Thursday, October 30, 2008

نرجع لموضعنا

بيقولك مصر بتتقدم بينا ..... هودا الفكر الجديد
خلاص راح ندخل عصر النووي هودا التجديد
الله!؟
مش دي البت لواحظ؟!.....نازلة من عربيه مين؟
ربنا يسترها علينا وعلى ولايانا
بس سمعت الله اعلم .... وبعيد عن السامعين
انها ماشيه في الحرام
ما هي سابت اسماعيين..... بعد قصه غرام
اصله ما حلتوش اللضا
اسماعيين مانت عارفه إبن عم مرتضى
مرتضى بقى طول عمره حظه معافر
جهز باسبورة وكان هايسافر.....كان متعشم يروح اليونان
هو وحسين ابن فوزي....اللي فاتح دكان
اللي في آخر الشارع
فوزي بتاع البيض..... الحرامي
ايتنشبتن
اتشسيبي
اسكت مش قفشوا الواد مسعد....سارق وصله دش
والست أم احمد جارتة ..... وقعت منها امبارح زلعة مش
غلبانه يا عيني ومسكينه
دا جوزها لابيهش ولا بينش
كان ماشي في حاله
.... بيجري ورا رزق عياله
قام هفه ميكروباص
صاحبه الاسطى عليوة
......كان جنبه بنت حليوة
معذور مكنش مركز.....قالها ما تيجي نروح السيما
خبط الراجل وعمله عاهه مستديمه
يا ساتر يا رب....دا البني ادم مالهوش قيمةاشيبشيس
اتيشسبتشتنيسب
لا حول ولا قوة إلا
منها لله الكله...هي والمدعوء البانجو
ضيعوا الواد مجدي وصابر وكمان الواد سانجو
صابر اتخرج من الهندسه
ومجدي خدها من قصيرها وساب المدرسة
قاعدين عالقهوة ليل ونهار
مقضينها شيشه ودومنه ولعب قمار
وسانجو اشتغل صبي جزار.....عند المعلم عطية
كان مرة بيشفي دبيحه..... وفاكره عجل صغير
اتاريه بيشفي حمار!!!
واحنا ناكل
إشي كبدة وإشي سجق
يا عم بلاش ندق.... خلينا في حالنا يا عم
هانقعد نعيد ونزيد
المهم
نرجع لموضعنا
اقولك بقه ايه هو الفكر الجديد
ميجوووووووووووو

9 comments:

Anonymous said...

فكرتنى باغنيه رصيف نمره خمسه لعمرو دياب
البوست به ابداع رائع
تحياتى

Migo Mishmish said...

على فكرة هو مش ميجو جوزي ومش المفروض اني اقول الكلام ده كتير قدامه علشان مايتغررش عليا ويعملي فيها شاعر
بس القصيدة ديه هايله صحيح. ده من ساعه ما قالي عالفكرة بتاعتها وانا مستنياه لما يخلصها
ولاول مرة ماقوحش معاه في الالفاظ اللي مستخدمها. ولا اقعد اقوله شيل ده وقدم ده
لا حلوة صحيح يعني
كان معكم مرات الشاعر
Love,
MishMish

Unknown said...

هاهاهاهاىىىىىى

تحفة

Ahmad Hegab said...

وقفه مصريه نقف مع بعضنا نشخرم نفسنا

^ H@fSS@^ said...

مش عارفة اصقف عشان معنى كلام ميجو
ولا اسخسخ من الضحك على الهم اللي يضحك و لا على اخر صورة
اه يا ابو سنة جنان مليانة حنان

مشمش و ميجو
انا بجد بحبكوا اوي
بجد
تحياتي و يلا بقى يا مشمش
هاتي ولية العهد و خلينا نزقطط شوية بدل الهم اللي راكبنا ده

تحياتي

Fantasia said...

ههههههه
سلملي ع الفكر الجديد

لأ بجد حلوة جدا.. احسنت يا ميجو

طمنوني على مشمش.. البنوتة شرفت ولا لسة؟

Desert cat said...

مصر بتتقدم بينا بالفعل
والفعل الجديد دائما هو اللى مخلينا هكذا فى ديل الامم

Anonymous said...

طمنونا اخبار مشمش ايه؟وليه العهد جت و لا لسه؟؟
ربنا يقوم مشمش بالسلامه و يطمنا عليها

Desert cat said...

انا جاية اسال على مشمش
انتى فين من زمان يا مشمشوة
ولدتى ولا ايه
طمنينا عنك يا جميله

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق