Friday, June 20, 2008

امل وعمر والكلبه لاسي

هل تتذكرون الشخصيات التاليه؟ السؤال ده جه على دماغى بقاله كام يوم وقعدت اتخيل هما راحو فين ؟
فاكرين كتاب القراءة والشخصيتين المشهورين امل وعمر؟ متهيألى جيلى بس هو اللى يعرفهم ..كانو بصراحه مرتبطين بينا وبطفولتنا ولغايه دلوقتى فاكر العبارات بتاعتهم ..وكمان كان فيه بنت عمهم نرجس الى كانت ساكنه فى الارياف ..طب حد فاكر الدرس بتاع قلم من؟ ..احمد عثمان تانيه اول ؟ ولحد مالكتاب خلص وهما بيدورو على احمد عثمان عشان يدولو القلم بتاعه بس ملاقهوش ..مش عارف الشخصيات دى اختفت راحت فين ؟
انا اقولكو :عمر سافر لدوله عربيه خليجيه عشان يشتغل ويعمله سبوبه من فلوس البترول وربى دقنه وبقى رجل تقى ومش بعيد انه بيشتغل فى قناه من القنوات الدينيه زى المجد والناس ..اما امل الى كانت املنا كلنا.. لبست النقاب وقعدت فى البيت وبتربى عيالها على الطريق القويم ..اما احمد عثمان اعتقد انه من ساعه لما فهم الفوله وان مصر هاتبقى كدا فقرر انه يسيب كتاب القراءه يمكن كان عنده نظر لانه كان غاوى كتابه وطفش على اى دوله اوروبيه عشان يعرف يكتب براحته وماحدش يبقى رقيب عليه ..لانه لقى الى يقوله الى بتكتبه دا حرام ..امل وعمر واحمد عثمان كانو التلاته فى كتاب واحد ، كتاب القراءة ..كانو عايشين حياتهم بلا عقد بلا مشاكل ، لم نكن نتخيل ابدا فى طفولتنا ان امل بنت مزة فهى لم تكن محجبه او منقبه كانت بتلبس مريله فوق الركبه ..امل لم تثير غريزتنا ابدا ..وعمر كان خير صديق،، كنا نلعب معهم وكنا نعيش مغامراتهم ،اما احمد عثمان فكلنا كنا نبحث عنه من اجل القلم ،كنا نشجعه على الكتابه لكنه فضل ان يتنازل عن قلمه ويلقى به بعيدا بعد ان استبد به الياس ...
ياترى اين ذهب امل وعمر ومعهم احمد عثمان ؟ وباقى الشخصيات زى الكلبه لاسي؟ اعتقد انها ذهبت الى بلاد اخرى لانهم هنا يعتقدون فى نجاستها.. لاسي التى علمتنا الوفاء والصدق والشجاعه نجسه
اين ذهب هؤلاء؟
السؤال مازال يبحث عن اجابه

10 comments:

سمر الشافعى said...

رجعتنى للاحلى ايام عمرنا ايام بوجى وطمطم واليس فى بلاد العجايب وارنبها الجميل اللى كنت بعشقه واحلى اغانى لسه حافظينها لدلوقتى فاكر حصالتى ليها كرش والشمس البرتقانى والمدرسه والطابور والواجب ايام كان ليها طعم حتى اطفال الايامدى اتحرمو انهم يعيشوها زينا

Anonymous said...

ياميجو دول بقم بيطلعوا فتاوي بتحرم علي الأطفال انهم يشوفوا ميكي و ميمي عشان علاقتهم غير شرعيه شوفت اللي وصلناله؟
ياعم دأحنا بقينا عايشين في عالم أغرب من الخيال

تحياتي ياميجو و سلامي لمشمش

Alkomi said...

على فكرة انا دلوقتي عايش ليا ربع قرن

يا ترى اكون لحقتهم

لو هما قوليلي عشان هتبسط اوي لانهم بيلعبوا في ذاكرتي البعيدة

كمان كتاب الحساب بتاع سنة اولى اللي كان بيعلمنا ازاي نحسب بالحمام و العصافير

و حروف المد الملونة

و البنانيت اللي كانوا بيصلوا بالطرحة و يقعدوا في البيت عادي بشعرهم و يهتموا بمنظرهم في المدرسة

و المدرسة الجميلة بدون ابتذال

كل ده كان في الكتب

راح فين

تحياتي

Migo Mishmish said...

العزيزة سمر
اهلاً بيكي في البلكونة ويارب ماتكنوش اخر مرة تطلعي فيها البلكونة وتشربي شاي معانا او نسيكافيه براحتك - بس ميجو بيعمل نسكافيه حكايه هيفوتك سيبك من الشاي ممكن نشربة في اي حته
يؤسوفني اني اقولك ان الحاجات ديه مع طيبة ورضا المصريين وبساطتنا واحنا صغيرين راحت مش جايه
مكنش ينفع رمضان من غير بوجي وطمطم وعمو فؤاد وجدو عبدو والفوازير
والطابور والاذاعه وتدريبات الصباح والحكم الذاتي ده بقه حكايه تانيه
يالا يمكن يكون في الجاي حاجة احلى
Love,
MishMish

Migo Mishmish said...

والله يا اجندة يا اختي انا مش فاهمه منطق العالم ديه
دول حتى اوطى من الحيوانات. يعني الحيوانات ما بتجلهمش حالة هوس جنسي غير في موسم التزاوج انما دول ما بيهدوش. هما معندهومش حاجة تانيه يفكروا فيها لما مش بيكونوا بيفكروا في الجنس
وبعدين الغريب انهم موبؤين وده في حد ذاته مش مشكله يعني ربنا يشفي والحمدلله اننا ماتعدناش. مش المفروض بتوع الحجر الصحي يبعدوهم عن البني ادمين علشان ما يعدهومش
وبعدين ديه ناس مش فاضيه غير للهدم والمصادرة وبدل ما يفرجوا اولادهم على ميكي وبطوط والحاجات بتاعه الاطفال بيفرجوهم كيف تصنع قنبله في 24 ساعة بس برضه ارجع واقول اننا احنا السبب لما فتحنا ودنا لاي حد يقول فيها اللي هو عايزة
Love,
MishMish

Migo Mishmish said...

عم الليبرالين كلهم
لا يا عم كل ده كان في الكتب والكتب ديه راحت لحالها خلاص. انت لحقت اخر ابو قرش. المناهج الموجودة دلوقتي بتخرج عيال دماغها ممسوحه ومغسوله كويس
Love,
MishMish

Empress appy said...

اقولك ليه لانهم بقوا بضاعه اتلفها الهوا بالنسبه ليهم
يعنى مش عاوزين ولا اطفال يبقوا كويسين ولا كبار ببساطه

Desert cat said...

ياااااه انا ليا ذكريات جامده مع احمد عثمان ده
اه والله الواد انا حبيته على فكرة وكنت بدور عليه بكل شغف وفى الاخر مش لاقيته
ربنا يستر ومش يكون حد لعب فى دماغه واقنعه بس انه يروح يشتغل فى بلاد الرمال يرجع لنا بحفنة من المال يفتى فى الحلال والحرام
وكل ماهو موجود فى الدنيا حرام يا ولدى حرام حرام حتى الهوى الداخل للرئتين الهواء مذكر والرئة مونثه اذن بينهم علاقة غير شرعيه لابد من استئصال الرئه ولا عزاء للعقل
تحياتى

محمد فوزي said...

ميجو
انا قريت تعليقك عند رئيس جمهورية نفسه وعجبني جدا
وعايز اقولك أشكي يا سيدي وقول براحتك , وارحب بالحوار معاك من غير حساسيه او عقد
بس اهم حاجه نتفق من اولها انك
لا تجادل ولا تناقش يا أخ ميجو
هههههههههههههها

تحياتي

رئيس جمهوريه نفسى said...

اعتقد انهم زى حجات حلوه كتير فى البلد دى خرجت ولم تعد للاسف ولن تعد

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق