Tuesday, April 6, 2010

وده غسلوه إزاي بقه؟

مشمش: ازاي حضرتك يا فندم وعامله ايه؟

السيدة الاولى: الحمدلله نشكر ربنا

مشمش: انا بتصل علشان اسأل على صحه سيادة الريس يا ترى ايه اخباره؟

السيدة الاولى: الحمدلله العمليه مشيت كويس وهو بيتحسن

مشمش: طب الحمدلله. صدقيني انا كنت قلقانه عليه قوي وبدعيله من قلبي

السيدة الاولى: مرسي على ذوقك هو اتحسن دلوقتي الحمدلله

مشمش: اوكي. بلغيه سلامي وقوليله ربنا يخليه لينا ومايحرمناش منه ابداً

افتح عينى لاجد نفسي لست في غرفتي افكر في لا منطيقه المكالمه

يا نهار اسود! - على رأي حماتي

حتى في الحلم

طب غسيل العقل الواعي وعارفينه انما العقل الباطن غسلوة إزاي بقه؟

قصه حقيقيه
Love,
MishMish

18 comments:

Ms Venus said...

هههههههههههههههه


صحيح ازاى ؟

صوت من مصر said...

هو استخدم رابسوا

على باب الله said...

looooool
مبارك شعبي مصر

Mafrousa said...

انا جيييييييييييييييييييت
كل سنة و انتم طيبين
طبعا مفروسين منى
معلش انا آسفة
حقولكم على اللى منعنى
بقا انا قبل شم النسيم لازم اجيب الرنجة و انضفها و انقععا فى زيت و ليمون
بس اختكم مفروسة لما يتعمل الشغلانة ديه
لازم يكون جنبها قد رغيفين عيش
لزوم المصمصة بقا
و عاديكم يوم السبت نضفت حاجة بتاعة 4 كيلو رنجة
متخيلين المنظر
و طبعا ال 4 كيلو ما كانش جنبهم رغيفين ابداااااااا
و علشان الرنجة ما تنفعشي من غير بصل
فطبعا كان البصل موجود
وبس
آدى كل الحكاية
اه نسيت اقولكم
انى بيجيلي حساسية فظيييييييييييييييييييييعة من الحاجات المملحة عموما
ولازم علشان تهدأ الحساسية آخد كلارتين
و الكلاريتين بينيم
و دول كانو 4 كيلو رنجة
يعنى علبة كلارتين بحالها
لسة مفوقة منها دلوقتى
هههههههههههههههه
تحياتي ليكم و كل سنة و انتم طيبين

Migo Mishmish said...

Ms Venus
والنبي ماعرف عملوا كدة إزاي
حتى الحلم يا جدعان
لا وبعدين انتي عارفه الاحلام ممكن يبقى فيها تخريف او كلام مالوش علاقه ببعضه
انما الكلام اللي انا كتابه ده هو نص الحوار اللي دار في الحلم لا كلمه زادت ولا كلمه نقصت
يعني مثلاً انا لا قولت على السيدة الاولى طنط ولا على سيادة الريس عمو
انا مش مصدقه نفسي لغايه دلوقتي
Love,
MishMish

Migo Mishmish said...

صوت من مصر
يمكن يا اخويا يجوز
انما انا عمري ما دخلت قسم غير علشان اطلع بطاقه انتخابيه
ومقعدتش هناك
دخلوا الرابسو لعقلي الباطن ازاي
Love,
MishMish

Migo Mishmish said...

على باب الله
هاهاهاهاهاهها
تصدق عمري مفكرت فيها كدة
بس هقولك ايه ده شكله قدر ومكتوب
love,
MishMish

Migo Mishmish said...

واحدة مفرووووووووووووسة
ليكي وحشه يا ستي
البلكونة نورت
لولا ان ميجو مش هنا دلوقتي كنت خليته يطلع فرعين نور من بتوع راس السنه ويعلقهم عالحبال

طب اما هتنضفي 4 كيلو رنجه
مش تنادي اختك
يعني ده يصح
كنتي انتي تنضفي وانا امصمص
بالهنا والشفا لكل الناس
وكل رنجه وملوحه وفسيخ وملانه والناس طيبين

love,
MishMish

عصام said...

أنا زعلان منك يامشمش دى كانت فرصه تعزميهم على ملوحة شم النسيم

Migo Mishmish said...

حاضر يا عمو
في الحلم الجاي ان شالله نقولهم على موضوع الملوحه
واقولهم من وحي تعليق لعمو عصام
لو انت لسه موجود هتبقى العزومة عندك
لو اختفيت في ظروف غامضه نبقى نبعتلك الملوحه مع واحد من عساكر سعادته يوديهالك مطرح مانت قاعد او واقف
Love,
MishMish

عصام said...

ان شاء الله هبقى موجود بس مش فى السجن هبقى موجود فى مدينة 15مايو وغالبا هنبقى مع بعض جماعه

Migo Mishmish said...

هاهاهاهاهاهاه
على الاقل هيبقى معرفو احنا فين
15 مايو مدينه الحبايب
كل اللي بنحبهم سبقونا على هناك
واذا مابطلتش احلم هنحصلهم كلنا قريب
Love,
MishMish

Tears said...

ده معناه ان اللا وعى عندك مؤيد مش معارض

انا كمان حلمت بيه لكن اللاوعى بتاعى واضح انه معارض جامد جامد
!

Migo Mishmish said...

Treas
يا بختك باللاوعي بتاعك
انا بتاعي باظ
ومش عارفه اعمل ايه
تخيلي حتى الاحلام ماسبولناش فيها مساحه حرية
برضه الحلم يؤيد ويبايع
Love,
MishMish

عصام said...

هو اللاوعى بتاعك خرج من الضمان ولا لسه يامشمش؟عموما لو ضمانه انتهى انااعرف واحد بيصلح اللاوعى كويس بس مالوش فى الوعى عشان هو مش بيفوق اصلا

Migo Mishmish said...

لا يا عمو
اللاوعي بتاعي صناعه مصريه ولسه في الضمان بس الشركة اتخصخصت واتباعت من زمان
ادوها لواحد عربي قلبها مصنع تعليب البرسيم اللي بيتزرع في توشكى علشان بهايم العرب تاكل
love,
MishMish

Kontiki said...

lool
فى المنام! فى الحلم!
يبدوا ان عندك ميول تشتغلى فى القلم السياسى و بتتحضرى نفسيا
:)

Migo Mishmish said...

Kontiki
اه بقه عندي ميول حزب وطنيه مع اني كنت فاكرة نفسي معارضه
اظن كدة بقيت جاهزة اخش انتخابات المجلس اللي جايه
Love,
MishMish

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق