Wednesday, April 8, 2009

ابقى قلهم الكلام دا فى القسم


الساعه 10 وربع صباحا .. الحصه الرابعه فى اولى تانى .. ياااه الجدول زحمه اوى النهارده ..مافيش وقت الواحد يشرب شاى ...دا حتى البريك عندى اشراف فى الملعب ...فجأه جانى عم محمود الفراش : الحق يامستر المديرة عايزاك بسرعه ..استاذ حسين هايقف مكانك فى الحصه وانت روح على المديرة ...خير ياعم محمود فيه ايه ؟ ..والله مش عارف يامستر بس الموضوع شكله كبير دا فيه امين شرطه عندها هناك فى المكتب ..خرجت من الفصل وفضلت افتكر ايه الى عملته ؟ يمكن صاحب البيت عملى محضر عشان مادفعتلوش فلوس الاسانسير؟ ماهو راجل حرامى ومستفز وكل شويه يلم فلوس للاسانسير ..دا لو بيبنى عمارة جديده كان لم فلوسها من زمان... ولا يمكن ضربت عيل من غير ماخد بالى ؟ بس انا طول عمرى مش عصبى وماحدش بيستفزنى بسهوله ..دا غير انى ماضربتش تلميذ ابدا طوال مشوارى التدريسى ..انا بصراحه خفت على العده لا يشيلوها ..مع انى ماعنديش تليفون ؟! ....خدت نفس عميق واستجمعت شجاعتى وقلت انت خايف ليه ياواد ..هو انت غلطت؟ اكيد الموضوع فيه سوء تفاهم ...
دخلت مكتب المديرة ولقيت امين الشرطه ماسك فى ايده ورق وبيكتب فيه حاجات ..قلتله خير ان شاء الله ..قالى لو سمحت امضى على الاستدعاء ده ..قلت استدعاء ايه؟ انا مادخلتش الجيش اصلا عشان تعملولى استدعاء ..قالى حضرتك مطلوب فى القسم ..فيه محضر ضدك انك ضربت الطالب مازن مصطفى فى سنه سادسه اول اثناء حصه اللغه الالمانيه ..اتفضل امضي ..ضربت مين حضرتك ؟ انا عمرى ماضربت طالب ابدا ..! ماتقوليله ياسياده المديرة هو انا عمرى جت شكوى منى ؟!!!! رد عليا الامين : ابقى قلهم الكلام دا فى القسم


للحديث بقيه
ميجوووووو

13 comments:

V.Hayat said...

ما تقوليه يا سيادة المديرة انى مدرس عربى مش المانى برضه قول الكلام ده فى القسم ولا اقولك استعين بصديق لمازن عشان يتازل ما هو مفيش طالب اصلا اسمه مازن
هههههههههههههههه

جميل ورائع السرد الجميل

تحياتى

صفا سارة said...

بس واضح انك ضربته جامد عشان كده عمل محضر
:D
الظاهر حصة الالمانى كانت تقيله عليه عشان كده حب ينتقم

المهم صورة ساندو الجديدة جميله اوى
ربنا يخليها :)

Anonymous said...

عالم وسخة تلاقيه مش بيحب الالماني عشان كده عمل المحضر
ربنا معاك و مستنيين اخر التطورات

هى البت ساندو بقت شبه بقلظ كده ليه؟

Anonymous said...

لا مش بقلظ قصدي كرنبة اللى كانت بتيجي يوم السبت

Unknown said...

عزيزي كيف احوالك عساك بخير
اتمني الموضوع يعدي على خير
بس انا عاتب عليك لانك لم تقم بزيارتى ولا مرة رغم اني بطل من بلكونتك بأستمرار
تحياتي والى الامام

AHMED SAMIR said...

طب وبعدين؟
خد بالك الواد دة لو جرى له حاجة انا هاحملك المسئولية كاملة متكاملة

Migo Mishmish said...

حياه
منورة البلكونه
كله هايبان فى القسم ان شاء الله ..
تحياااتى
ميجوووو

Migo Mishmish said...

صفا
والله ماكلمته ولا جيت جنبه ..انا عمرى فى حياتى ماضربت حد
وبعدين الالمانى مادة سهله والعيال كلها بتحبها ..
ميرسي على ذوقك بالنسبه لساندو
تحيااااتى
ميجووووو

Migo Mishmish said...

بسطاويسي
العالم الديرتى كتيييير
وبعدين تقول على البت شبه كرنبه ولا بقلظ ..ماشي ياعم
تحياااتى
ميجوووو

Migo Mishmish said...

medus
الحمدلله انا بخير وميرسي على ذوقك
صدقنى انا باجى عندك علطول ..بس ببقى مش عارف اعلق اقول ايه؟ انت كتاباتك هايله مش بتحتاج لتعليق
بحس انك بتقول الى انا عايزه بالظبط
على العموم هاجى قوام واعلق عندك
منور البلكونه دايما ..اتفضل شايك
تحياااتى
ميجوووو

Migo Mishmish said...

a samir
منور البلكونه
برضه بتقولى ضربته ؟ ياعم احنا الى عايز ناخد حقنا من التلامذه ..المدرس بقت حالته صعبه اوى ياعم تحملنى مسئوليه ايه بس؟
اهئ اهئ اهئ
اتفضل الشاى بتاعك
تحياااتى على اول مرور
ميجوووو

Unknown said...

يا اخ ميجو انا شاكر ليك زيارتك بس لازم تقولى رأيك علشان انا على اساس اراء زوار مدونى على البوستات سواء بالموافقة مع وجهة نظري او الاعتراض بقرر اني اكمل او لا
تحياتي والى الامام

Anonymous said...

Hey Migo, hope everything will work out for you..GBU

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق