Sunday, April 12, 2009

فى القسم -2


انتهى الظابط الشاب من النشال وفتحيه بتاعه الدائرى ..استعديت ان انهض من مكانى ..لكنه اشارلى باصبعه ان اظل جالسا مكانى ..امسك الموبايل وتحدث مع شخص اخر فهمت انها زوجته ...

الظابط : ايوة ياستى عامله ايه؟ ..اه انا لسه فى القسم ..اشكال زباله وشغلانه تقرف ( نظر لى نظرة ذات مغزى ) لا ماتعمليش حسابى على الغدا هاخلص النوبتجيه متأخر ....الواد ميدو ابن الكلب عامل ايه؟ بيذاكر ؟ قوليله ابوك لو جه ولاقاك مش مذاكر وعامل واجباتك هاينفخك ..طيب .......ايه فلوس ايه؟ هو المدرس بتاع الساينس دا مابيشبعش ( حمدت ربنا انى مش مدرس ساينس) هو مش لسه قابض الحصه الى فاتت الهى عزرائيل يقبض روحه ..انا هالاحق على ايه ولا ايه ..اسرق يعنى ؟ طب وحياه امه لاسحبه عالقسم بس لما الامتحانات تخلص ...طيب خلاص بقى ورايا شغل سلام سلام ..اشار لى بالقيام ...وجلس هو على المكتب

الظابط: ايوة ياسيدى

انا : حضرتك انا جالى استدعا عشان فيه محضر معمول ضدى

الظابط : محضر ايه ؟ سرقه ولا قتل ؟

انا : لا ضرب تلميذ

الظابط : هو انت بقى الى ضربت الواد بتاع سنه سادسه؟ اهلا وسهلا

انا : الله يسلمك ياباشا

الظابط : وضربته ليه بقى ؟ مش حرام عليك ؟ كل يوم تموتو عيل دانتو افتريتو قوى

انا : ياباشا انا عمرى فى حياتى ماضربت تلميذ ..بذمتك دا منظر واحد مفترى ؟

الظابط : يعنى هو هايتبلى عليك ؟تلاقيك ضربته عشان ياخد معاك درس

انا : طب اشمعنى هو يعنى ؟ ما فيه غيره كتير فى الفصل

الظابط :طب ماتقول لنفسك ..هو هايقول كدا ليه يعنى ؟

انا : الحكايه كلها انى كنت عندهم فى حصه ..والحصه كان فيها امتحان شهر ..الواد دا بقى كان عاملى زى الفرقعلوز ..عمال يتنطط ويغش من زمايله ..ويغششهم ويستظرف ..كان مبوظ الحصه ..حذرته كذا مره وقلتله يابنى اسكت بدل ماخد ورقتك ..هعمل اكس على ورقه الامتحان ..مافيش فايده

الظابط : تقوم تضربه وتبهدله ..دا عيل يا اخى ..انت ماعندكش عيال ؟

انا :صدقنى ماضربته ..انا نبهته كذا مرة وهو مش عايز يسكت

الظابط : ماتسقطه فى السلوك ..مش عندك اعمال سنه

انا : اعمال سنه ايه بس ياباشا ..دى اتلغت من زماااان

الظابط : مافيش اى عقاب تانى ؟ احرمه من الفسحه او احرمه من الالعاب

انا : لو حرمته من الفسحه هاضطر اقعد معاه دا غير ان ممكن يكون عندى حصه ساعه الفسحه ..ولو قعدت معاه هايطلع عينى عشان يقرفنى ويخلينى احرم اعاقبه تانى ..يبقى انا عاقبت نفسي قبل ما اعاقبه

تقوم برضه تضربه ؟

انا : برضه بتقولى ضربته ؟

الظابط : امال انتو بتعاقبو العيال ازاى ؟

انا : اعاقب مين يافندم ..احنا الى بنتعاقب مش هما ..

الظابط :والله عندك حق ..الواد ميدو ابنى مطلع عينى ومغلبنى معاه مش عارف اعمل معاه ايه

انا : ربنا يخليهولك يافندم

بس برضه تضرب الواد ليه مش حرام عليك ؟

انا : برضه تانى بتقولى ضربته ؟ انا بقول للواد هات بقى ورقتك كفايه عليك كدا ..لقيت الواد بيقولى لا مش هاديهالك ..قمت خدتها منه بالعافيه ..راح قايلى انا هاجيب بابا ينفخك ..انا سمعت كلمه بابا هاينفخك دى واتجننت

الظابط : دا واد مش متربى صحيح ..ازاى يقول للمدرس بتاعه كدا ..جيل اخر زمن ..دا الواحد زمان لما كان يشوف المدرس بتاعه جاى من الشارع دا يعدى من شارع تانى احتراما ليه ..بس مكانش مفروض انك تضربه

انا ::احلفلك بايه عشان تصدقنى ؟ انا كل الى فيها مسكته من دراعه وسحبته على الناظرة وقلتلها انا عايز اشوف ولى امر الطالب دا بكرة

تشده من دراعه ولا تسحله ؟ زى فيلم الارض ..حرام عليك يا اخى ..الاطفال احباب الله ..دا بيقول انك ضربته بالجزمه فى جنبه ..وانك هبدته على الارض سوبر سوفليكس ..داغير انك شتمته وبهدلته واهانت كرامته قصاد التلاميذ

انا : صح يافندم ..ومسكت المطوة وغزيته بيها ..وجبت جاز وولعت فيه ..وبعدين هبدته سوبر سوفليكس ازاى هو انا ممدوح فرج بتاع المصارعه ؟

الظابط : (ينادى على فرج ) الذى اتى مسرعا ..وهنا ارتعدت فرائصى ...وعرفت ان مكانى محجوز فى العنبوكه ..لكن الظابط قال لفرج.. ابعتلى ازازة ميه عشان اخد برشامه الضغط بتاعتى ..وهنا بدا على فرج الاحباط ..وتنفست الصعداء لانى لم اذهب الى العنبوكه

للحديث بقيه

ميجوووووووو

9 comments:

نيران said...

طب الحمد لله ، الراجل الضابط بياخد ويدي معاك في الكلام اهو

ربنا يسترها معاك..


بس بردو مش عيب تضرب الواد:)

blackcairorose said...

تصدق اننا لسه من يومين كنت بفكر اكتب تدوينة عن معاملة التلاميذ في المدارس الخاصة اليومين دول

والسبب ان اختي اللي بتشتغل في مدرسة مشهورة جدا وغالية جدا جدا في التجمع الخامس بتشوف وبتحكيلي العجب عن عدم قدرتها كمدرسة في انها تعاقب التلميذ مهما قل ادبه واتسبب في تهريج او بوظان

كل اللي تقدر تعمله انها تبلغ الاخصائية الاجتماعية اللي بدورها عادتا مبتعملش حاجة للتلميذ سوى عقاب شكلي مخفف جدا

كل ده بقولك والمدرسة سمعتها معروفة وغالية والاهالي بيجروا يدخلوا ولادهم فيها، ومع ذلك الادارة مش عايزين يزعلوا الاهالي باي نوع من العقاب يتم فرضه على الاولاد مهما عمل الاولاد، فما بالك بقى بالمدارس التانية اللي بتجري على اولياء الامور؟؟

على فكرة يا ميجو

انا اتلخبطت في تعليقي على موضوع رأس المال ومااخدتش بالي ان انت اللي كاتبه مش مشمش

وتحياتي

Anonymous said...

هاها مضحكة طحن خصوصا لما بصلك و قال اشكال زبالة
بس حرام برضو تضرب الولاه كده و تبهدله
أيه اخبار كرنبة عاملة ايه؟ :)

Migo Mishmish said...

نيرووووو
انتى برضو بتقولى ضربت الواد؟
بصراحه الاعلام مزودها معانا اليومين دول وبيعمل من الحبه قبه..مش معنى ان مدرس وحش يبقى كل المدرسين كدا
صح ولا ايه ؟
تحيااااتى ومنورة البلكونه
ميجووووووو

Migo Mishmish said...

بلاك روز
منورة البلكونه دايما ..
انا برضه شغال فى مدرسه عريقه من زمان الواحد بيشوف العجب من الناس دول ..مشاكل المدارس دى دايما مختلفه عن مشاكل المدارس الحكوميه...
مافيش اى حاجه نمسك منها التلميذ ..اطلعه برة الفصل ..الناظرة تقولى عاقبه بس ماتضيعش عليه الدرس ..قال يعنى هو مهتم اصلا ..واهم ميزة بقى فى الجيل دا انهم تنحين تناحه ومتبلدين

على فكرة مشمش هى الى كاتبه موضوع راس المال مش انا ..انتى صح هههههه
تحيااااتى ياروزا
ميجوووووووو

Migo Mishmish said...

بسطاويسى
الله يستر اصلك ياعم ..هى دى الى عجبتك من القصه؟ ماشي ياعم
برضه بتقولى انت بهدلت الواد ليه؟ هههههه
كرنبه ياسيدى بتسلم عليك علطول ..يعنى لا شافت منك شيكولاته ولا بونبونى ..
تحيااااتى يا باستو
ميجووووووو

mary victor said...

يا راجل شغلانة التدريس دى احقررررررر شغلانة فى البلد اليومين دول
لا تطرد برة الفصل و لا تزنب جوا الفصل و لا تضرب و لا تبرق حتى و يجيلك انت الضغط و السكر
و العيال بلمس و كلهم فجأة بقوا حساسين و بيخافوا مع انهم يخوفوا بلد
دى شغلانة تقرف

islamz said...

ظابط بيرغى ويفكر مع واحد معموله محضر ... احييك على خيالك

:] تحياتى

على باب الله said...

منتظرين نعرف بقية الحكاية
: #
و ربنا يستر طريقك يا أبني

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق