Saturday, February 27, 2010

الوزير جاى

ناسف على فترة التاخير فى الفترة الماضيه..وذلك لدواعى بدايه الترم التانى وما يحمله من تبعيات خطيرة على المستوى الدولى ..من تحضير ودفاتر درجات وتكت وجلاد وطباشير والنوم مبكرا لمطارده العيال فى المدرسه النظيفه الجميله المتطورة التى بلغ التطور فيها الى اقصى درجه ..فمدرستى حائزة على الجوده التعليميه ودى شهاده زى شهاده الايزو ..يعنى من الاخر ميه ميه ..وبالمناسبه فيه بند فى الجوده احنا طبقناه فى المدرسه وهو سبب تقدمها واذدهارها.. البند ده اختلف عليه معظم الناس لانه بند قوى قد يسبب طفرة رهيبه فى العمليه التعليميه البند ده بيقول بالنص الواحد : الحوكمه فى اطار من المعلوماتيه ..الحقيقه انا ذهلت اول ماسمعته ..مش عن جهل والله لكن لانه اخيرا احنا عرفنا مشكلتنا فى التعليم ..المشكله ياساده هى اننا معندناش حوكمه ..اللفظ ده عاجبنى اوى بيفكرنى بالعولمه وبالقولبه وبالمعلمه والخلجنه والكوكبه والفشخره و اللهلبه والزفلطه بقى اى واحد عايز يبقى مثقف يروح راقع لفظ من دول..يقوم الناس علطول يعرفو انه مثقف ويخافو منه ويمكن يقولو عليه ليبرالى كمان .وكمان لفظ المعلوماتيه بيفكرنى بسنيه الكلوباتيه اشهر راقصه فى العشرينات .المهم ..الحوكمه فى اطار من المعلوماتيه بند رهيب وضعه الجهابزة من اساطين التعليم فى مصر لعلمهم بان المشكله فى الحوكمه وليس فى شيئ اخر ..انا مرة شفت واد سايب الحنفيه مفتوجه فى المدرسه قمت زعقتله وقلتله انت ياولد ..انت معندكش حوكمه ولا ايه ؟ مش لازم تبقى فى اطار من المعلوماتيه ؟ راح الواد معيط ومبربر لما سمع كلمه حوكمه وقالى : والله منا يا مستر دا الواد محمد فتحى بتاع تالته رابع هوالى عمل كدا ..طبعا فرحت وقلت الحوكمه دى كلمه رهيبه زى كلمه البلاللام ..كلمه سحريه تفتح الابواب المغلقه ..ياسلام عليك يا واد ياميجو يامفتح ..بعدها طلبنى المدير عشان فيه شكوى من الاولاد ان فيه درس مش فاهمينه ..دخلت بكل ثقه وقلتله : يااستاذى الفاضل انا بطبق الاساليب التربويه داخل الفصل وبحاول اطور منهم (تذكرت الكلمه ) وبعدين احنا بنطبق الحوكمه فى اطار من المعلوماتيه ..بصلى واتبرجل ..وقالى انا عارف انك بتشرح بضمير وان الحوكمه شيئ مهم (خاف لا كلمه الحوكمه تكون حاجه وحشه ) بس حاول انك تطبقها فى اطار من المعلوماتيه عشان متجيش مشاكل .. خرجت بعدها قابلت عم عادل الفراش كان عايز يقبض حساب الشهر بتاع الشاى والقهوة ..قلت لما اجرب عليه تاثير الكلمه
حسابك كام ياعم عادل ؟ 15 جنيه يا استاذ
ايه ده ؟ انا مشربتش كل ده ..انت كدا عندك حوكمه فى اطار من المعلوماتيه
عمل صوت قبيح من مناخيره وقال لفظ على وزن حوكمه بس بالبلدى
معلوماتيه ايه ..انا عايز المعلوم ..والا مش هاتشوف شاى ولا قهوة تانى
الحوكمه يا افاضل كلمه رهيبه ..فضلت استخدمها مع اى واحد يقابلنى فى المدرسه ..واكتشفت انها اعادت الفصول الى نظافتها وانها جددت الكراسي التى يجلس عليها التلاميذ ..وطورت المناهج وطبقت الكادر وطبقت تأمين صحى سليم على التلاميذ ..وطبقت انشطه وحدثت معامل الكومبيوتر واخرجت تلاميذ نابغين هايبقو زى زويل ومحفوظ فى المستقبل ووووووو..عرفنا المشكله فين ؟
الحوكمه فى اطار من المعلوماتيه
ركبت ميكروباص كان زحمه اوى والركاب فوق بعض وقلت اجرب على السواق الكلمه : بقولك ايه ياسطى هى العربيه مافيهاش حوكمه؟
بصلى شذرا على انغام اغنيه يانى يانى يانى الى كان مشغلها ..حضرتك عايز تنزل عند الحوكمه الدستوريه العليا ؟
قلتله لا ..انا بسالك على الحوكمه
قالى : ااه فهمت ..الحوكمه الصبح كانت عامله كمين عالطريق برة وخدت رخص زمايلى ..بس انا طلعت ناصح ومشيت من جوة
روحت البيت وقلت لما اشوف مشمش هاتتاثر بالكلمه ولا لا ؟
دخلت وسالتنى السؤال المعتاد: اتاخرت ليه ؟
استجمعت شجاعتى وقلت فى سري انا معايا سلاح خطير : كان عندنا حوكمه فى اطار من المعلوماتيه
متخضتش وفضلت زى ماهى ..قمت قايلها تانى ...كان عندنا حوكمااااااااااه
سكتت وبرقت
انت مش عارف ان البيت هنا فيه قولبه فى اطار من الامبرياليه؟
خفت وسكت
انا اسف مش هاتاخر تانى
تحياتى
ميجوووو
من امام الحوكمه

3 comments:

mary victor said...

هههههههههههههه
بوست شربات بصراحة
احنا كمان واخدين الإعتماد
و ماحدش فاهم حاجة
الحال من بعضه يعنى

عمو عصام said...

يا أستاذ ميجوأنا شخصيا لاأعترض على الحوكمه فى إطارالمعلوماتيه لكن بشرط عدم تعارضها مع العولمه فى غياب المضمون حيث يتسبب التعارض فى حدوث إنتكاسه لمفهوم الليبراليه الدوليه الغارقه فى مستنقع البلشفيه الثوريه مما يتسبب فى ضياع حقوق الطبقات الكادحه والبرجوازيه المتطلعه وهذا بدوره يوجب علينا البحث عن وسائل جديده لحصول كل ثورى على نصيب يومى من الفول والطعميه وهو الحد الادنى للمعيشه فى ظل غياب الضمانات الإجتماعيه

Tears said...

أجمل حاجة ان مافيش حد فى البلد بيقول انه مش عارف حتى السواق حاول يدعى العلم و كل مرة يرد بطريقة شكل مع ان ببساطة كان ممكن يقول مش فاهم



تحياتى

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق