Thursday, August 14, 2008

جاف حار صيفا ..دفيئ ممطر شتاء !!!!!

بدات اشم ريحه الجوافه ..يعنى خلاص المدرسه قربت ..وبحكم انى مدرس لغه المانيه ..شعرت بانقباض لانى راجع للغم والهم والنكد من تانى ..بعد انتخه فى البيت ونوم وراحه نفسيه ..هرجع للكشاكيل ودفاتر الدرجات والتحضير واستدعاء ولى الامر واعمال السنه وحاجات كتييييير مقرفه ومزعجه لاى بنى ادم طبيعى ..
بدات اعيد ترتيب اوراقى من جديد واطلع الكتب عشان اظبط التحضير واعمل لوحات للسنه الدراسيه الجديده ..اكتر شيئ مضايقنى هو انى حاسس انى مش بفيد العيال فى المدرسه ..مش عشان انا ماعنديش ضمير ..لأ عشان حاسس انى بنفخ فى قربه مقطوعه ..العيال مش همهم انهم يتعلمو لغه كل همهم انهم ياخدو كلمتين يرصوهم فى الامتحان وخلاص على كدا ..بصراحه مصر رايحه فى داهيه ونازله فى القاع بسرعه الصاروخ ..لان العيال دول هما مستقبل مصر ..امسك اى حد منهم واساله عن اى حاجه فى اى حاجه تلاقيه تنح قصادك وبرق عينيه وبصلك باشمئزاز ..بلاش تساله فى اى ثقافه عامه اسأله فى الكورة ..تلاقيه برضه بلاص مش ..العيال اليومين دول كل همهم انهم يضربو شعرهم سبايكى ويسمعو تامر حسنى ومحمد حماقى ويقعدو عالنت ياريت بيقرو حاجه مفيده او يعملو حاجه تنفعهم ..لا تلاقيهم قاعدين عالنت بيعملو شات وبينزلو جيمز واغانى وافلام ..الى يشوفهم قاعدين على النت يقول بيحضرو الذرة وطبعا الاهالى مغفله سايبينهم عالنت فاكرينهم بيتعلمو كمبيوتر ..وكل عيل من دول تلاقيه ماسك موبايل احدث موديل وماليه افلام جنسيه وكليبات لنانسي عجرم وهيفا ..
... صدقونى ..عندنا العيال الصغيرة فى ابتدائى حاطين افلام جنسيه على الموبايل وبيبدلوها مع بعض مش حاجه تحزن ؟
الحاجه الاهم بقى هى انى بعلم العيال النفاق ..اى والله النفاق بحس انى كداب اوى ومفقوس قصاد العيال ..يعنى الصبح اول مانروح المدرسه لازم يبقى فيه طابور ..ليه طابور؟ هو احنا هانحارب ؟ وليه كله لابس يونيفورم واحد؟ دى حاجه قديمه من ايام الاشتراكيه والملوخيه ..فين شخصيه العيل ؟ انه ازاى يختار حتى لبسه ونوجهه نقوله ان دا لبس غير لائق ودا لبس لائق يبقى استفاد حاجه وبقى عنده شخصيه ..نيجى بقى للكارثه الى اسمها الاذاعه المدرسيه الى اصلا ماحدش بيسمعها ..كلمتين فارغين، بس لازم يتقالو حسب تعليمات الوزارة وخلاص ومش مهم المضمون المهم يبقى فيه اذاعه .. فقرات تقليديه عفا عليها الزمن .من نوعيه لاتؤجل عمل اليوم الى الغد ..ومن حفر حفرة لاخيه ..وكلام اهبل العيال مش سامعاه اصلا ..ولما تيجى تحيه العلم تلاقى كله مشدود.. مع ان الطالب عارف ان المدرس بتاعه بيشتم فى سره ويلعن فى سنسفيل البلد ..لان قميصه مقطع ومش عارف يجيب قميص جديد ..او لسه مافطرش ..هو دا الانتماء؟ انا مرة كنت براقب فى امتحان عربى والعيال عندهم املاء ...الموضوع كان عن مصر.. جمال مصر وحلاوة مصر وانها هبه النيل وجوها الخلاب وترابها الزعفرانى ..تحس ان القطعه بتتكلم على هاواى مثلا او سويسرا .مع ان العيل قاعد على دسك مكسر والفصل معفن ..والعيال نفسهم عندهم انيميا حاده لا نافع معاها بسكوت خشبسكو مصر بتاع الوزارة ولا اى حاجه ..احنا بنعلم العيال اكلاشيهات محفوظه فارغه بلا معنى ولو كتب غيرها فى الامتحان ..يبقى غلط ،يعنى لازم يقول ان فصل الربيع فيه تتفتح الزهور وانه اجمل فصول السنه طقسا حتى لو شاف من حواليه ان فصل الربيع فصل التقلبات الجويه وعدم استقرار الطقس وكله تراب بسبب رياح الخماسين ..المهم ان التلميذ لازم يكتب دا فى الامتحان ولو كتب غير كدا يبقى سااااااقط ..يعنى لازم يبقى كداب ومنافق عشان ينجح
انا بصراحه محبط جداا ..ودا السبب الى خلانى فترة طويله ماكتبش اى بوست جديد ..حاسس ان الكلام ماعدش له فايده وحاسس ان البلد بقت حاله ميئوس منها ولا امل فى اصلاحها .طالما ان الجو فيها استمر..(جاف حار صيفا .. دفيئ ممطر شتاءا !!!!
ميجووووووووووووو

6 comments:

Anonymous said...

يا مشمش متزعلش اوى كده انت عارف النهارده فى المصنع حققوا مع رئيس مجلس الاداره فى سرقة استلس من المصنع و ديه طبعا حاجه ماكنتش عمرها هاتحصل لولا ان واحد كان اللواء عايز يشلهالو زعق و قال للواء انت حرامى فى وسط المصنع و طبعا دى حاجه المصنع كله عارفها بس عادى يعنى كانوا متعايشين مع الوضع فخلى عندك ايمان بان واحد من العيال اللى انت بتتكلم عنهم دول بكره يكبر و يقول لا لكل حاجه للسرقه للظلم للمحسوبيه لبابا و ماما كده يعنى و كل عام و انتم بخير

mary victor said...

ايوة يا فندم راجعين للقرف تانى
انا برضه مدرسة بس مش ألمانى، انا إينجليش يا فندم
انا اللى قلقنى بأة السنة دى حوار التطوير اللى مش عارفين نهايته أيه
قرف قرف قرف إلى أقصى درجة
و لا فيلم دبلومة التربوى اللى كل مش خريجين تربية لازم يخدوها و الحكومة خلتها بقت بتلات ألاف جنيه فى السنة على سنتين
بمعنى آخر الحكومة إتديرت على المدرسين و قررت تعكنن عليهم عيشتهم رغم انها معكننة اساسا
فى التطوير يقول لك ايه بأة
يقول لك لازم العيال تقعد قعدة تشجع على المناقشات
يعنى يقعدوا فى مربعات كل اتنين باصين فى وش بعض
و جدع انت اتحرك فى فصل زى دة
اذا ماكنتش عارفة اتحرك اساسا فى الفصل و هما قاعدين القعدة الطبيعية و بتكعبل فى شنطهم؟
يقولك كمان هما اللى يحضروا الدرس و انت مراقب عليهم و هما يشرحوا
يعنى انا اقوم بنت فى تانية ابتدائى اقول لها قومى يا سهيلة و حياة ابوكى اشرحى لنا درس الجرامر النهاردة
و زمايلها يفهموا منها و كل سنة و انت طيب يا محترم
غير بأة روتين الوزارة و بورتفوليو و هباب الطين
على أساس ان المدرس دة شغال عند اهاليهم اللى قاعدين فى الوزارة دول ماورهمش حاجة غير انهم كل شوية يفتوا فتاوى ماتنفعش على ارض الواقع

Desert cat said...

اجمل حاجه انك ذكرت الجوافه وريحة الجوافة
بموت فيها فيها خصوصا لما بشم ريحتها الصبح وهى على الشجر فى الخريف
حاجه كدا ليها مذاق خااااص
سيبك من التعليم بلا تعليم بلا وجع قلب هو التعليم اساسا شكليات من زمان وكل كسنة بيتدهور عن السنة اللى قبلها
المهم بقى قولت لى ايه اخبار الجوافه
؟؟؟؟

Migo Mishmish said...

اخيراً يا رومي دخلتي البلكونة
على فكرة اللي كاتب الموضوع ميجو مش انا. بس لان دخول ميجو عالنت صعب فهارد انا على الناس
انا طول عمري بحاول ابشر بوجهه النظر ديه. ان كل الضلمه اللي موجودة في الدنيا لو اتجمعت مع بعضها عمرها ما هتقدر تطفي شمعه واحدة
اهو سيادة اللوز وقع اخيراً. بس انا نفسي ان الموضوع مايطبخش ويطلع براءة
ومبروك عالشغل الجديد
Keep up the good work
love,
MishMish

Migo Mishmish said...

Coffee break
اهلاً بالاسكندرانيه كلهم سكان اجمل مكان في مصر. وحمدلله عالسلامة انتي كان بقالك فترة طويله قوي بعيد. كبسوطين قوي انك دخلت البلكونة ونتمنى انك تبقى تعدي علينا من وقت للتاني نشرب سوا شاي.
بالنسبة بقه للي قوليته فياستي مع ان الحكومة ديه اول حكومة تاخد لقب ذكيه من ايام الفراعنه ومع كدة مفيش واحد فيهم بتكلم كلام عاقل او مقبول حتى
يعني موضوع المنافسه والمربعات اللي انتي بتتكلمي عنها ديه ماتختلفش كتير عن شنطة الاسعافات الاوليه ولا تصريحات البلتاجي لما كانوا بيكلموه عن ازمة رغيف العيش قال بكل براءة وهباله ان الناس لازم تاكل حاجات تانيه زي اللحمة والفراخ والخضار والفواكه ومايكنش تركيزهم عالعيش بس. شوفتي الحلاوة
ولا تصريحات نقيب الاطباء بتاع منع نقل الاعضاء ما بين المسيحين والمسلمين لان ده هيمنع تجارة الاعضاءمن وجهه نظر الاسطي
التطور اللي بيتكلموا عنه ده مش هايخرج عن تغيير جلدة الكتاب وتغيير ارقام صفحات الكتاب وتدريس منهج الترم التاني في الترم الاولاني. وطبعاً التطور الرهيب ده هيتكلف فلوس جامدة علشان الكتب هتبقى طبعات جديدة منقحة واهي سبوبة برضه
وموضوع تحضير الدروس ده هطل برضه. يعني لو العيال بتعرف تفهم لوحدها يبقى ايه لازمة المدرسة ما يدوا العيال الكتب ويعملولهم حصتين مراجعه ويمتحونهم اخر السنه وخلاص
وبعدين ايه لازمة التحضير اذا كان مش هيبقى من كتب ومراجع او من عالنت. التحضير غرضه ان الواحد يلم معلومات مختلفه عن موضوع معين. ايه لازمة الحدوتة ديه اذا كانوا العيال ملزومين بالاجابه النموذجيه اللي هي مكتوبة في كتاب المدرسه - بغض النظر هي صح ولا غلط - وبعدين هنحضر نظريه رياضيه او قاعدة نحو او
Grammer
إزاي يعين
يا ستي انتي لو عايزة تعملي حاجة تفيدي بيها العيال وانا لو كنت مدرسه كنت عملت كدة. كنت هاشرح الدرس في ربع ساعه واخد الباقي في محاولة مني لتفتيح عقول العيال اللي زنخت من التعليم الحكومي
Love,
MishMish

Migo Mishmish said...

يعني هتفرق في ايه لو الواحد سابه من التعليم او مسك فيه. بس ساعات يبقى صعبان عالواحد انه نفسه يعمل حاجة بس غصب عنه مش قادر يغير اي حاجة.يعني احنا شركاء في الجريمة والمفروض نتعاقب احنا كمان لاننا بنوسع رقعه الخطأ
اما بالنوسبه للجوافه احلى قفص جوافه هنبعته
attachment
على الايميل
لاحلي قطة عالنت
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق