Thursday, September 10, 2009

وصف مصر

انهيارات ارضيه فى باب الشعريه واسيوط ..مياه جوفيه ومياه مجارى طافحه فى كل شبر ..القمامه تغطى الجيزة والاهرامات ومصر باكملها ..انهيارات الدويقه على روؤس الغلابه .. نشرب مياه ملوثه بجميع انواع الملوثات العضويه والكيماويه ..نروى الخضروات والفاكهه بالمجارى ..كوارث يوميه وقتلى على الطرق السريعه والبطيئه تعادل قتلى الحرب العالميه الثانيه ..مقطورات تدهس الغلابه والابرياء كانها دبابات العدو وتكاتك (جمع توك توك ) مثل النمل او الذباب ..رشوة فى كل مكان وفساد منتشر فى كل الجهات الحكوميه والغيرحكوميه ...انفلونزا الطيور توطنت ..انفلونزا الخنازير تحاصرنا من جهه اخرى ..التيفود عاد الينا من جديد مع صديقته الكوليرا لكن الطاعون غار واتى معهم وفايروس سي وامراض القلب والاورام السرطانيه والفشل الكلوى اصبحت امراض مميزة للشعب المصرى ..فئران اكثر من البشر ..قطط وكلاب مسعورة ضاله منتشرة فى كل شبر ...السلعوة لم ترحل بعد ..تأكل فرخه كبيرة الحجم فتكتشف انها كتكوت محقونه بهرمونات وحبوب منع الحمل ..البان ملوثه بالفورمالين ..واصبحنا نشرب بودرة السيراميك ..والبان الاطفال الرضع المدعمه تذهب الى اصحاب محال الحلويات والى اصحاب النصيب .لانشون وبسطرمه مخلوطه بالفئران والقطط والكلاب الضاله ..زيتون لميع ورنيشي اصلى ..علب الزبادى والكشرى تصنع من مخلفات المستشفيات ولو تبرعت بدمك لانقاذ قريب لك تجد المستشفى تضيف سعر الدم على الفاتورة مع انك متبرع بيه .شباب ضائع مغيب يدخن البانجو والحشيش تائه يبحث عن امل فى الحياه غارق يبحث عن طوق نجاه فى مياه البحر المتوسط... مدارس اشبه بالكتاتيب تكتفى بلافته مدرستى نظيفه وجميله ومتطورة وتحيا الوحده العربيه وجو مصر جاف حار صيفا دفيئ ممطر شتاءالمهم تكون حاطط تكت وجلاد على الكشكول .واصبح التلاميذ تائهين بين التاريخ الميلادى والتاريخ الهجرى والتاريخ القبطى .عمليات بيع الاعضاء على ودنه والكل اصبح يبيع كلاويه وكبده وقوانصه من اجل العيش ولو ينفع نبيع اعضاء مجلس الشعب عشان مالهمش لازمه ..طوابير لانهائيه فى كل مكان طابور عيش وطابور فى جميع المصالح الحكوميه طابور معاشات وطابور السنترال وطابور الغاز وطابورالانابيب والطابور الخامس والتجمع الخامس والتجمع الاول ..بلد يصدر الغاز وبه ازمه انابيب بوتجاز ..بلد يستورد فوانيس رمضان وسجاجيد الصلاه والسبح من الصين ويصدر الخادمات وفكر يوما ما ان يصدر الجثث الى ليبيا ..إعلام يحتفى بزغلول النجار وعمرو خالد والحوينى والجوينى والعوا وماهر الجندى وهشام طلعت والشاب تامر وسعد الصغير ودينا الراقصه ويستضيف علماء امثال عبد العال المدلكاتى خبير طب الاعشاب والشيخ سيد مفسر الاحلام الاول فى العالم ..ويحاوره امثال تامر امين واحمد عبدون ..الصحفيون الافذاذ هم ممتاز القط وسمير رجب ومصطفى بكرى وعبدالله كمال .. اصبحنا نصنع تماثيل للمفتش كورومبو و نتجاهل الدكتور احمد زويل مع اننا نتابع تامر وشوقيه .نحتفى بالكابتن ميدو والكابتن زيدان ونهاجم سيد القمنى .لاعبى كرة يتقاضون الملايين من اجل ساعه ونصف من اللعب ويخرج يقول لك انه يضحى من اجل مصر كأن الاطباء او المدرسين او المهندسين او حتى الزبالين خونه وعملاء لاسرائيل ولاتضحك حينما تجد لاعب يقول لك (انما الاعمال بالنيات ).اصبح بعرور هو صوت الشعب ..ونشيدنا الوطنى تحول الى : انا شارب سيجارة بنى ودماغى عماله بتاكلنى .اللمبى ودبور والسبكى وممدوح فرج تاريخهم افضل من سعد زغلول .اغلقت مكتبه المعهد البريطانى بالضبه والمفتاح بعد ان صرح مديرها : اننا شعب غير صديق للقراءة ..واصبحنا شعب صديق للفلاح مثل ابو قردان الذى انقرض ..انقسم الشعب الى فئات وقسائم وفرق وشيع ويتم تصنيف الفرد على اساس فرقته ..بدو ونوبه واقباط داخل واقباط مهجر ومسلمى المهجر وشيعه وسنه وسلفيين وارثوذكس وكاثوليك وبهائيين وبدون ومعلمو الكادر و اطباء بلا حدود وبنى ادمين بلا وجود وفى ملابسنا نرتدى القميص والبنطلون والجلباب الافغانى والعبايه السعودى والبدله الافرنجى والجلابيه الصعيدى والجلابيه البدوى والشادور الايرانى والنقاب والحجاب والبكينى والبوركينى ولاقينى ولا تغدينى ..الكل اصبح يعلن هويته وفئته بوضوح على السيارات وفى المنازل وعلى الرقاب .الاخ يقتل اخيه من اجل 50 قرش واب يقتل اسرته وينتحر لانه خسر فلوسه فى البورصه ..ام تلقى بابنها فى صفيحه الزباله لانها لاتجد قوت يومها ..اطفال شوارع منتشرين فى كل مكان ومتسولين على كل لون ياباتستا يتفننو فى الرزاله حتى يحصلو على المعلوم ..خطاب دينى يكفر كل من هو مختلف معه فى العقيده .يتحدث عن عذاب القبر و الجحيم المخصص للمذنبين .ويهاجم الاخر .شعب يستفتى كهنته ومشايخه فى كل خطوة يخطوها حتى فى تزغيط البط او دخول الحمام بالرجل اليمين او الشمال ..شعب يعتبر النصب فهلوة والرشوة اكراميه ..يسرق ويقتل ويزنى ثم يذهب ليغسل ذنوبه من جديد .اسرق اقتل انهب بس اياك تقرب من الحجاب .شعب يعيش على البقشيش ..وفتح مخك وكل سنه وانت طيب ..احنا شعب 7 الاف سنه حضارة ..النيل ..العراقه ..الاصاله ..خوفو خفرع منقرع والاقصر بلدنا بلد سواح فيها الاجانب تتنفض وتحرم ترجع تانى وتحولت مصر من هبه النيل الى هبه بنت الجيران اللى ماشيه مع طوب الارض مع اننا حصلنا على صفر المونديال وصفر الجامعات ..اصبحنا لانكتفى بقمامتنا بل بدأنا نستورد قمامه الاخرين ..لم نرضي العرب فنحن فى نظرهم خونه لاننا لم نفتح معبر غزة ولو فتحنا برضو خونه مع اننا خضنا حروب وحدنا من اجل العرب ..و لم نتوغل افريقيا مع اننا افارقه ايضا وتركنا دول تلعب فى امننا الداخلى وتعبث بمنابع النيل وباعضاءنا الحساسه ..النيل الذى لم نعد نستحقه ...فلا نحن عرب ولا نحن اقباط ولا نحن مسلمين ولا نحن اغريق ولا نحن افارقه ولا طولونيين ولا مماليك ولا رومان ولا اخشيديين ولا فاطميين ولا بدو ولا صعايده ولامدنيين ولا انجليز ولا فرنسيين ولاعثمانيين ..كوكتيل ..فخفخينا من بتاعه فرغلى
عزيزى ..بعد هذا الوصف المختصر .. فكر قليلا واسأل نفسك ..هل نستحق الحياه ؟
ميجوووووووووو

23 comments:

Hassan El Helali said...

يا نهارك بازروميا!!! إنت كرهتني في الكره الأرضيه يا ميجو

الواحد كان بيستحمل البلاوي فرادي
جيت إنت حطيت البلاوي بالجمله
كل ما أقرا مصيبه أقول أملنا في حاجه تانيه
الاقيها مشرفه في سطر لاحق

إيه يا عم النصيبه دي؟
هي دي مصر يا عبله؟

يا خساره يا ولاد

عمو عصام said...

مجرد إقتراح ياعم ميجو...مارأيك فى تأسيس جمعيه بإسم جمعية الإنتحار الجماعى على الأقل بيدنا لابيد عمرو أقصد الحكومه

Karim said...

Migoooooo, i've been following u for so long since i noticed u on Hassan EL Helali's Blog which i do follow all the time too but has nothing to say to him cuz he usually says what i want say, anyway i've been following u for so long & i always appreciated & liked ur thoughts but didn't have the courage or idea to comment until this monster of a post.
Migo, let me just say that this post is so real that it scared me way too much to just think of it, all the info are precise & to the point which shows a great deal in writing techniques, if u would allow me, then i would like to take this post & put in a note on the facebook because i would like everyone to see it.
Sorry for writing in english because i currently live in Malaysia & I don't have an arabic keyboard.
Best of Regards to you, Mishmish & Sando, keep it going & never stop.

مستكه said...

هو مين اللي عمل البلاوي دي كلها مش احنا !!

كووولنا بلا استثناء لنا يد في اللي بيحصل ده سواء بشكل مباشر او غير مباشر

يعني من الاخر منعملش المصيبه وبعدها نعد ننعي حظنا

وبدل اللوحة السوداوية اللي اي حد لما يقراها بجد اقل واجب يجيب حبل ويشنق نفسه

نحاول نغير لو كل واحد حاول يغير بجد هتفرق , انا مش متفائله ولا من الناس اللي شايفه الحياه وردي وعارفه ان الامر صعب وهيحتاج وقت طويل

بس بجد الموضوع يستاهل اننا نتغير ونحاول نغير

Migo Mishmish said...

حسن
انا زهقت بصراحه وقلت استخدم طريقه الصدمه والرعب عشان نحس احنا وصلنا لايه مابحبش طريقه الدكتور الى بيقول للعيان انت عندك صداع وبعدها بشويه يقوله عندك التهاب رئوى وبعدها يقوله بصراحه عندك سرطان ميئوس منه ..هى مرة واحده وهى دى الحقيقه ..صحيح صدمه بس هو دا الواقع ومش لازم ندفن راسنا فى الرمل ..مايجيش واحد يقولى انت سوداوى ..زى بتوع الواقعيه فى الافلام الى يقولك لو دخلت خرابه حاول انك تشوف فيها ورده او حاجه حلوة ..الكلام دا لو الخرابه فيها حاجه عدله تتشاف ..يعنى الصح اقعد اقول الله الورده حلوة اوى الله عالجمال واسيب بقيه الخرابه عماله تزيد زباله وقرف ؟ دا منطق
هى دى مصر ياعبله فعلا
تحيااتى
ميجو

Migo Mishmish said...

عمو عصام
منور البلكونه ولو انك ماشربتش حاجه
انا موافق على اقتراحك وياريت تبقى انت المؤسس وانا النائب بتاعك ..ونحدد البرنامج بتاعنا : طريقه الانتحار 1- التهام 10 زتونات بالورنيش لمده اسبوع
2- التهام جبنه بيضاء بالفورمالين على شويه ميه ملوثه محطوطين فى علبه كشرى من مخلفات المستشفى
3- ثلاث ثمرات فاكهه مرويه بميه المجارى مع لبن بودرة سيراميك
4- ركوب ميكروباص خط حلوان رمسيس او الجيزة المؤسسه
5- سندوتش كبده وسجق يوميا من عبده نتانه او ربع بسطرمه ولاتنشون من صلاح وعبد الفتاح او اى نوع احر
تحياااتى
منور البلكونه
ميجووووووو

Migo Mishmish said...

كريم
منور البلكونه ياجميل ..شايك سكره ايه ؟ على فكرة التعليق بتاعك جه فى وقته وخرجنى من احباط كبير ..كنت ناوى انى ماكتبش تانى فى البلكونه حسيت ان مافيش حد بيقرا او يسمع ولقيت مدونين اد كدا مش بيكتبو اى حاجه فى مدونتهم عباره عن هلس وكلام فارغ والناس بتروح تعلق عندهم ..حسيت ان كلامى بروح فى الهوا وبيضيع لكن كنت بنبسط لما بلاقى حد يقولى انا معاك عالخط ..ميرسي جدا ياكيمو على تعليقك وعلى ذوقك ,,انا مش عندى مشكله انك تنزل البوست على الفيس بوك لو ده هايهمك ..بس ماتنساش تذكر المصدر ههههههههههه..منور البلكونه ياكيمو ومبسوط بزيارتك ..ادتنى امل ان فيه حد بيسمع ..ومعلش لو البوست سوداوى شويه بس دا الواقع
تحياااتى
ميجوووووو

Migo Mishmish said...

مستكه
منورة البلكونه
مش عارف اذا كنتى بتهاجمينى او انتى متفقه معايا ..اسلوبك مش واضح
انا راجل عملى ومتفائل ومعنديش عقد نفسيه او اكتئاب ..بس لو واحد القطر هايدوسه ..نقوله لا مافيش قطر ولا حاجه ؟
انا معاكى اننا لازم نتغير ونغير ..انا عن نفسي بحاول فى دايرتى الصغيرة ..بس لازم الناس تعرف احنا وصلنا لايه ..الى شايف ان الدنيا حلوة او معجبهوش كلامى ..او شايف انى سودداوى دى مشكلته ..بس بعد الكلام دا لو هو شايف ان بلدنا بتتقدم بينا ...انا الى هاروح انتحر
ميجوووووووو

عمو عصام said...

ميجو باشا...أظن أن لديك سببا إضافيا لترأس جمعية الباحثين عن الإنتحار وهوأنك متزوج مما يجعلك الأكثر شوقا للهروب من الحياه ثم أن هناك طرق أسرع للإنتحار ومنها متابعة أخبار الحزب إياه والإنطلقه الثانيه للمستقبل التى يمكن تغيير مسارها بسهوله لتصبح الإنطلاقه الأولى للقرافه أو القيام برحله سريعه لحلوان بهدف شم شوية أسمنت تنتهى بتحجر رئوى الذى يؤدى للموت وألقاك فى الآخره...سلااااام

semsem said...

ازيك يا ميجوووو و ازاى مشمش و ساندو؟
اللى خلانى اعلق على البوست ردك على كريم.
على فكرة فى ناس كتير اوى بتزورك فى البلكونة بس مش بتعلق و انا واحدة منهم. انا تقريبا بزوور البلكونة كل يوم.
keep going u & mishmish !!
اما عن البوست دة انا مش شايفة خالص انك سوداوى انت قلت الحقيقة و قلت اللى بنقراه فى الاخبار كل يوم.
على فكرة انا سايبة البلد قريب و مش عارفة المفروض ازعل و لا افرح.
بس من يومين سألت جوزى انت متأكد من قرار السفر؟؟ قالى اللى شفته فى الكام شهر اللى فاتوا فى المصالح الحكومية يخلينى اتمسك اكتر بفكرة السفر.
مش عاوزة اطول عليك بس انا عاوزة احكى موقف حصل معايا.
الاول انا من اسكندرية. ناس سافروا قبل كدة قالوا لى على الخطوات و قلت اعمل زيهم.
رحت لمكتب التطعيمات و دخلت للدكتورة المديرة قلت لها لو سمحتى انا مهاجرة و محتاجة ورقة للتطعيمات عشان اوديها وزارة الصحة فى القاهرةقالت لى " لا لا مافيش حاجة زى كدة روحى المنطقة فى سموحة و اسألى" . لفحت الواد مون مون على كتفى و رحت سموحة و من مكتب لمكتب فى الاخر وصلت لموظف ابن حلال قالى لا انتى مش محتاجة ورقة خالص كراسة التطعيمات كفاية خديها و سافرى القاهرة. قلت له ازاى حضرتك ؟ ناس عملوها كدة؟ قالى لا همامقالوش المعلومة ليكى صح.
مكدبناش خبر و جوزى سافر على القاهرة. جت الموظفة قالت له فين الورقة؟؟
قالها ورقة ايه سيادتك مش الكراسة كفاية ؟؟ قالت لا لازم ورقة من مكتب التطعيمات او ممكن يكتبوا على ضهر شهادة الميلاد.
و رجع جوزى تانى بدون اى فايدة
لفحت الواد مونمون تانى و رحت مكتب التطعيمات الفراشة قالت لى داخلة للمديرة ليه؟ قلت لها عاوزة ورقة للتطعيمات اترجمها قالت لى " لا لا مافيش حاجة زى كدة" طبعا انفعلت و قلت لها هادخل يعنى هادخل
دخلت و كنت عاملة زى بطوط فى الافلام الكرتون لما بيطلع دخان من ودانه
اول ماشافتنى من غير و لا كلمة خدت من ايدي شهادة الميلاد و عطيتها لدكتورة صغيرة قالت لها اكتبى لها التطعيمات.
الدكتورة الصغيرة كتبتها اى كلام. لما بصيت عليها قلت لها حضرتك التطعيمات مش مكتوبة بالتفصيل، ردت عليها الدكتورة الكبيرة قالت لها لا اكتبيها بالتفصيل عشان هاتترجم "يعنى هى من الاول عارفة كل حاجة" !!!!!
حسيت ساعتها انى سأصاب بالفالج "اللى مش عارفة هو ايه"
يعنى الموضوع دة حصل مع دكتورة كبيرة فى السن مثقفة. السؤال اللى بسأله لنفسى
لما دة بيحصل المفروض من الناس اللى فاهمة و المفروض انها خايفة على البلد. متوقعين ايه من باقى الشعب ؟؟
عاوزة اقولك انى حتجزة التذاكر من اربع شهور و بادية انى اخلص فى الورق الحكومى من ست شهور و لغايه دلوقتى لسة مخلصتش و اضطرينا ان احنا نرجع التذاكر.
ماشربتش من نيلها ؟؟ جربت تغنيلها؟؟

Migo Mishmish said...

عمو عصام العزيز
تفتكر كدا انى ممكن ابقى رئيس مجلس الادارة ؟ هاتبايعنى ؟ اوكيه انا عندى افكار كتير ممكن ننفذها ..بس اقتراحاتك فيها حاجات مش مظبوطه ..اولا لو اتفرجنا على اخبار الحزب اياه هايجيلنا شلل ومش هانموت وده هايبقى تعذيب مش انتحار واهم حاجه فى جمعيتنا هى ان الوسيله المقترحه تكون مميته فورا وتكون وسيله للقتل الرحيم ..انا معاك فى موضوع حلوان بس حاسس انه هايبقى تعذيب برضه عايزين موته سريعه لان الاسمنت هايعمل تحجر والتحجر هايسبب السرطان والواحد على مايموت هايكون اتعذب ..يمكن حته الانطلاقه للمستقبل تعمل موت مفاجئ ونعمل انطلاقه للقرافه ..انا متفق معاك فى دى
ميجووووووو

Migo Mishmish said...

semsem
تحياتى وشكرا على ذوقك ..صدقينى انا فعلا جالى احباط من ان المدونه مش جايبه مفعول ..حاسس انى بكلم نفسي ومحدش سامعنى لكن كلامك انتى وكريم ادانى امل من تانى
..بالنسبه لموضوع سفرك ..انا عارف شعورك دلوقتى وانتى مسافرة ..حاسه انك فقدتى عزيز ليكى ودفنتيه ونفسك تشوفيه بس هو خلاص مات ومفيش امل يرجع ..اتكلى على الله ياسمسم انتى وعائلتك ..بلاش عشان خاطرك انتى وجوزك ..عشان خاطر عيالك يبقى ليهم مستقبل ..لان مستقبلهم هنا مظلم جدا جدا
تحياااتى
ميجو

عمو عصام said...

عزيزى ميجو...بعد ردك على (سمسم)ومحاورتها بهذه النعومه أعتقد أنك لن تحتاج للإنتحار أصلا فهناك من سيقوم (الأصح ستقوم)بقتلك

^ H@fSS@^ said...

ايه ده يا ميجو
انا قلبي وجعني و قولوني قفش من بعد ما قريت
انا مش عارفة احنا رايحين على فين
انا اكتئابت بزيادة
:(

Migo Mishmish said...

عمو عصام العزيز
بعد التحيه ،
من المخابرات العامه المصريه الى عمو عصام شكرا على حسن تعاونكم معنا ..ونحب ان نخبركم ان مراتى مسافره لمده 5 ايام وهاعمل حفله ..الى اللقاء فى جولات اخرى ..وبلغ ابو رابين ان ميجو هايلعب معاه الجوله الجايه
تحيااااتى اتفضل عرقسوس
ميجوووو الشوان

Migo Mishmish said...

حفصه العزيزة
منورة البلكونه ..مكن نجيب نعناع بدل الشاى عشانالقولون الى قفش ده
مش دى الحقيقه ياحفصه ولا انا قلت حاجه غلط ؟ مش هو ده واقعنا ؟ انا مش متشائم او ببص من منظار اسود ..بس ليه نرضى بالقرف دا ؟ تفتكرى احنا نستحق ده ؟ هما اليابانيين اجدع مننا او الغرب او اى بلد فى العالم ؟هما مش بشر برضه زينا ..امال ليه بقى نرضي بالواقع ده اى مصيبه من الى كتبتهم فى البوست تقلب بلد ومتقومهاش واحنا عادى عادى مافيش مشاكل ولا بتتهزلنا شعره ..احنا فالحين بس نتعاطف مع غزة ومع دارفور ومع اى حد بس معندناش استعداد نتعاطف مع نفسنا ..ايه القرف ده ؟ كل ماتطلع بارقه امل تطلع حاجه تطفى الشعاع الصغير ..عشان كدا حبيت انى اكتب البوست ده مع انه سوداوى بس كان لازم اكتبه عشان نعرف احنا وصلنا لفين
تحياااااتى
ميجووووو

Desert cat said...

وانا معدتى قلبت فجأة ليه اتارينى لسه ضاربة زبادى والعلبه مصنوعة من مخلفات ايه بقتلو يا ميجوووووووو يا نهار مدوحس
كله كوم يا عزيزى والحجاب كوم تانى
انت ادخل اى مصلحة حكومية وشوف الست المنقبة بلاش المحجبة وهى فاتحه لك الدرج على مصراعيه لو مش حطيت المعلوم يبقى فوت علينا بكره يا سيد ميجووووو
وعجبى على بلد المتناقضات

تحياتى

Desert cat said...

فين صورة ساندو يا ميجو مش شيفاها ليه فى البلكونة
بلييييييييز رجع ساندوا البلكونة تانى مش تخاف عليها من المعاكسات اللى هيعكاسها هغزه لك مش تقلق

احساس لسه حى said...

اكيد بدل بنكذب زيك وننشر اخبار غير صحيحه

ولما حد يواجهنا بنهرب ومنردش

يبقا نستحق ضرب الجزم مش الحياه

والتعليق تانى

يعنى انت قولت كلام محصلش

ولا عرفت ترد على كلام تريكة وتقولى انت جيبه منين

وطنشت

فين بقه الاضطهاد اذا كان اخبارك مش صح وكاذبة

والتعليق تانى اهو اللى طنشطه فى الموضوع اللى فات

ممكن اللينك اللى جايب منه ان ابوتريكه قال ان الفوز انتصار للاسلام

انا مشوفتش الكلام ده ولا قريته الا عندك

دور وحطهولى فى المدونة

اما بقيت الكلام مش هرد عليك لسبب واحد

انك اتكلمت بمنطق مش موضوعى

زى ما قولت الموهبة فى كرة القدم

ومثلا زيدان اتعرف من بره مصر بموهبته

وكمان اكيد لو فى لاعب كويس هيفرض نفسه زى ما عمل هانى رمزى فى الاهلى



وعلقت تانى وقولت



July 12, 2009 6:39 PM
أحساس لسه حى ...أنا مش موافق said...
انا بحثت فى جوجل عن كلمة ابوتريكة ملقتش

ما دى المشكلة الاخبار الكاذبة

تحرى الدقه يا رجل فى اخبارك

ومعلش حاول تجيب مصدر المقولة دى

مستنى

مش قادر تجيب المصدر يبقا متقولش تانى اضطهاد

عنب

Migo Mishmish said...

معلش ياجماعه مضطر ارد على الفسل الحشرة الى اسمه معندوش احساس ..
اولا انت غير مرحب بيك فى البلكونه لان الى زيك اوباش ..انت حثاله المجتمع وطفله الحشرة على رأى اللمبى ..الى زيك دماغهم محشيه جزم بنى برباط ..ومش من حقهم يتكلمو لان افكارهم محتاجه بامبرز ..انت كفايه عليك غسيل المخ الى معمولك من الحوينى والجوينى وحسان والناس الى بتعمل إإح فى دماغك ..انت لا تستحق الرد اصلا عليك لانك شبطه وزنان وعامل زى الدبانه الرخمه ..لو مش عاجبك البلكونه متوريناش وشك تانى لانك مجرد كلب معندكش اى فكرة ..بالذمه حد بفتح مدونه عشان يسشتم واحده ؟ فين افكارك يامتعفن الفكر ..اسف انت مش متعفن الفكر انت معندكش اصلا ..انا واثق من شكلك كويس اكيد لابس جلابيه قصيرة وبنطلون مشموط وحاطط سواك فى بقك طول النهار وبترد عالتليفون تقول سلامو عليكو صح ؟ انا عارف الاشكال دى كويس ..ريحتهم بتبان ..وابقى سلملى على السعوديه الى غاسله مخك ومخلياك عرعور على رأى حسن باشا الهلالى ..على فكرة دا كان اخر تعليق ليك عندنا فى البلكونه ..معلش اصل انفلونزا الخنازير منتشرة اليومين دول
تحياتى
الى اللقاء ياللى معندكش اى نوع من انواع الاحساس
عمك وسيدك وتاج راسك ميجووووووووو

Desert cat said...

تصدق يا ميجو انت ضيعت وقتك الغالى فى الرد على متسلق ومتحزق قصدى اللى بيحزق عمال عى بطال عديم الاحساس ده
اصل ده فعلا واحد عبارة عن شوية زبالة لازقة فى كعب الجزم بتاعتنا
وكل لما نضف الجزم تيجى تلزق تانى
هذا الكلب المعدوم الاحساس مش مكفياه اصلا مدونة الردح اللى فاتحاها عنده وكل شوية يدخل يحزق فيها ويرجع الزبالة اللى بياكلها من الشوارع واللى بيحشى بيها دماغه اللى بدل المخ اللى فيها بدله بمقلب زبالة معفن
لاء كمان بيجى يكتب ردود كل يوم فى مدونتى ومن مجرد ما بشوف الاسم بحذفها لانى بخاف على عينى تقع على زبالته اللى بتكون فى الردود وبالرغم من كدا برضه زائر رخم قليل الادب ودائم برضه
يعنى تفتكر واحد زى ده يا ميجو ينفع يتعمله اعتبار وتضيع وقتك الغالى فى كتابة كلمة واحدة ليه ؟؟
ده حتى الرود دى على ما اعتقد انها بتفرحه وتزيد من وزنه المترهل اكتر واكتر اصل فى شوية حيوانات كدا مش بتعرف تعيش من غير ما تتهزأ

Mohamed Magdeldin said...

im not a follower to your blog,so i took some time looking through before i post this comment.

in terms of entertainment, you get a really nice grade for this post and the gardal idea.. but tryin to put some national purpose behind writing it is a bunch of bullshit.

the reason blogs can add a positive contribute to our lives and to our nation,for your information is to open a medium to discuss issues constructivly and look for reasons behind problems and finding solutions.

im sorry but you are just another whining baby,in a country with few men left standing.

Anonymous said...

بسيطة وحلوة. أنا أفكر في بداية آخر بلوق أو خمسة في وقت قريب جدا ، وسوف تنظر في هذا الموضوع بالتأكيد. م تبقي 'القادمة!

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق