Friday, November 18, 2011

لعبه المنديل وسميرة ابراهيم واشياء اخرى


في لعبة المنديل يقف الفريقين قدام بعض وواحد واقف ماسك المنديل في النص بنهم بالظبط. وينادي على رقم يجوا اتنين وليهم هدف واحد المنديل ... كل واحد يحط ايد جنب المنديل وايد ورا ضهر صاحبه ... كل الواحد حاطط في دماغه خطه للفوز ... واحد هدفه يشد المنديل ويجري وواحد تاني قرر انه يسيبه من المنديل ويركز في انه يلمس اللي خطف المنديل علشان النقطة تتحسبله
ساعات كتير الوقفه تتطول واللعبه تبوخ وفي الحاله ديه بيبقى قدام اللي ماسك المنديل او "السلطة" حل من اتنين:
يقول سلالالالالاطة: وساعتها الكل بينزل ويتكرر نفس الموقف اللي فات بس على كتير وساعتها واحد بس عادتاً بيبقى واقف بعيد في الاخر مستخبي في الزحمة بياخد المنديل ويجري
ياما يرفع المنديل ويلغي الدور


فتحوا السجون او المساجين هربوا وبقى عندنا 500 الف بلطجي وفي تقديرات تانيه متفائله 150 الف بس ..قلنا الحقونا ..قالوا المحاكمات تبقى عسكريه علشان نضمن سرعه الحكم وتنفيذ القانون وردع الخارجين عن القانون ...قلنا هيه
حبسوا علاء عبد الفتاح وسابولنا البلطجيه .... احيه


 الدنيا "هااااجت" علشان عليا قلعت هدومها "بمزاجها" واتصورت وحطت صورتها على مدونتها .... فدخل المجاهدون "الهائجون" ومدعي الفضيله ليشاهدوا صورة العاهرة ... وعلقوا قائلين " .... الصورة محركتيش فيهم حاجة .... وصبوا عليها لعنات الله والبشر " وخرجوا يستغفرون ويشعرون بالفخر لانهم ادوا واجبهم المقدس ورفعوا رايات الجهاد دون ان يتحرك فيهم حاجة
وصل عدد المعجبين بالمدونة على الفيس بوك الى 10668 وعدد المعلقين على الفيس بوك الى 3143 وعدد التعليقات على المدونة نفسها على بلوجر 440 تعليق وتقدم أعضاء الائتلاف العام لخريجى الحقوق والشريعة بلاغ للنائب العام لـ"تطبيق الحد" على علياء المهدى وكريم عامر. بينما سميرة ابراهيم التي انتهكت "قصراً وظلماً وتخلفاً" واخريات على يد العسكر يوم 9 مارس
وعن انتهاكات كشف العذرية، أوضحت سميرة أن إحدى السيدات التابعة للجيش طلبت منها خلع ملابسها، وكانت الغرفة التي تقف بها المتظاهرات مشرعة الأبواب والشبابيك، ولما رفضن أدخلت عليهن جنودا، واعتدى أحدهم عليها بالضرب. وقالت: «اضطريت أخلع وبعدين اللي على الشباك واقفين عملين يضحكوا ويتغمزوا علينا، وكانوا عساكر على ضباط. أنا يوميها أتمنيت الموت...... وبعدين لقيتها بتقولي اخلعي عشان البيه هيكشف عليكي، وبعدين خلعت البنطلون. وبعدما كشف قالي تعالي امضي انك بنت"
ولفتت سميرة الى أنها تقدمت ببلاغ للنائب العام منذ ذلك الحين، ولكن لم يتم التحقيق فيه، الأمر الذي دعا عدة منظمات حقوقية لإقامة دعويين نيابة عن سميرة أمام القضاء الإداري، للطعن في عدم اتخاذ الجيش للإجراءات اللازمة حيال القضية. وسوف تنظر في 29 نوفمبر.
سميرة لم يقف بجوارها المجاهدون "الهائجون" ولا الائتلاف العام لخريجى الحقوق والشريعة  ووصل عدد المعجبين لصفحتها على الفيس بوك 339 ... الظاهر ان الناس ديه ماينفعش معاها غير اللي عملته عليا .... ههاهاهاه احلى من الشرف مفيش


 إلى اخوتي في الدين والوطن اعضاء اتحاد ماسبيرو "انت حمار يا حمار" .... لا والنعمة بسأل بجد ...كل اما تعملوا مسيرة من اول كنيسه صول لغايه اربعين شهداء ماسبيرو يتم الاعتداء عليكو .... طب ايه بقه
قبل ما حد منكم يتخن في صوتة وعروقه تنفر وهو بتكلم عايزاه بس يتخيل انه واقف في البلكونة وخير اللهم اجعله خير لاقي الف واحد بلاش 200 واحد رافعين علم اسود عليه شعارات دينيه اسلامية او علم السعودية وماشين في الشارع وبيقولوا "اسلامية ... اسلامية" او اي شعار ديني تاني وقول بمنتهى الامانه هتحس بايه وبعدها تعالى اتكلم عن الحق والمستحق والاضطهاد والظلم و... وكل الحاجات
زي مانت مش عايز تعيش في افغانستان ...هما كمان مش عايزين يعيشوا في الفاتيكان
مفكرتوش ليه المرة الوحيدة اللي المسيحيين اتلموا فيها بعشرات الالاف لاكتر من 12 ساعه يوم 11 \ 11 يوم الصلاة متمش فيها الاعتداء عليهم ليه؟
افتحوا هوشع اصحاح 4 ايه 12 مكتوب "شعبي يسأل خشبه وعصاه تخبره" ..... يا رب نكون فهمنا

MishMish

9 comments:

لورنس العرب said...

عدد البلطجية المسجلين خطر في مصر يقدر ب 300 ألف
وعدد البلطجية العاديين يقارب المليون ونصف المليون
وعدد جنود الجيش المصري نصف مليون
يعني لو الجيش كله نزل الشارع لن يستطيع القبض عليهم
----------------------
بمناسبة الارقام لأني مركز معاها شويه
المدونه اياها عارفه زارها كام واحد؟
مليون واحد
-----------------
اما بالنسبه لآخر جزء في المقال
اعتقد ان الموضوع ده مفيش فيه فايده أصلا

Farahatov said...

مازال في بلدي المظلوم لايستطيع الحصول على حقة ..يا استاذي احنا اثبتنا على الحيطه وخدنا قلم سخن على قفانا..ثورتنا طلعت صيني..صيني..يعني مش اصلي

Anonymous said...

بوست اكتر من رائع يا مشمش
اكتر حاجة عجبتني هي اننا فعلا مش بنفكر باسلوب الاخر يعني زي ما انا مش عايز اعيش ف السعودية هما كمان مش عايزين يعيشو ف الفاتيكان بجد جملة جميلة

تحياتي
ام البنات

مصراوي said...

انا عجبني قوى المقال ده بس بصراحة لم افهم اخر جزء يمكن انا فهمي تقيل - ياريت توضحي في مقالاتك اكثر

goulha said...

اللهم احفظ مصر وشعبها من كل شر

Migo Mishmish said...

لورنس
اللي مضايقني ان المجتمع اللي بيحصل فيه حفلات تحرش جماعي مفيش واحد يومها بيعدي الا لما بتنتهك متضايق قوي من اللي عملته عليا ... قال يعني عندهم دم

اما الموضوع الاخير ده فمشكله ان كل واحد متخيل نفسه على حق والتانين بس لو يعرفوا هيحولوا افواجاً

Farahatov
اولاً انا المدام ...ثانياً الفساد عندنا متجذر ومستوطن ومن الطبيعي ان الناس هتتعدل مرة واحدة ... المقلوع اللي يحرقه سابها خرابه على كل الاصعدة ...بس الثورة عموماً مسأله نفس طولما لسه فيك نفس وعندك امل حتى لو انت لوحدك يبقى في امل

ام البنات
بقالك كتير قوي ماجتيش ...اهلاً باك
انتي عارفه اللي نبهي للموضوع ده واحدة صاحبتي على الفيس "كانت بتقول المسيحين بيزعلوا لما حد بيقول مصر اسلامية ومع ذلك نفس الناس ديه معندهاش مانع تقول مصر للمسيح"

MishMish

abhasoft said...

لا حول و لا قوة الا بالله

goulha said...

تشرفت بالمرور من هاهنا
تحيتي ومودتي
بالتوفيق والسداد

وجع البنفسج said...

ربنا يصلح الحال يارب

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق