Saturday, February 6, 2010

اول يوم اجازة


بعد عناء طويل فى موسم دراسي ساخن ..وبعد هوجه الانفلونزا فى المدارس ...وبعد تصحيح وكنترول ورصد درجات ومراقبه وتطليع عين العيال ..اخيرا خدت اجازة وفرحت بالظبط زيي زيهم..اول ماخلصت حسيت انى عايز اطلع السكوتر والبلاى ستيشن ..نفس شعورى وانا تلميذ بالظبط هو نفس شعورى وانا مدرس ..مش عارف ده كويس ولا وحش انك تفضل عندك احساس انك لسه تلميذ وتعيش اجواء الطفوله (على وزن اجواء البطوله ) تحس بالاجازة وتحس بالتكت والجلاد والواجبات والحوش بتاع المدرسه وتحيه العلم والاذاعه المدرسيه والاجواء الاسطوريه بتاعه الطفوله المشرده.. وعلى طريقه حسن الهلالى بتاع الفيلم مش صديقى حسن الهلالى المدون ..هارجع بالزمن ربع قرن ايام ماكنت فى ابتدائى فى مدرسه حكوميه نظيفه وجميله ومتطورة .واسترجع ذكرياتى فى الماضي

اول يوم فى الاجازة ...ياسلاااااام على اليوم التاريخى الجميل ده ..بيبقى يوم عظيم وله طعم مختلف عن باقى الايام ..كنت بتسابق انا وصحابى على مين اول واحد يخرج من باب المدرسه وكانت بتبقى زعله بجد لو طلعت التانى او التالت ..انا فاكر فى سنه من السنين كان فيه حمار جنب عربيه كارو قصاد المدرسه واول ماخرجنا من المدرسه فى اول يوم اجازة ..طلعلى قرنين زى بتوع الشيطان وفكرت انى اعمل مسابقه جامده مع صحابى ..سباق التحدى ..جبت عصايه طويله واتفقت مع صحابى ونشوف مين اكتر واحد يضرب الحمار على مؤخرته ويطلع يجرى من غير ما الحمار مايرفسه ..طبعا انا كنت واثق من نفسي انى هاكسب لانى واد عفريت وصاحب قدرات خاصه فى اذيه الناس والحيوانات..المهم طبعا كله خاف انه يضرب الحمار وساعتها حسيت بالفخر ونشوة الانتصار على اصحابى ..وبدأت اضرب الحمار على مؤخرته واجرى ..اضرب واجرى ..وهما يسقفو ..كل مايسقفو تزيد رغبه التحدى عندى واشعر بنشوة البطوله ..كان عرض (وان مان شو ) وهم مبهورين بادائى الفذ ..خدتنى الجلاله حبتين وحبيت ازود جرعه الاثاره زى بتوع السيرك ..وقلتلهم هاعمل حركه محدش يعرف يعملها غيرى ..هاحط العصايا عند مؤخرة الحمار( لمؤاخذه عند ديله) ..اخذو يتهامسون وينظرون لبعضهم نظرة تعجب ودهشه من قدراتى الخارقه .....وعلى طريقه انا شجيع السيما ..امسكت العصايه وقربت بخفه ورشاقه مثل ماتادور يناطح الثور ..ترررررررررررررررارم تررررررام ..وفجأه قربت من الحمار ولسه بحط العصايه عند لمؤاخذه ديله ...بعدها ب3 ايام لقيت ماما واخواتى واقفين عند السرير وانا بين الوعى واللاوعى ..وسمعت همس كلام ..الحمدلله جت سليمه ..ربنا ستر ..دا بقاله تلات ايام لا بيصد ولا بيرد ..واد جن مصور ..اعمليله لسان عصفور عشان يعوض السوايل وابقى غيرى ملايه السرير عشان مبلوله .ومن ساعتها تعلمت حكمه فى اول يوم اجازة ..لا تضع عصا فى مؤخرة حمار مهما كانت الاسباب ..لكن الحكمه الاهم التى ادركتها فيما بعد : الحمار قد يتحمل الضرب كثيرا..وقد يتحمل الجوع كثيرا ..لكن لا يتحمل اهانه كرامته كثيرا

تحياتى
ميجوووووو
من امام مؤخرة حمار

17 comments:

Tears said...

مش فاهمة اخر جزء يعنى طلع حلم و لا عملت كده فى الحمار فعلا؟

بجد اول ما بدات تسرد اذيه الحمار بقيت مش قادرة أكمل قراءه

اعتقد المشكلة فى التعليم لان اسمها وزارة التربية و التعليم و كان ابسط حاجة يدرسوا أهمية الرفق بالخلوقات بدل الحشو الفارغ بتاعهم

مبروك على الاجازة
:)

Migo Mishmish said...

tears
لا مطلعش حلم ..كان حقيقه واقعيه ..بس ملحقتش اعمل حاجه مع الحمار اصلا ..مجرد ماقربت منه رفسنى وفقدت الوعى لمده 3 ايام معاكى حق فى ان وزارة التربيه والتعليم بتدى حشو فارغ ..محدش من المدرسين زمان كان بيعلمنا اى اخلاقيات كانو بيحفظونا زى البغبغانات ..والى زاد وغطى الاغانى الهبله والبرامج العبيطه الى كانو بيقدموهالنا واحنا اطفال ..يعنى واحده زى ماما ساميه بوظت جيل بحاله وجابتله تخلف عقلى ..وواحد زى محمد ثروت شوه مشاعر جيل كامل باغانيه السمجه
تحيااااتى
ميجوووو

Anonymous said...

انا مش هقدر اعلق لانى اكتر واحد عارف تاريخك
وعارف اننا دفنينو سو

بس امانه احكى لساندو زى منا هاحكى لماثيو
ملاحظه بلاش حكايات مايو

George USA

Migo Mishmish said...

جورج
رفيق الدرب ..والضرب برضه الى كلناه سوا
طبعا لازم احكى التاريخ لساندو ..التاريخ المهبب ..وطبعا هابعد عن مايو لانها نقطه سوده ماينفعش تتقال
تحيااااتى
وسلامى لماثيو
ميجوووووووووو

mony said...

دى اخره اللى مايسمعش كلام الكبار

كل سنه وانت طيب بمناسبه اول يوم فى الاجازه

فعلا فعلا الحمار من اكتر الكائنات صبرا

واتقى شر الحليم اذا صبر

انا كنت كتبت مره عن ذكاء وصبر الحمار

مش عارفه ليه الناس بتوصف الغبى بانه حمار
هو صحيح كسلان بس مش غبى يعنى

المهم

اول يوم عدى على خير وللا ايه؟

Migo Mishmish said...

mony
ربنا يخليك ياجميل
محدش قالى ان لحمار كرامته بتنقح عليه قبل كدا عشان كدا اتهبدت رفستين تمام
واحب اطمنك ان اول يوم عدى على خير ومقربتش من اى حمار فى منطقتنا ..
وانا متفق معاك ان الحمار حيوان ذكى وفيه صفات حلوة كتير ..بس هو حمار عشان مش عارف قيمه الى عنده ..لو كان عارف كان زمانه بقى ملك الغابه
تحياتى
ميجوووووووو

Anonymous said...

بوست رائع يا ميجو
وخاصه الحكمه النهائيه

لورا

على باب الله said...

مبروك عليك الأجازة ، و السكوتر و البلاي ستيشن
: )
و ياريتنا نتعلملنا حاجة من الحمير

Anonymous said...

Eh dah ya Migoooo,

Haram aleek el homar. All animals are better than most of humans.

Marika

Migo Mishmish said...

لورا
منورة البلكونه
ميرسي على ذوقك ..وياريت نتعلم من الحمار
تحيااااتى
ميجوووووووو

Migo Mishmish said...

على باب الله
الله يبارك فيك يالورد
منا قلتلك ان الحمار لو عارف امكانياته كويس كان زمانه ملك الغابه ..بس هو حمار عشان كدا
تحيااااتى
ميجوووووووو

Migo Mishmish said...

ماريكا
منورة البلكونه
تشربى ايه الاول بدل مانتى داخله فيه زعيق كدا ؟
انا معاكى ان الحمار طيب وذكى وجدع وصبور وووو..وافضل من بنى ادمين كتيييير ..احسن من المدير بتاعى شخصيا ..ويمكن فيه صفات احسن منى ..اولا انا كنت غلطان بس زمان فى المدرسه كانو بيعلمونا زى البغبغانات مجرد كلام نظرى من نوعيه : اغسل يديك قبل الاكل وبعده
بس ملاحظه اخيرة مع احترامى للحمار
مش هو الى ساب الحبل على الغارب من الاول ؟ وساب نفسه ينضرب ويتبهدل ومرفسش من الاول ؟ يبقى يستاهل انه يجراله الى يجراله؟
تحيااااتى ليكى
منورة
ميجوووووووو

عمو عصام said...

عزيزى ميجو..كل أجازه وإنت طيب وذكرياتك العامره مليئه بالرموز وأظن أن حميرمصر كلها لمتفهم ماأردت أن تقول وليتنى لم أفهم أنا أيضا فقد كنت أظننى حمار ولكنى ألآن أدرك أن الفارق بينى وبين الحمار هو أنه لديه كرامه ولم يعد أمامى إل الإكتئاب صديقا...سلااام

Anonymous said...

laa ya Migo,

Baka yani alashan howa taib !!!

Marika :(

كافى خيرى شرى said...

تعرف ياعم ميجواتضح ان تعليقات الزوار امتع من كتاباتك وعلى مايبدو حمارك العزيز طلع بيفهم اكتر من ناس كتير فى البلد دى

Migo Mishmish said...

ماريكا
مع احترامى ليكى ولجناب الحمار
فيه فرق بين الطيبه وبين الحموريه
مش معنى انى طيب يبقى اسيب حد يهين كرامتى
تحياااتى
ميجوووو

Migo Mishmish said...

كافى خيرى شرى
اكيد طبعا التعليقات بتبقى امتع من كتاباتى
كتاباتى تحمل وجهه نظر واحده
بينما التعليقات تحمل وجهات نظر اخرى ومختلفه
انا معاك الحمار الى عملت معاه كدا طلع بيفهم اكتر من ناس كتير فى البلد
تحيااااتى
ميجوووو

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق