Sunday, October 19, 2008

زي الشتا



كوباية شاي بالنعناع في عز الشتا

يفضل الراديو والع

وانا مستخبي تحت الغطاء

وقطرات المطر

تخبط على الإزاز

تنده عليا...علشان افتح لها

نلعب سوا...نرقص سوا


انا زيي زي الشتا

جوايا حاجات كتير

لكن متلخبطة

معرفش ليه بحب البرد؟

يمكن عشان إحساس الدفا؟

تمام زي الخيانه

لولاها ما عرفنا الوفا


وانا مبقتش عارف

ديه حالة نشوة...ولا حالة إكتئاب


وليه لما بفتح الدولاب

ادور عالكوفيه...السودا المقلمة

وامشي في الشوارع لوحدي

ابص عالبيوت المضلمة

ساعات نقطة مطر

من فوق ورقه شجر

تنزل على خدي

بحتار انا

دي دمعتي؟ ولا نقطة مطر؟

ميجوووووووووووو

12 comments:

نيران said...

أوووووووول تعليق

ميجو..
حلوة اوي اوي..
مش عارفة ليه سمعت حبات المطر على زجاج غرفتي

شميت ريحة فنجان شكولاتة سخنة، و دفا السرير

بجد بجد تحفة

تحياتي.. و اعتذر للغياب

و تحياتي لمشمش :)

Anonymous said...

مفيش أحلي من الشتا ياميجو
انا بموت فيه
ياسلام و الواحد متكلفت كده و المطر و التلج
:)
سلامي ليك و لمشمش

Anonymous said...

يا عم ميجو ابس ايدك كل لما بقرا الكلام ده يفكرنى بذمان مش زمان اوى يعنى 3او 4 سنين فاكر لما كنا نخلص الشغل و نتقابل من غير معاد زى كل يوم على القهوه و نشرب كباية الشاى المشبره .
بص بقى انا عارف انك بتحب الشتاء علشان تطلع الكوفيه المقلمه من الدولاب عايز اقولك هو الشتا اللى عندوكو دا شتا تعالى يا معلم شوف الشتا على اصولو هنا.و شوف التلج لما يغطى كل حاجه خضرا كانه بياكلها اول مره شوفت التلج كان اول شتا ليا فى امريكا كان لمدى يومين و كنت فرحان بيه اوى اول مره اشوف تلج تانى مره الشتا اللى فات التلج نزل فيها كتير و اعد ينزل كل اسبوع يعنى اعدنا حوالى شهر كل حاجه بيضه ماعدا الشارع الى ماشيين فيه الناس كانت عادى بس انا كنت محبط مش عارف لية بس كان صعب عليا اشوف كل حاجه بيضه و اتعود عليها بعد ماكانت خضرا
يارتها كانت كوفيه مقلمه ول شويه
مطر على الازاز
دول شوية كتل تلج بتكسر الازاز
سلام يا صحبى

صبرني يارب said...

ماليش فى الادب

لكن عشان انا باحب امشي ت حت المطر وباحب احساس ان الجو برد

وباحب اوي شكل المطر وهو نازل من السما
وباحسه رضا من ربنا علينا

حبيت الكلام الى انت كاتبه

تحياتي لك وللبلكونه الى هواها يرد الروح

Anonymous said...

يخرب عقلك ياميجو..ايه يابنى العظمه دى؟انا دايما مع بداية الشتا افتكر عمنا صلاح جاهين ودخل الشتا قفل البيبان ع البيوت دلوقتى هاتتحفر فى ذاكرتى كلماتك اللى هاتدى الشتا طعم تانى حقيقى انا شامم ريحة انفجار نجم فنى كبير ولما البت العفريته توصل هاتخليك تحس بحاجات جميله باعتبارك اب وهاتكتب لها حاجات ربما تخلينا نبكى وربما تخلينا نشوف الدنيا افضل وانا فى انتظارها وانتظارك.

Anonymous said...

يخرب عقلك ياميجو..ايه يابنى العظمه دى؟انا دايما مع بداية الشتا افتكر عمنا صلاح جاهين ودخل الشتا قفل البيبان ع البيوت دلوقتى هاتتحفر فى ذاكرتى كلماتك اللى هاتدى الشتا طعم تانى حقيقى انا شامم ريحة انفجار نجم فنى كبير ولما البت العفريته توصل هاتخليك تحس بحاجات جميله باعتبارك اب وهاتكتب لها حاجات ربما تخلينا نبكى وربما تخلينا نشوف الدنيا افضل وانا فى انتظارها وانتظارك.

انا حره said...

رغم انى مبحبش الشتا ونهاره الكئيب وليله البارد الطويل

بس انت كتبتها حلو اوى بجد

tamer.sala7 said...

علي فكرة جامدة مووووووت
فيها طعم اغنية اليسا شوية

بس انتو الـ2 دماغكو مش زي بعض انا متعمكتش في البلوج بس ده اللي انا شايفه من الكام بوست اللي قريتهم

ربنا يسعدكم

Migo Mishmish said...

هو موضوع الشتا ده واحد من 7 مليون حاجة اللي انا وميجو مختلفين فيها. يمكن الناس مبتصدقش ده بس انا وميجو شخصيتين عكس بعض تماماً تقريباً في كل شيء.
والشتا بالذات بيجبلي اكتئاب وستر ربنا انه مبقاش يقعد كتير في مصر.اولاً علمياً مفيش حاجة اسمها برد انما هي حالة من غياب الحرارة. ثانياً النهار القصير بيفكرني باني مقصرة لما تنام شوية الضهر وتصحى تلاقي الليل جه مش ديه برضه حاجة تضايق.
انا بشوفه يوم اتحسب عليا وانا لسه معملتش حاجة فيه. وبعدين احنا بلد مطين اساساً شوف انت لما الدنيا بتمطر البلد بتبقى روهريط والجذم تتوسخ. لا وشعري اللي كل مجموعة منه تاخد بعضها وتطير في اتجاه مختلف عن الباقيين. واحساس البرد قاسي. والواحد بيلبس هدوم كتيررررررررررررر قوي. بتفكرني بالناس اللي كانت بتهرب البضايع من بورسعيد.
انما الصيف ... يا سلام ...يا سلام. نهار طويل. شمس موجوده طول النهار. بحر وخروج وتتاخر بالليل براحتك. والمشكله كلها تتحل بتكيف او مروحه بالنوسبة لمحدودي الدخل اللي زيي انا وميجو. يلا كفايه كدة علشان العشرة برضه اللي بيني وبين ميجو
love,
MishMish

Anonymous said...

على فكره يامشمش انا باحب الشتا جدا لان البرد ليه علاج لكن الحر لايطاق لااستمتاع باكل او شغل او ركوب مترو او اى شئ وبعدين ايه حكاية ال7مليون حاجه اللى مختلفين فيها ميجو قاللى مره انهم 9مليون بس كويس لان الاقطاب المتشابهه تتنافر والمختلفه تتجاذب عشان كده انا بحسدكم لانى مختلف مع المدام فى 6مليون و412ألف حاجه بس.

Desert cat said...

وااااااااو
بعشق الشتا بغموضه برومنسيته بقطرات المطر
بلسعة برده بكل ما فيه

Anonymous said...

فعلا الشتا فصل لذيذ كاكاو و بطانية و راديو او فلم جميل و ماتنساش الاكل

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق