Tuesday, June 30, 2009

ربنا يديم المعروف

اسف على التاخير ..كنت فى اجازة من كل حاجه ..من المدونه والشغل والحياه ...بفصل دماغى شويه بعد ان كادت ان تنفجر ..فمهنه التدريس من المهن الشاقه التى تستنفذ جميع القوى الممكنه فى الانسان ..المهم ..من حوالى اسبوعين رحت انا ومشمش نزور والد واحد زميلى عشان كان عامل عمليه قسطرة فى القلب ..زيارة المريض واجبه طبعا ..المهم خدت معايا واجب الزيارة ورحت انا والمدام وساندو ..بصراحه زميلى دا طيب جدا ومحترم ووالده كمان ..كانت القعده زى الفل وكل شيئ تمام ..الى ان جاءت نقطه اللاعودة فوجئت بوالد زميلى يتحدث بطيبه عن العلاقه الجميله بين المسيحيين والمسلمين وان جارتهم الست ام بلبل كانت بتعملهم الكحك و ان زمان مكانش فيه اى مشاكل وووو.....كل دا كويس وانا اقوله طبعا داحنا طول عمرنا عايشين مع بعض فى امان وان اعز صحابى مسلمين وان لو فيه فتنه او مشاكل مكناش قاعدين مع بعض دلوقتى وربنا يديم المعروف احنا اهل ..فوجئت بوالد زميلى الطيب بيقولى بس بصراحه فيه عندكو ناس متعصبين اكتر من عندنا وان الكنايس حاطين فيها اسلحه عشان تموتونا ودخل فى سكه ان الاناجيل محرفه وانتو بتقولو ان ربنا تلاته ..الالالالالاه ايه الى بيحصل ياعم منتا كنت ماشي كويس ..طبعا انا مكنتش برد وبسمع بس احتراما لانه مريض واحتراما لانه فى بيته ..تانى حاجه انا مش متعود انى ارد على اى واحد جاهل ودماغه على اده ..طبعا زميلى حاول انه يغلوش على الموضوع وانتهت الزيارة على خير بالاحضان والقبلات وربنا يديم المعروف احنا اهل ..وربنا يشفى كل مريض ومنجيلكوش فى حاجه وحشه ..نزلت مع زميلى الطيب ووصلت مشمش الى البيت واتصلنا بصديق طيب اخر وذهبنا الى احد الكافيهات ..تحدثنا فى كل شيئ وضحكنا للركب ..الى ان جاءت نقطه اللاعودة ..بدأ زميلنا الطيب يفتح معى سكه مش ولا بد بسؤال : انت حاسس بالاضطهاد ياميجو ..طبعا انا رديت ..ربنا يديم المعروف احنا اهل ..لو فيه اضطهاد مكناش قعدنا مع بعض دلوقتى وانا اعز صحابى مسلمين ومصر فى رباط الى يوم الدين ..وهكذا قالى امال انتو ليه بتقولو ان فيه اضطهاد؟ قلتله هو مافيش بالمعنى المفهوم ممكن تقول فيه تمييز يعنى الاقباط بيتعاملو على انهم مواطنين من الدرجه التانيه ...قالى ازاى مانتو واخدين حقكم فى البلد ..قلتله المقصود بالتمييز انه موجه الى فئه معينه زى التمييز ضد البدو وضد المرأة وضد الصعيد وضدك شخصيا كمواطن مطحون واحنا كفئه من فئات المجتمع معرضين للتمييز ..قالى ازاى يعنى ؟ قلتله حاجه بسيطه مثلا : عندك كام نادى فى مصر ؟ قالى حوالى 16 فى الدورى الممتاز ..قلتله فيهم كام لاعب مسيحى ؟ قالى مانت كان عندك هانى رمزى لاعب الاهلى ..قلتله دا من 20 سنه ..دلوقتى بقى فيه كام واحد ..قالى اللعب دا موهبه و ومالهوش علاقه بالدين ..اتحرق دمى وقلت : بذمتك ال 8 مليون ولا ال10 مليون مافهمش واحد عنده موهبه كرة القدم ؟ قلتله بلاش دى : احنا حسب الكلام الى بيتقال اننا حوالى 10 فى الميه من سكان البلد ..مش مفروض ان يبقى لينا برامج مخصصه لينا فى التليفزيون ؟ مش احنا بندفع ضرايب زى بعض؟ قالى بس احنا اغلبيه ..قلت منا مش معترض على انه يبقى اغلبيه البرامج موجهه للمسلمين طب احنا فين ؟ بلاش دى مش عايزين برامج فى التليفزيون ..هانعمل قناه على حسابنا طب ادونا مكان على النايل سات ..لا ممنوع شوفو الاوروبى ..قالى برضه فين التمييز انا مش شايف اى تمييز ..قلتله طب خد عندك دى ..تقبل ان البابا شنوده يطلع فى مقاله الاسبوعى فى الاهرام يقول ان القرأن محرف ؟ دى كانت البلد ولعت وماقعدتش تانى ..تخيل لما الاهرام العريق يدى مساحه للاستاذ زغلول النجار عشان يكتب عن الاعجاز العلمى ..رد عليا : وانت مضايقك فى ايه الاعجاز ..قلت : ياعم حلو يتكلم على اى حاجه تخص دينه انما ايه دخل الانجيل والتوراة بالاعجاز ..يعنى لازم يحبش الموضوع بكلمتين عن التحريف وان الاديان الاخرى مزيفه ؟ ايه علاقه دا بالعجاز العلمى ..رد عليا بحرقه : بس دى حاجات عقائديه ...قلتله انا معاك ان فيه اختلافات عقائديه بس مش مكانها الاهرام او الاخبار او اى جريده قوميه ..طب الناس زعلت ليه من موضوع الكاريكاتير بتاع الدانمارك ؟ والناس زعلت ليه من فرنسا انها منعت الحجاب ماهم برضه عندهم عقيده ..واليهود برضه عندهم عقيده ما عندهم نصوص عقائديه تخص ارض الميعاد ..وامريكا بالمبدا بتاعك احتلت العراق لاعلاء رايه الصليب ..والبوذيين شويه يشتمو فينا ويقولك المسيحيين والمسلمين واليهود مش عارف ايه ...المهم انتهى الحوار على خير ..وربنا يديم المعروف احنا اهل واوعى تزعل ياميجو ...
تانى يوم ..ماتش مصر وايطاليا الكل فرحان بالفوز ..الكل فرحان لان فيه حاجه بننتصر فيها حتى لو انتصار وهمى الناس مبسوطه لان مصر كسبت ايطاليا بطل العالم ..ياحلاوة ياولاد احنا متقدمين فى حاجه اهو ...سيل من التصريحات المقابلات الحصريه ..الكل يتابع اصداء الفوز ..ياتى الكابتن ابو تريكه ليضرب كرسي فى الكلوب : الفوز هو انتصار للاسلام !!!! بتقول ايه ؟ انتصار لمين ؟ يعنى انا كان مفروض اشجع ايطاليا عشان فيها الفاتيكان ؟ ؟؟؟؟ بتقولى يابو تريكه متشجعش مصر ياميجو عشان دا نصر للمسلمين انما انت لا ..انت مسيحى ومالكش دعوة بينا ..طب ياعم ابو تريكه لما اتغلبنا من السعوديه خمسه واحد ..كان نصر لمين ؟ للاسلام بتاعهم ؟ ولا الاسلام بتاعنا ؟ يعنى هما اسلامهم صح واحنا غلط ؟ طب لما البرازيل بتلاعب ايطاليا هل مسيحيه البرازيل احسن من مسيحيه ايطاليا فعشان كدا ربنا اداهم نصرا مبينا ؟ طب لما البرازيل تكسب كاس العالم يبقى انتصار للمسيحيه وقهر للاسلام ؟ ..على العموم ربنا يديم المعروف احنا اهل

17 comments:

Wandering Scarab said...

I am appalled by the blatant racism of the old guy but I understand where his ignorance comes from. As little Muslim kids we are taught that all other religions are "fake" and that the only "proper" religion is Islam. We are literally told that the only people who will go to heaven are Muslims. To think about it now as an adult, it seems quite disgusting to me, that someone would be devalued because of their faith. I think Muslims in Egypt still have a ways to go before they admit that minorities in the country are being suffocated socially and economically. Oppressors are rarely aware that they are oppressing others; it's the inherent arrogance of oppression.

I am sorry that you had to experience this, and for what it's worth, I am Muslim, and I definitely realize that Christians in Egypt suffer discrimination at the hands of Muslim authorities and institutions. I do hope that things get better some day. My best to you, your wife, and lovely daughter.

Hassan El Helali said...

يا ميجو واحشني

سيبك انت كل البلاليص دي بتردد كلام العراعير
صدقني إنها مرحلة وحاتعدي زي كل مراحل الإضمحلال اللي مرت علي مصر
وربنا يديم المعروف احنا اهل... فعلا مش كلام

Desert cat said...

انا بحسدك انك استحملت ابو زميلك ده
ولا ابو تريكه يا لهووووووى
لما امشى احسن
احنا برضه اهل

Anonymous said...

بس انا فرحان فيك فرحة
رايح تجامل مسلمين؟ طيب أشرب و اتكيف بقى ياحلو

سبحان الله رايح تجاملهم و طالع ذوق معاهم و اخرتها يبهدلوك كده؟

Mowatten Ardi - مواطن أرضى said...

Shokrun ya Migo, post gameel wallahe. Kolena ahl we rabena yedeem el ma3rouf.

El moshkelah en ennass fee masr bet3amel kol wa7ed 7assab deenoh awalan. We tool ma el betakah feeha el deyanah hayefdal el tamyeez wel kalaam el fare3' dah.

Salaam
Mowatten Ardi.

على باب الله said...

تدوينة ممتازة

المشكلة أنهم ها يتهموك أنك عايز تثير الفتنة

أصل القبطي لو قرر أنه يقعد ساكت ها يقولوا ده إنطوائي و مش إجتماعي و يستاهل اللي بيحصل له

و لو اتكلم بصراحة ها يقولوا ده عميل بمبريالي أمريكاني عايز يعمل فتنة طائفية

مش عارف الأقباط المفروض يعملوا أيه بالظيط ... طبعاً خيار ( نبيل لوقا بباوي ) هو خيار إستراتيجي موجود

Migo Mishmish said...

Wandering Scarb
هي فكرة احتكار الجنه سائدة في كل حته
انا مقدرش اكدب واقول ان الموضوع ده مش عندنا
بس انا مقتنعه ان ربنا عامل زي البحر الكبير المشكله بتبدأ لما بنحاول نزنقه في حفرة صغيرة -اللي هي عقولنا
وبعدين انا بحس اننا شعب فاقد للإنجاز ومعندوش اي انتصار او نجاح يفتخر بيه فبندور على اي انتصار حتى ولو بحاجة مش ضمانيها
وكل واحد عايز يطلع لسانه للتاني وخلاص
عمري ما حسيت وانا بتكلم مع واحد من اللي بيرغوا في الدين انه مهتم بابديتي ومصيري
كلهم عاملين زي مندوبين المبيعات اللي عايز يلزقولك المنتج بتاعهم علشان يحققوا التارجيت وياخدوا الكوميشن اخر الشهر
love,
MishMish

Migo Mishmish said...

حسن
منور البلكونه ياجميل ...
مش عارف ياحسن الموضوع شكله هايطول والعراعير بيكترو ..تفتكر الى زينا هاييجى اليوم الى ينقرضو فيه ؟ بص حواليك ياحسن هاتحس انك عايش فى افغانستان بص كميه المتعرعرين اد ايه؟ انت عارف ابو زميلى ده شغلته ايه؟ دكتور فى الجامعه وبيفكر كدا امال العامه والغوغاء والدهماء يفكرو ازاى ؟ انا مش متفائل خااااالص
تحياتى يابو على
ميجووووووو

Migo Mishmish said...

قطه
منورة ياقطه ومتألقه كالعاده
بس اعمل ايه يا قطه فى الراجل دا ؟ بالذمه اروح ازوره عشان عيان يقولى الانجيل محرف وانتو متعصبين بس اعمل ايه بقى كنت قاعد فى بيته وطالما دماغه كدا مايستحقش انى ارد عليه ..بس العيب الحقيقى هو عيب ابو تريكه لانه شخصيه عامه ولازم ياخد باله من تصريحاته ومايلعبش على مشاعر العامه من البسطاء يعنى تصريحه الى قاله بان الفوز على ايطاليا هو انتصار للاسلام لا ينم الا عن ببغائيه شديده وكلام اجوف يتمم ترديده فى المناسبات
تحيااااتى ميجو

Migo Mishmish said...

الكونت دى مونت كريستو
الموضوع مش كدا خالص ..اعمل الخير وارميه فى البحر ...وبعدين انا مكنتش متضايق خالص انا كنت متضايق ان مصر فيها ناس كدا والمصيبه انه دكتور فى الجامعه
تحيااااتى
ميجووووو

Migo Mishmish said...

مواطن ارضى
واحشنا ياراجل
للاسف التعامل فى مصر اصبح على اساس اى حاجه غير الكفاءة والاخلاق والاحترام بقى الموضوع كله بالدين والواسطه واى حاجه تانيه

Migo Mishmish said...

على باب الله
منور البلكونه
للاسف احنا بقينا بنردد اى كلام ببغائى وماشيين زى القطيع ومعندناش ثقافه التعامل مع الاخر مش فى الدين بس لا دا فى كل حاجه جرب تتكلم مع واحد فى الكورة ..وشوف ان ماطلعك كافر فى الاخر ابقى انا غلطان للاسف هى دى ثقافتنا
تحياااااتى
ميجووووووو

أحساس لسه حى ...أنا مش موافق said...

ممكن اللينك اللى جايب منه ان ابوتريكه قال ان الفوز انتصار للاسلام

انا مشوفتش الكلام ده ولا قريته الا عندك

دور وحطهولى فى المدونة

اما بقيت الكلام مش هرد عليك لسبب واحد

انك اتكلمت بمنطق مش موضوعى

زى ما قولت الموهبة فى كرة القدم

ومثلا زيدان اتعرف من بره مصر بموهبته

وكمان اكيد لو فى لاعب كويس هيفرض نفسه زى ما عمل هانى رمزى فى الاهلى

أحساس لسه حى ...أنا مش موافق said...

انا بحثت فى جوجل عن كلمة ابوتريكة ملقتش

ما دى المشكلة الاخبار الكاذبة

تحرى الدقه يا رجل فى اخبارك

ومعلش حاول تجيب مصدر المقولة دى

مستنى

MahaRani said...

حاجة فعلاً تكسف

Anonymous said...

Salaam Ya Migo,
I had a similar experience with an "educated cousin". Last time I saw him, he was about 9 years old.
I met him a few days ago, and somehow, he started a similar conversation about politics & religion!
I was both irritated and shocked to hear his hog wash. By then, I did realize that I have been away for too long. Too much have changed from the UNIVERSAL women uniform to the amazing retarded talk about Christians and Moslems and Jews.
He was offended and resentful when I told him that we are all COPTS as per the ancient Greek Language.
Rest assured , my dear friend that all this is the direct result of the severe failure of this country and its corrupt leadership.
The good news is: Once the economic crisis is gone, all will be back to normal.
The bad news is: No one knows when these thieves will stop in order to get the poor people to live again.

Anonymous said...

Hey this is somewhat of off topic but I was wanting to know if blogs use WYSIWYG
editors or if you have to manually code with HTML. I'm starting a blog soon but have no coding know-how so I wanted to get advice from someone with experience. Any help would be enormously appreciated!

Also visit my website :: cellulite treatment

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق