Sunday, June 26, 2011

انهيار عصبي


حياتنا كلها عباره عن سلسله احداث تؤدي في النهايه الى انهيار عصبى.
 بنتلقى مجموعه من الاوامر واحنا صغيرين "اوعى كلمه نقولها هنا تطلع بره" اوعى تشتم " و الجمله متنتهيش الا وتسمع مين ابن الكلب الواطى اللى معلى الكاسيت كده فاكر نفسه عايش فى الشارع لوحده ده و لا ايه".
 و بعدين تكبر شويه و تبقى فى اعدادى مثلا الولد يفضلوا يجروا وراه "اوعى تشرب سجاير. السجاير هتدمر صحتك ........روح هاتى طفايه بقى عشان السجاره اللى فى ايدى قربت تخلص". و اوعى تعاكس بنات و تسمع حكاية وانا فى سنك كنت ملاك برفرف بجناحات والمفروض انك تصدق الحكايات ديه.
و البنت بقى ياعينى يومها طين لمجرد انها كبرت اوعى تكلمى حد فى الشارع و صوتك وانت بتضحكى و اوعى تبصى لحد وانت بتكلميه ايه يقول ايه بجحه ...........و حاجات كتير و لو البنت قالت يا ماما انا بحب زميلى فى المدرسه يتم نقلها فورا لمدرسة بنات بس و عادة بتبقى المدرسه اشبه بسجن النسا و المدرسات نصهم معنسين و يتحدوا البنات الصغيرين وكل ما بنت تعمل حاجه يقولولها انت فاكره نفسك حلوه ولا ايه انت مستحليه نفسك يا بت...........لا حول الله قمة البهدله و طبعا خلال المراحل العمريه المختلفه لو صادفك الحظ وكنت موهوب فى حاجه رقص ايقاعى موسيقى رسم او حتى زراعه و قلت انا عايز ادخل مسابقة كذا تلاقى الرد فورا انت اتجننت و دروسك ومذاكرتك وكل الاهالى عايزه تطلع ولادها مهندسين ودكاتره بس مفيش اى وظيفه تانيه بتبقى من طموح الاهل


دخلت ثانوى انسى بقى يا معلم ولا خروجات و لا اصحاب و لا تليفون ولا اى حاجه خالص دروس خصوصيه و مدرسه فقط لا غير و طبعا قبل ما تبتدى الدراسه تلاقى اهلك حجزولك كل المواد "طب انا شاطر فى الانجليزى يا ماما مش عايز اخد فيه درس" اخرص عمى فى عينيك انت اتجننت و بعدين هتاخد غصب عن عين اهلك انت عايزنى لما اموت تقول اللى يحرقها مطرح ما راحت ما ساعدتنيش و استخصرت فيا" قال يعنى لما حد يموت هنفتكر بقى انه استخصر انهى درس عشان ادعى عليه و كل الشتيمه اللى فاتت دى عادى يعنى

الامتحانات جت و البيت بقى مكهرب و كل ماتقوم من على المذاكره تسمع صوت مخيف انت رايح فين يازفت ترد بصوت يرتعش من شدة الخوف انا ....انا .....انا رايح الحمام "اه حجة البليد روح روح واول ما تدخل تسمع انت هتقعد جوه اليوم كله و لا ايه يلا يا فاشل مع العلم انك عمرك ما سقطت........خلصت ايام الذل و جت الاجازه اول يوم فى الاجازه عادة بتنام بقى تعوض كل سنين العناء و الشقاء و الاشغال الشاقه اللى انت فيها تلاقى الصبح بدرى قوم يابنى انت هتفضل نايم كده على طول.......قوم عشان ربنا يفتحها فى وشك ........اللى نفسى اعرفه هيفتحها ازاى هو انا هانزل اسرح بلبن مثلا هيفتحها فى ايه بالظبط هيعرضوا فيلم لاول مره فى التليفزيون مثلا ناهيك بقى عن معاملة الكلاب اللى انت بتتعاملها لغاية ما تظهر النتيجه و اول ما تظهر النتيجه لو ربنا نصفك تلاقيهم بيحيلوك فانت تتغندر بقى مين قدك ياعم واول طلب تطلبه تسمع نفس الصوت المخيف فاكره من ايام الامتحانات"هو انت صدقت نفسك تلاقيك غشيت يا فاشل" يالا استعد للسنه الجايه تعرف لو مجموعك نقص هاعمل فيك ايه (فانت ايدك على قلبك بقى ياترى الوحش هيعمل ايه) و لا اعمل ليه انا مالى اللى ياكل على ضرسه ينفع نفسه" طب ما كان من الاول انتوا مالكو بقى.........
المهم جت الكليه بقى و انت مبسوط اخيرا بعدت عن القبضه الداميه المطبقه عليك من يوم مااتولدت واول ما تدخل الكليه تكون طيب كده و مصاريفك اول سنه مظبوطه و بعدين بقى يبان اثار التربيه السيئه واثار الكبت يطلع و تبتدى تسرق بقى من تمن الكتب و تسحب منهم المصاريف 3 او 4 مرات على سبيل الانتقام بس مش اكتر و طبعا بقى تسمع بعد كده احاديث الفخر بيك فى جلسات العائله انك دخلت كلية ايه و جبت مجموع ايه و نجحت فى اول سنه ازاى و انشاء الله عمرك ما هتكوع فى الكليه ...............شويه كده فى الكليه و تتقى ربنا بقى حرام فترجع كويس تانى وتحس انك كبرت وعادة بتبقى اخر سنه فى الكليه على اساس انك داخل بقى سوق العمل و تلاقى كتافك عليت كده وانت ماشى فى الشارع وتبص لنفسك فى المرايه كتير واعز اصحابك يهزر معاك تقوله عيب بقى احنا كبرنا .......المسخره كلها بقى فى اول انترفيو تلاقى عم الكبير عمل قطه و هيعيط لصاحب الشغل عشان يشغله و تقعد تفتى بقى و انا كنت اشطر واحد فى الكليه و السيره الذاتيه بتاعتك نصها مضروب و تحس دايما ان صاحب الشغل بيضحك على الكلام اللى انت بتقوله.......واول ما تشتغل تحس انك فجاه بقيت كائن محبط كئيب ايتم من الاخر واول وظيفه تتعين فيها لازم تحب زميلتك فى الشغل حتى لو كنت مرتبط بواحده تانيه وهى هى نفس الكلمه "اللى قبل كده كانت عيله اما امت شخصيتك بهرتنى".................وتزداد سخافه و تصبح اقرب شبها بالكائن المخيف اللى فى البيت اللى كل يوم اول ماتروح تسمع ازى الشغل عامل ايه تلاقيك عملت مصيبه كالعاده ....انت طبعا ترد الحمد لله مفيش مصيبه ولا حاجه ......ليه هو انا مش عارفك .......ياباب مفيش حاجه ....طب انت قالب وشك كده ليه جتك داهيه وانت شبه امك كده

 
خلال طول المده دى سمعت كلمة فسحه خروجه مع العيله من غير ماتبقى الخروجه دى جنينة الحيوانات و طول الطريق تسمع ابوك وامك بيتخانقوا على مصروف البيت و فى الاخر يطلعوا مدكنين قد كده بس يا عينى يستقطعوا من مصروفك كل شهر على اساس ان فى خصم فى المرتب الشهر ده او مجرد تعسف كده ولو ابديت اعتراض تسمع هو انت مبتحسش خالص كده يابنى حس بينا حرام عليك و انت تفتكر ان اهلك فقرا و لما تكبر تكتشف انهم اغنيا فجأه


عمرك قلت انا عايز اعمل كده وحد شجعك ....عمرك نجحت و حد جابلك هديه تكون انت عايزها مش بابا و ماما شايفين انها هتنمى ذكائك المحدود

تفضل طول عمرك يشككوا فى ذكائك وقدراتك لغاية ما تحس انك عامل زى حزلقوم ذكائك محدود وعدا كل الحدود

وبعد كل ده تروح تختار عروسه نسخه من امك والبنت تختار ابوها ....زى مانكون بنشتاق للنكد اللى اتربينا عليه و طول الوقت تبقى مشدود ومتضايق زى ابوك بالظبط والبنت قلقانه نسخه من امها

بذمتك مش ده يجبلك انهيار عصبى

إهداء من رومي

4 comments:

ياسمين said...

ههههههههه بصراحة شر البلية ما يضحك نص الحاجات حصلت معانا كلنا عادي عادي بتحصل ف احسن العائلات... بس يعني اكيد فيه حاجات ايجابية بتخلي الواحد مش يجيله اكتئاب ولا حاجة...ولا حتي انهيار عصبي .. مكنش فيه خروجا كدا وكدا ايام ثانوي ولا الجامعة او رحلة أو اصحاب ننسي معاهم كل حياتنا.....يغض النظر الانهيار العصبي عندي من زمان هههه الله يكون في عونااا كلنا

Tarkieb said...

يا باشا دا كاس وداير ع الجميع كلنا مرينا بنفس المرحلة وبعد كدة بتضحك عليها...انا فاكر وانا صغير قلت نفسي أكبر واشتغل عشان أجيب بكل فلوسي شيكولاتة ولما كبرت برضه ما أشترتش بكل فلوسي شيكولاتة عشان اكتشفت ان الدنيا مش بس شيكولاتة ...وبرضه ماجلناش لا نقص شيكولاتة و لا انهيار عصبي واحنا صغيرين ولا احنا كبار...
أحسنت يا معلم

Anonymous said...

تحفة بجد ضحكت من قلبي
بس برضو ما تنكريش يا رومي انتي ومشمش ان في حاجات جميلة اتربينا عليها وكبرت معانا زي اننا نتلم على اكلة حلوة كلنا بنحبها او نسهر كلنا سوا نتفرج على فيلم
وصدقيني كل ما بنكبر بنفتكر الايام اللي فاتت دي وبتوحشنا حتى بالنكد اللي كان فيها

تحياتي
ام البنات

Ms Venus said...

ههههههههههههه

حكاية نسخة متكررة فى كل البيوت


عجبنى تعليق تركيب والشيكولاتة هههههههههه

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق