Wednesday, February 11, 2009

امال لو كانت دولة دينيه كان حصل ايه؟

شدني قوي تعليق كن جميلا على البوست بتاع اول دير اسلامي في مصر
تعليقه كان بيحتوي على العبارة ديه "ميجوو أعتقد لو الإسلام حكم فعدل فكون مجتمع حر العقيدة فلن تكون أنت حزين لذلك بل أعتقد شخص مثلك فاهم سيكون أول المؤيديين للنظام الإسلام في هذا الوقت"

لا...........لا خالص يا اخ جميل محدش هيفرح لو مصر بقت دولة دينيه (اياً كان الدين ده) يعني انا مسيحيه واول واحدة هارقع بالصوت لو مصر بقت دولة مسيحيه. اي دولة لو اتحولت لدولة دينيه لازم مواطنيها ينقسموا لمواطنين درجه اولى ومواطنين درجه تانيه وش كدة..ومش ممكن هيبقى في مجتمع حر العقيدة ابداً لان في واحد هيبقى مؤمن بدين الدولة وده اللي هيبقى المواطن المثالي وفي مواطن تاني اتجرأ وامن بدين تاني غير دين الدولة وده مواطن مشكوك في انتماءه وحبه للوطن وفي مواطن تاني مؤمن بدين دولة عدوه زي اسرائيل مثلاً وده هيقى مواطن ابن كلب خاين وهيطلع تلاته تيتتتتتتتتتتتتتتتتتتت اهله
اما القانون المصري المفروض انه قانون مدني ومفهوش اي حاجة تشير الي الدين غير المادة التانيه اللي بتقول ان الاسلام دين الدولة وهو المصدر الرئيسي للتشريع ومع كدة طالع دينا بالكلمتين دول. خد عندك عل سبيل المثال لا الحصر
قانون زراعه الاعضاء مش عارفين نوصل فيه لبر مش علشان احنا معندناش الكفاءه الطبيه اللازمة ولا التقنيات لا ده علشان اللي بيناقشه مجموعه من الجهله طول الوقت عمالين يقولوا قال الله وقال الرسول وهما لا دكاترة ولا بيفهموا بس عايزين يحرموا الدنيا عالناس واي حد فيهم لو جراله حاجة عنده استعداد تتعمله عمليه زرع اعضاء من خنزير حتى بس المهم يعيش. واللي محتاجين زراعه اعضاء اللي منهم معهوش بيموت واللي معاه بيروح يعملها بره عند اناس معندهومش نفس الكفاءة الطبيه والنتيجه بتبقى مواطن مريض مرض مزمن وفلوس خرجت بره مصر في عمليات فاشله وعلى مصر انها توفر علاج بملايين لعلاج الاثار الجانبيه للعمليات ديه

قوانين الطفل وخاصه الجزء الخاص بنسب الطفل الناتج عن علاقه زنى موقفينها وحجتهم غبيه زيهم ملخصها انك لو حلت ليهم المشكله ديه يبقى انت بتشجع الزنى. يعني واحد وواحدة يغلطوا والاجهاض ممنوع يقوم طفل برئ مالوش ذنب في حاجة يفضل شايل عار اهله طول عمره ومتطلعلهوش شهادة ميلاد وبالتالي ما يطعمش وما يخشش مدرسة ويستنوا البيه اللي اشترك في نص الجريمة اما يعترف بيه علشان يتعاملوا معاه على انه انسان مش حاله. واظن انت فاكر كويس الست اللي قتلت ابنها او بنتها اللي كان عنده 6 شهور بايدها لانها مش عارفه تطلعله شهادة ميلاد ولا تطعمه. ايه رايك في الطفل ده لو يكبر وبقى راجل كبير وهو اتربى على انه شخص غير مرغوب فيه. مش هاقولك هيبقى زويل ومجدي يعقوب هاقولك هل تضمن انه ما يلفش نفسه بشوية ديناميت ويفجر نفسه في مكان ممكن انت تبقى موجود فيه بمحض الصدفه. لرغبه منه في انه يتقرب من ربنا اللي فهموه المسئولين عن شريعته انه غضبان عليه او رغبه منه في انه ينتقم من المجمتع اللي مارحمهوش. ببصراحه انا اخر واحده احب ابقى موجودة مع شخص زي ده في بلد واحدة. والست دايماً بتسيل معظم اللوم لوحدها والراجل اقل واحد ممكن يقع عليه الضرر وده لو اتمسك في حاله تلبس
. وعلشان اوفر وقتك ووقت الناس علشان ما نقعدش نسفسط في موضوع اصل لو كان حد الزني كان بيطبق مكنش ده حصل هاقولك خد اتوبيس واطلع عالسعودية اللي بطبق الحدود بحذافيرها وزيادة شوية والغريب يا اخي انك مش هتلاقي مجمتع ملائكي ولا حال البلد معدول وكل اللي هتلاقيه اشخاص عاديين الكويس منهم كويس والغلطان منهم غلطان لكن الحاجة الزيادة اللي هتلاقيها هي الازدواجيه اللي عايش فيها الشعب كله



قضايا الحسبه اللي بيرفعها شيوخ بيعانوا من صعوبه في التعليم وضعف في الادراك على كل واحد بيحاول يستخدم دماغه او يبدع

وقوف الدولة بكل اجهزتها ضد اي شخص عايز يغير دينه من دين الدولة الي دين تاني حس انه لاقي نفسه فيه اكتر.يعني ايه الدوله بكل اجهزتها عايزة تجبر الطفلين اندرو وماريوlو بالعافيه على انهم علشان يكملوا تعليمهم يمتحنوا امتحان لدين تاني مالهومش اي علاقه بيه غير ان ابوهم اتبعه وحس ان هو الطريق المناسب بالنسبه له. ولا عملت وزن لحرية معتقد ولا قوانين الطفولة ولا الهوا لا وحجه الدولة هابله تقولك الاطفال يتبعوا الدين الاقوى. يعني ايه دين اقوى مش فاهمه
بلاش كل ده بص لعناوين المصري اليوم امبارح

مبارك يتوقع عقد «التهدئة» الأسبوع المقبل وغارات إسرائيلية على غزة تسفر عن شهيدين
نائب إخوانى يطالب بتوجيه اللوم لعدلى حسين بسبب «الأنفاق».. و«الفقى» يتساءل: «لا مؤاخذة يعنى الإخوة فى غزة كانوا بيحاربوا بسلاح من فين»
تصريحات وزير الثقافة لـ«المصرى اليوم» حول الديانات الأرضية تثير أزمة فى مجلس الشعب
واخد بالك السادة النواب والسيد الرئيس مشغولين بإيه. شوف بقه نفس العدد والمشاكل الداخليه اللي محدش بدايه من السيد الرئيس الى الساده النواب سألين عنها

ارتفاع عدد وفيات «العناية المركزة» بمستشفى الفيوم إلى ٥٥ خلال يناير وفبراير
وزير الزراعة: نقص المواد الغذائية فى مصر بلغ ٤٠٪ - وفي داخل الخبر جمله بتقول: وأكد أن نقص المياه اللازمة للزراعة هو العائق الوحيد أمام التوسع فى زراعة القطن، خاصة أن استهلاك مياه الشرب زاد إلى ٩ مليارات متر مكعب عام ٢٠٠٩ بعد أن كان ٥ مليارات منذ ٥ سنوات، مشيراً إلى أن إنتاج ٤٠٠ كيلو قطن شهرياً يحتاج إلى ٦ آلاف متر مكعب من المياه - مصر هبه النيل فيها نقص في المياه.
البورصة تعاود الهبوط.. والمؤشر يخسر ١.٨٪خ
ض
شوفت بقه السيد الرئيس والسادة النواب مشغولين بإيه والبلد فيها ايه وكل ده واكتر بسبب لخبطة الدين في الدولة بمادة واحدة في الدستور امال مصر لما تبقى دوله دينه هيحصل ايه؟؟؟؟؟؟؟؟؟؟؟؟

Love,

MishMish

14 comments:

Unknown said...

ممكن استريح في بالكونتكو شويه
الحقيقه انا اؤيدك ولا اتمنى ابدا ان يحكمني نظام ديني واتذكر مقولة واحد مش فاكر اسمه دلوقت قال (لاينجح مجتمع حكم بحكومه عسكرية او حكومة دينيه)لانه ببساطه لو المجتمع عسكري لو فكرت راسك هطير ولو النظام دينى لو خالفت هتبقى كافر ويجب تطبيق الحد عليك
دمت بخير تحياتي والى الامام

Desert cat said...

لو كانت دولة دينية يا مشموشة كنتى هتلاقيهم بيقطعوا ايد اللى بيسرق فى نفس الوقت الحاكم والجلاد حرامية
وبيرجموا اللى بيزنى فى نفس الوقت اللى الحاكم والجلاد لسه قايمين من سراير الغوانى
دى لو دولة دينية خربت اكتر

نيران said...

مممممممممممم السلام عليكم
بقالي كتير ما جيتش هنا
ازيكم بقى..
وحشتوني..
البرنسيسة ساندرا عاملة ايه يا ترى/ انشالله تكون بخير كدا و تفرحوا بيها

بالنسبة بقى لموضوع.. الدين والحكومة
انا عندي تحفظات كتيرة اوي ..
اولا لا احنا كمسلمين بنطبق دينا صح.. ولا اخوانا المسيحيين بيطبقوا الدين صح عشان نحكم على هذا الاساس
يعني ما ينفعش نحكم على اساس الدين اللي احنا شايفينه قدامنا دلوقت
كلنا مش واخدين من دينا الا قشور و بنطبق شوية و شويتين لا
واللي على هوانا بنعمله واللي مش على هوانا ما بنعملوش و يار يت بس ما بنعملوش دا بتطلع فئة مننا تنتقده

بس انا مؤمنة ان اساس الاديان كلها واحد
و ان رب الكون.. سواء امنوا بيه مسلمين او مسيحين.. بنى الكون على اساس العدل
و الرب واحد لكل الاديان .. يبقى العدل المقصود واحد
يبقى المفروض اني ما ازعلش لو الديانة المسيحية حكمت بشرط تحترم ديانتي او المسلمين حكمو بشرط انهم يحترمو دين الاخرين
دا المفروض
لكن اللي بنشوفه دا ما هو الا استتار وراء الدين لأغراض الدنيا
و مش كل من طول دقنه بقى مسلم ولا كل من علق صليب بقى مسيحي

انا هدفي ايه من دا كله
انا نفسي دين يحكم المجتمع.. لان الدين يعني ان هايكون في اخلاق.. هايكون في مثل و قيم
ما اعتقدش الدين المسيحي قال اننا ما نحترمش ديانات الاخرين
كذلك متأكدة ان ديني قائم على الايمان بكل الكتب السماوية و المرسلين و احترام ادمية البني ادمين

المشكلة مش في الدين اللي يحكم..
المشكلة في شكل التطبيق
الاسلام مش قائم على تطبيق حدود و بس
الاسلام مش قائم على الجدل في الفوارغ..
في فقه عندنا اسمه فقه الأولويات
بيقول الفقه دا اننا نرتب اولوياتنا..
مش الناس بتموت و السرقة مستشرية في البلد و احنا بنتكلم عن تطويل اللحية و الساعة تتلبس في اليمين ولا الشمال اصل الشمال ايد الشيطان
الفقه دا بيقول ان بدل ما اروح احج كل سنة ممكن اتبرع بقلوس الحجة دي و استر بني ادم اخر و اقضي له حاجة

زي ما قلت.. المشكلة مش في الدين ايا كان.. لاني كمان اعرف ناس مسحيين ملتزمين.. اخلاقهم احسن بكتير من ناس مسلمين بالاسم
واللي يفرق بين دا و دا هو الالتزام بالدين
و معنى اني اكون ملتزمة بالدين اني افهم صح مش بس اكون بغبغان بيقول قال الله و قال الرسول
و اعتقد ان الغرب لما تخلى عن الدين فقد جزء كبير في الاستقرار الروحي..
و استشرت عندهم آفات اخرى..
زي اللي احنا ماشيين على خطاها
الابتعاد عن الدين مش هوالحل
ولا الدين كارثة لما نحتكم ليه..

و بس لحسن دا انا رغيت كتير اوي

فين الشاي؟

Migo Mishmish said...

MEDUS
انت فين يا عم بقالك فترة مختفي
كلامك مظبوط جداً جداً. ومثال على كلامك موضوع الطلاق عندنا مش ممكن يتم الا لعله الزنى. والايات واضحه في الموضوع ده ومفيهاش اي شك. لكن وبسبب المادة التانيه في الدستور في ناس راحت المحاكم وخدت حكم طلاق لاسباب اخرى ورفعت قواضي على الكنيسة علشان تلزمها انها تجوزهم تاني. والمحكمة حكمت لصالح اللي اتطلقوا وحطت الكنيسة كلها بالمسيحين في موقف خصومة معاها. لان الكنيسة قدامها سكتين ياما تنفذ قرار المحكمة لانه ملزم ولانها كنيسة مصريه تقع تحت سلطة القضاء المصري وتخالف الانجيل ياما تخالف الدولة وتلتزم بنصوص الانجيل وساعتها الدولة لازم تفرض سلطتها وهيبتها وتعاقب اللي يمتنع عن تنفيذ قرار المحكمة بالسجن. وساعتها افتكر الحل الوحيد قدام الحكومة انها تلم المسيحين كلهم في حته واحدة وتبني حواليهم سور كبير لاننا مش هنخالف تعاليم الانجيل ولو حتى بقرار من محكمة العدل الدوليه. شوفت موضوع صغير ممكن يعمل مصايب كبيرة ازاي
في حين ان لو عقود الزواج مثلاً بقى الاساس فيها انها تبقى مدنيه تسجل في الشهر العقاري بشروط طرفيها ساعتها يبقى كل واحد مسئول عن نفسه. واللي عايز يتجوز في كنيسة او على يد مأذون يبقى ساعتها يلتزم بنصوص عقد الزواج الديني مش هتبقى في مشكله
Love,
MishMish

Migo Mishmish said...

القطة الحبيبة
تعرفي موقف المسيح من المراه الزانيه لما مسكوها متلبسه وخدوها للمسيح وقالولوه وجدنها تزني وموسي قال اللي زي ديه لازم تترجم. وكان الغرض من الحكايه ديه مش تطبيق الشريعه على قد ماكان الغرض هو اختبار المسيح لو كان قال اه تترجم يبقى مفيش فرق بينه وبين اللي قبله وكلامه مالوش لازمة وان قال لا يبقي بيخالف شريعه موسى وساعتها لازم يترجم هو كمان
فرد عليهم وقال: من منكم بلا خطية فليرميها اولاً بحجر. فضمايرهم كلهم صحيت ساعتها وانسحبوا واحد ورا واحد
وهو ده المطلوب في اللي هيحكم بأسم الدين انه يكون بلا خطية. لو في واحد بالمواصفات ديه اهلاً وسهلاً يورينا ايه الجديد اللي ممكن يقدمة.
Love,
MishMish

Migo Mishmish said...

نيرو
اهلاً وسهلاً والشاي عالنار
اما بالنوسبه للبرنسيسه ساندو عملتني ان كل قوي في اقوى منه

بصي يا نيرو في الاول كدة حتى قبل بسم الله الرحمن الرحيم انا مش بدعو لإننا نلغي الدين او بروج للإلحاد ولا بحط الدين الاسلامي في موقف اتهام علشان ابين الاسلام ما ينفعش لكن شوفوا لو الحكم مسيحي هيحصل ايه.
بجد وبأمانه انا محبش يحكمني حكم ديني ولا حتى لو كان الدين المسيحي هو دين الدولة. لان الدين علاقه روحيه ما بين الله والانسان ما ينعش امن الدولة ووزير الداخليه يبقاله دخل فيها
انا مختلفه معاكي في نقطة إننا كمسلمين / مسيحين مش بنطبق دينا صح. لان مين اللي بيحكم لا انا ولا انتي نقدر نحكم. بصي مع رفضي لفكرة النقاب لكن لما بشوف واحدة لابسه 3 او 4 كيلو قماش اسود في عز الحر وانا حتى مش هاقولك مش طايقه هدومي لا دانا مش طايقه جلدي. ديه بالنسبه لي مشيت سكه زيادةعلشان خاطر ترضي ربنا
علاقه الانسان بربنا نسبيه ما ينفعش تخضع لقوانين جامدة.
انا زيك مؤمنه ان اساس الاديان واحد وان ربنا موجود وانه مش حكر على حد. وانه بيحبنا كلنا بنفس القدر حتى الملحدين واللي بيشتموه واللي بيعبدوا البقر والشجر. لان ربنا ببساطة مش خالقنا علشان نكره بعض او نعادي بعض او علشان يفضل ناس على ناس ولا علشان يحرقنا في جهنم
والا ان كانت هي ديه الصورة اللي وصلت لنا عن ربنا فهي صورة مشوهه ومحتاجه تظبيط
بتشوفي مثلاً ردود افعال الاشخاص والدول لما بتبقى في رسوم مسئيه او اي حد بنقض الاسلام. مهزله ودول تقطع علاقتها بدول تانيه وكل ده علشان واحد عبر عن اللي فهمه. يعني مثلاً صورة من ضمن الصور اللي ارتسمت لرسول الاسلام كانت عبارة عن واحد عنده دقن منكوشة وشكلها وحش وحواجبه تخينه ووشه مليان غضب ولابس عمه مكتوب عليها الشهادة والعمه عبارة عن قنبله. هل الرسول كان كدة ولا ديه الصورة اللي نقلها المسلمين للناس عن رسولهم وعن دينهم. حتى لو شفتي وشوش الناس في المظاهرات مكنتش تختلف عن الوش اللي اختاروه للرسول
الدين لما بيخش في الدولة يقلب كيانها. طب ليه الناس قايمة على الاسلام ومش قايمين على عبدة الشيطان اللي من ضمن طقوسهم دبح الاطفال الصغيرة على المذابح والجنس الجماعي وتعذيب الحيوانات وتقديمها كذبيحه للشيطان. لان دول افراد في حين الاسلام بتمثله دول وسواء ان كان السبب في اترباط الارهاب بالاسلام نتيجه افعال المسلمين او نتيجه مؤامرة على الاسلام فالنتيجه واحدة
ارجو اني اكون وضحت وجهه نظري
Love,
MishMish

على باب الله said...

ما ينفعش دولة دينية لأن الدين هو كم مطلق أي قابل للتفسير بأكثر من طريقة

لكن الدستور الوضعي قابل للإصلاح و التعديل بما يتماشى مع متغيرات العصر فما كان يصلح للتطبيق من ألف سنة لن يصلح الآن

الدولة الدينية أولويتها هي المحافظة على النص .. لأنها تظنه مطلق لا يأتيه الباطل لذلك تسعى لتطبيقه بنظرية
" و لو كرهوا "
أما الدولة المدنية فأولويتها هي حقوق المواطن لذلك تُعدل و تحسن دساتيرها و قوانينها بما يحقق لجميع مواطنيها القدر الأكبر من الراحة و الأمان و الحرية

صبرني يارب said...

طيب بصرف النظر عن ان كلامك فى البوست عايز بوستين تلاته مني عشان ارد عليكى

سؤال واحد

تحبي حضرتك قانون الاحوال الشخصيه يكون مستند لايه ؟؟؟

لمانكون احنا دوله مش دينيه والقوانين ما لهاش دعوه بالدين ؟؟؟

يعنى نعمل قانون مدني وشخصي فى النص ما بين الاسلام والمسيحيه والكل يمشي عليه ؟؟؟؟

مش فاهمه على فكره بجد ايه يعنى نعمل ايه ؟؟

والدين الرسمي للدوله ده عشان الاغلبيه يا ست الكل انتم خمسه فى الميه بس دي كل الحكايه مش اكتر من كده

وموضوع دوله دينيه ولا مش دينيه

طيب ماهي امريكا دوله مش دينيه

على غرارك انتى لما قلتي السعوديه بتطبق الحدود (مش عارفه جبتيها منين ) لانهم حاليا بيهبلوا مش بيطبقوا حاجه حكومه فاسده زيها زي كل الحكومات العربيه لا والعالميه كمان

وامريكا بقى حققت عدم وجود التعصبات الدينيه والشعوب المفتوحه الفكر والثقافه ؟؟؟

اعتقد هما عندهم تعصب دينى وفكري اكتر مننا ومشاكل اكتر مننا

لكن ده ما يمنعش ان فيهم ناس كتير برضه بتفهم فعلا وعندهم فعلااا احترام للراي والفكر الاخر والدين الاخر

وبالنسبه لتطبيق الحدود ما حدش قال ابدا اننا لو طبقنا الحدود هانعيش فى المدينه الفاضله
اطلاقا

ايام الرسول عليه الصلاة والسلام وفى اوج الدول الاسلاميه من بعده كان فى جرائم وكان فى ناس بيقام عليها الحد

لكن الحد ده حق اجتماعي من حق ولي الامر بس الحكم به وتنفيذه وعليه قيود كتيره جدا من شأنها ان الحدود دي تطبق فى اضيق الحدود

خلينا قبل ما نفكر فى موضوع السياسه والحكم الدينى نفكر الاول فى المجتمع وافكاره الغلط
بشقيه على فكره المسيحى والمسلم

من كام يوم شوفت فيلم حسن ومرقص
رغم ان فى حاجات كتير اوي فى الفيلم مش عاجباني

الا ان فكرة الفيلم نفسها عاجباني وهى ان العلاقه ما بين الاسرتين كانت ح لوه اوي لما كان كل واحد فاكر التاني على دينه

ومجرد تغير الموقف اختلفت التصرفات والافعال

ياااااااريت نفهم ان مافيش فى دين الاسلام ولاالمسحيه ما يحض على كره الطرف الاخر ولا جعله مواطن من الدرجه التانيه بالعكس


تحياتي ليكى يا جميل وعلمك علمك انا لسه عامله نعناع لابو بانوب من كام يوم عشان كان تعبان

حبايب يا معلمي هههههههههههههههههههههه
بوسيلى ساندووو

Migo Mishmish said...

على باب الله
تمام يا افندم وانا هاستخدم تعليقك في الرد على الاخت صبرني يا رب
Love,
MishMish

Anonymous said...

زي ما قلت.. المشكلة مش في الدين ايا كان.. لاني كمان اعرف ناس مسحيين ملتزمين.. اخلاقهم احسن بكتير من ناس مسلمين بالاسم

Neeran, when you said what you've said above, doesn't this show that you believe that Muslims are better than Christians by default only because they are Muslims.

Marika

Migo Mishmish said...

العزيزة صبرني يا رب
انا أسفه اني اتاخرت في الرد. لكن في الايام اللي فاتت واحدة صحبتنا ماتت هي وابنها الصغير في حادثه وجوزها وابنها الكبير في العنايه المركزة. وكانت حاجة تحزن

المهم انا عايزاكي تقري المشاكل اللي في البوست وتعليقات الناس هنا تاني علشان تعرفي انا اقصد ايه. لما تبقى المشاكل ديه كلها موجودة بسبب قانون يستند على الدين في مادة واحدة امال لو القانون كله بكل مواده مستندة على الدين الوضع هيبقى ايه؟

بصي يا ستي بالنسبة لقانون الاحوال الشخصية احب انه يكون مستند لقوانين وضعيه تناسب متطلبات الحياه. يعني عيب قوي لما تبقى واحدة تتمنع من السفر علشان جوزها مش موافق. ولا واحد يطلب مراته في بيت الطاعه غصب عنها ولو محبتش تعمل كدة تبقى ناشز. في حين ان مفيش حاجة زي كدة في ايد الست تتضمن مساوة الاتنين. او عندنا - علشان محدش يفتكر اني بهاجم الاسلام - مفيش اي قانون في الدنيا يجبر واحدة ست انها تعيش مع جوزها وهي ما بتحبوش علشان الطلاق لعله الزنا بس.
عقد الزواج يخضع لقوانين وضعيه يوافق عليها الزوج والزوجه ويمضوا هما الاتنين عليه ويتعهدوا بالالتزام بيه. وفي شروط معينه لفسخ العقد ده. ويبقى ده العقد الاساسي مع السماح للي عايزن عقود دينه بتوثيقها مع تحملهم المسئوليه كامله للإلتزام بالعقد الديني. يعني الالتزام ينبع من جوه البني ادم مش علشان مفيش غير كدة

انا بقه غيرك برفض يبقى في حاجة اسمها دين الدولة. لان مصر مش بني ادم ومش هتتحاسب فكون ان يبقى في كيان تخيلي نفضل نتخانق عليه ده هبل لا مؤاخذه في الكلمة.
وبعدين على اي اساس قولتي انتوا 5% ولا حتى 1/2% مين احنا؟
احنا دورز ولا بدو ولا رحاله ولا قبائل مهاجرة ولا اصلنا ايه
احنا اللي اتني اعتبري وجودهم مش مؤثر في ضغطة زر على الكي بورد بندفع ضرايب زينا زيكو وبنتجند زينا زيكو وبتعلم معاكو في المدارس وساكنين جنبكو وشبهكوا وبنتبرع بالدم زيكوا ومبيبقاش مكتوب عليه هو ده كيس من عندنا ولا من عندكوا وشكلنا زيكو. وعندنا بطاقات انتخابية زيكو تقدري تقوليلي احنا اقليه على اي اساس؟

هو ده مش بسبب المادة التانيه برضه اللي خلت في مواطنين قرايب الدولة ومواطنين مش

وبعدين مين جاب سيرة امريكا يا حاجة. انا مقولتش ان النظام الامريكي هو البديل ولا قولت المفروض نروح امريكا نجيب الدستور بتاعهم ونجيب نسخه منه نوزعها عالناس هنا وهو ده اللي هنمشي بيه
انا بقول لازم يبقالنا قانون وضعي يناسب مشاكلنا. بدل القانون بتاعنا اللي عمالين نرقع فيه ومبقاش بيحل ولا بيربط

سيادتك انا جبت موضوع ان السعودية بتطبق الحدود من نص الدستور بتاع المملكه وتقدري تقريه كله على اللينك ديه
http://www.mofa.gov.sa/Detail.asp?InSectionID=1747&InNewsItemID=24887
في المادة الاولى

وانا مقدرش اقول الكلمتين اللي حضرتك قولتيهم دول بتوع "لانهم حاليا بيهبلوا مش بيطبقوا حاجه حكومه فاسده زيها زي كل الحكومات العربيه لا والعالميه كمان" لان بحسب المادة السابعه والتامنه من دستور المملكة اللي بيقولوا :
المادة السابعة
يستمد الحكم في المملكة العربية السعودية سلطته من كتاب الله وسنة رسوله.. وهما الحاكمان على هذا النظام وجميع أنظمة الدولة.

المادة الثامنة
يقوم الحكم في المملكة العربية السعودية على أساس العدل والشورى والمساواة وفق الشريعة الإسلامية.

كلام حضرت يعاقب عليه القانون لان السلطة في السعودية ملزمة بنص الدستور بالاعتماد على كتاب الله وسنه رسولة. فكون ان حكومة السعوديه مش عجباكي يبقى انتي ياما مش عاجبك كتاب الله وسنته اللي بتطبقهم الحكومة ياإما مش عاجباكي الحكومة اللي برضه بتحكم بكتاب الله وسنته
يبقى كلام حضرتك مش هيتاخد على انه معارضه للنظام لا ده كفر والعياذ بالله

اظن واضح

وبالنسبة لتطبيق الحدود مفيش مدرس عربي او دين ساب الحصه وحولها لندوة للرأي ويتحرق المنهج بجاز او موظف في مصلحه حكومية سايب شغله وعمال برنامج عما يتسألون في شغله ولا شيخ في جامع الا اما قال ان اللي احنا فيه ده نتيجه عدم تطبيق حدود الله. فربنا غضب على مصر علشان ما بيرجموش الناس ولا بيقطعوا ايديهم وخربها مع ان محدش قال ان انعدام الضمير احد اسباب الخراب على الاقل

كويس انك جبتي اسم فيلم حسن ومرقص. انتي فاكرة الفيلم ده كان اسمه ايه لما كانت الناس عايشه في سلام مع نفسها ومع الاخر بعيد عن الاقليه والاغلبيه
كان اسمه حسن ومرقص وكوهين. لانه كان في مصريين الجنسية يهودي الدين وطبعاً كان من احد انجازات ثورة العسكر طردهم من البلد. انهي نظام اعمى البصيرة يستعدي مواطنين البلد بحسب انتمائهم الديني. حتى لو تم احتلال فلطسين من الاسرائيلين فده مش ذنب يتحملوه اليهود المصريين

وبعد شوية بقى اسم الفيلم حسن ومرقص ولما يخلصوا المسيحين هيبقى الفيلم اسمه حسن ولا محمد

عارفه اغنيه منير بتاعه يهمني الانسان لو كان ملوش عنوان هو ده اللي انا اقصدة. الدين هدفهه انه يسمو بالانسان مش يبقى سبب نزاع وتناحر
اعذريني للإطاله وارجو ان يكون اسلوبي مضايقكيش
حبابيب يا حاجة
Love,
MishMsih

صبرني يارب said...

اولاااااا ازيكم

ومرسي ليكى يا جميل على انك قولتيلى انك رديتى بس انا كنت هاجي هاجي يعنى انا رخمه طول عمري كده فى النقاش هههههههههههه

برصي يا ستى يا نبدأ نقطع فى شعور بعض بكل ود وحب هههههههههههههههههههههه

لا والنبى باهزر بلاش شعري اصل ما عادش منه حاجه

المهم

الاول البقاء لله وحده فى صاحبتك وربنا يشفي جوزها وابنها ويطمنكم عليهم

ثانيا مشاكل ايه انا قريت ما لقيتش مشاكل تقصدي موضوع الطلاق يعنى ؟؟

احنا فى الاساس ما عندناش مشكله فى الطلاق احنا الى بنعمل المشاكل دي لنفسنا على فكره
انما المسحيين عندهم مشكله فى الطلاق

انا شوفت برنامج على قناة وان بتاعة نجيب سويرس قريبكم اهو يا عم
حتى انا موبينيل
هههههههههههههه

المهم شوفت برنامج عن الطلاق فى المسيحيه وما كنتش اعرف حكاية المشكله الى بين الكنيسه والمحكمه دي
بس الى فهمته بقى منهم الناس الى اتكلمت فى البرنامج مش انهم معترضين على الطلاق
لا انهم معترضين على ان الحكومه بتقولهم ارجعوا لكنيستكم واتصرفوا معاها

وعلى فكره ينفع يتجوزوا بعقد بموجب الوثيقه الجديده على حسب علمي

وينفع يطلعوا لبنان ولا قبرص يتجوزوا ويجوا برضه فركة كعب
ده علىحد قول ا صحاب المشاكل
الا انهم عايزين مباركة الكنيسه

طيب حضرتك القانون يعمل ايه هنا ؟؟؟

يعنى انتم كمسحيين عايزين ايه

عايزين تطلقوا بموجب القانون المصري ولا مش عايزين ؟؟
مش فاهمه يا فندم

بالنسبه لقانون الاحوال الشخصيه حضرتك عوزي زي ما انتى عاوزه انما احنا كمسلمين مش بنفصل الدين على متطلبات الحياه

من وجهة نظري قوعد الشريعه الاسلاميه اساسا هى الحياه

انهو قواعد ؟؟؟ القرآن يا ماما مش حاجه تانيه خالص


بالنسبه لموضوع الطاعه والنشوز
احب اقولك حضرتك فاهمه غلط خااااالص

قانون الطاعه ده اساسا وضعي ههههههههههههههههههه
اه والله باتكلم جد

بصي فى الاساس كانت مشكلة النفقه هى دي الى تبع الشرع

طيب وبعدين النفقه دي هاتستمر حتى لو كانت الزوجه سايبه بيت الزوجيه ؟؟؟

طيب هو ايه اصلا قانون الطاعه والنشوز ؟؟؟

هو انه بيرفع قضية طاعه مش اجبار عليها انها تنفذ زي ما بيجى فى الافلام ههههههههههههههه

نو نو مطلقا هى ممكن ما تنفذش وفى هذه الحاله تبقى هى كده ناشز ومش من حقها تاخد نفقه

فهمتي القصه ايه ؟؟؟ ولا ما وصلتش

يعنى هى تقدر ما تنفذش الطاعه بس تسقط عنها بعد الحقوق القانونيه
فى ستات بقى ولاد تيييييت بينفذوا الطاعه امعانا فى قرف الطرف الاخر

الى هو برضه فى الاساس حب يقرفها ويسقط عنها حقوقها القانونيه مش الشرعيه بس

والمنع من السفر ده افتكر لغوه باين

ولو ان يعنى الى تسافر من غير موافقة جوزها اظن من حقه انه يطلقها والا يبقى متجوز مين حضرتك وهى مسافره ؟

حضرتك بقى الى قلتي ان عندكم مافيش طلاق الا فى حالة الزنا

لا يا ست الكل عندنا الف حل وحل ومافيش اي اجبار من اي نوع

لكن مخاليق الله هما الى بيحبوا يقرفوافى بعض فى المحاكم عشان الفلوووووووووس

وباكرر الحكايه كلها حكاية فلوس وعند وقرف

انما عندنا بكل بساطه لو قالتله مش عايزاك يا غلس مش طايقه رخامتك تقدر تطلق مافيش اي اجبار هنا

وبالنسبه لعقد الجواز افتكر الوثيقه الجديده فيها الكلام ده مش عارفه اصل انا قديمه هههههههههههههههههه

ومافيش اي حاجه عندنا فى الاسلام تمنع ده على فكره بالعكس


اما بالنسبه لموضوع اقليه

والله يا بيه انا بريء الاحصاءات الحكوميه بتيقول ان المسحيين فى مصر نسبتهم خمسه فى الميه

وبعدين مش معقول عيل تايه من لبنان فى مصر هنا دورزي يبقى احنا عندنا دروز
هههههههههههههههه

لا موضوع الاقليات ده كبير كبير يا فندم

وشئتم ام ابيتم المسحيين اقليه فى مصر
وحتى الدول اللادينه بطلع تقارير واحصائيات بنسب الناس الى عندها واعتناقتهم الفكريه والدينيه مش عيب والله

ومين قال انى انتم مش شبها ومش زينا ومش ومش وفطير وعسل

وانا ما قلتش وجودكم مش مؤثر ازاي بقى عيب عليكى
انما كمان احنا دوله ديموقراطيه نحترم الاغلابيه

وليكى عليا يا ستى لو بقيتوا اكتر مننا وعملتوا انقلاب ومسكتوا الحكم انا هاقولك يا خالتي هههههههههههههههه


شوفي يا مشمشه انا جبت امريكا كمثال للدوله الا دينيه زي ما انتى جبتى السعوديه كمثال على الدوله المقيمه حدود الله


اما بالنسبه للسعوديه انتى يا بنتى هاتلبسينى تهمه وعايزاهم يهدروا دمي ويقتلوني اخس عليييييييكى
ههههههههههههههههه

دستور ؟؟؟ دستور يا فالحه
هو الدستور ده بيطبق فى اي مخروبه من الى احنا عايشين فيها
وبعدين دستور ايه دول مفصلينه على مقاس رجليهم يا حلوه
انا قلت حكومه فاسده لو كان ماشي القانون والدستور فى كل الدول كانوا ما بقاتش فاسده اصلا
انتى بتتكلمي فى ايه

طيب طبقوا انتم بس الدين صح سواءا كده ولا كده ولا اعملولكم اي قانون امشوا عليه وانا موافقه بس يمشي القانون على الكل الغني والفقير
القوي والضعيف بس يكون فى قااااانون اصلا

قانون ما يجبرش حد على انه يعمل حاجه برضه ضد دينه اي كان الدين ده ما دام ما بياذيش حد

يعنى القانون الى يمنع واحده انها تتحجب يبقى استهبال

والقانون الى يفرض على واحده انها تتحجب اوتتنقب برضه يبقى استهبال


وبالنسبه للامثله الى انت ذكرتيها من تخلف دينى وعقلي وترك العمل وتعطيل مصالح الناس عشان يهبل ده طبعا غلط مافيش كلام

وبالنسبه للفيلم تعرفي انى ضحكت جامد على كلامك وربنا
مش عشان حاجه عشان انتى شكلك ما شوفتيش المسرحيه القديمه ولا الفيلم الجديد

المهم القصتين مالهمش دعوه ببعض تقريبا

ثانيا
حضرتك مين قالك اننا خلصنا على اليهود مش هما الى هربوا يا بنتى لارض الميعاد هععععع

بجد ما حدش طردهم ولو كان حد طردهم يبقى الحكومه يمكن خوفتهم عشان يمشوا ؟؟؟
مش عارفه ما كنتش هناك ساعتها
بس وايه يعنى ما الحكومه كمان خوفت عمر خالد وطردته ماهو مسلم

الموضوع مش موضوع دين
الموضوع موضوع توجه سياسي

وعلمك علمك احنا عندنا يهود فى مصر لسه وما مشيوش ومرزوعين

قليلين طبعا لان طبيعى ده يحصل ما دام فى دوله برضه اعلنت انها الدوله اليهوديه الوحيده وانها طمعانه فى جيرانها وارض الميعاد والبتنجان ده
يبقى لازم احنا نقول لليهود بخخخخ
كمجتمع يعنى

رغم انى بررررررررضه ارفض الصاق التهم بالدين واهله بشكل عام

انما فى بنى ادم وحش وفى بنى ادم كويس

بصر النظر عن دينه

لان الديانات عموما قائمه اصلا على الاخلاق

حتى الى بيعبدوا البقر عندهم قواعد اخلاقيه على فكره

وطبعا طبعا يهمنى الانسان ولو مالوش عنوان

لكن كمان الدين من وجهة نظري مش شعائر ومكان ولا زمان
الدين حياه
الدين عشان نعيش الدنيا
كتالوج
مش نعيش عشانه ولا به ولا اي حاجه تانيه

بس خلااااااااااص الله يسامحك يا مشمش

ليه بقى
اولا كان المفروض انزل بوست النهارده ما نزلتش حاجه قاعده جنبك
ثااانيا عايزه تعويض مااااااادي عن كيلوا اللحمه الى اتحرق جوووووووه ده
هههههههههههههههههههه

وعلى فكره ما اضايقتش من كلامك ولا حاجه عاااااااادي

لو اضايقتى انتى هادفعك تمن كيلوا الحمه
سلام يا جميل
بوسيلى ساندو

حقا انا رغايه ؟

^ H@fSS@^ said...

انا بصراحة مش فاهمة
يعني فيه ناس بتتكلم عن صعوبة اتباع حل الدولة المدنية كانه لوغاريتمات غير مفهومة و كانه لم يطبق في مليون بلد قبلنا و نجح و وقى اهل البلد شرور كتيرة اوي
يعني ولا كاننا اللي لسه حنخترع الذرة
ما هو متلقح قدامنا اهو في كذا بلد و ناجح و الناس عايشة و مروقة نفسها
ولا هو لازم نعمل نفسنا بنخترع الفنكوش

انا خلاص اتجننت
عقلي مبقاش يستحمل
بقيت الدع من ااقل شئ
بعيد عنكوا الابلاتين كوري شمالي
فتصينع اي كلام
تصبحوا على خير

^ H@fSS@^ said...

معلش سؤال خارج عن الموضوع

اخبار اجندا حمرا ايه؟
حد يعرف عنها حاجة؟
من نوفمبر اللي فات و مافيش لا حس ولا صوت
طمنوني
ماشي؟
و بوستين على خدود ساندو عشان بموووووت في الخدود
ما شاء الله اكبر في عيني

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق