Saturday, December 6, 2008

رز وبسله

ازاى اقولك بحبك
وانا مخنوق ومتضايق
اقولها ازاى من قلبى
وقلبى مش رايق
بفكر فى حاجات
فى اللى جاى والى فات
وليه ياحبيبتى يوم السبت

بقى زى الحد

بقى شبه التلات

اقولك بحبك ازاى وإمتى؟

وانا كل همى

مين يركب زرار القميص

ويتنى كم الجاكته

حتى الكلام مابيننا
مابقاش زى زمان
بقيت اسالك
هانتغدى ايه النهارده ؟

ياترى رز وبسله ؟

زى بقيه الحاجات الممله

وبقى اقصى طموحى فى التغيير

يادوبك..

يادوبك

بالكتير

اغير لون ملايه السرير

واسمع نفس الكلام

وتفضل نفس الوشوش

هى هى

من اول
مينى باص خمسه واربعين
لحد اسماعين

بتاع الحضور والانصراف

بنفس الاستظراف

لما يبص فى ساعته القديمه

ويبتسم ابتسامته اللئيمه

وافضل فى الشغل

مع نفس الملفات

وتيجى الساعه اتنين الا ربع

الاقى نمرتك

وارجع واسألك نفس السؤال

هانتغدى ايه النهارده ؟

ياترى رز وبسله ؟
ميجوووووووووووو



9 comments:

Desert cat said...

يوميات موظف مطحون
:)

Unknown said...

انا بحب البسله ابقوا اعزموني اليوم ده

كل سنه و انتو طيبين و بوسولي ساندو

Migo Mishmish said...

قطه
منورة البلكونه
انا على فكرة مدرس المانى مش موظف ..لانى مش بحب الثبات والجمود ..بحب التغيير ..ودا اختلاف جوهرى بينى وبين مشمش ..بس انا اقصد معنى قريب الى هو الحبيب ..والمعنى البعيد الى هو حب البلد..تقدرى تحبى البلد دى وانتى مخنوقه ومتضايقه؟ ونفس النظام هو هو ومافيش اى نوع من انواع الحراك فى اى حاجه ..بمعنى ادق ..يبقى الوضع على ماهو عليه ..يعنى من الاخر مافيش تغيير ..يبقى ماحدش يغصب عليا بقى انى احب حاجه وانا مش حاسس ان فيه امل فى التغيير
احتراماتى ليكى ياسيدتى
ميجووووو

Migo Mishmish said...

ايمى الامورة
انتى تنورى فى اى وقت ..البلكونه بلكونتك ...على فكرة انا بحب البسله جدا ..بس مش بحب اكلها كل يوم ..زى حاجات كتير بتتكرر كل يوم ومافيش تغيير تحياتى يافندم
وساندو بتسلم عليكى كتير

انت تسال والكمبيوتر يجيب said...

دعوه
الأحت العزيزه-الأخ العزيز
تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

Anonymous said...

سيبك من الرز والبسله بلغ مشمش ان انت وهى معزومين على اكلة ملوحه صعيدى حجم كب وححدوااليوم اللى يعجبكم.

Anonymous said...

سيبك من الرز والبسله بلغ مشمش ان انت وهى معزومين على اكلة ملوحه صعيدى حجم كبير وحددوااليوم اللى يعجبكم(تعليقى بعد تصحيح الاخطاء(

Migo Mishmish said...

عمو عصام انت هايل
ملوحه وبصل احمدك يا رب
الساعه دلوقتي 3 الفجر ينفع اجي؟ وعلى فكرة ولو انه هيقلل حصتي من الملوحه بس ماتنساش أكرم هو كمان من الاحرار!
love,
MishMish

Anonymous said...

انا عارفها الملوحه الصعيدى اخر مره اكلتها كانت مع العجوز الساعه 3 الفجر
ينفع اجى انا كمان

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق