن يحب المسلم والمسلم لن يحب المسيحي
دي مشكله عمرها عشرات السنين
فاليكن التعامل بيننا قائم على المصلحه كما يفعل الاوربيون- زي بالضبط معاملة التاجر مع الزبون، احنا كلنا اصحاب مصلحه واحده وهو البلد تقف على رجلها- نشتغل على الاساس ده
لا اطلب من المسيحي ان يحب المسلم أو العكس لأن هذا لن يحدث وهذه حقيقه- صحيح مؤلمه- لكنها الحقيقه
بلاش نلف في دائرة مفرغه لن توصلنا لشيء
أما بالنسبه للمجلس العسكري، مشكلته انه لا يعرف كيف يسيطر على الموقف، وربما يجهز شيئا للسطو على السلطه في المستقبل والله اعلم

Kahi ra said...

نسيت تقول لازم ندفعها ونحن صاغرون يعني مزلولين ولو ده اخر يوم في حياتي انا وولادي ومراتي لايمكن هتزل ولا هادفع جزيه في بلدي وزي ما بيقولا في الافلام الفرنجه بالترجمع العربيه تباً لهم ترجمها انت بقي باللغة الفرنجة

Migo Mishmish said...

Ms. Venus
وتعليقات الناس على الاحداث توجع القلب زي الاحداث نفسها. لما تلاقي واحد يقولك يا ريت احنا ناخد حقوقنا زي النصارى ...او هما عايزين ايه احنا في بلد اسلامي وهما اقليه لازم يحترموا شعور الاغلبيه ... الله يرحم السادات ... بجد بحزن من عمى القلب والشعور بتاع الناس ديه -المتعصبين طبعاً


Tears
والله هي شكلها باظت وهتقفل زي ايران


لورنس
انا مع جزء من تعليقك اننا نتعامل على اساس المصلحه بس ... وده في نظري النظام الوحيد اللي يمشي ... بس مش موافقه على موضوع الحب والكرهه ده ...كل فريق شايف التاني من خلال معتقده ... وكل فريق عنده مبررات الهجوم على الفريق التاني ... اهمها عدم تطبيق القانون ... واحنا كمان اتربينا على الشخليله او اليويو مفيش اي اختيار تاني ... يا اهلاوي يا زملكاوي ... يا مع العروبة ياما خاين

Khai ra
بالظبط كدة تباً لمن يريد عودتنا للقرون الوسطى

MishMish

ELVIRA said...

مشاكل مصر الدينية هى فى ناس خطفوا البلد من تلاتين سنة أول ما طلعوا من السجون

لو قلنا ان اللى قاموا بالثورة و هم عدة ملايين كان منهم الاسلاميين و العلمانيين مسلمين و مسيحيين وناس عادية من اللى بينشوفهم فى الشارع و ميعرفوش حاجة عن البلد غير من نشرات الحكومة يبقى عدد العلمانيين مثلا حوالى مليون اكتر او أقل
وحتى لو الناس بتكره العلمانية و فاكرينها كفر فهم دلوقتى كارهين حاجة أسمها السلفية أكتر من أى شئ

طالما الناس أبتدت تحس على دمها يبقى فيه أمل

IMSA said...

مشمش :
دفع الجزية أصلا لا يكون إلا حين يوفر المسلم لغير المسلم الأمن والأمان ، الرخاء والرقي ، وفي نفس الوقت الدفاع الكامل عن الدولة التي تحمي الاثنين .
وبما إننا نعيش في دولة قوائمها مصريين في الأساس ولا تقوم على الاقامة الدينية والطائفية فيجب هنا أن يتم إلغاء هذا اللغو الغريب عن دفع الجزية والكلام الأجوف الذي لا يغني ولا يسمن من جوع .
//
الدين الاسلامي أو المسيحي غير مسئولين عن كلام اجوف يظهر من جماعات متخلفة - لا اتحدث عن موضوع الجزية فقط بل عن مواضيع كاملة مثل الجزية والاستقواء والكلام الفاضي الذي يخرج - ..
الحقيقة التي يجب أن يعترف بها الجميع غصبا عن المتخلفين أن هذا الوطن يحمل بين طياته الجنسية وليس الدين ، حين تم التحويل من اللغة القبطية إلى العربية كان إعلانا عن تضامن نسيج هذا الوطن بين مسلم ومسيحي من أجل شيئ واحد هو تلك الدولة التي نعيش فيها ألا وهي مصر ...
التعامل على اساس الفرد وليس على اساس دينه او نوعه او لونه ..
//
تحياتي وتقبل مروري

Migo Mishmish said...

Elivera
يا رب بس منلاقيش نفسنا في ايران تانيه

IMSA
طب حط نفسك مكاني واقرا تعليقات الناس وشوف الكره في عنيهم وانت تعرف انا كتبت البوست ده ليه
ونفسي الانتماء يبقى للوطن وبس ... لكن انت طول الوقت تبقى ماشي في اي حته تلاقي واحد مشغل تسجيل فيه شيخ من بتوع تحت السلم يفكرك بان وجودك في مصر كنصراني مختلف متوقف على سماحه هو الشخصي بكدة وبعدين يفكرك بقه انك مش من حقك تعترض مش من حقك تشكي مش من حقك ترفع راسك حتى
MishMish

Anonymous said...

فهمت من كلامك ان المصريوون المسيحيون يدفعون جزيه ؟

انا مسلمه لكن حقا هذا خبال لو قرات القراتن لرايت ان الجزية يدفعها المعتدين وليس المعتدى عليهم

لا اعرف ماذا اقول حقا

الله يعينكم

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق