Monday, March 29, 2010

كلام اخوك الكبير

كان فيه مسلسل بييجى زمان وكان فيه جمله معكننانى ..المسلسل اسمه غوايش وكان فيه جمله مشهورة : كلام اخوك الكبير لازم يصير ياولدى ...ليه يابوى ؟ ...عشان اخوك الكبير ..كان لازم فى الجمله دى يقولو : ليه يابوى ؟ رخامه ياولدى ..غتاته ياولدى .بنفس المنطق بيتعاملو بيه معانا .حاجات كتير كانو بيحشو دماغنا بيها .بس لازم نسمع كلامهم وخلاص ..ليه ؟ عشان هما الكبار وكلامهم مطلق ومافهوش نسبه خطأ.واحنا لاحول لينا ولا قوة ..تلاقى مثلا مذيعه تطلع فى برامج الاطفال . لازم تاكل جزر عشان يقوى النظر ..طب انا مش بحب الجزر ومش باكله ونظرى سته على سته ..والى تقولك كل سبانخ عشان فيه حديد ..مش تفهمنا يعنى ايه حديد .طفل صغير هايعرف ان فيه حديد يعنى فيه مسامير وشواكيش .. عملتلى عقده من السبانخ طول عمرى .. حطت لنا سكه واحده مافيش غيرها .يا السبانخ يا اما هايجيلك انيميا ..طب قوليلنا حاجات تانيه فيها حديد .عندك فى كتاب القراءة بلاوى تانيه ..يقولك ايه الصدق منجى ..ويجيبلك قصه هبله بتاعه عيل صغير كان واخد مبلغ كبير يوصله امانه لجدته (مش عارف جدته كانت هاتعمل بيهم ايه ..والعيله يعنى مفهاش رجاله عشان يدوها للعيل الصغير ) فطلع عليه اتنين حراميه وقالوله معاك فلوس؟ (حراميه جنتل ) فرد عليهم وقال ايوة ..قوم واحد من الحراميه المؤدبين قال للتانى ..يالا بينا ياعم ده شكله معهوش فلوس ده لسه عيل فسابوه ومشيو ..وبكدا الصدق منجى ..يعنى لو طلع عليك دلوقتى عيال صيع وثبتوك فى الشارع وخدو موبايلك وساعتك ..فانت تقولهم انا معايا فلوس كمان شايلهم فى الشراب ومخبيهم ..فيقولو عليك انك واد صادق ويرجعولك الفلوس والموبايل ويمكن يدولك جوز جنيهات ..ليه ؟ لان كتاب القرءة قال كدا ..والقصه التانيه الشهيرة بتاعه حمدان والذئب ..تمسكها تلاقى ان واحد اهبل ومتخلف عقليا مألفها وواحد تانى اهبل منه حطها فى مناهج الوزارة ..يقولك ايه ..حمدان كان كل شويه يقول للناس الحقونى فيه ذئب ..ولما ييجويلحقوه يقولك وضحكت عليكو مافيش ذئب ولا حاجه ..انا بصراحه كنت معجب جدا بحمدان وبحركاته ....تخيلو ان حمدان قاعد فى الصحرا وبيرعى غنم..ومكانش فيه تليفزيون ومكانش فيه نت ولا اى حاجه يسلى بيها نفسه ..كان هايعمل ايه يعنى ؟ فاضي وزهقان ..وكل شويه الناس تيجى تنقذه مايلاقوش ذئب ويطلع حمدان بيشتغلهم ..مش فاهم هما هبل؟ عملها فيهم كذا مرة ..غلطتهم انهم صدقوه ..مايسييبو الذئب ياكله ولا يتنيل على عينه ..عيل واطى صحيح ..والقصه دى بالذات انا حاولت افهم ايه المغزى فيها معرفتش ..يعنى ايه القيمه الى الانسان ممكن يطلع بيها ..يعنى الواحد مفروض يعمل ايه فى الاخر ؟ طب انا معنديش خرفان وساكن فى حته مفهاش ذئاب ..والقصه بتاعه الارنب الغضبان دى بقى حكايه تانيه ..ارنب مش عاجبه انه ياكل كل يوم خس وجزر ..ماهى حاجه تزهق صحيح ..واتجرأ بس وقال لامه .. الجمله الشهيرة بتاعت : كل يوم خس وجزر ..طبعا بقى انهالت عليه العقابات السماويه وانه هايخش النار وانه مش بيحافظ على النعمه وحظه انه مكانش عايش اليومين دول كان قالوله على عذاب القبر وكانو جابوله الثعبان الاقرع ياكله ..كل ده عشان نفسه هفته على حاجه تانيه غير الخس والجزر .طب بذمتكو فيه واحد فيكو يرضى ياكل طول حياته نوع واحد بس من الاكل ؟ كان يجرى ايه لو امه خدته على كنتاكى ولا مكدونالدز مرة كل اسبوع ولا كل شهر وتجيبله الوجبه المفرحه وكانت حلت المشكله وبلاش صداع ..هانعد نحل مشكله الارنب وامه؟ وبعدين اصلا ابوه فين ؟ مش له دور برضه ويعقل امه ويقولها كلمتين حلوين بدل ماهى معكننه عالواد؟ ..ولا هو شغال وطافح الكوته عشان فى الاخر يخش عليهم بحزمه خس وجزر؟ ..تحس ان الى عامل الموضوع ده واحد اقطاعى وبيشجع العيال بس فى صورة مستترة انهم كل يوم ياكلو فول وميتبتروش على اهاليهم ..نيجى بقى لقصه الاتحاد قوة بتاعت الفلاح الى جمع ولاده وجابلهم لبشه قصب وقعد يرخم عليهم ويخليهم يكسرو القصب لما ايديهم ورمت من الضرب ..طب ياعم الحاج ماتقولهم الكلمتين دول من الاول ..لازم تخلى ايديهم تورم عشان فى الاخر تقولهم الاتحاد قوة ؟ ماتقولهم الاتحاد قوة من الاول ولا هى رخامه يا ولدى؟ ...ومن القصص الغريبه برضه قصه الارنب والسلحفاه ..مش عارف كانو بيضحكو على مين ؟ يقولك ارنب بيسابق سلحفاه ؟ مش عارف ايه الى يخليهم يتسابقو اصلا؟بيلعبو فى الاولمبياد الشتوى ؟ ويقولك ايه الارنب قعد يضحك على السلحفاه عشان بطيئه قام خدله تعسيله قبل مايخلص السباق ..ماهو طبيعى انى لو بسابق سلحفاه كنت هاناملى يومين ..انا لو من الارنب كنت روحت عملت شوبنج وصيفت يومين فى اى حته ورجعت ..وفى الاخر تلاقى السلحفاه كسبت السباق ..هانستعبط؟ سباق قعد كام شهر ده ؟ وكله كوم وقصه الاسد والفأر الى قعد يقعد يقرض فى الشبكه ..ايه الى يخلى فار يروح يتكلم مع الاسد اصلا ؟ انا لما بشوفه فى جنينه الحيوانات ركبى بتسيب ..يقوم الفار يروح يتناقش معاه كدا بكل سهوله ؟ هو ده المنطق الى بيحاولو يعلموه لينا ..كلام اخوك الكبير لازم يصير ياولدى حتى لو غلط ..حتى لو مش منطقى او حتى يحمل فى طياته قيمه ..لكن هذه القيمه ساذجه وغير منطقيه ..نسي المؤلف ان العصر يتطور وان تعليم القيم ليس اهم من كيفيه تطبيقها
تحياااتى
ميجوووووو

27 comments:

Anonymous said...

هههه حلو اوى يا ميجو
كلبيزو

Anonymous said...
This comment has been removed by a blog administrator.
عصام said...

ياعينى يابنى داانتا كنت مكتوم كتمة الفول

hanan said...

تحفة بجد
إسلوب رائع
وواضح أنك شايل للكتاب المدرسى من زماااااااااااااااان

MSMO said...

بوست قمة في الروعة والجمال
بصراحة مضحكتش قوي كده من زمان و أنا قاعد اقرا تسلم ايديك علي الكلام الجامد ده بس هقولك حاجة في الآخر
كلام اخوك الكبير لازم يصير ياولدى ...ليه يابوى ؟ ...عشان اخوك الكبير

Anonymous said...

سؤال واضح الكلام ده لسه العيال بتتعلمه فى ابتدائى

George USA

فرعون said...

يابووووووى كلام تجيل وواعر جوى بس برضيك لازم تسمع كلام خيك الكبير بدال مانطخك بالنار

لاسع افندى said...

تصدق انا لسه فاكر الحاجات دى

وقصة قلم من احمد عثمان
وقصة باب الحظيره اللى كان يزيق وافتكروه الثعلب
طق طق صوت باب الجظيره

هههههههههه
تحياتى

على باب الله said...

كلام أخوك الكبير لازم يصير يا أبن الشعب

Desert cat said...

انا فاكرة ان ده المنهج اللى درسته هو لسسه لحد دلوقتى شغال فى المدارس بجد ؟؟ يعنى
ليهم حق العيال اللى مطلعين عين المدرسين ماهو ده كلام ميدخلش عقل طفل رضيع فى الالفية الثالثة

Migo Mishmish said...

كلبيزو
منور البلكونه
عجبتك؟ الفهالك فى قرطاس؟
تحياااتى
ميجوووو

Migo Mishmish said...

عمو عصام
انا فعلا مكتوم كتمه الفول ..بس الحمدلله فيه واحد اسمه عمو عصام كان بيلحقنى علطول بوزارة تعليم موازيه ..وبيظبطلى دماغى
تحياتتتى
ميجووو

Migo Mishmish said...

حنان
منورة البلكونه
ميرسي على ذوقك
فعلا انا شايل للكتاب من زمان ..فضلت ساكت ساكت لحد مافاض بيا الكيل
تحيااااتى
ميجووووو

عمو عصام said...

عزيزى ميجو..عندما طلبنا تغيير رؤساء تحرير الصحف القوميه الذين عفا عليهم الزمن جاءوا لنا بمن يعلموننا الأدب مثل صحفى طشة الملوخيه وصحفى البعرور والأوزى وعندما طالب الأقباط بتعيين محافظ قبطى عينوالهم محافظ وراهم (النجوم فى عز الضهر )إعمل معروف بلاش مطالبه بأى تغيير هى كده حلوه قوى والمثل الشعبى يقول(إصبر على جارك السو يايرحل بايجى له برادعى)ودى كانت نهايةالبلكونه

Migo Mishmish said...

msmo
ميرسي ياباشا
ربنا يضحكك كمان وكمان ..هم يضحك وهم يبكى
حتى انت كمان بتقولى كلام اخوك الكبير لازم يصير؟
تحياتى
ميجووو

Migo Mishmish said...

msmo
ميرسي ياباشا
ربنا يضحكك كمان وكمان ..هم يضحك وهم يبكى
حتى انت كمان بتقولى كلام اخوك الكبير لازم يصير؟
تحياتى
ميجووو

Migo Mishmish said...

جورج
ايون الحاجات دى لسه بتدرس لابتدائى ..لا كمان العن من كدا وهاعمل بوستات على الكلام ده قريب
تحياااتى
ميجوووووو

Migo Mishmish said...

فرعون
ليه بس تطخنى بالنار ؟ انا عندى عيال وبعدين هو كله داخل يرخم عليا مش يعلق وبس
تحياااتى
ميجوووووو

Migo Mishmish said...

لاسع افندى
انا برضه فاكر الكلام ده ومتخزن عندى فى اللاشعور ..ده مش متخزن بس ده بقى مترسخ
تحياااتى
ميجوووو

Migo Mishmish said...

على باب الله
منور البلكونه
هي ايه الحكايه كله عمال يقولى كلام اخوك الكبير؟ هو اخويا الكبير مسلطكو عليا؟
تحياااتى
ميجوووو

Migo Mishmish said...

قطه
ياااااه اخيرا رحعتى لمكانك فى البلكونه
فعلا ياقطه المناهج دىلسه بتدرس بس بطريقه اسوا كمان
تخيلى فيه نشيد فى سنه رابعه بيقول : انزل ياقمر نلعب تحت الشجر
يعنى لو مدرس العربى قفش واد وبت تحت الشجرة بيلعبو ..هايقولهم ايه ؟ الواد هايرد عليه اكي ويقوله انا بسمعلها النشيد
تحياااتى
ميجوووووو

Migo Mishmish said...

عمو عصام تانى
ماترجعش تقول اننا بنقول كلام وننسبه ليك ..اديك انت الى بتتكلم لوحدك
وبعدين ياعمو عصام هانعمل ايه يعنى نغير للاسوا احسن مانغيرش خالص
تحياااتى
ميجووووو

أحمد.خ said...

أستاذى الفاضل لك كل الحق فى الإعتراض ولو أنه ظل كامنا داخلك طويلا حتى أنك لم تعترض بل إنفجرت

Tears said...

بس برضة كانت قصص دمها خفيف و اثرت فينا لدرجة اننا فاكرينها لدلوقتى
:))))

التعليم بشكل عام موضوع بشكل معين بحيث ننتج مواطن نمطى يتلقى اوامر و بحفظ و لا يفكر

Hassan El Helali said...

ه...... بس بقي وراح الخليفه ضحك حتي استلقي على قفاه وسامح المنيل علي عينه لما عجبته القفشه ومنحه شوال دنانير من بيت المال. وده مالي تراث العراعير للصبح

Brunette said...

da7aktny gedan =))))))))
gamila :D

Anonymous said...

عمرك سمعتي عن حاجة اسمها القصة الرمزية ؟؟

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق