Wednesday, February 10, 2010

اول يوم اجازة _ الجزء الثانى

فى اول يوم اجازة وانا مدرس وانا مش تلميذ قابلت حمار ..شبهت عليه ..ايه دا انا اعرف الحمار ده كويس ..شفته قبل كدا ..شكله مش غريب عليا ..ملامحه هى هى بس متغيرة شويه ..بان عليه السن ..كان لابس نضارة وشعره بقى فيه شويه ابيض ..بصلى من طرف عينه ..الله الله دا باين يعرفنى انا كمان ..غريبه دى .. عينى فضلت فى عينه لحد ماقربت منه ..خلع نضارته ودقق فيا ودار بيننا الحوار التالى
ميجو : انا متهيالى اعرف حضرتك كويس
الحمار: وانا كمان اعرفك ..متهيالى شفتك قبل كدا
ميجو : انت كنت شغال زمان مع خضرى قصاد مدرستى النظيفه الجميله المتطورة ..صح
الحمار : انت عارفنى كويس اهو ..مين بقى حضرتك
ميجو : انا كنت تلميذ فى المدرسه دى وكنت بشوفك كل يوم
الحمار : اااه ..اهلا وسهلا ..بس انتو كنتو عيال اشقيا اوى
ميجو : معلش بقى ..بس كل حاجه بتتغير
الحمار : على رأيك ..كل حاجه بتتغير ..بس ان جيت للحق الجيل اليومين دول بقى اصعب منكو ..العيال لا فيه لا تربيه ولا اخلاق
ميجو : اسألنى انا ..منا شغال مدرس
الحمار : ربنا يكون فى عونك ..تخيل العيال بقت بيجيبو صواريخ ويحدفوها عليا
ميجوو: ياااه ..هى وصلت لحد كدا؟
الحمار : انا هاقولك حاجه ..زمان لما كنت شاب صغير كان فيه عيال من سن حضرتك كدا ..لمؤاخذه يا استاذ ..فيهم واد شيطان جاب عصايا طويله ..وفضل يضرب فيا على ضهرى ..سكت وقلت عيل صغير ..حب يعمل شو عليا قصاد العيال ..طنشت وقلت سيبه يلعب
انما يجيب العصايا ويحاول انه لمؤاخذه ..لمؤاخذه يعنى ..يعملى بيها حاجه أبيحه ..دا الى مسكتش عليه ابدا
ميجو : ( يانهار اسود لو افتكر انى انا الى عملت كدا)ده مش بعيد يشغلنى مكانه عالعربيه الكارو ..ها وعملتله ايه الواد ده
الحمار : رقعته رفسه محترمه فى بطنه ..سوبر سوفليكس
ميجو :( ممسكا بطنه ) طبعا يستاهل
الحمار : دنا لو قابلته تانى دلوقتى اقطعه بسنانى
ميجو : طبعا طبعا ..بس قولى ليه يعنى سبته يضربك ..ماكان من الاول تبعده عنك
الحمار : منا قلت عيل وعايز يلعب ..اعمل عقلى بعقل عيل صغير ..وبعدين انا طيب مبحبش ااذى حد
ميجو :اسمحلى دى مش طيبه دى ...
الحمار : عارف ..متكملش ...حموريه
ميجو : انا اسف مقصدش بس يعنى انت الى اتهاونت فى حقك
الحمار : انت بتلومنى اوى ليه كدا ..متبصوا لنفسكو ..على الاقل انا جيت فى مرحله ورفست ويحصل الى يحصل..عند الكرامه وستوب.. انما انتو بقى الى ساكتين على حقكو ..انا مش متخيل ان فيه ناس ممكن تقف طابور طويييييل عشان تشترى عيش ..على الاقل انا البرسيم بيجيلى لحد عندى ..عمرى ما وقفت فى طابور عشان اشترى انبوبه بوتجاز..بتقولو كلام شعارات وخلاص ومبتطبقوش منه حاجه ..بص المدرسه دى مكتوب عليها نظيفه وجميله وتطورة ..تصدق بايه ..بشوف عيال فى ابتدائى جايبين موبايلات وبيتفرجو على افلام سيكو سيكو ..ومبيتكسفوش ..كدا عينى عينك ..لدرجه مرة واد جابلى فيلم و حطه قصاد عينى وفرجنى عليه وصحابه بيضحكو
ميجو : طب ومرفستهوش ليه زى الواد بتاع زمان
الحمار : ارفس مين ولا مين انا لو رفست كل واحد بيعمل وضع غلط ..مش هاخلص
ميجو : وفين كرامتك
الحمار : وفين كرامتك انت ..بذمتك انت راضي عن العيال الى فى المدرسه عندك ؟ وراضي عن المناهج الى بتديهالهم؟
ميجو : معاك حق ..انا حاسس انى بوشين ..وحاسس انى بديهم كلام فارغ
الحمار : تخيل مرة جه عيال صايعه بعد ماتش مصر والجزاير ..ورسمو عليا علم الجزاير ..وزفونى فى المنطقه ..وقعدو يشتمو فى الجزاير ..واللى ماشي يضرب ..واللى جاى يضرب ..لحد ماكنت هاعيط
ميجو : يااه ..فيه ناس كدا ؟
الحمار : عيال صايعه وضايعه ..دا بييجو يستخبو تحت العربيه الكارو يشربو بانجو وبرشام صراصير
ميجوو: وانت كنت بتطنش طبعا
الحمار : وانا هاعملهم ايه يعنى ..عيال مغيبه اصلا ولو شفتهم وهما راسمين علم مصر على وشهم تقول دول رايحين يحاربو
ميجو: اهو بينفسو عن نفسهم
الحمار : انتو ناس مزيفه ..بتوع كلام وبس
ميجو: معاك حق
الحمار : انا ببقى قاعد هنا وشايف الشارع كله ...بيعدى عليا اشكال والوان ..ببقى شايف الى عاملى فيها شيخ ..وهو بيخون مراته
والى عامله نفسها الخضرة الشريفه ...وهى ماشيه مع طوب الارض ووووو.. تخيل مرة بقلب فى الموبايل بتاع المعلم الى شغال معاه ..وببص لقيت كليب ..فيه واحد ظابط بيحط خشبه فى ... فى ...لمؤخذه يعنى ..والمتهم عمال يصوت زى النسوان ..تفتكر انا لو كنت مكانه كنت عملت ايه
ميجوو : كنت رفسته طبعا
الحمار : لمؤاخذه يبقى انت متعرفش الحمار كويس انا كنت قتلته وقطعت جتته حته حته وميهمنيش اموت بعد كدا
ميجو : طب ماهو احنا برضه مبنسكتش وبنعمل مظاهرات
الحمار : هأو هأو أواو..مظاهرات يابو مظاهرات ..انتو فالحين بس تعملو مظاهرات لغزة والجدار ..ولو فيه عيل مات فى كوالالامبور بتاخدكو النخوة اوى ..انما الى يموت منكو ..بتسكتو ..بتتهان كرامتكو وبتسكتو ..ياخى متحرقش دمى بقى
ميجو:يييياه انا مكسوف منك اوى
الحمار : وحياة ابوك متقلبش عليا المواجع وبلاش السيرة دى ..عشان مغلطش اكتر من كدا
ميجوو : انت قلبت عليا انا المواجع
الحمار : على العموم فرصه سعيده ..متعرفتش بحضرتك
ميجو: مش مهم تعرف اسمي ..المهم انا عرفتك كويس
الحمار : بس انا استريحتلك والله ..زى ماتكون قريبى كدا
ميجو : احنا فعلا قرايب ..بس عالاقل انت بتعرف ترفس
تحياتى
ميجووووو
فكرة : عمو عصاااااام

6 comments:

mony said...

عجبنى اوى انه مبيعملش عقله بعقل العيال

حمار اخلاق صحيح

Tears said...

لطيف الحمار

:))

فرعون said...

نفسى الحمار ده يرشح نفسه فى اى انتخابات وانا اصوت له على طول

أحمد.خ said...

ترى إلى أى مدى يمكن للإنسان أن يتعلم من الحمار؟؟

rony said...

يا سلام ع الحمار
يا سيدى ع الحمار
طيب وغلبان بس ما سابش حقه
يا ريتنى كنت زيه

تحياتى

Hassan El Helali said...

والله يا ميجوووو الحمار ده أكرم من ناس كتير أعرفهم وباشوفهم كل يوم

ناس نفسي أرفسهم بنفسي

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق