Thursday, April 30, 2009

حرقه دم

اغتصاب سيده عجوز سنها 97 سنه : كان معجب بالطقم ولا ايه؟..الدهن فى العتاقى ...وانا اقول صباح عماله تتجوز عمال على بطال ليه ؟ لا حول ولا قوة الا بالله
حادثه القطاميه بتاعه التريلا : البانجو سيد الموقف
تفويت الزمالك للاسماعيلى : عادى ...واحده وعشيقها متوقعين ايه يعنى ؟؟
استهبال الحكام : بتكلم عن حكام الكورة مش حاجه تانيه ..ماحدش يفهمنى غلط
لا علاوة سنويه ولا اجازة للعمال : الحمدلله مافيش علاوة ..ماهو كانو بيغلو الاسعار بعدها
اعدام الخنازير: ..مع ان الخنازير مبرطعه فى البلد ..لا والى يضحك بقى ان فيه ناس خدتها من ناحيه الدين برضه ..يعنى بعض المسلمين قالت شفتو حكمه ربنا فى تحريم اكل الخنزير ؟ ..طب مالفراخ برضه جالها ..وبعض المسيحيين قالو ازاى يموتو الخنازير .. دا اضطهاد ..
الجزمه الجديده بتاعه مشمش اتقطعت مع ان بقالها اسبوع بس ..
خصم يومين من مرتبى لان طالب عندى زقنى وقالى هاجيب بابا ينفخك ..وانا بقول لكل شاب وكل فتاه ..لو طالب عندك شتمك وضربك ..بوس ايدك شعر ودقن ..وقوله انا اسف حقك عليا عشان ميتخصمش منك يومين
فيلم دكتور سيليكون ..وفيلم علقه موت ...رجعنا تانى للايام دى ؟؟
قضيه حزب الله وتوابعها : ياعم نصر هو احنا ناقصينك؟ روح جاهد فى حته تانيه سيبنا فى الهم الى احنا فيه
الغاء برنامج حمدى قنديل ( قلم رصاص ) : الظاهر خدوا منه البرايه
للمرة الالف فيلم الطريق الى ايلات فى عيد تحرير سينا : ياريتنى كنت معاهم
بتاع السجاد الى تحت بيتنا مصمم برضه ياخد الشارع لحسابه
الراجل صاحب العمارة : كل شهر يلهف مننا فلوس جديده للاسانسير ..قمه الابتزاز
تقليل ميزانيه الزراعه والرى : قال يعنى احنا كنا بنزرع اوى
الداخليه طلبت زياده الميزانيه لمواجه الاضرابات : معاهم حق الاضرابات كترت اوى فى البلد
البامبرز بتاع ساندو بقى مكلف جداااااا ..بفكر اقعدها عالبوووتى من دلوقتى
احمد زويل مستشار لاوباما : احنا مش كرمناه بقى وحطينا موضوع عنه فى كتاب القراءة؟
اتقلبت انا وساندو فى الشارع وايديا ورجلى اتبهدلو من الوقعه بس الحمدلله ربنا ستر... وكله من واحده غبيه ماشيه فى الشارع بتتفرج على المحلات
سعيد البواب فى العمارة الى قصادنا ساب العمارة ومشي بعد ماسرق ممسحه وشرشوبه وجردل تمنهم 45 جنيه
وضرب خمسه جنيه كمان من ساكن كان مفروض يديهم للزبال ..
جارنا الرخم بييجى كل شويه يسأل على الجرنال بتاع النهارده ..طب مايشترى
ميجوووو المحروق دمه

Tuesday, April 14, 2009

امن دوله


بعد ان ابتلع الظابط الشاب حبوب الضغط ..سالته .. يافندم هو مش مفروض تسألو المدرسه وتسألو المدرسين والطلبه الى فى الفصل وتتحققو من الواقعه ..دى تهمه كيديه ياباشا ..رد عليا الظابط الشاب : احنا مش فاضيين للحاجات دى ..احنا بنتعامل مع المستندات والورق الرسمي ..يعنى الولد عمل محضر رسمي ..وحظك انه معملش شهاده طبيه ..دا لو عملها وجاب تقرير فيه اصابه اكتر من 21 يوم علاج يبقى انت رحت فى داهيه ياحلو .....انا عايز اساعدك عشان انت شكلك ابن حلال ..والواد بيفترى عليك ..اصله لما جالى هو وامه حسيت انه بيكدب لانه مكانش فيه اى اصابه وحسيت من كلامهم انهم كدابين وعايزين يقرفوك وخلاص..اصل انا اعرف الاشكال دى من وسط ميت مليون واحد ..الخبرة بقى ...بقولك ايه سؤال بصراحه .. انت مسيحى؟
انا: ودى هاتفرق فى ايه يافندم؟
الظابط :لا تفرق كتييييير ياحلو
انا : قصدك انك ضربته عشان انا مسيحى وهو مسلم؟ .. بس انا ماضربتوش اصلا ولو ضربته هاضربه عشان واد قليل الادب ومش متربى مش عشان هو مسلم ..انا عمر فى حياتى ماتكلمت فى الموضوع دا او اتعاملت على اساس الدين
الظابط : انا مصدقك انك ماضربتوش ..بس لما ييجو تانى هاظبطهملك
انا : ازاى ياباشا؟
الظابط : اول ماييجو تانى هاقولهم ان طرفيى المشكله هايتحولو لامن دوله عشان القضيه خدت بعد تانى ..المدرس مسيحى وانتم مسلمين ..وكدا لازم تتحول لامن دوله ..ودا مش فى مصلحه ابنك
انا : وفعلا الكلام دا؟
الظابط : طبعا ..لو فيه اى مشكله بين مسيحى ومسلم علطول بتتحول لامن دوله حتى لو كانت عاديه
انا : بس انا مش عايز العب بالكارت القذر دا ..دا غير ان الست نفسها ممكن تلعب على الوتر دا وتقول انى ضربت ابنها عشان انا متعصب
الظابط : الغايه تبرر الوسيله ..انت شكلك ابن ناس ..ودول عالم لبط مش هاتسلك معاهم ..يعنى ممكن يتبلو عليك ويقرفوك ..وانت الخسران ..واضح ان ام الواد هى الى سايقه الدنيا وجوزها فى الطراوة ..ممكن تقولك دا المدرس اتحرش بابنى فى الحمام ولا عمل معاه مصيبه ..وساعتها يبقى انت مستقبلك ضااااع ..وحلنى بقى على ماتثبت ..ولو اثبت انك بريئ ..هاتكون سمعتك باظت ..هنا الناس مابتصدق تشبط فى اى قصه ..
انا : يانهار اسود ..دنا مكنتش شايفها كدا خالص ..اعمل الى شايفه ياباشا
الظابط : عليك نوور انت كدا فى السليم ..سبنى اخوفهملك و هاجبرهم على الصلح ..وهاخليهم كمان يبوسو ايدك عشان تتنازل انت عن المحضر ..انا متغاظ من الواد ابن الكلب دا انه قالك ابويا هاينفخك ..امال احنا بنعمل ايه؟ احنا الى بننفخ بس
انا : ولو انى مكنتش احب انى العب بحته الدين دى لكن طالما هايبقى كدا وكدا يعنى ..خلاص
الظابط خلاص روح انت وتعالى بكرة وهاكون ظبطلك المسأله ... بقولك ايه صحيح .. انا عايزك تدى درس للواد ابن اختى هو فى اولى ثانوى ..اصل المدرس بتاعه مش بيشرح كويس ماشي ؟
انا اوكيه ياباشا ..ومتشكرين على المساعده ..
الظابط : لاشكر على واجب ..بس ماتنساش بقى موضوع الواد ابن اختى
خرجت من القسم وقد تغيرت نظرتى الى المتهمين فقد كنت اتعامل معهم بنظرة مسطحه تصدرها لنا وسائل الاعلام ..وتعلمت الا اصدر اى احكام مسبقه على اى متهم ..فلم اكن اعلم ان مشاهده الممثلين على المسرح من وسط المتفرجين مختلفه تماما عن مشاهدتهم من الكواليس ..

Sunday, April 12, 2009

فى القسم -2


انتهى الظابط الشاب من النشال وفتحيه بتاعه الدائرى ..استعديت ان انهض من مكانى ..لكنه اشارلى باصبعه ان اظل جالسا مكانى ..امسك الموبايل وتحدث مع شخص اخر فهمت انها زوجته ...

الظابط : ايوة ياستى عامله ايه؟ ..اه انا لسه فى القسم ..اشكال زباله وشغلانه تقرف ( نظر لى نظرة ذات مغزى ) لا ماتعمليش حسابى على الغدا هاخلص النوبتجيه متأخر ....الواد ميدو ابن الكلب عامل ايه؟ بيذاكر ؟ قوليله ابوك لو جه ولاقاك مش مذاكر وعامل واجباتك هاينفخك ..طيب .......ايه فلوس ايه؟ هو المدرس بتاع الساينس دا مابيشبعش ( حمدت ربنا انى مش مدرس ساينس) هو مش لسه قابض الحصه الى فاتت الهى عزرائيل يقبض روحه ..انا هالاحق على ايه ولا ايه ..اسرق يعنى ؟ طب وحياه امه لاسحبه عالقسم بس لما الامتحانات تخلص ...طيب خلاص بقى ورايا شغل سلام سلام ..اشار لى بالقيام ...وجلس هو على المكتب

الظابط: ايوة ياسيدى

انا : حضرتك انا جالى استدعا عشان فيه محضر معمول ضدى

الظابط : محضر ايه ؟ سرقه ولا قتل ؟

انا : لا ضرب تلميذ

الظابط : هو انت بقى الى ضربت الواد بتاع سنه سادسه؟ اهلا وسهلا

انا : الله يسلمك ياباشا

الظابط : وضربته ليه بقى ؟ مش حرام عليك ؟ كل يوم تموتو عيل دانتو افتريتو قوى

انا : ياباشا انا عمرى فى حياتى ماضربت تلميذ ..بذمتك دا منظر واحد مفترى ؟

الظابط : يعنى هو هايتبلى عليك ؟تلاقيك ضربته عشان ياخد معاك درس

انا : طب اشمعنى هو يعنى ؟ ما فيه غيره كتير فى الفصل

الظابط :طب ماتقول لنفسك ..هو هايقول كدا ليه يعنى ؟

انا : الحكايه كلها انى كنت عندهم فى حصه ..والحصه كان فيها امتحان شهر ..الواد دا بقى كان عاملى زى الفرقعلوز ..عمال يتنطط ويغش من زمايله ..ويغششهم ويستظرف ..كان مبوظ الحصه ..حذرته كذا مره وقلتله يابنى اسكت بدل ماخد ورقتك ..هعمل اكس على ورقه الامتحان ..مافيش فايده

الظابط : تقوم تضربه وتبهدله ..دا عيل يا اخى ..انت ماعندكش عيال ؟

انا :صدقنى ماضربته ..انا نبهته كذا مرة وهو مش عايز يسكت

الظابط : ماتسقطه فى السلوك ..مش عندك اعمال سنه

انا : اعمال سنه ايه بس ياباشا ..دى اتلغت من زماااان

الظابط : مافيش اى عقاب تانى ؟ احرمه من الفسحه او احرمه من الالعاب

انا : لو حرمته من الفسحه هاضطر اقعد معاه دا غير ان ممكن يكون عندى حصه ساعه الفسحه ..ولو قعدت معاه هايطلع عينى عشان يقرفنى ويخلينى احرم اعاقبه تانى ..يبقى انا عاقبت نفسي قبل ما اعاقبه

تقوم برضه تضربه ؟

انا : برضه بتقولى ضربته ؟

الظابط : امال انتو بتعاقبو العيال ازاى ؟

انا : اعاقب مين يافندم ..احنا الى بنتعاقب مش هما ..

الظابط :والله عندك حق ..الواد ميدو ابنى مطلع عينى ومغلبنى معاه مش عارف اعمل معاه ايه

انا : ربنا يخليهولك يافندم

بس برضه تضرب الواد ليه مش حرام عليك ؟

انا : برضه تانى بتقولى ضربته ؟ انا بقول للواد هات بقى ورقتك كفايه عليك كدا ..لقيت الواد بيقولى لا مش هاديهالك ..قمت خدتها منه بالعافيه ..راح قايلى انا هاجيب بابا ينفخك ..انا سمعت كلمه بابا هاينفخك دى واتجننت

الظابط : دا واد مش متربى صحيح ..ازاى يقول للمدرس بتاعه كدا ..جيل اخر زمن ..دا الواحد زمان لما كان يشوف المدرس بتاعه جاى من الشارع دا يعدى من شارع تانى احتراما ليه ..بس مكانش مفروض انك تضربه

انا ::احلفلك بايه عشان تصدقنى ؟ انا كل الى فيها مسكته من دراعه وسحبته على الناظرة وقلتلها انا عايز اشوف ولى امر الطالب دا بكرة

تشده من دراعه ولا تسحله ؟ زى فيلم الارض ..حرام عليك يا اخى ..الاطفال احباب الله ..دا بيقول انك ضربته بالجزمه فى جنبه ..وانك هبدته على الارض سوبر سوفليكس ..داغير انك شتمته وبهدلته واهانت كرامته قصاد التلاميذ

انا : صح يافندم ..ومسكت المطوة وغزيته بيها ..وجبت جاز وولعت فيه ..وبعدين هبدته سوبر سوفليكس ازاى هو انا ممدوح فرج بتاع المصارعه ؟

الظابط : (ينادى على فرج ) الذى اتى مسرعا ..وهنا ارتعدت فرائصى ...وعرفت ان مكانى محجوز فى العنبوكه ..لكن الظابط قال لفرج.. ابعتلى ازازة ميه عشان اخد برشامه الضغط بتاعتى ..وهنا بدا على فرج الاحباط ..وتنفست الصعداء لانى لم اذهب الى العنبوكه

للحديث بقيه

ميجوووووووو

Friday, April 10, 2009

فى القسم


رحت عالقسم ..كان الظابط الشاب الذى يشبه شكرى سرحان فى رد قلبى مشغولا مع احد المتهمين ..قلتله لوسمحت ..لم اكمل الكلمه واشار لى ان انتظر ...كان هناك شخص ممسوكا من قفاه مثل الفار المسلوخ والذى يمسكه على ما اعتقد هو احد المخبرين الذين يشبهون فرج الى اغتصب سعاد حسنى فى فيلم الكرنك ..كان هذا الشخص على مايبدو ..احد اللصوص المبتدئين ..
جلست على المصطبه الاسمنتيه حتى ينتهى الظابط من مهمته ..وكانت تجلس بجوارى احدى الفتيات التى تضع ماكياج صارخ وفهمت من نظراتها انها فتاه ليل ...وجلست اتابع الحوار
الظابط: يعنى مش هاتتكلم ياد يابن التيييييت ؟ وتقول مين الى سرق محل الكهربائى؟
المتهم : والمصحف ياباشا ما انا ..(يصفعه فرج على قفاه صفعه مدويه ..ماتحلفش ياد ياتيييييت)
الظابط طب وحياه امك لاوريك ..بتنكر ياد يابن التيييييت ؟
المتهم :ياباشا لو انا هاقول ..انت عارف انى راجل صريح
(فرج يفاجئه بصفعه على قفاه ...رد عدل يا تييييييت )
الظابط : مانا عارف انه مش انت ياد يابن التيييييت ..قلنا مين الى عمل كدا واحنا نسيبك .. بقى انتو يا شويه تييييييت تسرقو واحنا نشيل قرفكم ؟ طب قولى مين الى سرق الوليه بتاعه المعادى الجديده .. الوليه قالبه علينا الدنيا ..وعايزين نقفل المحضر ..ياتقولنا ياتلبسها انت يا تييييييت ..عشان تعمل فيها راجل
المتهم : والمصحف ماعرف ياباشا ..(فرج يفاجئه بصفعه اخرى على قفاه برضه بتحلف يا تييييييت ؟
المتهم : مانت عارف ياباشا انى لو عرفت مين الى عمل كدا هاقولك علطول ..
الظابط : طيب ..انا هاعرف اخليك تفتكر كويس .. خده يافرج على العنبوكه وخليه يفتكر ..بس اتوصي بيه حبتين
ابتسم فرج ابتسامه تنم عن سعاده داخليه ..وسحب المتهم على العنبوكه) )
قلت فى بالى ..اكيد هو بيعمل معاه كدا عشان مجرم ..انما انا راجل مدرس وهو حرامى
اشار الظابط الى الفتاه الجالسه بجوارى .. وعلى الفور قامت من مكانها واخذت تمشي بطريقه فتيات الليل المعروفه وتلوك لبانه بطريقه
مستفزة


الظابط : ايه يافتحيه ؟ مش هاتلمى نفسك بقى؟
فتحيه : مانا ملمومه اهو ياباشا
الظابط : ردى عدل يا تييييييييت ..هو احنا ماوراناش غيرك ؟كل يوم تشرفى عندنا؟
فتحيه : ياباشا هو ان ذنبى ايه ؟ ولاد الحرام ماخلوش لولاد الحلال حاجه ..انتو الى حاطينى فى دماغكو
الظابط : كنتى بتعملى ايه فى الطريق الدائرى مع الراجل ؟
فتحيه : دا ختيبى ياباشا ..كنا زهقانين وركبنا العربيه وقلنا نتمشي بيها
الظابط : تتمشي بيها على الدائرى الساعه 2 بالليل ياتيييت ؟ وكنتو واقفين بتعملو ايه بقى فى نص الليل ؟
فتحيه : كنا بنسمع نجوم اف ام ياباشا ..اصل البرنامج بتاع اسامه منير كان شغال ..وانا بابا مانعنى اسمع الحاجات دى فى البيت
الظابط: نجوم اف ام يا تيييييييت ؟ ..طب انا هاوريكى النجوم فى عز الضهر .. اتى فرج وحده دون ان يناديه الظابط .. يبدو ان غريزته نادته الى ضحيته الجديده .
الظابط : خد بنت التيييييييت دى لحد مانشوف قصتها ايه
سحبها فرج الى العنبوكه ...
ظللت جالسا على المصطبه الاسمنتيه ..مستعدا ان اعترف على زميلى محمد ابراهيم مدرس اللغه العربيه انه ضرب تلميذا بظهر المسطرة على مؤخرته الشهر الماضي ..حتى لا اذهب مع فرج الى العنبوكه
للحديث بقيه
ميجووووووو

Wednesday, April 8, 2009

ابقى قلهم الكلام دا فى القسم


الساعه 10 وربع صباحا .. الحصه الرابعه فى اولى تانى .. ياااه الجدول زحمه اوى النهارده ..مافيش وقت الواحد يشرب شاى ...دا حتى البريك عندى اشراف فى الملعب ...فجأه جانى عم محمود الفراش : الحق يامستر المديرة عايزاك بسرعه ..استاذ حسين هايقف مكانك فى الحصه وانت روح على المديرة ...خير ياعم محمود فيه ايه ؟ ..والله مش عارف يامستر بس الموضوع شكله كبير دا فيه امين شرطه عندها هناك فى المكتب ..خرجت من الفصل وفضلت افتكر ايه الى عملته ؟ يمكن صاحب البيت عملى محضر عشان مادفعتلوش فلوس الاسانسير؟ ماهو راجل حرامى ومستفز وكل شويه يلم فلوس للاسانسير ..دا لو بيبنى عمارة جديده كان لم فلوسها من زمان... ولا يمكن ضربت عيل من غير ماخد بالى ؟ بس انا طول عمرى مش عصبى وماحدش بيستفزنى بسهوله ..دا غير انى ماضربتش تلميذ ابدا طوال مشوارى التدريسى ..انا بصراحه خفت على العده لا يشيلوها ..مع انى ماعنديش تليفون ؟! ....خدت نفس عميق واستجمعت شجاعتى وقلت انت خايف ليه ياواد ..هو انت غلطت؟ اكيد الموضوع فيه سوء تفاهم ...
دخلت مكتب المديرة ولقيت امين الشرطه ماسك فى ايده ورق وبيكتب فيه حاجات ..قلتله خير ان شاء الله ..قالى لو سمحت امضى على الاستدعاء ده ..قلت استدعاء ايه؟ انا مادخلتش الجيش اصلا عشان تعملولى استدعاء ..قالى حضرتك مطلوب فى القسم ..فيه محضر ضدك انك ضربت الطالب مازن مصطفى فى سنه سادسه اول اثناء حصه اللغه الالمانيه ..اتفضل امضي ..ضربت مين حضرتك ؟ انا عمرى ماضربت طالب ابدا ..! ماتقوليله ياسياده المديرة هو انا عمرى جت شكوى منى ؟!!!! رد عليا الامين : ابقى قلهم الكلام دا فى القسم


للحديث بقيه
ميجوووووو

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق