Monday, February 8, 2010

خليك مكانى

المشهد الاول : ليل داخلى الساعه 3 الصبح ..اخيرا ساندو نامت ..انا مرهق وتعبان وكذلك مشمش ..بطل القصه ميجو يرمى راسه على السرير ويغط فى نوم عميق بينما تنام مشمش مع المفعوصه على السرير الاخر وفجأه صحى البطل على نداء زوجته مشمش
مشمش : ميجو ميجوووووووو
ميجويطنش وينفض
مشمش: ميجوووووووو
ميجو : يتظاهر بالنوم ويرد بتثاقل ..نعم
مشمش : انا افتكرت حاجه مهمه اوى
ميجو: ايه خير ..الفلوس خلصت بتاعه البيت ؟
مشمش : مش كدا ..انا افتكرت حاجه مهمه مضايقانى
ساورتنى بعض الشكوك ان مشمش عملت مصيبه وخليتهالى مفاجأه زى ماراحت اشترت لاب توب من ورايا ..هيأت نفسي للكارثه
ميجوو: خير ياحبيبتى ..قولى ايه مضايقك ..حد ضايقك فى الشغل
مشمش : لا مافيش حد يعرف يضايقنى
ميجو : امال ايه الى حصل
مشمش : احنا بقالنا سنتين متجوزين صح؟
ميجو : اه ..طب هو انا زعلتك فى حاجه ؟
مشمش : لا خالص بس افتكرت انك قبل الخطوبه مقلتليش انك بتحبنى وعايز تتجوزنى
نزل عليا الخبر كالصاعقه
ميجو : ازاى يعنى ..امال احنا عايشين مع بعض ازاى ؟ صحيتى الصبح لاقيتينى معاكى فى بيت واحد ..وبعدين انتى هاتعمليلى زى فؤاده فى شيئ من الخوف ؟ اجيب الجيران ويقولو جواز ميجو من مشمش باااااااااطل بااااااااااطل
مشمش : انت مديتنينش فرصه افكر ومقولتليش انا عايز اتجوزك
ميجو : طب ممكن اديكى فرصه تانيه تفكرى وتعيدى حساباتك .وبعدين ياستى حقك عليا انا غررت بيكى ومش هاعمل كدا تانى .بس سيبينى انام وبكرة الصبح يحلها حلال
مشمش: بس كان مفروض افكر وارد عليك
ميجو : ماهى النتيجه واحد فى الاخر ياحبيبتى
مشمش : بس افرض مكنتش وافقت
ميجوو: معلش قسمتك ونصيبك
مشمش : ماهو انا كنت هوافق عليك ..مش هى دى المشكله ..المشكله انك مقلتليش زى بقيت البنات انا بحبك وعايز اتجوزك
ميجو:الوليه اتهبلت فى دماغها ولا ايه ؟ وبعدين فى اليوم الى مش فايت ده ..طيب ياحبيبتى انا اسف ممكن اجى اتقدملك تانى ..حدديلى معاد مع بابا وخدى وقتك براحتك ..وفكرى على اقل من مهلك ..(والله لو اعرف كدا كان مفروض انى انا الى افكر ميت مرة )خلاص ياحبيبتى ..يالا نامى بقى عندنا شغل الصبح
مشمش : بس بابا الله يرحمه
ميجو: ماهو كان لازم يموت يا حبيبتى ..مكانش يقدر يستحمل هبل اكتر من كدا
تحياااتى
ميجووووو

11 comments:

ehabafndy said...

حلوه.......
بس إنت برضه غلطان برضه يا عم ميجوووووو كان لازم تقلها و أنا أعملك إيه مانتى إما صدقتى و خدتينى على مشامى و مدتينيش فرصه أنطق بكلمه لكن هقول قيه قدرى و نصيبى .

عمو عصام said...

عزيزى ميجو..الزوجات دايما يحبوا يسمعوا كلام جميل من الازواج ودايما يطلبوها صراحه من غير لف او دوران بس للاسف الرجاله مش بيفهموا والمره الجايه لما تيجى عندى هديلك كتب عن الموضوع ده وياريت تلحق تحجز لك مكان فى معهد المشوره وخللى بالك من مشمش وسمعها كلام حلو غير سم البدن بتاعك والا هتجبرنى العب عليك دور حماك مع اطيب التمنيات بحياه زوجيه سعيده

Migo Mishmish said...

ايهاب افندى
ينصر دينك يا استاذ خليييييفه
اهو كدا الرجاله ولا بلاش
احنا غلابه يابا وملناش غير بعض ..لازم نقف وقفه رجاله يالورد
تحياتى
ميجووووو

Migo Mishmish said...

عمو عصااااااااام
انت جاى تهدى النفوس صح ؟
كده اتأكدت ان قارش ملحتى ..ملوحه ووووو
وواخد صف مشمش دايما
افتكر انى جوهرووووووو
مش هى الى جوهرروووووووو
وبعدين انت مشوفتش حاجه ..كلام حلو وقلنا مواعين وغسلنا
هدايا فى الزفت الفلنتاين وجبنا
سبلت عنيا
غسلت سنانى ورميت الشراب فى مكانه
بعلق هدومى عالشماعه
بطلت اروح مع صحابى فى اى حته
بتفرج على القنوات الى بتحبها غصب عنى
اتحرمت من افلام البريئ وعنتر ولبلب وطاقيه الاخفا وبرامج الكورة
بنيم البنت ساندو وبلعب معاها
بطلت اقرا الجرنان فى الحمام
المرتب وكل الاضافيات الاخرى بتقلبها اول بأول
الشقه من حقها عشان حاضنه
الشبكه ماليش فيها عشان بتاعتها
من حقها تركب عربيتين فى المترو وانا لا
اخر جزمه اشترتها من سنتين وهى علطول بتشترى هدوم
اشترت لاب توب وطنشت
وبعدين؟
هو مطلوب من الرجاله بس؟ وهما مالهمش اى دور ؟
سؤال هما ماسكين علينا زله ولا ايه مش فاهم ؟
بص يمكن يكون ده اخر تعليق بكتبه بس مايهمنيش ..كله على الله
ميجو
من امام شنطه الاسعافات الاوليه

rony said...

انا اعترض
الست بتحب تسمع كلام حلو
بتحب من ودانها
اكتر من انها تشوفه بيعملها حاجه تفرحها او يثبتلها حبه بكده
برضه بتحب تسمع
ده ما يغنيش عن ده
وبعدين احفظلك كلمتين ولو كده وكده
يا سيدى هو الكلام عليه جمرك
احنا كده
ماشى
يللا باى

صوت من مصر said...

فينك ياعم يوسف شاهين
كنت عملتها فيلم

Migo Mishmish said...

الحيوان اللي اسمه المرشد العام للجماعة
موضوع "فنون و أوضاع الجماع الجنسى" تحكية لافراد الجماعة بتاعتك علشان معظمهم عندهم كبت جنسي وشواذ ومبيفكروش غير في الجنس. ومجرد ذكر تاء التانيث قدامهم بيعملهم حالة هياج
الفن الوحيد في اللقاء الجنسي هو الحب يا حيوان - وده طبعاً بعيد على امثالك فههمة
المدونة اسمها البلكونة
مش الميضة
ماتجيش هنا تاني
MishMish

فرعون said...

بص ياميجو مادام اتجوزت لازم تسد وبلاش فضايح للرجاله الله يخليك وعموما قلبى عندك والحمد لله انى عرفت مصايب الجواز قبل مقع فيه

Anonymous said...

للاسف انا مش ادر اكتب تعليق لان المدام بتقرا البلكونه

مع اطيب التمنيات لميجو بالشفاء العاجل

المتضامن معاك
George USA

Anonymous said...

للاسف انا مش ادر اكتب تعليق لان المدام بتقرا البلكونه

مع اطيب التمنيات لميجو بالشفاء العاجل

المتضامن معاك
George USA

Migo Mishmish said...

إلى السادة المعلقين
طبعاً قدر الاستاذ ميجو يكسب تعاطفكم معاه باسلوبه الجميل في سرد القصة
ولكن هو ده اللي حصل صحيح
ميجو مقليش انه بيحبني وعايز يتجوزني واظن ان ده من حقي
الموضوع كله جه ورا بعضه بسرعه
قبل ما نتخطب ابويا مات
قام ميجو واهله كلهم وقفوا معانا وكانوا كل يوم عندنا. وغير كدة كمان وفقوا جنبا ضد عمي - وهو راجل زباله بكل ما تحمل الكلمة من معاني
وبعدين لاقيت ان ناس عملوا معانا الواجب ده يبقى لازم نوجب معاهم باكتر من كدة
بس بعدها بـ6 شهور لاقيت نفسي حرم الاستاذ ميجو
بس انا عايزاه يطلب ايدي زي كل بنت. كتير عليا ده
المفترى عليها
مدام/ مشمش

There was an error in this gadget

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق