Thursday, August 28, 2008

الله!....هو الحب بالعافيه يا عم

السيد المسئول قال :الشعب المصري بطبعه طيب - يقصد سلبي - ويتحلى بالايمان - يقصد ان الناس ادروشت بعد مافقدت اي امل في تغيير الواقع - خاصة وقت الازمات تجده لا يفرق بين الظالم والمظلوم - ما هو من الحشيش يا سعاد - ولم تقل صدمته في حريق مجلسه النيابي - يا ترى ضمير الغايب في كلمة "مجلسه" عايد على مين؟؟؟؟؟؟؟ -عن صدمتنا جميعاً ولكن هناك بعض الفضائيات تروج لعكس ذلك - رجعنا تاني لنظرية المؤامرة واننا محسودين على الآمله اللي احنا فيها والمحروسة معمول لها عمل على ارموط اهبل ومرمي في النيل - وما اسهل إجراء محادثات تليفونيه مخططه - او مقلمه لسه نتائج التحقيق ما ظهرتش - في برامج فضائية تبحث عن الاثارة دون النظر للمضمون - هيهيهيهيهيهيهيهيهيهيه ايش ياخد الريح من البلاط يا راجل

بس انا عايزة اقول للسيد المسئول انا عن نفسي ومعايا عدد لا بأس بيه من المعلقين في المواقع الاخبارية والمدونين واعضاء المجموعات عالفيس بوك ومعظم فئات الشعب شمتنا في الحكومة. اه والنعمة شمتنا ورحمة ابويا شمتنا في الحكومة وفي المجلس لا وغير كدة كمان بقيت ماسكة الريموت زي الهابله ادورعلى بيان الثورة بين المحطات. اصلي افتكرت ان في ثورة قامت لكن للاسف الثورة لسه نايمة ومش عايزة ازعاج

وكانت تعليقات الناس مابتخرجش عن واحد من تلاته: ياما ناس كانت شايفه ان ده انتقام ربنا لضحايا العبارة والمركز الثقافي وغرق الشباب في عرض البحر و...و...وكل الحاجات اللي انت عارفها ومطنش

ياما كانت ناس شايفه ان قليل البخت يلاقي العضم في الكرشه. يعني حتى يوم مالحريقه حصلت كانوا- اللهم احفظنا - الاسياد اللي ساكنين المبني في اجازة وبكدة نبقى لسه محتاجين حريق تاني

واخر مجموعه كانت مضايقه من الحريق علشان قيمة المجلس - المبني يعني - التاريخيه والجماليه وبس كدة

وبرضه سيادة المسئول ٌمصر ان الشعب دايب في داباديب الحكومة موت وبيحبها زي ما بيحب بنت خالته واللي عاجبه عاجبه واللي مش عاجبه يشد في حواجبه

Love,

MishMish

15 comments:

Empress appy said...

عايد على مين
عايد على كوبرى عايده اللى اتهد ههههههههههههه
وانا وانا وانا شمتانه فيهم علشان فضايحهم وخيبتهم القويه مش انا قولت هما بيلعبوا على الحبل ده
اننا عاطفيين وهيبيعوا مناديل على قفانا بالعبيط علشان متاثرين بقى وبنقول مصر بتتحرق
اللهى يهبله اكتر ما هو العبيط ده
والله العظيم انا ما بحب نظريه المؤامرة بس العقل بيقول انهم عملوا كده علشان حاجه تانيه
او يمكن كانوا عاوزين يحولوه لمركب عايم ههههههههههههههههههه
كل سنه وانتم طيبين

Migo Mishmish said...

ازيك يا ابي
كل سنه وانتي طيبه يا قمر. بصي قبل مارد عليكي انا عندي فعلاً مشكله مش عارفه اخش عندك ابداً. يمكن تصميم الموقع تقيل على الكمبيوتر او الاعلانات اللي بتطلع مع الموقع مش عارفه. بس بجد انا عايزاكي تاخدي بالك الازمة ديه عندي انا بس ولا عند ناس تانيه كمان
هو فعلاً ممكن يكون قصده اننا شعب عاطفي وعامل حسابه على صفقه مناديل ورق زي مانتي قولتي. لكن الحمدلله جات سليمة والناس كانت ميته من الضحك. فراح قلب على اللب والسوداني والمسكرات على اساس ان الناس هتاخد عيالها وتنزل وسط البلد ويفرجوهم عالحريقه وهمابياكلوا لب وسوداني ومكسرات. ويكون الهدف من القصه كدة اللي بيكدب او بيسرق بيروح النار. انما اللي بيعمل الاتنين سوا كتير النار بتجيله لحد عنده
والله انا مش عارفه هو مين اللي متامر على مين بالظبط. بس انا مع مؤامرة من تأليفي -حتى لو كانت افتكاسه - ان الحادثه ديه مدبرة من جهات معينه علشان تقول الحكومة كدة كفايه قوي. يعني زي ما يكون انذار كدة قبل المصيبة الكبيرة على طريقه اللهم بلغت اللهم فاشهد. هي ديه المؤامرة الوحيدة اللي ممكن اصدقها. لكن غير كدة حريقه زي ديه وقعدتها 9 ساعات شغاله وخيبة الدفاع المدني في السيطرة عليها هي صفر تاني يضاف الي قائمة اصفار الحكومةالطويلللللللللللله
Love,
MishMish

رئيس جمهوريه نفسى said...

عايده على مين طبعا عايده على الدكتورة عايده بتاعت مسلسل اوبرا بتاع يحى الفخرانى
انا واحد من ضمن الشمتانين فى ام الحكومة بس احب ابشرك نظام الاطفاء المعفن اللى متركب فى الشورى هو هو نظام الاطفاء المعفن الى متركب فى مصر الجديدة بس انتى قولى يارب عب سجارة معفنة ولا شاره من حجر شيشه ولا اى حاجه بس بشرط القصر يكون باللى فيه

Migo Mishmish said...

سيادة رئيس الجمهورية
يا عم خد بالك ياعم وانت بتدعي لحسن الايام اللي احنا فيها ديه ايام مفترجه. صفوت الشريف رفض تبرعات رجال الاعمال وقالك الحكومة مش محتاجه حسنه من حد. وطبعاً الحكومة هتجيب منين تمن اهمالها من جيوب اللي جابونا. يعني يعملوا علاوة يطلعوها مننا. يبعتوا شوية مكسحين عالصين يفضحوا اللي جابونا هناك وتكاليف السفر والاكل والشنط واللوكاندة اللي نزلوا فيها من جيوب اللي جابونا برضه. اغبياء مش عارفين يحافظوا على مجلس الانس بتاعهم لما ولع هيجدوده على حسابنا. خلاص احنا بعنا كل حاجة واحنا ماشين نسد من ورا الحكومة. كفايه حرايق انا شايفه ان الامل دلوقتي في الفره بتاعه الفراخ هايله كانت تفضي العيشه في يومين اتنين يا رب تيجي في اللي في بالي كلهم. لحسن لو اللي في مصر الجديدة ولع هيطلبوا مننا تمن الترميم ومصاريف الجنازة والفطير اللي هيتوزع في الارافه والمقرئ والصوان و...و... خلينا في الحاجات اللي نقدر عليها يا فندم
سلام وسلملي على عايدة
love,
MishMish

رئيس جمهوريه نفسى said...

منا بقول يارب يولع ويكون فى حفل افطار رسمى كدة تخيلى المنظر الطقم كله من فوق لتحت جامع شامل يقوم مولع ينهار يا جدعان
يبقى بعد كده نرمم نبنى من جديد مش مشكلة لانه حيكون على نضافه كاملة بس ربنا يتقبل فى الايام المفترجه دى ويولع بصحيح

Alkomi said...

انا شخصيا بصيت للنص المليان من الكوباية

ان في حاجات في البلد كنا مفكرين انها مقدسة مش بيجيلها حوادث و النظرية دي اتكسرت

عقبال يا رب كدة المرة الجاية يكون البعدا قاعدين و تولع بيهم

جاتهم القرف و ربنا ولع من كتر السرقة و النجاسة و النهب اللي فيه

Empress appy said...

حبيبتى استخدمى فاير فوكس الانترنت نت اكسبلورر بقى نيله ومش بيفتح حاجات كتير نزليه وافتحي المدونات عن طريقه
كل سنه وانتم طيبين

Anonymous said...

سؤال الي مشمش و كل اللي كتبوا تعليقات هنا لو عشر حرايق مش حريق واحد ولعوا ف اماكن تجمعات اعضاء الحكومه وهما فيها ده هيغير ايه ف واقعنا وواقع البلد؟؟؟؟؟
ملحوظه:ده سؤال غرضه النقاش مش الاستنكار

Migo Mishmish said...

عندك حق يا سيادة الريس
ربنا يسهل وتظبط معانا في الحريق الجاي
love,
MishMish

Migo Mishmish said...

عارف يا محمد احلى تعليق على الموقف ده كنت قريته في المصري اليوم باين
التعليق كان بيقول ان المجلس ماستحملش اللي بيجرى جواه قام انتحر
الحجر حس والبعدا لسه مكملين. الناس بعوا اللي وراهاهم واللي قدامهم و باعوا كبدهم وكلاويهم ودمهم وبيموتوا في بعض علشان مش لاقين اللقمة. والسيد المسئول يقولك ديه اشاعه
love,
MishMish

Migo Mishmish said...

بص يا اكرم
انا شايفه انه حتى لو اتحرقت الحكومة كلها بميانيها باللي فيها الوضوع مش هيختلف
انت نفسك عارف ان النظام اللي ماشي في البلد بيعتمد على وضع كلب للسلطة على راس اي مصلحه حكومية مبيفهمش في اي حاجة غير انه ينفذ الاوامر
love,
MishMish

Desert cat said...

ازيك يا مشموشة
وقت الحريق ولما كنت بتابع فى التى فى كنت حاسه ان حتة منى هى اللى بتتحرق
لانى شايفه تاريخنا بيتحرق
مش مهم المبنى اثرى
مش مهم المبنى مين فيه
مش مهم انه مكان اجتماع النواب
انما المهم انها كارثة بكل المقاييس
لما مبنى زى ده يتطفى فى 9 ساعات
ده احنا عبرنا فى 6 ساعات وحطمنا خط بارليف يقوم مش عارفين نطفى مبنى ؟؟
هى دى الكارثة الحقيقيه
وربنا يحفظ البلد وتاريخها
انما اللى حاكمنا من 30 سنة الله يكرمه من عنده
تحياتى يا جميل

Alkomi said...

رمضان كريم


ليكي فانوس عندي تعالي خديه

كل عام و انتم بخير

و اعاده الله عليكم بالخير و اليمن و البركات

Migo Mishmish said...

اهلاً يا قطوطة
بصي انا فعلاً في الاول مكنتش مصدقة خبر الحريق لغايه اما شفته بعيني. اما بالنوسبة لموضوع التاريخ ده انا مكنش عندي علم بيه لاني مش من هواه قرايه التاريخ علاوة على اني كنت علمي ومعرفتش ان المبني تاريخي وشهد تطور الحياه السياسية في مصر غير من المصري اليوم. اما بالنسبة لرد فعلى ورد فعل ناس كتير تانيه فكان من الزهق محدش عمره بيفرح لو لاقى بيته بتحرق. بس الفكرة اننا بقينا حاسين انها مبقتش بيتنا. اتباعت يا قطة للمعاه يشيل
مصر ام الدنيا يا قطة عجزوها بدري ورموها في دار مسنين. دول عاملين زي ما يكون ليهم هدف واحد وحالفين عليه لا ينفذوه. حالفين لا يجيبوا ضرفها. مش هايمشوا منها غير لما بتأكد انهم مصوا دم كل كائن حي.
اما الاخ اللي حاكمنا بقاله 30 سنه انا في اعتقادي انه مالوش دور. ديه خطة مرسومة واللي هيحاول يقف في وش التيار مش هيلاقي نفسه. ده زيه زي غيره كومبارس بيطلع في التليفزيون بيقرا كلمتين مكتوبين في ورقه غير كدة في رائي مالوش
love,
MishMish

maxbeta3zaman said...

من أجمل ماجانى على النت زمان كان تسجيل لبنت صغيره اتصلت بالدليل وسألت ببراءه عن مركز نسف وهدد المبانى ...خدت الرقم ويظهر انهم اعطوها رقم الدفاع المدنى اللى رد عليها ..نعم ممكن اساعدك بإيه ...قالت البنت يكلفنى كام نسف وهدم المدرسة بتاعتى ..الراجل سجل المكالمه وتماشى مع الطفلة اللى باين عليها كانت عاوزة تولع المدرسه قللها كتير وضحك ...ردت البنت بجديه إحنا مابنهزرشى ...اسمع عاوزاك تكون متأكد من وجود جميع المدرسات والاستاف جواها ساعة الهدم ولازم تسووها بالأرض ...ووضحت انها محوشه كام دولار كده وتظن انهم كفايه للمهمة..كان ذلك فى تسجيلات 911 الأمريكيه ...ألا ترى اننا نشبه هذه الطفلة فى حلمنا كشعب وعليك اسقاط بقية شخوص الحكايه على من تشائين ...ورمضان كريــــــــــم

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق