Sunday, March 22, 2009

اغانى وطنيه 2009


فدائى فدائى فدائى
اهدى الحكومه دمائى

واموت اعيش

مايهمنيش

ويارب اروح الفرن الاقى


...

فدائى فدائى فدائى

اموت اعيش ..مايهمنيش

........

وسط الطابور

هناك مكانى

والعيش دا عندى اغلى الامانى

وسط السنج ..وسط المطاوى

لازم اقاتل ..

لازم اصارع

واموت اعيش مايهمنيش

ويارب اروح الفرن الاقى ..


فدائى فدائى فدائى
.....

لو مت يا امى ماتبكيش

راح اموت علشان بجنيه عيش

افرحى يامه وزفينى

ويوم ماتاكلو افتكرينى

وان طالت يامه السنين


خلى اخواتى الصغيرين

يكونو زييي فدائيين
.......
ميجووووو

22 comments:

Anonymous said...

اللي مات على العيش مات بسبب الهمجية و الشاذ من السلوك مش بسبب ان الحكومة ضربته بالنار

انا لسه جايب عيش النهارده و الكشك كان فاضي

فى الغالب الكشك مش بيبقى زحمة

بطلوا افترا عالحكومة بقى لاربنا يديكم حكومة اوسخ منها بدقن طويلة

نيران said...

ليه هو حضرتك ساكن فين يا اخ بسطاويسي؟
هنا يختلف شكل ونوع الكشك
و شكل ونوع الناس اللي واقفة قدام الكشك

معلش والله مش استهزاءًا برأي حضرتك، بس اصل انت عايز تقولي ان الأزمة دي كللللللللها بسبب الهمجية بتاعة الناس البيئة؟
او لالا

والدقيق اللي بيتهرب والرشاوي اللي بتتعمل عشان الموضوع دا عشان الناس البيئة الهمجية؟
و كمان أو لالا

طب ما يقتلوا الناس البيئة دي رميا بالرصاص و يخلصوا البلد منها بدل مهي بتزعج الناس ولاد الناس!!

هو اصلا مين سبب الجهل والمستوى بتاع الناس دي؟

افترا على الحكومة

بطل يا ميجو افترا على الحكومة
شوية مشمش تلسن على الفنان المثقف
و انت بتثير فتنة بأزمة العيش
عيب، دا حتى اللي بيفتري على الحكومة بيروح جهنم

هي الاغنية كانت بتقول ايه

فدااائي فداائي
و يا رب اروح الفرن الاقي :)

تحياتي

Anonymous said...

صدقني يااخ نيران انا ساكن فى العشوائيات
همجية الناس هما السبب فيها مش الحكومة لان عمرها مابتتحكم فى سلوك حد
الدقيق اللى بيتهرب و الرشاوي عمرها ماتسبب موت حد
عموما الحكومة اللى مش عاجباكم دي عمرها قرب و هاييجي اللى يعرفكم ان الله حق

نيران said...

أخ نيران!!
مممم مااشي ممكن اعديها
لا بأس يعني
مع اني استحق تاء التأنيث ونون النسوة
بس انا روحي رياضية

لما يبقى في تعليم وفي الحد الأدنى من الحياة الادمية للناس اكيد الهمجية هاتقل و هايكون في نشر للثقافة حتى في ظل وجود الفقر بس فقر عن فقر يفرق يعني

وصدقني اي حكومة هاتيجي مش هاتكون اسوأ من دي
يكفي اننا نقول لا يقولوا اه
نقول مش عايزين يعملوا مش سامعين

و بعدين انت قلقان ليه من الحكومة الجاية
مهو بردو مش هاتفرق كتير من مبارك لمبارك يا قلبي لا تحزن

الا قولي يا بسطاويسي
انت تبع الحزب الوطني اللي هو بتاع فكر جديد عشان بلدهم؟

نيران said...

الا صحيح يا ميجو انت و مشمش فين الشاي؟

Anonymous said...

لامؤاخذة يااخت نيران ماكنتش اعرف انك من النوع الناعم

الحكومة الجاية هاتبقى اوسخ لان الحال فى مصر من سيىء لاسوأ

فى الغالب الامريكان هايعارضوا التوريث و يفتحوها سايبة للانتخابات الحرة اللى هاتجيب الاخوان للحكم زى ماحصل بالمسطرة لغزة و ساعتها الامريكان هايقولوا تحملوا مسئولية غزة قصدي مسئولية انتخاب الاخوان و يحاصرونا اقتصاديا و الطوابير هاتبقى على كوباية المية و يمكن الهوا مش بس العيش

بوسوا ايدكم شعر و دقن و علقوا صورة سيادة الريس فى بيوتكم و قلوبكم وألا الساطور الاسلامي هايتحط على رقابكم هو و البندقية الامريكاني

ايوة انا بكل فخر حزب وطني

حــالة مــلل said...

اغنية رائعة تناسب وجه مصر المشرق المنير اللى مالوش حال عام 2009

هم يضحك وهم يبكى بجد

شكرا ميجو

نيران said...

بسطاويسي
مع اني عارفة ان ميجو هايطردنا برة و احنا قاعدين نرغي في البلكونة بتاعتهم كدا بس مش مشكلة

تصدق يا اخي لو امريكا عارضت التوريث، انا هاحب امريكا
اي والله هاحبها اوي

من باب التغيير ليس إلا
يجو اخوان يجو الجن الازرق
مش مشكلة ساعتها

تخيل انا بحب الحكومة الحالية بقى قد ايييييييه :)

على فكرة ميجو و مشمش دا مش وقت شاي دا بقى غدا
طابخين ايه انهاردة؟

نيران said...

بسطاويسي بسطاويسي
معلش سؤال اخير و هاروح والله

هم بيشتركو في الحزب الوطنهم دا ازاي؟
و بيدوهم ايه؟
اقصد بيدوكم ايه

؟

اصل انا اول مرة اشوف واحد حزب وطني ولا ليهم في الفكر الجديد

بكل فخر ليه؟؟؟؟؟؟

اوعوا حد يزقني برة
انا طالعة بكرامتي

ايوة الباب فين

يمين تاني ناصية
طب سلام :)

Anonymous said...

هايعارضوا التوريث (يارب تموت يااوباما)
ماهم عارضوا ضرب الانتخابات فى غزة و حاصروها و ساعتها الغزاويين فرحوا زي ماهاتفرحي عن قريب لما جمال ياخد بمبة
بس ياترى بتوع غزة فرحانين دلوقت؟؟و هايضطروا يختاروا الفتحاوية تاني بس بمزاجهم و كامل المسئولية المرة دي لا تزوير ولا حاجة و كله فى السليم

للأسف كلامك مافهوش نضج سياسي و اتمنى ماتزعليش من الكلمة دي
يعني ايه: "من باب التغيير ليس إلا
يجو اخوان يجو الجن الازرق
مش مشكلة ساعتها"
ثورة عدمية تاخد البلد لدوامة حروب اهلية و طائفية زي العراق؟؟

نيران said...

اووبس الموضوع وصل للنضج السياسي
اقولك الحق انا فعلا ما عنديش نضج سياسي
بس من وجهة نظرك كحزب وطنك، يا ترى ايه فوائد التوريث؟
ان الحرامي اللي تعرفه احسن من ابن الــــ اللي ما تعرفوش
ايه مقومات نجاح حكومة التوريث
و ليه لازم الاخوان هايفشلوا
و هو مافيش حل غير الاخوان

علما اني والله مش مع الاخوان مع اني مسلمةو باحب ربنا اوي
ولا باطيق الحزب الوطني ولا الحكومة الحالية ولا القهر والذل اللي احنا فيه

تقدر تقولي الحزن الوطني آآقصد الحزب الوطني عمل ايه للبلد؟

اوعى تقولي زي اللي بيقولوا في التلفزيون البلد عال العال والضرايب عشان مصلحتك والفلم الفاشل دا
انزل كدا الشارع وقولي الحكومة دي عملت ايه؟
و اوعى تقولي زي احمد بيه عز انه عارف الشارع المصري اكتر من العالمون ببواطن الأمور

لأن بجد طفح الكيل
و الضحك على شوية شباب بوظايف و شقق و مش عارفة ايه لا يبرر النهب والجشع اللي بقى عيني عينك من كبار محتكري الحزب الوطني والحكومة الحالية

انا اسفة اني طولت
انا مش سياسية ولا انا مع حد ضد حد
بس انا عايزة حد يقولي اني اقدر اربي ابني في بلد ادمي.. و دا اكيد مش كلام اي حد على الساحة
يبقى اموت مخنوق او مشنوق
مش فارقة كتير

عرفت ايه بقى معنى مجرد تغيير

و اسفة اني عملت ازعاج كتير كتير :)

شششش
ماحدش يشوطني برة
انا عارفة الباب اول يمين الناصية الجاية


تاااكسي

Anonymous said...

يتساليني عن فوائد التوريث اقولك ياستي:
انا مقلتش خالص ان فوائد التوريث ان الحرامي اللى نعرفه احسن من اللي مانعرفوش
فوائد التوريث ان جمال هايمسك و جمال مش اخوان
انا مش معجب بجمال عشان هو جمال و انما عشان هو مش اخوان

الاخوان خسروا المعركة السياسية بعد اغتيال السادات و لكن كسبوا قلوب تلات ترباع مسلمي مصر بمعني ان اى انتخابات نزيهة هاتخليهم يمسكوها
الاخوان انا بعتبرهم مسلم فاشست و انا ارفض ان فاشستي عنصري يحكم بلدي خصوصا اني انا غير مسلم

انا عارف انك مسلمة و من حقك تشوفي ان الاخوان كويسين لكن من حقي انا كمان كقبطي اخاف على نفسي و اهلي و بلدي منهم

الحزب الوطني مايقدرش يعمل كل حاجة لانه باختصار هو مش ربنا
هايقعد على ايد مواطن مواطن يشوفه بيسرق ولا يرتشي ولا يزوغ من الشغل عشان يصلي؟؟ و افرضي عاقب اللى بيزوغ من الشغل عشان الصلاة يبقى هايعاقب البلد كلها ايوة البلد كلها معاتيه دين و حراميه ده غير ان البلد هاتولع لو واحد اتعاقب عشان بيصلي بغض النظر كان معطل مصالح اللناس ولا لأ
الموضوع مش سهل و الشعب المصري أغلبه جبان مايختشيش ماينفعش معاه المنطق

أبنك صعب انه يتربى فى بلد شعبه غليظ الرقبة زي شعبنا لو حظه حلو يهاجر يتربى فى بلاد الكفرة و الملحدين

نيران said...

مممممممممم
طيب لما الحكومة دي مش ربنا، و مش هاتقعد على ايد كل واحد تشوف هو بيعمل ايه و مش هاتقدر توفر كل حاجة لكل الناس عشان هي مش هاتقدر تعمل كل حاجة لوحدها
بتحكمنا ليه
ما يقولوا مش قادرين
مش يستمروا هم في زيادة النهب والسرقة
انا مش شايفة ان الاخوان هم الحل الأفضل لعلمك مع اني مسلمة، بس الفكرة اني ما شفتش منهم حاجة، قد تكون فكرة استغلال الدين عشان وصول سياسي بتؤرقني زي ما بتؤرق اي حد بس انا كمان على ثقة ان لو جمال مسك البلد مش هاتبقى مية مية خصوصا اننا شفنا بلاوي الحزب الحاكم

الحكومة اللي ما تقدرش تقول ما اعرفش وتغور في ستين داهية
مش احنا اللي المفروض نغور من البلد عشان نعيش عيشة كريمة
طب ما نسيب البلد للكفرة والملحدين عشان يحتلونا و بكدة مش ابني بس هو اللي هايعيش كويس دا كل الناس واهو الخير يعم

دي بلدي انا
وحقي اني اعيش فيه
وحقي اني الاقي ادميتي فيها
مش بلد بتوع الحزب الوطني
مش مملكة مبارك واولاده

دي جمهورية مصر العربية

فهمت

Anonymous said...

من حقهم يمسكوا الحكم مادام مش هايضروا البلد بعكس المسلمين الفاشست اللى من حقهم بس يتحرقوا بجاز

ثاينا مين قال ان الحزب و الحكومة مش عارفين يظبطوا البلد؟؟ على الاقل مادخلناش ولا حرب من ساعة مبارك و حزبه مسكوا و انشاءالله جمال
ماحصلتش مجاعات ولا حروب اهلية
انا عن نفسي لا اتعذبت فى حرب ولا جعت و لا اتحرمت من تعليم و انا على فكرة فقير مش غني ساكن فى العشوائيات بس مستورة

اللى بينهب هو الشعب المصري و لان الحزب من الشعب يبقى بديهي هاتلاقي ناس جوا الحزب بتنهب زي اي حزب فيكي يامصر و زي اي مكان اجتمع فيه كام مصري مش الاحزاب بس

دي بلدك انتي و من حقك تعيشي فيها طيب ماتعملي حاجة ضد التسيب و الفساد ولا هما الحرامية هايختشوا من نفسهم كده لوحدهم؟ ياستي اضعف الايمان نبطل سرقة(مش بتكلم عليكي انتي)
ماحدش قال انها بلد حسني ولا الحزب بلدنا احنا بس احنا برضو اللى بننهبها و بنتصرف بطريقة شاذة

Migo Mishmish said...

ما خلاص يا جدعان
هو البوست ده بتاع ميجو بس انا لاقيت بوادر خناقه قولت اتدخل علشان الناس ما تتلمش.
بس ده مش معناه اننا متضايقين من حد فالبلكونه هي مكان من ليس له بلكونه
اولاً خلينا نتفق على اننا نختلف. كل واحد فينا ليه وجهه نظر
انا مع نيرو في اننا محتاجين دم جديد اي دم جديد. زهقنا من العبور الجديد والفكر الجديد والحرس الجديد والحرس القديم. والرغي بتاع الحزن الوطني اللي ما بيأكلش عيش. وبعدين اكبر دليل على ان الحزن الوطني ديه صوان معمول علشان مولد سيدي الريس ولاهو حزب بجد ولا سياسه ولا بطيخ ان مفيش احزاب تانيه في مصر واللي اتجرأ وحاول يعمل حاجة اتشيع ولنا في ايمن نور اسوة حسنه - على فكرة في انتخابات الرأسه انا انتخبت ايمن نور -
وبعدين ما ينفعش كدة احنا مش مواشي ولا بهايم يحكمنا الريس الاب 27 سنه ويكمل بينا الريس الابن اللي باقي لحد ما مصر تقفل وتتباع في المزاد العلني.


اما بالنسبه للأخ بسطاويسي انا معاه برضه في ان المرشح الوحيد القوي هما الاخوان ودول لو مسكوها هيجيبوا معاهم الخراب المستعجل. يعني لو مصر هتخرب بعد 50 سنه في ايد الاخوان مش هتاخد اكتر من شهرين. لان الاصلاح السياسي في نظرهم يتكون مش شقين اولاً اننا كمسيحين ندفع الجزية ويخرجونا من الجيش. ويلغوا معاهدة السلام مع اسرائيل ويخشوا الحرب معاها. يعني المسيحين هيمولوا الحرب والمسلمين هما اللي هيحاربوا
يعني الاخوان هيخلصوا على مسلمين مصر ومسيحينها. وطبعاً هيدموا الاصنام المتمثله في الاهرامات وابو الهول وكله كله
هيبقى خراب مستجعل
بس كدة
Love,
MishMish

نيران said...

انا مش عارفة تقريبا ميجو اتقبض عليه بسببنا يا بسطاويسي :)

المهم

كلامك متناقض على فكرة، ازاي يعني حضرتك هم ما ضروش البلد،
ممكن تقولي يعني ايه يضروا البلد
اومال اللي احنا فيه ايه؟

حال التعليم اللي انت ما اتحرمتش منه بقى ايه دلوقت
حال الرعاية الصحية
و بعدين ايه فكرة ان الحزب من الشعب يبقى بيسرق زي الشعب
و هو الشعب بيسرق ليه
و على كدا بقى رئيس الحزب يبقى كبير الحرامية
كدا فسرت لي بما انه اختيار الشعب!!

طب خليني اسألك، هو ليه قاعد على قلبنا مع اننا مش بنختاره

ايمن نور مش اخوان ليه ايمن نور فجأتن بقى مزور على حين غرة كدا

و بعدين اعمل ايه عشان احارب الفساد؟
سرقة انا بطلت اسرق من زمان
رشاوي ما بادفعش
طب اقسام البوليس مين يحكمها
المستشفيات
المشاريع اللي بتتنهب من مسؤولين
الاحتكار من الكبرات
المؤامرات

و بعدين الحرامية مش هايختشوا من نفسهم
بس اصل المال السايب يعلم السرقة
وكل حرامي كبير بيسيب الحرامية السغيرين يسرقوا عشان هو يعرف يسرق اكتر

ما دخلناش حرب، عشان امريكا مش عايزانا ندخل حرب
يعني لا حسني ولا جمال
يقدروا يقولوا لأمريكالا

و مين قال ما عندناش مجاعات في البلد
انت مش معانا في نفس البلد ولا ايه
في فئات يا محترم لا تجد كفاف يومها
في ناس نايمة في الشوارع
و ما تقوليش اصل دول نتاج التصرفات الشاذة

الشذوذ الحقيقي هو تصرف الحكومة اللي بتغمض عينها عن كلللللل حاجة
عبارات تغرق والاف تموت طز
قطارات تولع طز
حوادث بسبب سوء الطرق طز
مواد مسرطنة تدخل البلد طز
تخلف اقتصادي للبلد طز
و غيره كتيييييييييييييييييييير اوي

تعتقد كل المواضيع دي راجعة للشذوذ في البلد؟

Migo Mishmish said...

يا نيرو بلاش كلام في موضوع الشذوذ ده علشان الناس ديه بيتقبض عليها
اكبر دليل على ان الحكومة بالحزب بالمسكرات كلها مولد سيدي الريس
ممدوح اسماعيل بتاع العبارة قعد اربعين يوم في الحصانه وقضيته اتعملت جنحه مع انه جايب عبارات بضائع متكهنه وقلبها للركاب. وبعدين اترفعت الحصانه لما راح بريطانيا. ودلوقتي قال اتحط على قوائم الوصول. ما هو كان معانا ولا هو ابني يبقى في ايدي وادور عليه
لكن لما الحكومة حبت تشيل واحد من بتاع الاخوان. الحصانه اتسحبت في ساعتها. الراجل اتشال في 24 ساعه
يلا ولا يهمك
Love,
MishMish

Anonymous said...

يامشمش أيمن نور ضعيف و مبارك كان لازم يوقفه قبل مايخش و يدي الاخوان حريتهم

ليبرالية ايه اللى عاوزين تدوها لشعب مدمن على الاسلام؟؟

طيب كنتي هاتعملي ايه لو أيمن نجح مدة ولا مدتين و بعد كده حكم الاخوان طول العمر عمر مصر؟

ثم صدقيني ايمن نور ماكانش هاينجح ولا حاجة اللى هاينجح كان الاخوان

كمان انا عاوز افهمك ان الليبرالين مخترقين اسلاميا على نطاق واسع و عاملين زي الخشب المخوخ من بره ليبراليين و من جوا اسلاميين

هو الاخ ميجو فين؟ سايبك انتي و نيران عليا لوحدي كده؟

Anonymous said...

هو ياتقبض عليه يااما مستخبي فى حتة

ياستي اللى ضر البلد هو الشعب المصري مش الحزب الوطني بعينه

اى مكان يتجمع فيه اتنين مصريين يبقى منهب 24 ساعة
اللى احنا فيه ده بسبب فساد الضمير و الذمة و النظم النقطية فى الدين على غرار انهب و اسرق و اقتل و كل مال اليتامى و بعدين اطلع حج خد كام نقطة قصدي كام حسنة تمحي بيهم ذنوبك و تطلع زي الشعرة من العجين و كمان موضوع الفروض يعني الواحد مش مشكلة لما يسرق و ينهب و بعد كده يؤدي الفروض (الصوم الصلاة و هكذا) و بكده يبقى مازال فى السيف سايد مادام عمل اللى عليه من فروض

مصرة انتي ان اللى خارب البلد الحزب الوطني في حين ان الشعب المصري حفنة من الملايكة ياحرام

فى ناس فقيرة فى البلد زيي كده بس برضو البلد مافهاش مجاعة اللى بتقولي عليهم دول لا علم ولا نيلة وعاوزين يناموا و اكلهم ييجي لحد عندهم
انا والدي ووالدتي موظفين حكومة و حالتنا ماديا مستورة مش فاهم انا ام المجاعة دي فين و مابنسمعش عنها فى الاخبار الاعالمية ليه طيب؟ مجاعة زي بتاعة افريقيا كده؟ ياريت تسمي الاشياء باسماءها و بلاش مبالغة

اللى عامل مشاكل هي زمة الشعب الواسعة مش ان الحزب الوطني نبي رسالته افساد النفوس

انا مقصدش الشذوذ الجنسي انا اقصد الشذوذ عموما شذوذ التصرف و الفكر مش المثلية الجنسية

نيران said...

طب اقول ايه بقى
نقول تور يقولوا احلبوه
يا جماعة توووور يقولوا احلبوه

خلاص خلاص
انا اقتنعت
مصر دولة مستقلة وحرة
واحنا بنحب مبارك
والناس البيئة هي اللي غلطانة
والشعب المصري هو اللي قارف الحكومة
والحزب الحاكم كفاية عليه انه حاكمنا يعني يحكمنا ونعيش كويس
دا ايه الاستهبال دا
احنا شعب طماع وواطي

اخص علينا اخص

و ربنا يخلي مبارك وابن مبارك واحفاد احفاد مبارك
و يا رب يموت الشعب ابن الشعب

Anonymous said...

هاها بس هدي اعصابك و ريلاااااكس
عموما واضح ان ماحدش هايقتنع بوجهة
نظر التاني

اه بالنسبة لنقطة امريكا هي اللى مخليانا مانحاربش
بلاش و النبي الكلام المرسل ده اشك ان عندك دليل ان امريكا هي اللى موصية مصر ماتحاربش ولا تخرق معاهدة السلام ثم ياستي لو امريكا فعلا عملت كده يبقى حلو اوي و تشكر عالسلام اللى احنا عايشين فيه

شكرا على المناقشة الحلوة

Desert cat said...

انا موضوع العيش ده مش اقدر افتى فيه لانى بصراحة عمرى ما وقفت فى كشك بس الشخص اللى بيجيب لنا العيش لما بيتاخر مش بيشتكى ان العيش مش موجود وانما بيشتكى من الناس اللى بتموت بعضها

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق