Sunday, December 14, 2008

انا مهزوم ..اذن انا محبط

صحيت امبارح بدرى حوالى الساعه 5ونص ..عشان اروح اتفرج على ماتش الاهلى وباتشوكا ..كان الكافيه زحمه جدا والجو رائع والكل متحمس للماتش ..بدأ الحديث قبل المباراة وكان الكل متفائل ....الى ان بدات المباره واحرز الاهلى هدفه الاول وارتفعت معنويات الجميع ..حتى جاء الهدف الثانى .واصبح الكل واثقا من الفوز ..وانتظرنا الشوط الثانى لكى نشاهد شوط تحصيل حاصل بمعنى ان الفوز مضمون بشكل كبير ..لكن جاءت الرياح بما لا تشتهى السفن ..ففريق باتشوكا المكسيكى احرز اربعه اهداف تلو الاخر لكى يفيق الجميع على كابوس مزعج ..وهو الهزيمه أو النكسه لحسن حد يزعل ..ذهبت الى المنزل وانا محبط ..لا اعرف لماذا مع ان الاهلى لو كسب البطوله مش هاخد منه حاجه ولا هاشارك اللاعيبه فى المكافأت ..سالتنى مشمش على النتيجه قلتلها اتنفخنا يامشمش !
قالتلى وانت زعلان ليه ؟ ايه الى حصل يعنى؟
نمت وحطيت المخده فوق دماغى وانا محبط وبرضه مش عارف ليه ؟ مع انى مش اهلاوى متعصب
بس برضه عندى احباط ..اجبرت نفسي على النوم ..الى ان قمت لاتناول الغذاء ومازالت حاله الاحباط مستمرة
اخذت ابحث عن مبرر لحاله الاحباط ..الى ان توصلت لنتيجه ...انا محبط لانى مهزوم ..فى الكورة بس؟
اكيد انا محبط لانى مهزوم فى العمل من رؤسائى الروتينيين والمناهج المتخلفه التى اقوم بتدريسها للاولاد ..بس؟
ومهزوم فى المواصلات العامه من ميكروباصات واتوبيسات وسلوكيات الناس العشوائيه ..بس؟
ومهزوم فى طوابير العيش والبنزين ..وغيره من كافه انواع الطوابير ..بس؟
ومهزوم فى المستشفيات واقسام الشرطه بسبب المعامله الغير ادميه التى يتعاملون بها معى ..بس؟
ومهزوم فى وسائل الاعلام التى تتحدث عن ناس لايعرفوننى ولا اشبههم ..اعلانات هذه الوسائل مخصصه لفيلاتهم وشاليهاتهم فى مارينا وبورتو سخنه ..بس؟
مهزوم بسبب مايحدث لنا من ضربات سياسيه واختفاء دور مصر كدوله عريقه واحتلال دول اخرى لمكانتها ..بس؟
مهزوم فى المكاتب الحكوميه وروتينها المعروف ..من صحه وكهربا وتليفونات ..بس؟
مهزوم امام فواتير الغاز والمياه والكهرباء وارتفاع الاسعار الجنونى ..بس؟
مهزوم امام التعصب الدينى والفتاوى المتخلفه وكل من يعبث بدماغى ..بس ؟
مهزوم امام التيار الاعلانى الاستهلاكى الذى يعمل ليل نهار من اجل الترويج لسلعه المختلفه
مهزوم مهزوم مهزوم
وكان الانتصار الوهمى الوحيد الذى نعرفه هو الانتصار فى كرة القدم ..هو ليس بانتصار معروف ..لكنه على الاقل انتصار فى شيئ من الاشياء حتى ولو كان وهميا او تافها ..هذا الانتصار يعطى امل فى الحياة ان هناك شيئ جميل ..لكن افقنا جميعا على ذلك الكابوس الذى عرفنا واقعنا وصدمنا بشده ..لاننا مهزومون فى كل شيئ فلذلك كانت هزيمه الاهلى صادمه ..فلم يعد فى القلب مكان لهزائم اخرى
كلمه اخيره : منك لله يا اهلى كنت خليت الهزيمه دى فى اول الاجازة على الاقل كنا نسيناها فى العيد ..انما تعكنن علينا قبل الشغل بيوم ؟ رربنا يسامحك يااهلى ...وربنا يكون فى عون الزمالكويه المهزومون دائما
انا مهزوم ...اذن انا محبط
ميجووووووووو

12 comments:

Anonymous said...

الماتش كان عندنا الساعه 11 باليل رجعت من الشغل و المدام كانت عامله طبق مكرونه بالصلصه لكن ايه تمام و انا جاهز تمام علشان اتفرج على الماتش و مستعد انى افرح لانى كنت واثق من الفوز و المدام كانت فرحانه جدا لانى اول يوم اسهر معاها و مع الواد تيكا تيكا لحد الساعه 1 صباحا كل مره الساعه 11 اعمل نفسى نعسان و تعبان و عايز انام ما علينا انا مكملتش الماتش بعد الجون التالت و اتنكد عليا زيك بالضبط معا انى هنا ماعنديش المشاكل زى اللى عندك بس نمت و قمت من النوم متعكنن محبط بردو
بس مش علشان الاهلى اتغلب
علشان كانت الدنيا تلج باليل وانا كنت ناسى و مولعتش الهيتر

هههههههههههههههههههههههههههه

Anonymous said...

انا سقعان اذا انا محبط

Migo Mishmish said...

ياعم جورج
بقالك كتير مش بتكتب فى البلكونه بشوفك بتدخل وبعدين بتخرج تانى ..
المهم ياجورج انت برضه بالرغم من انك فى امريكا ومعندكش مشكلات زى الى عندنا الا انك محبط برضه ..عارف ليه؟ لانك مصرى برضه وعشت طول عمرك على الاحباط ..يعنى جتتك خدت على الاحباط وولفت ..ومش بسهوله انك تخرج من الحاله دى ..يعنى لو انت كنت ساكن فى بيت مافهوش سرير وبتنام على الارض وبعدين ربنا كرمك وعزلت مكان خمس نجوم ..لازم وانت نايم هاتفتكر الايام السوده وانك كنت بتنام على الارض ..فهمت؟ برضه انت مصرى مش امريكى وعندك حنين للوطن ..ومتنساش ان بقيه عيلتك واصحابك وحبايبك لسه فى مصر عشان كدا انت محبطلهم ..مش عشان انت سقعان يا فالح
تحياتى للواد وامه

Desert cat said...

روق كدا يا ميجو
وسلم لى كتير اوى على مشموشة وساندو
اما الاحباط هو انا ماليش فى الكورة علشان كدا مش بتصيبنى حالة الاحباطات بتاعتها
ومش محبطة من المناهج علشان انا اتخرجت ومش بشتغل برضه مرسة
ومش محبطة من المستشفيات ولا الاقسام مش بدخل الاتنين
انا محبطة من العشوائيات
ومن اخلاق الناس الزبالة

Unknown said...

أيه اللى قلب عليك المواجع دى كلها بس
صدقنى احنا مش حاناخد حاجة لو ده فاز او ده خسر اللى حياخدواهم اللاعيبه
وانا عارفة ان الحكاية مش ماتش واتهزمنا فيه لكن اهو سبب يطلع الواحد فيه غلبه زى ما بنروح(العزاء )ونعيييييط ويمكن احنا مابنكون نعرف مين اللى مات لكن اهى فرصة(للانفساء)على رأى جمال اسماعيل فى مسرحية نمرة 2 يكسب
المهم عايزة ابعت سلامى لمشمشة وساندو واقولهم ان جت لنا ضيفة جديدة اسمها ملك (حفيدة لاختى).مرة تانية ماتزعلش نفسك انت راجل صاحب عيال ومسئولين منك صحتك بالدنيا

Migo Mishmish said...

قطه فيينا
اخلاق الناس العشوائيه والزباله هى السبب الرئيسى فيما وصلنا اليه ..انا زهقت بجد من الى بيحصل حوالينا وزهقت من القرف الى عايشين وسطيه ..ناس حثاله عايشه حواليكى فى كل حته ..ذوقهم زباله وسلوكهم زباله وافكارهم متعفنه ومغيبين ..حتى المعاكسات بقت زباله ..زمان كانت الواحده تنبسط انها اتعاكست ..دلوقتى ببقى ماشي مع مشمش ومعانا ساندو ..وتتعاكس بكلام قذر ..هاسيب مراتى وبنتى هاعد اتخانق مع كل واحد شويه؟
الحكايه مش ماتش ولا قسم بوليس ولا مستشفى ..الحكايه حكايه وضع عام ..انتى ممكن مرة ياقطه تدخلى القسم مع انك حد محترم..ودا بسبب السلوك العشوائى الى حواليكى ..شوفى مثلا حنان بتاعه قضيه التحرش حصل فيها ايه؟ يعنى ياتسكت يا اما تروح القسم والصحافه كمان مش عاجبها انها دافعت عن نفسها
تحياتى ليكى ياقطه

Migo Mishmish said...

نورا هانم
نورتى البلكونه والف مبروك لملك
معلش على جرعه الاحباط ..انتى لخصتى كل حاجه والله ومش عارف اقول حاجه اكتر من الى قلتيها ..عجبتنى جدا كلمه الانفساء اوى هههههه
سلامك اكيد هايوصل لمشمش وساندو
تحياتى ليكى ياتيتا نورا ههههههه

Unknown said...

كلنا محبطين والله
على الاقل انت بتحط همك فى الكورة
:)

على باب الله said...

كلنا مهازيم

أنا حتي مهزوم لدرجة أني مش ها أقدر أكمل التعليق

Empress appy said...

عارف انت محبط اذا نت موجود علشان عندك احساس اوي
عارف احباطي شخصيا ايه علشان موقف الناس يعني لو حد عنده شغل بدري تفتكتر هيصحي كده
سلم على مشمش كتير وساندو رنا يخليها لكوا يارب

^ H@fSS@^ said...

ازيك يا ميجو
السماح يا اهل السماح
و حياتك تحنن قلب مشمش عليا
ممكن بليز؟؟

بص انا مش حكلمك عن الاحباط
لانه ده بقى العادي يا ميجو
انا ساعات ببقى متضايقة اوي من غير اي سبب
يعني مافيش حاجة حصلت فورا خليتني محبطة
لانه زي ما انت قلت كل شئ بقى محبط
و لان كل شئ بقى مزمن
فمافيش اي سبب اننا نغير المود
انا قلبتها اسود خالص
صح؟
معلش
بس اهم شئ حاول متنقلش الاسود ده لساندو
يمكن يكون فيه امل

ارق تحياتي ليك و لمشمش و لساندو

حــالة مــلل said...

اول زيارة للبلكونة الرائعة دى

صراحة لو على الاحباط فايه ميجبش احباط حوالينا ؟؟؟

مش لاقية شيئ واحد يفرح بجد ومن القلب

حتى الاهلى اللى لما كان بيكسب كنت بنتهوهالافرصة واشاكس مع جوزى الزملكاوى للاسف

واهو من وقتها ذاللنى ومطلع حبابى عنيا تريقة :(

يعنى ياربى حتى الكورة بقت وكسة

ويا شماتت ابلة ظاظا فينا بجد

يسعدنى زيارتى لبلكونتكم الجميله واكيييييييد حتتكرر ومبروك القمرة الضغننة رب المجد يحافظ عليها

علشان محدش يزعل

كافه المواد المنشورة في هذا الموقع محفوظة بموجب قوانين حقوق النشر والملكيه الفكرية ولا يجوز نسخ هذه المواد او اعاده انتاجها او نشرها او تعديلها او اقتباسها لخلق عمل جديد او ترجمتها او إذاعتها او انتاجها للجمهور باي شكل من الاشكال دون الحصول على اذن مسبق