Sunday, December 27, 2009

مين الحمار ؟


الأجهزة الأمنية استطاعت مصادرة جميع الموبايلات التى صورت الحمار..
كتابة لفظ الجلالة على حمار يتسبب فى فتنة بأسيوط


مسابقه اليوم : من هو الحمــــــــــــــــــار ؟

1- اللى نشر الخبر

2- اللى كتب على ظهر الحمار

3- الامن

4- اللى صدق الخبر وخدته الحماسه وعلق عليه

5- اللى حاول ينتقم من الاقباط ومن الحمار

6- اللى دخل على اللينك ليقرأ المقال

7- الحمارنفسه

8- جميع ماسبق

اتصل الان على رقم : زيرو تلات رفسات تسعميه ..لتحصل على بردعه هديه وحملين برسيم
تحديث : اتضح ان الشاب عمره 16 سنه وكتب على الحمار ( الله محبه ) والمعروف ان هذه الجمله معتاده عند المسيحيين ..لكن بعض الناس اعتقدو ان كلمه محبه (محمد ) مما اثار الفتنه ..يعنى واد حمار راكب على حمار فقام قابل جماعه حمير مش بيعرفو يقروا ..فقامت الفتنه ..شفتو الهنا الى احنا فيه؟ معلش ياحمار ظلمناك والله اننا شبهناك بناس زى دى على رأى عمو عصام
تحيااتى

ميجو الحصاوى

20 comments:

على باب الله said...

الحمار هو كل ماسبق

Mina said...

هههههههههههههههههههههههههههههههههه
لا ياعم انا مالي
لو قلت مين الحمار ممكن الحمار يزعل
وانا ماضمنش زعله
ده حمار شراني مايتضمنش

Anonymous said...

الحمار اللى نشر الخبر

الحمار اللى صدقه

والاحمر منهم اللى هيجروا يحرقوا بيوت المسيحيين وينهبوا محلاتهم علشان مبيفكروش بالمخ اللى ربنا اداهولهم

تحياتى
لورا

صوت من مصر said...

اظن انها افتكاسه بايخه جدا

Migo Mishmish said...

على باب الله
ربنا يفتح عليك
انا قلت كدا برضه
تحياااتى
منور دائما
ميجووووو

Migo Mishmish said...

manamino
بقى هو برضه الى حمار ؟ ولا اللى مستحمرهم ؟ وعايشين ولا فى بالهم ؟
متخافش ..مافيش حمار بيخش المعتقل ..البنى ادمين بس
تحيااااتى
منور البلكونه
ميجووووووو

Migo Mishmish said...

لورا
بالذمه مش حرام ينشرو خبر زى ده مش منطقى ؟ هو احنا ايه حمير ؟
تحياتى
ميجووووووو

Migo Mishmish said...

صوت من مصر
طبعا افتكاسه بايخه ..زى اتنين سواقين ميكروباص واحد مسيحى والتانى مسلم يتخانقو مع بعض وواحد يقتل التانى فيرجع ويقلوك مصرع سواق مسيحى او مصرع سواق مسلم ..دى جريمه عاديه
انما الخبر المنشور ده استهبال مش بيحترم الناس ..يعنى واحد عايز يغيظ المسلمين يقوم يخش مثلا الجامع ويشتم الناس الى بتصلى ؟ او يعمل زى الراجل ده ؟ دا يموت فى ساعتها ..ازاى واحد يعمل كدا الا لو كان زيه زى الحمار الى راكبه ؟ واحد راكب حمار فى القرن الواحد وعشرين اكيد مبيعرفش يقرا وجاهل يا اما حد عملها فيه مقلب او بيستهبل معاه ..او اشتراه كدا من واحد جاهل كان كاتب الكلام من غير مايعرف انه حرام ..فيه الف سيناريو غير الى حصل ..وحتى لو عمل كدا يبقى يتعاقب ..مش نجرى ننتقم من المسيحيين ..يعنى لو واحد اسمه حسن او محمد سرقنى مثلا اقوم اولع فى المسلمين كلهم ؟
تحياااتى
ميجوووووووو

نيران said...

السلاااام عليكم

ازيكم وحشتوني اوي

بعيدا عن كل الحمير المذكورين في البوست

سوري اني مش كنت باعلق الفترة اللي فاتت نظراً لتشريف البرنسيسة مريم الدنيا :)

مع اني كنت متابعة
بس يعني كان صعب اني اعلق


تعليقي بقى على البوست دا

كلهم حمير احمر من الحمير نفسها

مع كامل الاحترام للحمير يعني

:) تحياتي
ممكن واحد حلبة بقى عشان ما باشربش الشاي

Anonymous said...

عيب يامجو تشبههم بالحمير...هو فى حمير وسخه كده؟؟

عمو عصام said...

عيب ياميجو تشبههم بالحمير...هو فى حمير وسخه كده؟؟؟

Anonymous said...

الحمار اللى نشر الخبر كان بياكل ايه اكيد مش برسيم فريش غالبا برسيم معلب والمواد الحافظه اثرت عليه

ايه جاب كلمه محبه لمحمد ؟
طيب هيا محمد تبقى الشهاده كامله؟؟؟

لورا

م/ الحسيني لزومي said...

عام سعيد وكل عام انتم بخير
نحن مقبلون علي لحظات حرجه في تاريخ مصرنا
انتخابات مجلس الشعب 2010
انتخابات الرئاسه 2011
هل اعددت نفسك لتقول كلمتك
هل سجلت نفسك في الجداول الانتخابيه
اذا كنت قد سجلت نفسك ادعو غيرك
الحمله الشعبيه للقيد بالجداول الانتخابيه
باقي من الزمن30 يوم

^ H@fSS@^ said...

ده لننا عايشين في مجتمع حميري
و حالة الاحتقان عنده عالية فاقل شكة دبوس هبلة تعمله مصيبة
والنبي خليني ساكته انا هاين عليا افجر قنبلة نووية و نخلص

كل سنة و انت طيب
2010 سعيدة من غير حمير
:D

Hassan El Helali said...

هو أساسا آنا مش فاهم ايه يخلي واحد حمار يكتب أي حاجه علي حمار علشان يلف بيه وسط الحمير ويخلي الحمير تتكلم وتصور وتنشر وتسخن وتكسر وتحرق؟

بجد الموضوع بقي فعلا عاوز زريبه مش بلكونه

كل سنه وانتم طيبين يا ميجوووووو ويا مشمش
ويحرمنا جميعا من البرطعه البغالي العرعوري

Migo Mishmish said...

حسن ياهلالى
الملافظ سعد ياعبد العال ..(عايز زريبه مش بلكونه ) ربنا يكرمك ياشيخ ويستر اصلك ..انت شفتنى برفس ياعم ؟

Mafrousa said...

انا جاية اقول كل سنة و انتم طيبين
و عيد سعيد عليكم يارب
و بلاش تقفوا فى البلكونة كتير لا تاخدوا برد
كل سنة و انتم طيبين و بخير

Mafrousa said...

طيب انت كده فرستنى
هههههههههههههه
انا رجعت تاني علشان ساندو
كل سنة و هيه طيبة و بخير يارب
و تشوفوها احسن ساندو
تحياتي

Migo Mishmish said...

نيران
الف حمدالله على السلامه بوسيلنا النونو كتير ...وعندك واحد حلبه ممتااااازة
كل سنه وانتى طيبه
ميجوووو ومشمش

Migo Mishmish said...

لورا
منورة البلكونه ..فعلا هما كانو بياكلو برسيم مش نضيف
تحياااتى
ميجوووو

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق