Saturday, July 5, 2008

لا بقى دا زودها اوى

كنت كتبت بوست عن توتو الشاب المخنث الهربان من الجيش اللى عمل شريط اسمه احضنى اوى وهاجمت اسم الشريط ..لكن الظاهر ان توتو الهايف استاذ الجيل وصاحب اغنيه القرن ..حد قاله الناس هاتاكل وشك وبالذات الواد الرزل ميجو هايهريك تريقه فى البلكونه فقام غير اسم الشريط : قرب كمان ..طب ماهو اسم اسخم من الاولانى هو عايز حد يلزق فيه وخلاص؟ يا اما يحضنه يا يقرب منه ؟؟ مش بقولكو ..هو عنده رغبات دفينه فى اللاشعور ..وبيحاول ينقلها للشباب عشان يبقو زيه .
مشمش اتخانقت معايا عشان انا شتمت توتو المخنث فى البوست وقالتلى انا مش بحبه ..بس بلاش تشتم فيه ..وانا اتراجعت وقلت معاها حق خلينا محترمين طالما فيه ناس بتسمعه ..لحد ماجه يوم وكنا بنتفرج على التليفزيون وجه اعلان فيلم الواد توتو المخنث الجديد الى طالع فيه فتى الشاشه الاول زى عماد حمدى ..والبنات بتموت فيه وبترمى نفسها عليه .مش مشكله ..لكن بقى اللى مشكله كبيرة انه وصل لدرجه من الاستفزاز فى الكليب بتاع الفيلم ولقيتها فرصه عشان اثبت لمشمش انى على حق لما شتمته ..اللى شاف الكليب فيكو اكيد عرف انه واد مش محترم ..بيقول فى الكليب : احسن حاجه لقيتها فيكى هو ده ( ويبص فى حته لمؤاخذه ) ويقول ..قلبك ..
وبعدين بيقول : اجمل حاجه لقيتها فيكى ..هى دى ..ويشاور لمؤاخذه على ( مؤخرتها ) ..ويقول طيـــــــــــــــــ.......به قلبك ..و كل واحد بقى حسب نيته !!!
خلاص وصل الاستهبال بيه للدرجه دى ؟ هو دا رمز الجيل ؟ لو هو دا رمز الجيل يبقى جيل يتحرق بجاز وانا مش عايز ابقى من الجيل دا وشدو الستاره عليا انا بدى اقفل عيونى .. شدوا شدوا .. وانا بقولك ياتوتو طـــــــــــــــــــــــــــــــــــــ......يبه قلبك حمرا .
وليكى ربنا يامصر
ميجووووووووووووووو المحروق دمه

18 comments:

Migo Mishmish said...

يعني هو شباب البلد ورجالتها ناقصين بوظان. عليا النعمة انا لو حد قعد يتطنط حواليا زي القرد ده كنت نفضت الشبشب على دماغه. الواد ده المفروض يتعمله قضية تحرش
تخيلوا كدة اي بنت معديه وواحد بيشاور عليها وبيقولها اكتر حاجة بحبها فيكي هو ده ويشاور وعليها وبقيه الشله يوقولها اه هو ده. كنت بتكلم مع اخويا انا وميجو وقال ده الفديو كليب دمه خفيف فقولتله بس ده فج قوي وميجو قاله يا ابني ده مباشر جداً. قال هو بقى في حد بتكسف دلوقتي قولته يعني شريطين كمان وهايقولك للبت اللي بيحبها طيـــ............ك حلوة
راح ميجو قالي عيب كدة قولته مش هو اللي قال ان مفيش حد بتكسف دلوقتي.
انتوا عارفين انا قولت لميجو قبل كدة ما تشتمش في تامر هو بيقدم لون انت مبتحبوش وده مش مبرر للهجوم الشخصي عليه. بس ميجو طلع معاه حق هو مش بيقدم لون معين ده بيقدم بقع محتاجة اريال وبرسيل علشان ينضفوها
love,
MishMish

Alkomi said...

في مدونة اسمها الكيت كات صاحبها اسمه فوكسولوجي

كاتب عن نفس الموضوع

ياباي عالواد مابحبهوش نهائي و مش عارف البنات بيحبوه على ايه

Migo Mishmish said...

لا والله يا كومي لا بنحبه ولا نيله
البنات اللي بتحبه دول بنات ثانوي نظام مرهقات بقه زي مانت عارف. لكن لما بيكبروا وبيكتمل نمو الجزء التحليلي في المخ بيعرفوا انه يحرق الدم
انما اللي لسه بيحبوه بقه دول عندهم قصور في نموهم العقلي. وربنا يشفي
love,
MishMish

Anonymous said...

المثل بيقول يا فرعون ايه فرعنك قال شويع عيال مجانين و مغيبين المشكله مش عند توتى لوحده المشكله فى العيال اللي طلعوه على اكتافهم اللي انا اعرفه انه في اى مكان في العالم الشى العريب و الشاذ عن اخلاقيات و رواسخ تلك البلد يتم لفظه الا عندنا في مصر بنرفعه و نعليه و نعمله بنى آدم على قفانا يا ناس حد يصدق ان واحد هربان من الخدمه العسكريه يعنى جريمه بالاضافه للجبن يجي شويه لاموآخذة يعملوا له تي شيرتات و عليها صورته و كاتبين عليها بنحبك يا سيس و مش عايزينه يعمل كده كويس انها جت على اد كده ميرووووووووو

Desert cat said...

انا بشوف اعلان الفيلم يا ميجو بقلب على اى قناة تانية لحد ما يخلص مش ناقصة انا حرقة دم

Migo Mishmish said...

ازيك يا ميرو بقالك فترة مختفي
بس يا سيدي احنا بقينا في مدينة البهائم
انا عايزة افهم المغنواتي اللي سراح بالبيانوله ده احسن من مين من اول الدكاترة والمهندسين لغايه الفرحين اللي بيلموهم من الغيط علشان يرحوا الجيش. وبعدين امبارح بالصدفة كدة كنت فاتحة التليفزيون بلف على القنوات لاقيت الماكينج بتاع فيلم عمرو وسالمة وسيادته قاعد لازق في كل ممثله شوية وقاعد بيغنيليها
انا معنديش مشكله في القعدة لما يبقى الاتيني دماغهم نضيفة. انما البيه لما اتقبض عليه عمل فيها مؤمن شوية وراح لزق في عمرو خالد وقعد يقول انه عارف ان الفن حرام ومستني ربنا يهديه واتوقع طبعاً الهدايه لما يبقى راجل كبرة كدة عنده بتاع 50 سنه ودلعه المرق مع البنات يبوخ
لو كل واحدة من الممثلات دول عرفوا هو بيبصلهم ازاي كانت اديته بالجذمة
يلا ربنا يرحمنا ويترأف علينا
Love,
MishMish

Migo Mishmish said...

المشكله يا قطة ان الواد ده بقه في كل محطة
ده فاق اعلانات الشاي كل اما اقلب على اي محطة ياما الاقيله اغنيه ياما الاقي اعلانات رنات الموبيل ياما فيلم
تحسي ان التليفزيون اتفيرس
يا رب يعني رضينا بالهم والهم مش راضي بينا. مش كفايه الخنقة اللي احنا فيها كمان شوية الوقت اللي بنقعدهم قدام التليفزيون علشان ننسي شوية وهو ارخص واسلم من الحشيش يطلع لنا بوز الاخس ده يضيع دماغ التوهان بتاعه التليفزيون
وبعدين فين بتوع جميعات حقوق المراة ده تحرش وزي ما ميرو لسه قايلي في التليفون دلوقتي ده بيقل من قيمة المرأة وبيحولها لشيء
يلا ايكش تولع
Love,
MishMish

على باب الله said...

رزق الهبل علي المجانين

Migo Mishmish said...

على باب الله
آه يا سيدي شفت الهم اللي احنا فيه
Love,
MishMish

نيران said...

هههههههه
على فكرة انا ماخدتش بالي خالص من الإيحاءات دي..

او بالأحرى ما باخدش بالي..

دا انا طلعت هبلة اوي :)

تحياتي.. و الحمد لله اني ما باخدش بالي عشان ما يتحرقش دمي

^ H@fSS@^ said...

هههههههههههه
قلبك ابيش يا ميجو
هو فعلا سخيف وا نا مش بطيقه من يوم ما طلع
و لما عبرت عن كرهي و استيائي الشديد منه شكلوا فيا اني مش بنت
و قالولي اني لو بنت فعلا لازم اكون ميته في دباديبه
؟؟انا
حفصة اموت في دباديب واحد زي ده
طيب حتى لو خيوله ولا كتاكيته حتى مش ححبهم بتاتا
و اخته اللس اسمها هيثمة سعيد اخبارها ايه؟؟


تحياتي

Anonymous said...

هاهاهاهاهاها

ألبك ابيض ياميجو
اما يجي الاعلان اقلب الموضوع مش ناقص حرقه دم
اللذيذ بقه ان جريده الدستور كانوا بيتكلموا عن البومه الجديد و بيقولوا انه ابدع في وصف سيكولوجيه المرأه
الصراحه فعلا بصاته غريبه و هو بيقول اكتر حاجه شدتني ليكي ...طيبه البك ال
هاهاهاه باينوا فاهمنا علي نياتنا
فاكر اما احمد نظيف قاله انه واجهه مشرفه لمصر لما غني في دافوس
شوفت بقه انه واجهه مشرفه لمصر مش عارفه عم نظيف بني كلامه علي ايه بظبط؟علي اساس انه هرب من الجيش فبيعتبر واجهه مشرفه لمصر؟

معلش ياميجو ماتضايقش نفسك

سلامي لمشمش و ليك و لولي العهد
:)

Migo Mishmish said...

نيران
كويس انك مابتخديش بالك
عارفة كنا بنقول واحنا في المدرسة قول مأثور شهير
العلم نورن والنورن جاي من الكهربه والكهربة خطرة يبقى العلم خطر
اهو العلم بصحابنا خطر زي الكهربه
شكراً على مرورك واهلاً وسهلاً بيك شرفتي البلكونة
Love,
MishMish

Migo Mishmish said...
This comment has been removed by the author.
Migo Mishmish said...

مش عارفه والله يا حفصه ياختي
الحمدلله اننا مش بنات. عمري ما حبيته ولا هاحبه ولا بقبله
ونفسي اشوفة علشان الطشه قلمين واقفله ام القميص اللي فاتحه لغايه نص بطنه واقوله استرجل يا زفت انت. جاكتم القرف مليتوا البلد
واخده من ايده واطلع بيه عالجيش واقولهم شفتوا اهمالكم عمل ايه في الرجاله. ده يخش وما يخرجش غير لما يبقى راجل ولو منفعش يبقى ياخد شهادة طبية بحالته اهو نبقى ندعيله ان ربنا يشيل عنه
Love,
MishMish

Migo Mishmish said...

وحيات النبي يا اجندة ياختي بنقلب وبنقفل التليفزيون وبنغير مكان قعدتنا خالص ونجي بعد شوية نفتح التليفزيون نلاقيه بيطنط في محطة تانيه.
لا بيفهم في السيكولوجيه ولا نيله ده بيفهم في النحنحه والبنات علشان عندهم كبت عجبتهم النحنحه
وبعدين اديكي انت قولتي مين بيقول عليه انه واجهه مشرفة لمصر. اللي نظف البلد كلها وخلاها انظف من الصيني بعد غسيله
ربنا يرحمنا ويتراف علينا
Love,
MishMish

Anonymous said...

طبعا ميجو معاه حق ولازم تسمعى كلامه

Anonymous said...

ياعم ميجو بلاش دوشه احنا رمينا طوبة الفن من زمان وكفايه نعيش مع ذكرياتنا مع ثومه وطلب وقنديل.

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق