Saturday, February 5, 2011

SMS's


السيد الرئيس: قلت هتسيب التاريخ يحكم عليك. واحنا موافقين

السيد حبيب العادلي: كانت اقصى امال اهالي شهداء الداخليه هي إقالتك. لكن ربك لما يريد مش بس اقاله لا ومحاكمه وفضحيه بجلال وبلاوي تانيه كتيرررررررررر

السيد احمد عز: ....قولوا للي أكل الحرام يخاف بكرة اللي كله يفسده ....يتهيألي انك مشفتش مسلسل العار في رمضان اللي فات ... معلش ملحوقه

السيد وزير الاعلام: وحيات عينك وعفيك واللي يا رب تعدمهم لو كنت كداب.. انت بتتفرج على قناه النيل للأخبار

قناه المحور: بعد ان توصلت الى الجاسوسه التي اخذت دورات في قلب نظام الحكم والبطل الشعبي اللي طلع النهاردة ومش فاكرة اسمه وكان من الارياف لكن يعرف مأمور قسم الدقي اللي بالامارة كان لابس جاكت ازرق هو والظباط بتوعه وكانوا في المظاهرات وكمان حامي الكنيسة من الاعتداء وفندق الكونراد واركديا مول وووكاله البلح ومترو الانفاق. مش وقت هزار دلوقتي ده موجه كوميدي معملتهاش

افراد الشرطة واقصد منهم المتجردين من انسانيتهم واللذين مدوا ايديهم بالايذاء لغيرهم: العظمة لله وحده. شوف انت دلوقتي لما تبقى داخل على لجنه شعبيه وتقول انا ظابط الناس بيبقى رد فعلهم عامل ازاي

تفجير كنيسه العائله المقدسه برفح: انتوا لسه فاكرين!!! طب من اخت مسيحيه ليكم جالها اكتئاب شديد بعد حادث الاسكندريه وكانت فاكرة انه مفيش فايدة لكن لما نزلت تحضر قداس العيد لاقيت المسلمين موجودين من قبلها في الكنيسة وساكنه جنب كنيسه حاول الايام اللي فاتت بعض البلطجيه الدخول الى شارعها فقط واتعمل معاهم احلى واجب من اهل المنطقه الكرام. بقول فجروا كنايس مصر كلها فدا تراب مصر علشان يبان مين اللي بيبني ومين اللي بيهد. والكنيسة ليها رب يدافع عنها

الاخوان المسلمين ابناء النظام البرره وصنعه يديه التي يعتز بها: منكم لله يا بعدا العالم كله متضامن مع حقنا في الحريه ولكن خايف من توليكم الحكم. حتى الثورة تم تشويهها وابعاد الناس عنها بإتهام اعضائها انهم ينتمون لجماعه الاخوان. بسبب افكاركم الظلاميه تطحن مصر بين حجري رحى

كل من غير صورته عالفيس بوك ووضع بدلاً منها صورة للريس ولا كانه داخل انتخابات: من الطبيعي بعد 30 عاماً من التعليم الحكومي واكثر ان يكون لكل داء دواء إلا الحماقه اعيت من يداويها

شباب 25 يناير وجميع من ساهموا في انجاح هذه الثورة: التراب اللي بدوسوا عليه كحل لعيني ودم الشهداء حنه ليوم الفرح


تعيشي يا مصر...تعيشي يا مصر
MishMish

13 comments:

صفا سارة said...

حلوة جدا يا مشمش
على امل تكون النتيجة كويسه ومتضيعش الثورة دى فى الفاضى

Tears said...

تسلم ايدك على البوست ده

ياريت كل الدنيا تقرأ و تفهم

بس على فكرة حبيب العادلى مش ح يتحاكم ده بس فيلم هندى لان المسئول عن حبيب العادلى اكيد مديره

MSMO said...

الشرفاء أمثالك يثلجون صدورنا
وحقنا وحقك فيها لن نتهاون في الدفاع عنه
يوم الأحد سيقام قداس في الميدان غذا أحبت أن تشاركنا فرحتنا في الميدان

Anonymous said...

اتمنى لاحقا ان تذكر هذه الثورة في كتب التاريخ

ELVIRA said...

كان نفسنا ان المجرم حبيب العادلى يتشال من الوزارة دلوقتى كمان بقى كبش فدا للنظام كله هو و احمد عز

و لا ننسى الشماتة الواضحة من الجزيرة و محاولتها تسخين الأمور عن الحد
غل لا ىيمكن ان يتصف به سوى العرب الذين يعانون من عقدة نقص مذمنة

Kontiki said...

مشمش وحشتينى جدا كلنا فينا اللى مكفينا مش لاحقين ناخد نفسنا من اول م السنة بدات
يارب تكونى بخير يا صديقتى

Migo Mishmish said...

اسفه يا جماعه على التأخير. النت بتيجي عندنا سرسوب

صفا سارة
اتمنى ان ربنا يكملها على خير والثورة تجمعنا ما تفرقناش


Tears
مرسي لذوقك. والله حبيب يتحاكم او ما يتحاكمش كفايه ذله وكسرته واعتقد ان حق الناس اللي ماتت على ايده وبسببه هو واللي مشغله مش هايروح هدر


MSMO
شكراً على ذوقك ويا رب تكمل على خير
انا نفسي اجي الميدان بس انا عاجزة عن المجيء
بس قلبي مع كل اللي هناك واحترامي وتقديري ليهم وكرهي لظروفي بيزيد كل يوم. وصدقني من يوم 25 وانا بصلي علشان ربنا يعدينا على خير ويسلم مصر


BenBaz
ان شالله
وشكراً على مساندتك لينا

ELVIRA
بصي الجزيرة منهجها معروف من زمان.انا نفسي كنت بكره العرب ومبحبهمش لكن بعد موقفهم معانا وتايدهم لينا وبعد مانكشف النظام الفاسد الكاذب بتناعنا. عرفت ان مش العرب هما اللي حاقدين عرفت ان النظام هو اللي زرع الحقد والغل ما بينا ومابين كل الناس


Kontiki
الحمدلله يا صديقتي العزيزة ولو اني كنت خايفه لا الصداقه ديه تقف لسبب او لاخر

يا رب اذكر مصر
MishMish

Ms Venus said...

جاية متأخرة

السنة دى غرريبة

لسه يادوب مكملناش فيها غير شهر وشوية ايام

والواحد حس ان فات عليه عشر سنين

كلماتك فى الجون يا مشمش

Migo Mishmish said...

Ms Venus
السنه ديه من بدايتها لغايه النهاردة فيها احداث اكتر من اللي عدت في التلاتين سنه اللي فاتت
داحنا في نص اتنين وحاسين كانها سنين
امال ايه اللي هيحصل في شهر 6
بس سيبك ان شالله هتبقى احسن
انا متفأله

تحيا مصر
MishMish

NooN said...

حلوة قوي عجبتني..وبصفتي من شباب التحرير بتوع 25 يناير دول بقول ميرسي ليكوا

NooN said...

حلوة قوي عجبتني..وبصفتني من شباب التحرير بقولك ميرسي :)

Migo Mishmish said...

Noon
وبصفتك واحدة من شباب 25 احب اقولك المدونة اتشرفت بوجودك معانا
وشكراً ليكي ولكل واحد نزل ومخافش انكم رجتوعنا بني ادمين
تحيا مصر
MishMish

NooN said...

ميرسي يا مشمش بس حب افكركم ثورتنا لسه مخلصتش..مليونية تانية يوم الجمعة..بس مش مليونية احتفال وكرنفال ومسخرة زي اللي فاتت..مليونية مطالبة بمطالبنا اللي لسه مكملتش..مليونية عشان اخوتنا المعتقلين..مليونية لالغاء قانون الطوارئ..مليونية عشان النظام اللي الناس فاكرة انه سقط لكن ذيوله لسه موجوده

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق