Monday, December 8, 2008

طقم اسنان طائش


استيقظ عم صبحى فى الصباح الباكر ليذهب الى مكتب معاشات الخانكه ليصرف المعاش الاستثنائى قبل عيد الاضحى وعندما وصل الى هناك ..وجد طابور طوييييل من المسنين تحت الشمس الحارقه ..مستندين الى عكازاتهم وقوفا فى الشارع ..
وقف عم صبحى مضطرا ..ووضع سماعه ال ام بى ثرى فى اذنه مستمتعا باغانى محمد حماقى ..كان الطابور يسير ببطء شديد ولكنه وقف متحملا وصابرا ..فعم صبحى وراؤه الكثير من الالتزامات ..فهو مطالب بدفع اشتراك ال(جيم ) ويسعى للمعاش حتى يستطيع الخروج مع صديقته نرجس ليتنزهوا فى مول سيتى ستارز ويشاركها اكل الايس كريم ..فجأه جاء عم جمال ودخل فى الطابور ووقف امام عم صبحى متنطعا كعاده بعض المصريين ..ولم يعجب الامر عم صبحى

عم صبحى : فيه طابور ياخينا ..عيب كدا (لم يرد عم جمال ) يعنى انت مش عايز ترد؟ بلطجه يعنى؟

عم جمال : عايز ايه ؟ بتزعق ليه؟
عم صبحى : تاخد دورى وتقف قصادى وتقولى بزعق ليه ؟
عم جمال: انا واقف من الصبح ..انت الى مش واخد بالك
عم صبحى : واقف من امتى ؟ هو انا اعمى ولا عندى زهايمر؟لا مايغركش منظرى دنا واخد بطوله المملكه فى الملاكمه ايام الملك فؤاد الله يرحمه
عم جمال : انت بتخوفنى يعنى؟ الى قصادك دا كان حكمدار بوليس العاصمه ..فاكر الفيلم بتاع احمد ابراهيم القاطن بدير النحاس؟ اهو يوسف بك وهبى هو الى كان عامل دورى يعنى ممكن اوديك ورا الشمس
عم صبحى : حكمدار ايه انت شكلك اساسا مايديش غير اميرالاى بالكتير ..اتفضل بقى ارجع ورا
عم جمال: لا مش راجع ..انت الى ترجع ورا
عم صبحى: انت صفيق اوى يعنى الناس دول كلهم مش عاجبينك ؟ (بصوت عالى ) تعالت الاصوات من الطابور الخلفى وابتسم عم صبحى ابتسامه النصر
رجل مسن 1 : عيب كدا ياجماعه ماينفعش الى بتعملوه دا ..هو احنا صغيرين ..افتكرو اننا فى حرب 48 كنا رجاله ووقفنا وقفه رجاله .. وقفنا قصاد رصاص الانجليز بصدورنا ..ماخفناش ليه؟ عشان كنا رجاله ووقفنا وقفه رجاله

رجل مسن 2: عيب ياحجاج ..العيال الصغيرة تقول علينا ايه؟ ..خلصونا بقى عشان نروح .. انا سايب الميسنجر بتاعى اون لاين ..زمان عطيات الجيرل فريند بتاعتى بتبعتلى نودج كل شويه ..وفاكرانى مطنشها
رجل مسن 1 : ومين سمعك انا سبت الى فى ايدى وجيت ..كنت بعمل داون لود لافلام وشويه مصارعه حرة
عم صبحى : انتو مش شايفين ..هو الى معطل الطابور ازاى ؟ يعنى لما اديله باللوكميه فى وشه عشان يتعلم الادب
عم جمال : لا دانت زودتها اوى ..انت باين عليك هاتنضرب انت واللى يتشددلك ..انا واقف هنا والى مش عاجبه يضرب دماغه فى الحيط
راجل مسن 1: طب انا بقى هاتشددله ..وورينى نفسك ياصايع ..ياكلب الانجليز يابتاع الكامب ياعميل (يقترب من جمال ويهبده روصيه فى دماغه )فيقوم عم جمال يرفع عكازه لكى يضرب بها صبحى لكن صبحى يتفادى الضربه برشاقه
راجل مسن 2 : انتو كلكو عالراجل ولا ايه؟ هى دى المرجله؟ والله الى هايقربله هايعرف شغله


اختلط الحابل بالنابل وارتفعت العكازات وتطايرت اطقم الاسنان نتيجه الضرب بالبونيات والشلاليت ..وتحول المكان الى مشهد تكسير الخمارة الشهير ..انتهى الامر الى اصابه عم جمال وعم صبحى اصابات بالغه ..فعم صبحى اصيب بطاقم اسنان طائش فى صلعته ..وعم جمال اصيب بضربه عكاز فى مؤخرته لكنه لم يبوح لاحد بذلك لان صبحى الخبيث اشاع انه تعمد وضع العكاز فى مؤخره جمال ..انتهت المعركه وتناثرت الاشلاء فى المكان ...سماعه اذن عم حسين ..صفحات من جريده الاهرام متناثرة ..عكازات مكسورة ..طقم اسنان عم مينا به سنه مكسورة ..ساق عم عبد الحميد التعويضيه ..نظارة عم خليل الى لسه عاملها فى التامين الصحى
ذهب الجميع الى قسم البوليس وتصالح الجميع ..وقيد المحضر........ ضد مجهول
من وحى خبر نشر بالمصرى اليوم تحت عنوان
ميجوووووووو

9 comments:

Anonymous said...

انا شفت الحادشه دى حتى بالاماره كانت الشاعه تشعه الشبح وكنت واقف مشتنى معاشى عشان ادفع مشاريف العلاج بش ياخشاره الراجل بتاع البوشطه حلف مايقبضنا بعد الخناقه بش شيبك انت اتعرفت على حتة مزه لشه طالعه معاش جديد وعملت لى توكيل اشرف لها المعاش كل شهر.

Migo Mishmish said...

عمو عصام
ربنا يديك الصحه ..ياعم انت لسه مش جدو عصام ..انت لسه كتكوت على راى اللمبى ..انت شاب فى زمن صعب فيه الشباب قلبه شاب ..هاقولك على حاجه بجد ..انا مش مقتنع لغايه دلوقتى انى متجوز وعندى بنت ..لغايه دلوقتى عايز اروح بيتنا عند امى ..مش عارف حاسس انى اتخطفت وحاسس انى لسه عيل صغير وعايز الف وادور على مزاجى ..انت لما بتعدى على القهوة الناس فاكراك اخونا الكبير انت وعمو نادى
بلاش جدو عشام دى تانى
اخوك الشغير ميجو ابو شاندو

Anonymous said...

هاها حتى العواجيز اتجننوا فى البلد دي!!!

Migo Mishmish said...

an egyptian
بالذمه مش الى حصل فى العواجيز دول حرام ولا ايه ؟ مش هما الى اتجننو ..الى مجنون صحيح هو الى حطهم فى الموقف دا .ازاى يعنى مافيش طريقه ادميه تخليهم ياخدو مستحقاتهم ؟ بلد مش بتحترم كبار السن يبقى ناقص ايه تانى ؟
انا مش بتريق عليهم انا متعاطف معاهم ..اقرا نهايه القصه كويس وانت تعرف انا اقصد ايه !!

Unknown said...

كل سنه و انت طيبين

بوسه لساندو

شر البليه ما يضحك بجد

البوست جميل اوي انا دايما بحب الكتابات الساخره

كل حاجه في البلد بقت اسكتش ساخر

حتي الناس الكبيره بتاعة المعاشات مافيش اي احترام ليهم

تحياتي

Unknown said...

تصدق وتأمن بالله هذا ما يحدث بين كبار السن عندى من المرضى وببقى مستغربة
هو فيه ايه؟ ويلا السلامة لو اتخانقوا او مسكو فى بعض مفيش الا العكاكيز سلاح فتاك اسألنى عليه ...عارفة:)

Unknown said...

ايوة صحيح نسيت اقولك انا بتصعب على نفسى اوىىىىىىىىىىىىىىىىىىىىىىىىىىى
واقعد اعيط اعيط اعيط اعيط اعيط
لو كتبت تعليق وصاحب البيت ما ردش ان شاء الله يقول
وحش
أو وحش جدا
او وحش اوى خالص
مش مشكلة المهم
يعرفنى
انه قرأ كلامى

Migo Mishmish said...

نورا هانم
ماتزعليش ياستى
بس الظروف عندنا مش سامحه اننا نقعد على النت كل يوم..بكرر اسفى جدا..وبعدين انتى دايما بتعلقى متاخر
بنكون كتبنا بوست جديد

Migo Mishmish said...

نورا هانم
معلش هو سؤال رخم ..هو انتى دكتورة؟ اصلك قلتى المرضى عندى
اكيد دكتورة صح ؟ اما انا غبى صحيح
ههههههههههههههههه

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق